Puasaina Bo 40

Puasaina Bo 40

Achhyna byureih paduana nata pahyna

1 ABEIPA ta Mawsi hnohta,

2 “A thla khana noh kha noh liana chata ahmaopakhyna poh-o achhyna byureih cha na padua awpa a châ.

3 A chhôh liana chata biepahnosana zy na soh awpa châ ta, chatawhcha Byh cha poh-raipa ta na pakhâ awpa a châ.

4 Chatawhcha tlâhkhai kha a ngiakheipa ta a chô liata hmo a ypazy cha a siapata na soh awpa a châ; meiôh sona kha a ngiakheipa ta a meiôzy na soh awpa a châ.

5 Chatawhcha rao awpa ropahâhpa raona ngôh maisâh kha Biepahnosana Byh hmiakô liata sopa ta achhyna byureih chhikao poh-raipa kha na rai awpa a châ.

6 Raopa ta hlâna maisâh kha ahmaopakhyna poh-o achhyna byureih chhikao hmiakô liata na patyu awpa a châ,

7 chatawhcha ahmaopakhyna poh-o nata maisâh likawh liana chata rahô patyupata, cha liana chata ti na soh awpa a châ.

8 Chatawhcha achhyna byureih padôpa ta a dôhpachhôh tlyhmia taopa ta, a dôhpachhôh tlyhmia chhikao poh-raipa cha na rai awpa a châ.

9 Chatawhcha sathaw a thupa lapata achhyna byureih nata a chhôh liata a ypa zydua cha hniapa ta na pathai awpa a châ, a hmobaoh zydua chhaota; chatanachata a vaw pathaih aw.

10 Raopata hlâna maisâh nata a hmobaoh zydua cha sathaw hniapa ta maisâh cha na pathai awpa a châ; chatanachata maisâh cha a pathaih ngaitapa a châ aw.

11 Rahô nata a patyuna cha sathaw hniapata na pathai awpa a châ.

12 Chatawhcha Arawna sawchapawpazy cha ahmaopakhyna poh-o chhikao thaby liata a vaw chhipa ta ti ta na pasi awpa a châ,

13 Arawna cha chysia pathaihpazy na pakysa awpa a châ, chatanachata theihthaipa rai hriapa ta ei châta a chakao thei nawpata sathaw thupata na panano awpa a châ.

14 A sawchapawpazy chhao a vaw chhipata, viahpakao na paky awpa a châ,

15 chatanachata theihthaipa rai hriapa ta ei châta ama chakao thei nawpa ta, ama paw sathaw na thupa hawhna khata âmo cha sathaw na thu awpa a châ; sathaw thupata ama ypa he ama pathlazy taih chhaota chhâzaw ta theihthaipa châta raopa ama châ ha aw tahpa, ama châta pahnona a châ aw,” tahpa ta reih ta.

16 Cha hawhna chata Mawsi ta tao ta; ABEIPA ta tao awpata bie a piepa zydua hawhna chata tao khai ta.

17 A kô nona thla hmiatua chaipa thla, noh kha noh liana chata achhyna byureih cha padua haw ei ta.

18 Mawsi chata achhyna byureih cha padua ta; a patyunazy paryh ta, a thophia paryhpazy cha padua ta, a tlâhzy cha chahrao ta, a tôhzy cha padua ta;

19 achhyna byureih chô liana chata poh-o rai ta, cha poh-o chô cha a khuna ta khu heih ta, ABEIPA ta Mawsi bie a piepa hawhna khata.

20 Chatawhcha bie pahnosana cha la ta, Byh chhôh liata soh ta, Byh liana chata a lâ zy hrei ta, Byh chô liana chata zawngiana dyuchhai soh ta;

21 chatawhcha Byh cha achhyna byureih chhôh liana chata soh ta, a pakhona poh-raipa cha rai ta, Biepahnosana Byh cha pakhâh ta; ABEIPA ta Mawsi bie a piepa hawhna khata.

22 Chatawhcha tlâhkhai cha ahmaopakhyna poh-o chhôh, achhyna byureih maw lâchhâh poh-raipa khôtho lâna chata patyuh ta,

23 tlâhkhai liana chata ABEIPA hmiakô ta viahchhâ cha a siapata soh ta; ABEIPA ta Mawsi bie a piepa hawhna khata.

24 Chatawhcha meiôh sona cha ahmaopakhyna poh-o chhôh, achhyna byureih chhôh lâchhâh tlâhkhai dady liana chata soh ta,

25 chatawhcha meiôhzy cha Abeipa hmiakô ta soh ta; ABEIPA ta Mawsi bie a piepa hawhna khata.

26 Chatawhcha ngôh maisâh cha ahmaopakhyna poh-o chhôh, poh-raipa hmiakô liata soh ta,

27 a chô liana chata khâpaleipa rohpahâh ngaitapa rao awpa rohpahâhpa rao ta; ABEIPA ta Mawsi bie a piepa hawhna khata.

28 Chatawhcha achhyna byureih chhikao poh­raipa rai ta.

29 Chatawhcha ahmaopakhyna poh-o achhyna byureih chhikao hmiakô liana chata, raopata hlâna maisâh patyu ta, a chô liana chata raopa ta hlâpa nata hlâpa hlâ ta; ABEIPA ta Mawsi bie a piepa hawhna khata.

30 Chatawhcha rahô cha ahmaopakhyna poh-o nata maisâh likawh liana chata patyuh ta, a sina awpata ti patlai ta,

31 Mawsi nata Arawna nata a sawchapawpazy chata cha liana chata ama ku nata ama pheizy a si ei ta; ahmaopakhyna poh-o liata amâ ngia chy ta nata maisâh thaby lâta ama vaw chy ta amâ si; ABEIPA ta Mawsi bie a piepa hawhna khata.

33 Chatawhcha achhyna byureih nata maisâh padôpata dôhpachhôh tlyhmia tao ta, a dôhpachhôh tlyhmia chhikao poh-raipa cha rai ta. Chatanachata Mawsi ta raihria cha paloh ha ta.

Achhyna byureih ameih ta a pahly(Mar 9: 15-22)

34 Chatanachata ahmaopakhyna poh-o cha ameih ta pahly ta achhyna byureih cha ABEIPA rôhnahna ta vaw bie haw ta.

35 Chatawhcha cha hawhta ameih a vaw chhohpa ta ABEIPA rôhnahna ta achhyna byureih cha a vaw bie hawpa vâta Mawsi cha ahmaopakhyna poh-o chhôh liana cha a ngia thei leipata.

36 Ameih chata achhyna byureih cha a paisai patanahta Izarel pathlazy cha a pasie lymâ ei ta, ama siena awpa lâta ama sie chhôh zydua chata;

37 ameih chata a paisai leipa khiahta deikua cha a paisai hlâ lei cha a pasie leipa ta ama y thlâh ha tyh.

38 Nohchhô ta ABEIPA ameih cha achhyna byureih chô liata a chhoh ta, cha liana chata zâ ta mei vaw y tyh ta, Izarel sahlao zydua chata ama siena awpa lâta ama sie chhôh zydua chata, cha cha ama hmô lymâ tyh.

Puasaina (Exodus)

1	2	3	4	5	6	7
8	9	10	11	12	13	14
15	16	17	18	19	20	21
22	23	24	25	26	27	28
29	30	31	32	33	34	35
36	37	38	39	40

Puasaina Bo 39

Puasaina Bo 39

Theihthaipa chysiazy taona (Pu 28:1-43)

1 Chatawhcha pala nohpa zy, a nohsaihpapa zy, a sailawpa zy, hmâpa ta supathaihpa chakaona awpata chysia a ngia ngaitapazy tao ei ta; Arawna châta chysia pathaihpazy tao hra ei ta; ABEIPA ta Mawsi bie a piepa hawhna khata.

2 Chatawhcha ngôh ri zy, pala nohpa zy, a nohsaipâpa zy, a sailawpa zy, pala ri di ngaitapa pabaohpa zy hmâpa ta theihthaipa viahpakao cha tao ta.

3 Ngôh cha â pa ngaitapa ta paphia ei ta, pala nohpa zy, a nohsaihpâpa zy, a sailawpa zy, pala ri di ngaitapa zy ta chyhsa a thai ngaitapa ta kiky a paky awpa ta vaw tao ei ta.

4 A ngiatlâh ri bie pâpata tao ei ta, a pawhmao rairieh bie pâpa a châ,

5 cha viahpakao chô liata chaisaih awpa zôthai ngaitapa ta sapa cha, cha viahpakao chi ualuapa sai châ ta, ngôh ri zy, pala nohpa zy, a nohsaihpâpa zy, a sailawpa zy, pala ri di ngaitapa pabaohpa zy ta sapa a châ; ABEIPA ta Mawsi bie a piepa hawhna khata.

6 Izarel pathlazy moh hawh lymâ ta, moh chahnaona liata ropa hawhta pachohsana ngôh patusana liata bôpa bery lôzy liana chata roh ei ta.

7 Izarel pathlazy pahno thlâh hana alô châta theihthaipa viahpakao ngiatlâh baipa liana chata bai ta; ABEIPA ta Mawsi bie a piepa hawhna khata.

8 Chachôhna baipa cha, theihthaipa viahpakao taopa hawh hra ta, chyhsa a thai ngaitapa taopa hawhta, ngôh ri zy, pala nohpa zy, a sailawpa zy, pala ri di ngaitapa pabaohpa zy hmâpa ta tao ta.

9 Cha cha ki palih a hneipa châ ta; cha chachôhna baipa cha patho ei ta, a doh lâ cha kha kha châ ta, a hâ lâ cha kha kha châ hra ta, pathopa a châ.

10 Cha liana chata alôsôhpazy tlâh palih ta tao ei ta; tlâh khana cha sadi zy, tôpazi zy, kubuni zy châ ta;

11 tlâh nona cha emyra zy, saphai zy, sadoni zy châ ta;

12 tlâh thôhna cha chhina zy, akate zy, amethy zy châ ta;

13 tlâh palihna cha bery zy, bery lôsôhpa zy, zaspy zy châ ta; ngôh patusanazy liata bôpa a chô.

14 Alôzy cha Izarel pathlazy moh hawh lymâ ta miahrawhleino a châ, ama moh hawh lymâ ta châ ta; moh chahnaona liata a chohpa hawhta, pho to ama moh hawh lymâ ta pho hrawhleino châta a châ.

15 Chatawhcha chachôhna baipa chô liana chata khawhri charipa hawhta bâliazy, ngôh suapa charipa tao ei ta;

16 ngôh patuna miano nata ngôh tiaki miano tao ei ta, chatanachata chachôhna baipa tlâh pawhmao rairieh liata tiaki zy cha patao ei ta;

17 chatawhcha ngôh bâlia charipa miano cha chachôhna baipa tlâh pawhmao rairieh liata tiaki miano liana chata bu ei ta.

18 Bâlia charipa pawhmao hiakhalâ miano zy cha ngôh patuna miano liana chata pazao ei ta, cha cha theihthaipa viahpakao hmia lâta baina liana chata bu ei ta.

19 Chatawhcha ngôh tiaki miano tao ei ta, chazy cha chachôhna baipa ki miano theihthaipa viahpakao a daipa chho lâchhâh liana chata patao ei ta.

20 Chatawhcha ngôh tiaki miano tao ei ta, chazy cha a hmia lâta theihthaipa viahpakao baina miano ry lâchhh a pazaona rachhôh theihthaipa viahpakao hraina zôthai ngaitapa ta sapa chô lâna chata patao ei ta.

21 Chatawhcha theihthaipa viahpakao liata tiakizy liana chata, chachôhna baipa liata tiakizy cha ri nohpa ta pazao ei ta, zôthai ngaitapa ta sapa theihthaipa viahpakao hraina chô lâta a y thei nawpa ta nata chachôhna baipa cha theihthaipa viahpakao nata â pachhaih lei nawpa ta, ABEIPA ta Mawsi bie a piepa hawhna khata.

22 Theihthaipa viahpakao, viahpakao pasihpa a nohpa saita sapa tao ta;

23 viahpakao pasihpa liah liah cha viahpakao bâh chôpa hawhta pa-â ta, a âpa cha â hrie thei lei nawpa ta a kiah pakyu ta.

24 Viahpakao pasihpa paizy liana chata pawmikranat nohthlahpa a nohpa zy, a nohsaihpâpa zy, a sailawpa zy, pala ri dipa pabaohpa zy ta tao ei ta.

25 Ngôh suapa lailôzy tao ei ta, cha lailôzy cha viahpakao pasihpa pai liata â dopa ta pawmikranat likawh zy liana chata soh ei ta, pawmikranat likawh lymâ liata ama soh;

26 lailô miakha nata pawmikranat miakha, lailô miakha nata pawmikranat miakha lymâ viahpakao pasihpa pai liata a dôpa chakaona awpa ta a tobi nawpa ta soh ei ta; ABEIPA ta Mawsi bie a piepa hawhna khata.

27 Arawna nata a sawchapawpazy chata pala ri di ngaitapa sapa viahpakaozy tao ei ta,

28 pala ri di ngaitapa ta taopa theihthaipa lakhu zy, pala ri di ngaitapa ta taopa luhkhuna pha ngaitapa zy, pala ri di ngaitapa ta pabaohpa ta taopa pala ri dipa chaopasypa zy, 

29 pala ri di ngaitapa pabaohpa zy, a nohpa zy, a nohsaihpâpa zy, a sailawpa zy hmâpa ta, kiky a thai ngaitapa pakypa chaisaina zy chhaota; ABEIPA ta Mawsi bie a piepa hawhna kha ta.

30 Chatawhcha lakhu pathaihpa châta ngôh phiapa cha ngôh suapa ta tao ei ta, a chô liata moh chahnaona liata a chohpa hawhta, “ABEIPA CHÂTA PATHAIHPA,” tahpa pahnosa ei ta.

31 Chatawhcha theihthaipa lakhu chô lâta bai awpa ta a ri nohpa ta bu ei ta, ABEIPA ta Mawsi bie a piepa hawhna khata.

Achhyna byureih hmobaohzy pakipa(Pu 35:10-19)

32 Chatanachata ahmaopakhyna poh-o achhyna byureih raihria zydua cha palohpa châ haw ta; ABEIPA ta Mawsi tao awpata bie a piepa hawh tlaita Izarel pathlazy chata tao ei ta.

33 Chatawhcha Mawsi hnohta achhyna byureih a vykhei ei ta, poh-o zy, a chhaichhi zydua zy, a hraina zy, a thophia paryhpa zy, a tôh zy, a patyuna zy chhaota;

34 mietaekupa tôhpa vo pasaipa nata mietôhpa vo ta taopa a khuna zy, a pakhâna awpa poh-raipa zy chhaota:

35 bie pahnosana Byh nata a lâzy, zawngiana dyuchhai chhaota;

36 tlâhkhai zy, a chhaichhi zydua zy, viahchhâ sopa zy chhaota;

37 ngôh suapa ta taopa meiôh sona zy, a meiôh soh awpa zy, a hmobaoh zydua nata pakhaih nawpata a sathaw chhaota;

38 ngôh maisâh zy, sathaw a thupa zy, rao awpa ropahâh ngaitapa zy, poh-o chhikao liata poh-rai awpa poh­raipa zy chhaota;

39 dawh maisâh zy, a dawh sao zy, a lâ zy, a hmobaoh zydua zy, rahô nata a patyuna zy chhaota;

40 achhyna byureih dôhpachhôh tlyhmia liata poh-raipa zy, a tôh zy, a patyuna zy, a dôhpachhôh chhikao liata poh-raipa zy, a khawhri zy, a khaipâna zydua chhaota;

41 su pathaihpa liata chakaona awpata chysia â ngia ngaitapa ta sapa zy, theihthaipa Arawna nata a sawchapawpazy ta theihthaipa rai ama hria tita ama ky awpa, chysia pathaihpazy chhaota.

42 ABEIPA ta Mawsi tao awpata bie a piepa zydua hawhna cha, Izarel pathlazy ta tao khai ei ta.

43 Chatawhcha Mawsi ta cha raihria zydua cha moh ta, paloh khai haw ei ta; ABEIPA bie piepa hawh tlaita ama paloh khai haw. Chatawhcha Mawsi ta âmo cha byhnâ aw pa ta. 

Puasaina (Exodus)

1	2	3	4	5	6	7
8	9	10	11	12	13	14
15	16	17	18	19	20	21
22	23	24	25	26	27	28
29	30	31	32	33	34	35
36	37	38	39	40

Puasaina Bo 38

Puasaina Bo 38

Raona hlâna maisâh taona (Pu 27:1-8)

1 Akeisha tho ta raopa hlâna maisâh cha tao ta; a doh lâ cha dy pangawh châ ta, a hâ lâ cha dy pangawh châ ta; ki palihpa a châ, chatawcha a sâhna lâ cha dy thôh a châ.

2 Cha a ki palih pawhmaozy liana chata a kizy tao ta; cha kizy cha maisâh nata a pazao khai ta, dawh ta pahu khaipa a châ.

3 Maisâh châta chhaichhi zydua beihzy, buchâh linazy, rahôzy, sathaona thua a kohpazy, mei lanazy tao ta; cha chhaichhi zydua cha dawh ta tao ta.

4 Maisâh châta dawh sao maisâh kiah ry lâ a khophie taihta tao ta.

5 A lâzy chahraoh nawpa ta dawh sao sona ki palih liata patao awpa tiaki miapalih leih ta;

6 a lâzy cha akeisha tho ta tao ta, dawh pahu ta.

7 A syna awpata maisâh kâ liata tiaki zy liana chata, a lâzy chahraoh ta; maisâh cha thophia ta dôhpa ta a pakaopa ta tao ta.

Rahô taona(Pu 39:18)

8 Rahô a patyuna dawh chhaota a ahmaopakhyna poh-o chhikao thaby liata chanô chakao typazy thlalâ hmâpa ta tao ta.

Achhyna byureih dôhpachhôh(Pu 27:9-19)

9 Achhyna byureih dôhpachhôh tlyhmia tao ta; chho hei lâchhâh ta a dôhpachhôh tlyhmia liata poraipa parai awpa cha pala di ngaitapa pabaohpa ta taopa dy za kha a seihpa a châ;

10 cha châna chata a tôh syno nata dawh patyuna syno y ta, a tôh liata a bainazy nata a patunazy cha tâkâ ri a châ.

11 Maw lâchhâh ta poraipa parai awpa cha dy za kha châ ta, a tôhzy cha syno nata dawh patyuna syno châ ta, a tôh liata a bainazy nata a patunazy cha tâkâ ri a châ.

12 Notla lâchhâ ta poraipa parai awpazy cha dy sypangawh châ ta, a tôhzy cha miahrawh châ ta, a patyuna cha miahrawh a châ; a tôh liata a bainazy nata a patunazy cha tâkâ ri a châ.

13 Chatawhcha nochhi hei nochhi lâchhâh ta poraipa parai awpazy cha dy sypangawh a châ.

14 Chhikao kâ hiakha lâta poraipa parai awpazy cha dy hrawhleipangawh a seihpa châ ta, a tôh miathôh nata a patyuna miathôh a châ.

15 A kâ hiakha lâchhâh tahpa chhao, cha hawhna hra chata a châ; achhyna byurei dôhpachhôh tlyhmia chhikao kâ chavei chachâh ta, poraipa parai awpazy cha dy hrawh hleipangawh a châ, a tôhzy cha miathôh châ ta, a patyunazy chhao miathôh a châ.

16 Achhyna byureih dôhpachhôh tlyhmia liata poraipa rai awpa zydua cha pala ri di ngaitapa pabaohpa sai a châ.

17 A tôh patyunazy cha dawh châ ta, a tôh liata a bainazy nata a patunazy cha tâkâ ri châ ta, a luhbyupazy cha tâkâ ri ta pahupa châ ta; achhyna byureih dôhpachhôh tlyhmia tôh zydua patunazy cha tâkâ ri sai a châ.

18 Chatawhcha achhyna byureih dôhpachhôh tlyhmia chhikao liata poraipa rai awpa cha poh kiky thai ngaitapa pakypa a châ, pala ri di ngaitapa pabaohpa zy, a nohpa zy a nohsaihpapa zy a sailawpa zy ta taopa a châ; chatawhcha a seina lâ cha dy syno châ ta, â sâhna lâ cha achhyna byureih dôhpachhôh tlyhmia poraipa parai awpazy nata a khopa dy pangawh a châ hra.

19 A tôhzy cha miapalih châ ta; a patyunazy cha miapalih châ ta, dawh sai a châ, a bainazy cha, tâkâ ri châ ta, a luhbyupazy nata a patunazy cha tâkâ ri ta pahupa a châ.

20 Achhyna byureih nata a tlyhmia dôhpachhôh khaipâna zydua cha, dawh sai a châ.

Supathaihpa châta hmânazie

21 Achhyna byureih bie pahnosana achhyna byureih châta chhaichhi Mawsi biepiepa hawhta, Livai chizy ta ama hmâ nawpa ta theihthaipa Arawna sawchapawpa Ithama ta a reipazy cha, hezy he a châ.

22 Zudah pho liatahpa Hura sawchapawpa Uri, cha sawchapawpa Bezalel chata ABEIPA ta Mawsi hnohta tao awpa ta bie a piepa zydua kha tao khai ta;

23 a hnohna chata Dana pho chyhsa Ahisama sawchapawpa Ôhôliaba a chapai thaipa, ku zôthaipa, pala nohpa zy, a nohsaihpapa zy, a sailawpa zy, pala ri di ngaitapa pabaohpa zy, kiky a thaipa ta hria hra ta.

24 Supathaihpa châta hmâ byuhpa maihta ngôh hmâpa zydua, ngôh hlâpa cha, talent syno nata miachaki nata sekel za sari nata sythôh a châ, supathaihpa liata sekel ama pie tyhpa hawhta reipa ta.

25 Chatawhcha zawpi rei hawpazy hry liata a hlaopa maih tâkâ piepa cha talent zakha nata sekel sâkha nata zasari nata sysari nata miapangawh a châ, supathaihpa liata sekel ama pie typa hawhta reipa ta;

26 kô syno tawhta a chô lâ rei hawpazy hry liata a hlao awpa ta a siepa, thycharu nata sâthôh nata zapangawh nata sypangawh cha, supathaihpa liata sekel a pie tyhpa hawhta reipa ta, beka miakha chyu, (cha cha sekel khophie a piepa hawhta ama châ.)

27 Tâkâ talent zakha cha supathaihpa tôh patyupa nata poraina tôh patyuna châta leih awpa ta hmâh ei ta; a tôh patyuna zakha leih nawpa ta talent zakha hmâh ei ta, a tôh patyuna miakha leih nawpa ta talent miakha lymâ ama hmâh.

28 Chatawhcha sekel sâkha nata zasari nata sysari nata miapangawh cha hmâpa ta, a tôh liata bainazy tao ta, a luhbyupa zy cha tâkâ ri ta pahu ta, a patunazy tao hra ta.

29 Chatawhcha ama dawh hlâpazy cha talent sysari nata sekel, sâno nata zapalih a châ;

30 chazy cha a ahmaopakhyna poh-o chhikao tôh patyuna ta zy, dawh maisâh ta zy, a dawh sao nata maisâh liata chhaichhi zydua ta zy,

31 achhyna byureih dôhpachhôh tlyhmia rachhôh ta a tôh patyuna ta zy, achhyna byureih khaipâna zydua ta zy tao khai ta. 

Puasaina (Exodus)

1	2	3	4	5	6	7
8	9	10	11	12	13	14
15	16	17	18	19	20	21
22	23	24	25	26	27	28
29	30	31	32	33	34	35
36	37	38	39	40

Puasaina Bo 37

Puasaina Bo 37

Biehraina Byh taona (Pu 25:10-22)

1 Bezelal chata akeisha tho ta Byh cha tao ta; a doh lâ cha dy no nata a khophie châ ta, a hâ lâ cha dy kha nata a khophie châ ta, a sâhna lâ cha dy kha nata a khophie a châ.

2 A chhôh nata a khôtho lâ cha ngôh suapa ta pahu ta, chatawhcha ngôh ta a tlâh pakyu ta.

3 Cha a phei miapalih liata patao awpa ta ngôh tiaki miapalih leih ta, tiaki miano cha hiakhalâ châta châ ta, tiaki miano ch hiakhalâ châta a châ.

4 Chatawhcha akeisha tho ta a lâzy tao ta, chazy cha ngôh ta pahu ta,

5 chatawhcha Byh cha a sy thei awpa ta a kâ lâta tiaki liana chata a lâzy cha chahraoh ta.

6 Ngôh suapa ta zawhngiahna dyyuchhai tao ta; a doh lâ dy no nata a khophie châ ta, a hâ lâ cha dy kha nata a phophie a châ.

7 Cherubi miano ngôh ta tao ta, zawngiahna dyuchhai pawhmao rairieh lia tahpa cha a daih ta daih ta,

8 pawhmao hiakha lâta cherubi miakha, a pawhmao hiakha lâta cherubi miakha; zawngiahna dyuchhai nata a pazao khaipa ta a pawhmao rairie liata cherubizy cha tao ta.

9 Cherubizy cha hmia a chhypa ta zawngiahna dyuchhai cha ama mathlaw ta khupa ta, ama mathlawzy cha pakai ei ta; zawngiahna dyuchhai lâ cha cherubizy chata a heih rairieh ei ta.

Tlâhkhai taona (Pu 25:23-30)

10 Akeisha tho ta tlâhkhai tao hra ta; a doh lâ cha dy no châ ta, a hâ lâ cha dy kha châ ta, a sâhna lâ cha dy kha nata a khophie a châ;

11 cha cha ngôh suapa ta pahu ta, ngôh ta a tlâh pakyu ta.

12 Chatawhcha paza tie a phiapa ta a pakyuna tao ta, a pakyuna cha ngôh ta a tlâh pakyu ei ta.

13 Cha châna chata ngôh tiaki miapalih leih ta, cha tiaki cha tlâhkhai phei miapalih ki chyu liata patao ta.

14 Tlâhkhai cha a sypa ta a lâ cha chahrao thei awpa ta tiaki cha a pakyuna liata patao ta.

15 Tlâhkhai cha a sy nawpa ta a lâzy cha akeisha tho ta tao ta, ngôh ta pahu ta.

16 Chatawhcha tlâhkhai liata hmobaoh, beikohzy, nyuzy, a patlaina awpa biebuzy, kresawti ôhzy, ngôhsuapa ta tao ta.

Meiôh tôh taona (Pu 25:31-40)

17 Meiôh sona cha ngôh suapa ta tao ta. Cha meiôh sona cha a tôh thabypa nata a tôh cha a daih ta daih ta; a nyuzy, a paw ngaichakuazy, a pawzy cha a pazao khai ta.

18 Chatawhcha a kâ lâzy liana chata a chiah miacharu pachiah ta, meiôh sona tôh kâ hiakha lâna chata a chiah miathôh y ta, chatawhcha meiôh sona tôhka hiakha lâna chata a chiah miathôh y hra ta;

19 a hiakha lâchhâh chiah liana chata almônd pabyuhpa hawhta nyu miathôh, a paw ngaichakua nata a paw tao ta, chatawhcha a hiakha lâchhâh chiah liata chhao almônd pabyuhpa hawhta nyu miathôh, a paw ngaichakua nata a paw tao ta; cha hawhna chata meiôh sona chiah miacharu châta tao ta.

20 Cha meiôh sona tôh liana chata nyu mia palih almônd pabyuhpa hawhta taopa, a paw ngaichakua nata a pawzy y ta,

21 cha a pazao khaipa chiah miano ry liana chata a paw ngaichakua y ta, meiôh sona tôh liata a chiah miacharu liana chata a y khai.

22 Cha a paw ngaichakuazy nata a chiahzy cha a pazao khai ta; a pôhpalôhpa ta ngôh suapa ta daihpa a châ.

23 Cha châna chata meiôh miasari nata chaikiezy nata meipaoh sonazy cha ngôh suapa ta tao ta.

24 Cha meiôh sona nata a chhaichhi awpa zydua tao nawpa ta ngôh suapa talent miakha hmâh ta.

Rohpahâhpa maisâh taona (Pu 30:1-5)

25 Rohpahâhpa rao nawpa ta akeisha tho ta maisâh tao ta; a doh lâ dy kha châ ta, a hâ lâ dy kha châ ta; ki palihpa a châ. Chatawhcha a sâhna lâ cha dy no a châ; a kizy nata a pazao khaipa a châ.

26 A chôzy, a pôhpazy nata a kizy cha ngôh suapa ta pahu ta; ngôh ta a tlâh pakyupa ta,

27 a tlâh ry lâta a kâ lâna chata ngôh tiaki miano tao ta, a kâ miano liana chata tao heih ta, chazy cha a lâ chahraohna awpa a châ.

28 Chatawhcha akeisha tho ta a lâzy tao ta, ngôh ta pahu ta.

Sathaw a thupa nata rohpahâhpa taona

29 Sathaw a thupa chi sathaw pathaihpa, khâpaleipa rohpahâh ngaitapa rao awpa rohpahâh ngaitapa rohpahâhpa taopa hawhta tao ta. 

Puasaina (Exodus)

1	2	3	4	5	6	7
8	9	10	11	12	13	14
15	16	17	18	19	20	21
22	23	24	25	26	27	28
29	30	31	32	33	34	35
36	37	38	39	40

Puasaina Bo 36

Puasaina Bo 36

1 Bezalel nata Ôhôliaba nata chyhsa zôthaipa ahyrai ABEIPA ta bie a piepa lymâ hawhta su pathaihpa liata chakaona rai to hria thei awpa ta sona nata novâhna a piepa maih chata ama hria awpa a châ,” tah ta.

Chyhsazy ta hmosaipiepa hluhpi ama cheih

2 Mawsi ta Bezalel nata Ôhôliaba nata chyhsa zôthaipa sahlao ABEIPA ta ama pathipalôh liata sona piepa ta, cha rai a hria hoh awpa ta palôh thyuna a hneipa maih cha aw ta;

3 Izarel pathlazy ta su pathaihpa liata chakao nawpa ta hmo tao awpa ta ama vaw thyupa zydua cha, Mawsi tawhta la lymâ ei ta. Chatawhcha my chareih ama lôhthai ta hmohlâpazy cha ano lâta vaw hlâ lymâ hra ei ta,

4 chatanachata chyhsa zôthaipa sahlao zydua su pathaihpa châta rai to a hriapazy chata ama raihria haipa cha a râsai chyu ei ta,

5 Mawsi hnohta, “ABEIPA ta tao awpa ta bie a piepa tao nawpa ta chyhsazy chata a hlei khôpa ta hmo ama vaw cheih,” tahpa ta chho ei ta.

6 Chatawhcha Mawsi chata bie vaw pie ta, “Su pathaihpa châta hmo pie awpa cha a chanô a chapaw ahyhma ta a vaw chhuahdy khao kha ei se,” tahpa ta, amâ riena su liana chata, tlâh pa awhsa haw ei ta. Chatanachata chyhsazy chata ama vaw cheih awpa pasaipa châ khao leipa ta;

7 ama hnei chiehp cha tao byuhpa maih tao nawpa ta a daih ha ta,  hluh tupa a châ.

Achhyna byureih taonapa (Pu 26:1-37)

8 Ama hry liata chyhsa zôthaipa raihriapa sahlao zydua chata achhyna byureih cha poraipa miahrawh a hneipa ta tao ei ta; cha poraipazy cha pala ri di ngaitapa pabaohpazy, a nohpa zy, a nohsaihpâpazy, a sailawpa zy hmâpa ta cherubi nohthlapazy a thai ngaitapa taopa pachohsapa ta tao ei ta.

9 Poraipa cha a seihna lâ dy syno nata dy charie chyu châ ta, poh raipa cha phiana lâ dy palih chyu a châ; poraipa zydua cha a kho sai ta.

10 Poraipa miapangawh cha pazao khai ta, chatawhcha poraipa miapangawh a hropa zy chhao cha pazao hra ta.

11 Poraipa a pazaopa miakha pawhmao chaip tlâh liana chata a nalih a nohpa ta tao ta; cha hawhna hra chata poraipa pazaopa hiakhalâ pawhmao chaipa tlâh liana chata tao hra ta;

12 poraipa miakha liana chata nali sypangawh tao ta, chatawhcha a pazaopa miakha poraipa tlâh liana chhao chta nali sypangawh tao hra ta; cha nalizy ch a dady sai ta.

13 Chatawhcha ngôh hraina sypangawh tao ta, a hrainazy chata poraipazy cha hrai ta, chatanachata achhyna byureih cha chhôhpadâhpa miakha vaw châ haw ta.

14 Achhyna byureih chô khu nawpa ta mie hmi poraipazy tao ta, poraipa miahrawhleikha tao ta.

15 Poraipa cha a seina lâ dy sythôh chyu châ ta, chatawhcha poraipa a phiana lâ dy palih chyu a châ; poraipa miahrawhleikha cha a kho sai ta.

16 Poraipa miapangawh cha pazao khai ta, chatawhcha poraipa miacharu chhao cha pazao khai ta.

17 Poraip pazaopa miakha pawhmao chaipa tlâh liana chata nali sypangawh tao ta, chatawhcha poraipa pazaopa hiakha lâ tlâh liana chata nali sypangawh tao hra ta.

18 Poh-o cha miakha a châ thei nawpa ta a hrai nawpa ta dawh hraina sypangawh tao ta.

19 Mietahkupa tôhpa vo pasaipa ta o chô khunazy, pivao vo ta a chô khu pachhuahnazy tao ta.

20 Chatawhcha achhyna byureih thophia paryh awpazy cha a dopatata a duahpa ta akeisha tho ta tao ta.

21 A thophia paryhpa seihna lâ cha dy hrawh châ ta, a hâ lâ cha dy kha nata â khophie chyu châ ta.

22 A thophia paryhpa to liana chata a phei miano a pazaopa ta y ta; cha hawhna chata achhyna byureih thophia paryhpa zydua cha tao ta.

23 Achhyna byureih chata a thophia paryhpazy tao ta; chho heih lâchhâh chata a thophia paryhpa syno tao ta;

24 cha a thophia paryhpa syno atyuna châta tâkâ ri patyuna sypalih tao ta, a phei miano châta a thophia paryhpa miakha a patyuna miano tao ta.

25 Achhyna byureih kâ hiakhalâ maw hei lâ châta a thophia paryhpa syno tao ta.

26 cha châna chata tâkâ ri patyuna sypalih chhaota, a thophia paryhpa miakha châta a patyuna miano chhaota, a thophia paryhpa hropa miakha châta a patyuna miano tao ta.

27 Achhyna byurei chhao cha notla hei lâ châta a thophia paryhpa miacharu tao ta.

28 Chatawhcha achhyna byureih chhôchâ ki rairie châta thophia paryhpa miano tao ta.

29 Chatawhcha a ry lâna chata pakyupa châ ta, cha hawhna hra chata a sa lâ a nali hmiatua chaipa taihta taopa châ ta; a ki miano liana chata cha hawhta tao rairieh ta.

30 Thophia paryhpa miacharie a patyuna awpa tâkâ ri patyuna miahrawhhleicharu chhaota y ta; thophia paryhpa to patyu nawpa ta patyuna miano lymâ a y.

31 Akeisha tho ta a tlâh achhyna byurei pâchhô hiakhalâ thophia paryhpa châta miapangawh,

32 achhyna byurei pâchhôh hiakhalâ thophia paryhpa châta miapangawh, chatawhcha achhyna byureih chôchâh notla hei lâ thophia paryhpa châta chhao miapangawh tao ta.

33 A tlâh lia liata thophia paryhpa liah liatahpa cha thophia paryhpa pawhmao chaipa tawhta a hiakhalâ pawhmao chaipa taihta hreipakhâh awpa ta tao ta.

34 Chatawhcha thophia paryhpazy cha ngôh ta pahu ta, a tlâhzy hreipakhâh nawpa ta, ngôh tiaki tao ta, chatawhcha cha a tlâhzy cha ngôh ta pahu ta.

35 Poraipa châna cha pala ri di ngaitapa pabaohpa zy, a nohpa zy, a nohsaihpapa zy, a sailawpa zy hmâpa ta cherubi nohthlahpa zy a thai ngaitapa taopa pachohsapa ta tao ta.

36 Cha châna chata akeisha tho a tôh miapalih tao ta, chazy cha ngôh ta pahu ta, a bainazy cha ngôh a châ, chatawhcha chazy patyuna châta tâkâ ri patyuna miapalih lei ta.

37 Po-o chhikao liata porai awpa pala ri di ngaitapa pabaohpa zy, a nohpa zy, a nohsaihpapa zy, a sailawpa zy hmâpa ta, kiky a paky thai ngaitapa pakypa chhaota tao ta;

38 cha paraina awpa ta a tôh miapangawh a baina zy chhaota tao ta. A tôh luhbyuhpa zy nata a patyu sana zy cha ngôh ta pahu ta, cha a patyuna miapangawh cha dawh châ ta. 

Puasaina (Exodus)

1	2	3	4	5	6	7
8	9	10	11	12	13	14
15	16	17	18	19	20	21
22	23	24	25	26	27	28
29	30	31	32	33	34	35
36	37	38	39	40

Puasaina Bo 35

Puasaina Bo 35

Pahânoh bie paryhpazy

1 Mawsi ta Izarel pathla ahmaohpakhypa zydua cha aw ta, ama hnohta, “He he a châ hih, ABEIPA ta nama tao awpa ta bie a cha piepa ei cha.

2 Noh charu chhôht rai hria nawpa ta hmâ awpa ta châ ta, a noh sari noh deikua ch nama châta noh pathaihp ABEIPA chât pahâna pahânoh a châ; ahyrai cha noh liata rai a hriapa maih cha thiepa a châ aw;

3 Pahânoh cha nama pahrâna su liata rai mei nama pati awpa châ vei,” tah ta.

ABEIPA lâta a hlâna (Pu 25:1-9)

4 Mawsi ta Izarel pathlazy apahmaohpakhypa sahlao zydua hnohna chat, “He he  châ hih, ABEIPA ta bie a piepa ei cha.

5 Nama hry liata ABEIPA chata hmohlâ awpa vaw cheih teh u, ahyrai ta nama palôhrupa ta piepa a khohpa maihta cha ABEIPA châta hlâ awpa cha vaw cheih teh u; ngôh zy, tâkâ zy, dawh zy;

6 pala nohpa zy, a nohsaihpapa zy, a sailawpa zy, pala rih di ngaitapa pabaohpa zy; hmi zy chhaota,

7 mietahkupa tôhpa vo pasapa zy, pihvao vo zy; akeisha tho zy chhaota,

8 meiôh chât sathaw zy, sathaw a thupa châta nata rao awpa roh pahâh ngaitapa châta nata rao awpa roh pahâh ngaitapa châta khâpa leipa rohpahâhpa chhaota,

9 theihthaipa viahpakao nata viahpakao chachôhna liata kiky paky awpa t bery lôzy nata alôsôhpa zy chhaota.

Achhyna byureih hmobaohzy (Pu 39:32-43)

10 Nama hry liata zôthaipa maih cha a vy ei sala, ABEIPA ta tao awpa ta bie a piepa maih tao mawh sy;

11 achhyna byureih zy, a poh-o zy, a khuna zy, a patuna zy, a thophia paryhpa zy, a tlâh zy, a tôh zy, a patuna zy chhaota;

12 a byh nata a lâ zy, zawngiahna dyuchhai zy, a pakhâna awpa pohraipa chhaota;

13 tlâhkhai nata a lâ zy nata a chhaichhi zydua, viahchhâ sopa zy chhaota;

14 khaina châta meiôh sonazy nata a hmobaoh zydua, a meiôhzy pakhai awpa ta sathaw zy chhaota;

15 rohpahâhpa raona maisâh nata a lâzy, sathaw a thupa zy rao awpa ta rohpahâhpa rohpahâh ngaitapa zy, chatawhcha achhyna byureih chhiko liata parai awpa chhikao liata parai awpa chhikao pohraipa zy chhaota;

16 raopa ta hmohlâna maisâh, dawh sao nata a lâ zy nata a hmobaoh zydua, rahô nata a patyuna zy chhaota;

17 dôhpachhôh tlyhmia liata pohraipa zy, a tôh zy, a patyuna zy nata a dôhpachhôh chhikao liata pohraipa zy chhaota,

18 achhyna byureih khaipâna zy, a dôhpachhôh khaipâna zy, tlyhmia khaipâna zy, a ri zy chhaota;

19 su pathaihpa liata chakaona awpa ta chysia a ngia ngaitapa ta sapa zy, theihthaipa rai ama hria tita a ky awpa, theihthaipa Arawna chysia pathaihpa nata a sawchapawpazy chysia zy,” tahpa ta tah ta.

Chyhsazy ama hlâpa cheih ei ta

20 Chatanachata Izarel pathla ahmohpakhypa sahlao zydua cha Mawsi tawhta pai khai ei ta.

21 Chyhsa to pathipalôh hmeihseihpa ta a lypa maih nata palôhrupa hmeiseihpa a pasaipa maih cha a vy ei ta, a hmaohpakhyna poh-o liata hmâ awpa nata chakaona lâ châta hmo hmâ byuhpa maih nata chysia pathai awpa cha ABEIPA châta vaw thyu chyu ei ta.

22 Chatawhcha a chanô a chapaw ta piepa a byuihpa maih cha a vy ei ta; lâkyu zy, rahy zy, mochahnaona kusadi zy, pachhi zy, ngôh ta taopa to vaw cheih ei ta, chyhsa to ngôh hlâ awpa a hneipa maih ta, ABEIPA châta hlâ chyu ei ta.

23 Chatawhcha chyhsa to pala nohpa zy, a nohsaihpapa zy, a sailawpa zy, pala rih dipa zy, mie hmi zy, mietahkupa tôhpa vo pasaipa zy, pivao vo zy a hneipa maihta vaw cheih chyu ei ta.

24 Chyhsa to tâkâ nata dawh zy a thyupa maihta, ABEIPA châta hmohlâ awpa vaw cheih ei ta; chatawhcha chyhsa to akeisha tho chhaichhi tôh châta hmâ tlâhpa a hmeipa maihta vaw cheih ei ta.

25 Chanô zôthaipa sahlao zydua chata pala pahi ei ta, cha pala-pahipa a nopazy a nosaipapazy a sailawpa zy, palaridipa zy cha vaw cheih chyu ei ta;

26 chanô zôthaipa ama palôh a dyupa sahlao zydua chhaota, mie hmi pahieh ei ta.

27 Ryureituhpazy ta theihthaipa viahpako nata viahpakao chachôhna liata kiky paky awpa ta bery lô zy nata lôsôhpa zy vaw cheih ei ta,

28 rohpahâhpa zy, sathaw zy chhaota pakhai awpa ta zy, sathaw a thupa châta zy, rao awpa rohpahâh ngaitapa châta zy chhao.

29 Izarel pathlazy chata chyhsa to  a chanô a chapaw; ABEIPA ta Mawsi ku liata hmo tao awpa ta bie a piepa zydua tao awpa ta, pathipalôh byuh ngaitapa ta a cheihtuhpazy chata ABEIPA lâta ama lôhthai ta hmohlâpa vaw hlâ ei ta.

Bezalel nata Ôhôliaba awna(Pu 31:1-11)

30 Mawsi ta Izarel pathlazy hnohta, “Pachâ teh u, ABEIPA ta Zudah pho liatahpa Hura sawchapawpa Uri, cha chyhsa sawchapawpa Bezalel cha  tlyh haw;

31 cha chyhsa cha sona zy, novâhna zy, pahnona zy, kyh to liata zôthaina zy hnei awpa ta, Khazohpa Thlahpa ta bi haw ta,

32 hmo tao awpa so ngaitapa ta pachâpady thaina zy, ngôh nata tâkâ nata dawh dai thaina zy,

33 alôsôhpa zy, a bô awpa ta patlaw thaina zy, tho a pangia thaina zy, kyh to liata zôthaina zy hnei awpa ta.

34 Chatawhcha ano nata Dana pho liatahpa Ahisama sawchapawpa Ôhôliaba nata chyhsazy pachu theina, sona pie rairieh ta.

35 Amo cha kyh to liata zôthaina zy, khâpaleipa roh thaina zy, pala nohpa zy, a nohsaipapa zy, a sailawpa zy, pala ri dipa pabaohpa zy, kiky thaina zy, poh sa thaina zy, raihria to thaina zy, hmo tao awpa ta so ngaitapa ta pachâ padyh thaina zy hnei awpa ta pathipalôh sona ta a pabie haw. 

Puasaina Bo 34

Puasaina Bo 34

Alôphiapa ei nona (Rc. 10:1-5)

1 ABEIPA ta Mawsi hnohta, “Alô phia miano hmia lâ tahpa hawhta khaih teh; alô phia liana chata hmialâta na pakei hawpa alô phia liata bie a chohpa hawhna kha ei roh heih aw na.

2 Mylâ my ta ama chhua lâ, chatawhcha mylâ chata Sinai Tlâh liata a khy la, tlah laki liata ei hmiakô liata a vaw duah mah y.

3 Na hnohta ahyhmah ta a khy kha ei se, tlâh liata rai ahyhmah ta  â lâ rai ta a kaw lâ cha chei kha ei se; mietahkupa zawzy nata viahchao zawzy chhao, tlâh liana chata a lao bâ hra kha se,” tah ta.

4 Chatanachata Mawsi cha alô phia miano, hmialâtahpa hawhta khaih ta; Mawsi cha mydi ta thyu ta, ABEIPA ta bie a piepa hawhta Sinai Tlâh lâna chata khy ta, alô phia miano cheih ta.

5 Chatawhcha ABEIPA cha meihdo liana chata a zu ta, a kiahpâh liata a kei duah ta, ABEIPA moh cha phuah haw ta.

6 ABEIPA chata a hmiakô lâna chata sie pakhô ta, “ABEIPA cha, ABEIPA cha, Khazohpa kyhpachâna ta a biepa, chyhsa ngiachhie thei ngaitap, pathi nai ngaitapa, nônaipa nata bie hmeiseihpa a hnei hluhpa,

7 chyhsa sâh hlhpi chô liata ngiachhiena a palâsa tyhpa, taopasiana nata paraonazy, molei hmo paraonazy a ngiahthai tyhpa, thai leipa ta a raopazy, a papua thlâh ha beih leipa, pawzy hmoparaona vâta sawzy nata chhâ hluhpi chhâ thôhna nata chhâ palihna taih chhao ta a hrie tyhpa cha,” tahpa ta phuah haw ta.

8 Chatanachata Mawsi cha, a lei lâ a luh a bôh parah ta, a chhy ta.

9 Ano chata, “Atahmâ he, na mo dypa ei châ khiahtala, hy ABEIPA, ABEIPA cha eima hnohta ngiachhiepa ta sie hra mawh sy, phopi chhoru ngaitapa châ tlôh ei ta, chatanachata eima paraona nata eima moleina a ngiahthai la, na ryu to awpa châta maniah hnei mah y,” tah ta.

Biehraina taopathipa(Pu 23:14-19; Rc. 7:1-5; 16:11-17)

10 ABEIPA chata, “Pachâ teh, bie ei hraih hih. Khizaw zydua nata ahy pho hry liata hmahta tao beih leipa, na chyhsa zydua mohmô liata hmonoâhpa ei tao aw; chatanachata na kiapâh liata a ypa sahlao zydua heta, ABEIPA hmo taopa ama hmô aw; na châta ei tao awpa hmo he rarôy ngaitapa châ tlôh aw ta.

11 “Atanoh ta bie ei cha piepa he a pyh teh, na hmiakô liana chata Amawri mo zy, Kana mo zy, Hiti mo zy, Periza mo zy, Hivi mo zy, Zebu mo zy chhao ei papua aw.

12 A chado teh; chatanachata na siena awpa râh liata a pahrâpazy hnohta bie hrai aw chi ta, nama hry liana heta khohei a vaw châ pathlei aw na.

13 Anodeikuacha ama maisâhzy cha nama parao khai awpa châ ta, ama lôbôzy cha pakei khaipa ta, ama Aherahzy cha nama thlu khai awpa a châ,

14 khazoh hropa rai cha namâ chhy awpa châ leipa ta, ABEIPA cha a moh rai chhao Hiatlia a hmâhpa châ ta, Khazohpa hiatlia a hmâhpa châ tlôh ta,

15 chata leipa ta cha, cha râh liata chyhsazy hnohna chata bie hrai aw chi ta, ama khazohzy liata a phei aw ei ta, ama khazohzy hnohta a theih aw ei ta, ama cha vaw hrua nahta, amâ theihna cha nama nie pathlei aw na,

16 chatawhcha ama sawchapawpazy chata ama sawchanôzy hneipa ta, ama sawchanôzy cha ama khazohzy liata a phei aw ei ta, nama sawchapawzy chhao ama khazohzy liata ama papheisa pathlei aw na.

17 “Nohthla leipa khazohzy cha na tao awpa châ vei.

18 “Viahchhâ thinô a hlao leipa kyhchhina na tao awpa a châ. Bie ei cha piepa hawhna khata, noh sari chhôh cha viahchhâ thinô pahlao leipa Abi thla liata daihti raopa liana khata na nie awpa a châ; Abi thla liana khata, Izi râh tawhta na vaw puapa châ tlôh ta.

19 Chhi a pahy tua chaipa maih cha ei châta a châ, chatawhcha na sahroh chapawpa zydua viahchao tôhpa nata mietahkupa tôhpa a patawh tua chaipazy chhao

20 Alâ a patawh tua chaipa cha, mietahkupa taw ta na chatlai awpa a châ, na chatlai khoh vei khiahta cha a rao nâ thli awpa a châ. Na sawchapawpa a pih tuapa zydua cha na chatlai awpa a châ. Chatawhcha ei hmiakô liata ahyrai ku ruapa ta namâ vy awpa châ vei.

21 “Noh charu chhôhta rai na hria awpa châ ta, a noh sari noh deikua cha alei palie hai no nata sâh hria nota chhao na pahâ awpa a châ.

22 Noh sari nohzy kyhchhi sa a daih tuapa kyhchhi cha, kô vaw lei ta sâh pakhy khai tawhta peitla kyhchhi chhao nm hnei awpa a châ.

23 Na chapaw zydua cha kô khata ei thôh ABEIPA KHazohpa, Izarelzy Khazohpa hmiakô liana chata ama vaw la tyh awp a châ.

24 Na hmiakô liata phopi to papuapa ta na râhrizy cha pakawh tlôh na ta, kô khata ei thôh ABEIPA na Khazohpa hmiakô liat a lâ awpa ta nâ khy tina chata, ahyhmah ta na râh he uava aw veih ei.

25 “Kei châta atheihna sa thisaih cha viahchhâ thinô pahlaopa nata na vaw hlâ awpa châ vei; Zawpakhô kyhchhi a theihna chhao cha, a mylâ taihta paysa awp châ hra vei.

26 Na lyu liata chicheipa a daih tua chaipa cha ABEIPA na Khazohpa o liata na vaw soh awpa a châ. Mie taw sa a panô sâhpiti ta na chho awpa châ vei,” tah ta.

27 ABEIPA ta Mawsi hnohta, “He biezy he roh teh; he biezy heta na hnohta nata Izarelzy hnohta bie ei hraihpa cha a châ,” tah ta.

28 Cha liana chata ABEIPA hnohta noh sypalih nata zâ sypalih y ta; pati rai nie leipa ta, ti chhao doh hra vei. Chatawhcha alô phiapa lianazy chata biehraina biehrawh piepazy cha roh hra ta.

Mawsi cha tlâh tawhta za chô ta

29 Mawsi cha bie pahnosana lô phipu mino cha a ku ta chbapa ta Sinai Tlâh tawhtapa cha za chô ta, tlâh tawhtapa a chô nah chata, Mawsi cha, cha hawhta bie mâ chhopa vâna chata, a hmia vo cha a vaw khaih haw tahpa pahno chachei leipa ta.

30 Arawna nata Izarel pathla zydua ta Mawsi ama hmô nahta, a hmia vo cha vaw khaih ta, a hnia ngâh leipa ei ta.

31 Châhrasala Mawsi ta âmo sahlao cha aw ta; chatawhcha Arawna nata  pahmaohpakhypa sahlao ryureituhpa zydua cha, ano lâta vaw kua heih ei ta, chatawhcha Mawsi ta âmo sahlao cha bie a chho ta.

32 Cha hnôh lâna chata Izarel pathla zydua cha a vaw hnia ei ta, Sinai Tlâh liata ABEIPA nata bie amâ chhopa zydua cha bie piepa ta chho pachhuah ta.

33 Chatawhcha Mawsi ta âmo cha a chho khai nata a hmia cha hmia khuna ta a khu ha ta;

34 anodeikuacha Mawsi ABEIPA bie a chho awpa ta a hmiakô liata a ngia ti maihna chata, a pua heih hlâ lei ta cha, hmia khuna cha pahluh tyh ta; chatawhcha vaw pua heih ta,

35 Izarel pathlazy chata Mawsi hmia cha moh ei ta, Mawsi hmia vo cha vaw khaih tyh ta, Mawsi cha Khazohpa bie a chho awpa ta a ngia heih hlâta cha hmia khuna khuna chata a hmia  khu heih tyh ta. 

Puasaina (Exodus)

1	2	3	4	5	6	7
8	9	10	11	12	13	14
15	16	17	18	19	20	21
22	23	24	25	26	27	28
29	30	31	32	33	34	35
36	37	38	39	40