Tilaipi Saihpa chakana
1 Chatawhcha ABEIPA ta Mawsi bie chho ta, a hnohta,
2 “Izarel pathlazy hnohta heta bie reih teh, kua heih sala Mikadô su nata tilaipi likawh Pihahirô su Baalzephô kiapâh liana chata a rie ei sala, cha a vaw daihpa tilaipi kiah liana chata namâ rie aw.
3 Phirao ta Izarel pathlazy kyh liata, ‘Lyurâhpa liata ama nô a po na, râhpathohpa liata amâ tâh haw,’ tah aw ta,
4 Keima ta Phirao pathiplôh cha kuh pachhasa aw na ta, chatanachata âmo cha a chadai aw ta, keima ta Phirao liatahpa nata a pheisaih zydua tawhna chata palyupalihna cha ei hlao aw; chatanachata Izi chyhsazy ta kei he ABEIPA cha ei châ tahpa ama pahno aw,” tah ta. Izarel sahlao ta cha hawhna chata tao ei ta.
5 Chyhsazy cha amâ râ khai haw tahpa Izi beipa cha chho pa a châ pata nahta Phirao pathipalôh nata a chakaotuhpazy pathipalôh cha a palie heih ta, “Izarel chyhsazy maniah ama chakao ngâpa ta eima papua thlâhpa he, kheihtazie ta ma he hawhta a taopa eima châ tly?” tah ei ta.
6 Chatawhcha a talailizy a chhuahdy ta, a pheisaihzy cha a hnohta a chhi ta,
7 talaili za charu pha ngaitapa a tlyh ta. Izi râh liata talaili zydua ama chô liata hyutuhpazy chhaota a chhi haw ta.
8 Chatawhcha ABEIPA ta Izi râh beipa Phirao pathipalôh kuh pachhasa ta, Izarel pathlazy cha chadai haw ta, Izarel pathlazy cha a kho ngaitapa ta pua tlôh ei ta.
9 Izi chyhsazy chata arâ zydua nata Phirao talailizy nata arâ chô a kiahpa chyhsazy nata a pheisaihzy chhao chata chadai haw ei ta, chatawhcha Pihahirô su liana chata Baalzephô su a daihpa tilaipi kiah liata amâ riena liana chata za pha haw ei ta.
10 Phirao ta pangaipa ta a hnia nota, Izarel pathlazy cha vaw sai ei ta, chatawhcha Izi chyhsazy chata âmo lâna chata pangai ei ta; Izarel pathlazy chata vaw chi ngaita ei ta, ABEIPA cha aw haw ei ta.
11 Mawsi hnohta, “Izi liana khata thlâ y leipa vâta ma, râhpathohpa liana heta thi awpa ta maniah na chhitha tly? Khâpa vâta e he hawhna heta maniah tao awpa ta Izi tawhtapa maniah na puakhei tly?
12 Izi liana chhao khata, ‘Izi chyhsazy chakao awpa ta eima y thlâh ha aw na,’ tahpa ta nâma liana khata reih haw tlai mapi mâ? Râhpathohpa liata thi thlâh hawpa hlâta cha, Izi chyhsazy vaw chakao ei sihla tlao a pha via hih,” tah ei ta.
13 Mawsi ta zawpizy hnohna chata, “Chi leipa ula, y molo thlâh ha teh u, ABEIPA pachhana atanoh a cha taopa awpa ei he, moh thlâh ha teh u; atanoh Izi chyhsa nama hmôpazy he chhâzaw ta hmô heih khao aw veih ei chi.
14 ABEIPA ta châ dyuhpa aw ei ta, nâmo cha nama y molo thlâh ha aw,” tah ta.
15 ABEIPA ta Mawsi hnohna chata, “Khâpa vâta ma eina aw ei tly? Izarel pathlazy he sie lymâ awpa ta chho teh.
16 Nâma chhao na chôhchahrei kha chalo la, tilaipi chô liana khata pazawh la, ti cha vaw pachhaih mawh sy, chatanachata tilaipi chhôh alei hipa liata Izarel pathlazy cha ama sie aw.
17 Keima ta Izi chyhsazy pathipalôh cha kuh pachhasa aw na ta, chatanachata amâ chadai lymâ aw, Phirao tawhtapa nata a pheisaih sahlao zydua tawhtapa nata a talailizy tawhta nata arâ chô a kiahpa chyhsazy tawhna chata palyupalihna cha ei hlao aw.
18 Phirao tawhta nata a talailizy tawhta nata arâ chô a kiahpa chyhsazy tawhna cha palyupalihna ei hlao tina chata Izi chyhsazy ta kei he ABEIPA cha ei châ tahpa ama pahno aw,” tah ta.
19 Chatawhcha Khazohpa vâlyuhchâpa Izarel chyhsazy ama hmia lâta chhitha tyhpa kha ta ama hnôh lâta a pasie haw ta; chatawhcha ameitô kha, ama hmialâ tawhta pasie ta, ama hnôh lâta a duah ta,
20 Izi chyhsazy nata Izarel chyhsazy likawh liata vaw tla haw ta. Ameih nata zohna y hra ta; anodeikuacha ameih chata zâ cha pakhaihsa ta, zâ khihdei ta ahy lâta hmahta a pangai leipa ei ta.
21 Mawsi ta tilaipi chô liata a ku vaw pazawh ta; ABEIPA ta zozâ khihdei ta nochhi thlih thata vaw pathlisa ta, tilaipi cha hnoh lâ to ta, tilaipi cha alei hipa lâta pachâsa ta, chatawhcha tizy cha a vaw pachhaih ha ta.
22 Chatawhcha Izarel pathlazy cha tilaipi chhôh alei hipa liana chata sie haw ei ta, tizy cha ama chachâh lâ nata ama chavei lâna chata ama châta pâhchhô hawhta vaw châ ta.
23 Izi chyhsazy chata chadai ei ta, Phirao arâ zydua nata a talailizy nata arâ chô a kiahpazy chata, tilaipi chhôh liana chata chadaipa ta a ngia ei ta.
24 Khihdei pata nahta ABEIPA ta Izi chyhsazy cha meitô nata ameihtô liana chata za moh ta, chatanachata Izi chyhsazy cha ama nô za paposa ta,
25 ama talaili pheizy ch thlopa ta, a chatliepa ta pasiesa thei khao leipa ta; chatanachata Izi chyhsazy chata, “Izarel sahlaozy he râsai ei suh u, ABEIPA ta âmo lâ a châh ta, he chyhsazy he Izi chyhsaszy â dyuhkhei hih,” tah ei ta.
26 Chatawhcha ABEIPA ta Mawsi hnohta, “Izi chyhsazy, ama talailizy, ama arâ chô a kiahpa chyhsazy cha, ti ta âmo chô liata a khu thei nawpa ta, na ku kha tilaipi chô liata vaw pazawh teh,” tah ta.
27 Chatawhcha Mawsi ta tilaipi chô liana cha a ku cha pazawh ta, khih a dei pata nahta tilaipi cha, a loh tyhpa hawhta loh ha heih ta; chatawhcha Izi chyhsazy cha kua heih ei ta, ABEIPA ta Izi chyhsazy cha tilaipi chhôh liana chata thy haw ta.
28 Tizy cha loh ha heih ta, chatanachata talailizy nata arâ chô a kiahpazy, tilaipi liata a chadaituhpa Phirao pheisaih zydua cha ti ta vao khai haw ei ta; pakha hma ta a puapa j leipa ei ta.
29 Izarel pathlazy deikua cha, tilaipi chhôh alei hipa liana chata sie khai haw ei ta, tizy cha ama chachâh lâ nata ama chavei lâna chata ama châta pâhchhô vaw châ ha ta.
30 Cha hawhna chata ABEIPA ta Izarel sahlaozy cha cha noh liana chata Izi chyhsazy ku tawhta a pachha; chatawhcha Izarel sahlaozy chata Izi chyhsa a thipazy cha tilaipi kiah liana chata hmô ei ta.
31 Izarel sahlaozy chata ABEIPA ta Izi chyhsazy chô liata hmo rôhnah ngaitapa a taopa cha hmô ei ta, zawpizy chata ABEIPA cha chi ei ta; chatanachata ABEIPA nata a chakaotuhpa Mawsi cha a ngiapâ haw ei ta.
| 1 | 2 | 3 | 4 | 5 | 6 | 7 |
|---|---|---|---|---|---|---|
| 8 | 9 | 10 | 11 | 12 | 13 | 14 |
| 15 | 16 | 17 | 18 | 19 | 20 | 21 |
| 22 | 23 | 24 | 25 | 26 | 27 | 28 |
| 29 | 30 | 31 | 32 | 33 | 34 | 35 |
| 36 | 37 | 38 | 39 | 40 |