Mawsi pina
1 Chyhsa pakha Livai chhôhkhapazy hry liata pua ta, Livai sawchanônô lahpinô ta hnei ta.
2 Chanô cha saw phaoh ta, sawchapawpa sa ta; a nô chata hawti cha hmipha tah ngaita ta, thla thôh nyu ta.
3 Chatawhcha khâ nyu thei thlâh ha khao leipa ta a nô chata maitanô balyh la ta, cha cha chiatlao nata a baina ta bai ta; hawti cha cha liana chata pazia ta, chavah kiah liata râhbu hry liana chata soh haw ta.
4 Chatawhcha a chô liata khâpa rimâ a tlô aw tahpa pahno a chhuahpa ta, a sietanô cha lâhlapi liata a duah ta.
5 Phirao sawchanônô cha chavah lâ a ngai a sie awpa ta zu ta, a laihsazy cha ngiakâ liana chata charei hra ei ta; râhbu hry liata a byh a hmô nata a laihsanô kei palasa ta.
6 Chatawhcha a vaw pahy nahta hawsai cha hmô ta; pachâ teh, hawsaih cha cha haw ta. A ngiachhie ngaitata, “Hebrai saw a châ he zaw,” tah ta.
7 Chatanachata a sietanô chata Phirao sawchanônô hnohna chata, “He hawsaih châ hâpa awpa ta, Hebrai chanô nawhâtuhpa cha aw pa aw sah y?” tah ta.
8 Chatawhcha Phirao sawchanônô chata a hnohta, “Sie teh,” tah ta. Chatawhcha laihsa cha sie ta, cha hawsaih nô cha kei aw haw ta.
9 Phirao sawchanônô chata a hnohta, “He hawsaih he siekhei la, na hâpa mah y, hlao cha pie la vâ na,” tah ta. Chatanachata chanô chata hawsaih cha la ta, a pyh haw ta.
10 Chatawhcha hawsaih cha vaw laiseih ta, Phirao sawchanônô lâta chhitha ta, a sawchapawpa ta y haw ta; chatawhcha “Ti tawhta ei lapa vâta,” tah ta a moh ta Mawsi bi ta.
Mawsi cha Midia lâ â râ
11 Cha nona chata Mawsi a vaw pitlo nahta a unawhpazy a kei hmô ta, ama phaohripazy cha kei hmô ta; chatawhcha Izi chyhsa pakha heta a unawhpa pakha Hebrai chyhsa he a tu haipa hmô ta.
12 Mawsi cha mohmia pasaih ta, ahyhmah y veih ei tahpa a pahno pata nahta, Izi chyhsa cha tusao ta, alei liata pabu haw ta.
13 A mylâ ta a kei pua heih no ta, Hebrai chyhsa pano a vaw tu ei ta; chatawhcha a thai lei viapa hnohna chata, “Khazia e na viasa na tu tly? tah ta.
14 Ano chata, “Eima chô liata hyutuhpa ta nata ryureituhpa ta ahyma châ tao? Izi chyhsa na thiepa hawhna khata thie einâ chhuah chi mâ?” tah ta. Chatawhcha Mawsi cha chi ta, “Ama pahno ha tlai he zaw,” tah ta.
15 Phirao ta cha cha a pahno pata nahta Mawsi cha thieh a chhuah haw ta. Châhrasala Mawsi cha Phirao tawhtapa cha a râ ta, Midia râh liata y haw ta; tikhaoreipa kiah liana heta a tyuh ta.
16 Midia râh liata theihthaipa chata sawchanônô pasari hnei ta; chatawhcha âmo chata ti vaw thaih ei ta, ama paw mietahkupa zaw do awpa ta, ti dona châkizy cha pabie ei ta.
17 Mietahkupa vaihtuhpazy a vy ei ta, vaw to ei ta; Mawsi deikua cha vaw thyu ta, âmo vaw bao ta, ama mietahkupa zaw cha ti padosa haw ta.
18 Ama paw Reuel lâta ama kei tlô nata ano chata, “Kheihtazie ta e atanoh cha nama vaw tlô hmâ kaw dia?” tah ta.
19 Amo chata, “Izi chyhsa pakha ta mietahkupa vaihtuhpazy tawhtapa maniah a pachha, cha dei châ leipa ta, tizy maniah thaipa ta, mietahkupa zaw cha ti a padosa,” tah ei ta.
20 Ano chata a sawchanônôzy hnohna chata, “ Ano cha khataih liata a y? Kheihtazie ta namâ vysai thlâh haw? Aw ula, patizy a vaw niena hâh ta,” tah ta.
21 Chatawhcha Mawsi chata cha chyhsa hnohta ypa cha â ryh tah ta, a sawchanônô Zipôrah cha Mawsi pie ta.
22 Ano chata sawchapawpa sa ta, Mawsi ta a moh Kesaoma bi ta; “Chyhsa râh liata a paihpa ei châpa vâta,” tah ta.
23 Noh hluhpi rakha tawhna chata Izi beipa cha thi haw ta. Chatawhcha Izarel pathlazy cha ama raihria ru ngaitapa vâna chata a hrô ei ta, baotuhpa aw ei ta, chatanachata ama raihria ru ngaitapa vâta ama awpa ao cha Khazohpa lâta kaw tlô haw ta.
24 Khazohpa ta ama hrôpa cha vaw thei ta, Khazohpa ta Abaraha zy, Aisika zy nata Zakaw zy hnohta a biehrai kha a thei thlâh ta.
25 Chatawhcha Khazohpa ta Izarel pathlazy cha sai thlâh ha ta, Khazohpa chata âmo cha za pachâ thlâh ha hra ta.
| 1 | 2 | 3 | 4 | 5 | 6 | 7 |
|---|---|---|---|---|---|---|
| 8 | 9 | 10 | 11 | 12 | 13 | 14 |
| 15 | 16 | 17 | 18 | 19 | 20 | 21 |
| 22 | 23 | 24 | 25 | 26 | 27 | 28 |
| 29 | 30 | 31 | 32 | 33 | 34 | 35 |
| 36 | 37 | 38 | 39 | 40 |