Saw tuapa pananona
1 ABEIPA ta Mawsi hnohta reih ta, “Saw tuapa zydua kei châta nama panano awpa a châ;
2 Izarel pathlazy hry liata chhi a pahy tuapa maih, chyhsa rai, sa rai, kei eih a châ,” tahpa ta.
Viahchhâ thihnô pahlao leipa kyhchhi
3 Mawsi ta zawpizy hnohna chata, “Atanoh Izi râh tawhta sei tawhta nama puana noh he pahno thlâh ha teh u. Ku thatlô ngaitapa ta ABEIPA ta he su tawhtapa he a cha papua ei hih; atanoh châta viahchhâ thihnô pahlaopa rai cha nama nie awpa châ vei.
4 Abi thla, atanoh liana heta nama pua. 5 ABEIPA ta Kana mozy, Hiti mozy, Amawri mozy, Hivi mozy, Zebu mozy râh, kheihti nata sâhpiti ta a lona râh, nama pathlatuhpazy chhiesapa ta bie a taihpa liana khata a cha tlôkhei tita, he thla liana heta, he chakaona he nama pazao awpa a châ.
6 Noh sari chhôh cha viahchhâ thihnô pahlao leipa nama nie awpa châ ta, chatawhcha a noh sari noh cha, ABEIPA châta kyhchhi noh a châ aw.
7 Noh sari chhôh cha viahchhâ thihnô pahlaopa rai nama nie awpa châ vei; viahchhâ thihnô pahlaopa rai ch y kha se, nama râhri zydua liata rai thihnô chhao y hra kha se.
8 Cha noh liana chata nama sawzy hnohta, Izi râh tawhta eima vaw pua nona khata ABEIPA ta hmo maniah a vaw tao papa vâta a châ,’ tahpa ta nama chho awpa a châ.
9 ABEIPA ryhpa cha nama pakah liata a y thlâh ha thei nawpa ta, nama ku liata nama châta pahnona nata nama moh likawhta a thei thlâh hana awpa a châ aw: ku thatlô ngaitapa ta ABEIPA ta Izi râh tawhta a cha papua ei hih.
10 He bie raopa he kô chareih a daihti liata nama ô tyh awpa a châ.
Saw tuapa
11 “ABEIPA ta nama hnohta nata nama pathlatuhpazy hnohta, ‘Chhiesapa ta bie a chataih hawpa hawhta Kana mozy râh lâta cha tlôkheipa ta a cha pie tina chata,
12 chhi a pahy tuapa maih nata nama sahroh a patawh tuapa maih cha ABEIPA châta nama panano lymâ awpa a châ. A chapawhpazy cha ABEIPA châta a châ aw.
13 Alâ a patawh tuapa maih cha mietahkupa taw ta nama chatlai awpa a châ, nama chatlai khoh vei khiahta deikua cha, a rao namâ thli awpa a châ. Nama sawzy hry liata chapaw a pih tuapa maih cha nama chatlai awpa a châ.
14 Nohro ta nama sawzy ta, ‘He he kheihtazie ta tlyma,’ tahpa ta ama cha hiahri tita, nâmo ta ama hnohta, ‘Ku thatlô ngaitapa ta ABEIPA ta Izi râhtawhta sei ta eima ypa kha maniah a papua.
15 Phirao ta eima puana kyh a parusa kaw nona khata, ABEIPA ta Izi râh liata saw tuapa zydua, chyhsapa saw tuapa maih nata sahroh a patawh tuap maih cha thie khai ha ta. Chavâta a chapawhpa chhi a pahy tuapa maih ABEIPA lâta eimâ theihna he; anodeikuacha eima sawchapawpazy hry liata saw tuapa zydua cha eima chatlai,’ tah muh vy.
16 Nama ku liata nama châta pahnona a châ aw, nama mo nata nama mo likawhta khirienazy chhaota; ku thatlô ngaitapa ta ABEIPA ta Izi râh tawhtapa maniah papua haw tlôh ta,” tah ta.
Meitô nata ameihtô
17 Phirao ta chyhsazy cha papua a pasai pata naht, Khazohpa ta Philistina mo râh lâna chata hnia via tarawpa ta a chhi leipa ta; Khazohpa ta, “Adyuhnazy ama hmô nata a ngiapachhi aw ei ta, Izi râh lâta ama kua pathlei aw na,”tah tlôh ta.
18 Anodeikuacha Khazohpa ta chyhsazy cha Tilaipi Saihpa lâta pangaipa ta, râhpathohpa lâta tlao chhihtha haw ta. Izarel pathlazy cha Izi râh tawhtapa cha a hrohruana chôta pua ei ta.
19 Mawsi ta Zawsi ruzy cha a hnohta siekhei ta; Izarel pathlazy cha, “Khazohpa ta za tly thlyu aw ei ta, ei ruzy he, he tawhtapa nama phaoh awpa a châ,” tahpa ta chhie vaw pasasa tlôh ta.
20 Sukô su tawhtapa cha pua ei ta, râhpathohpa Ethama su liata a rie ei ta.
21 Chatawhcha ABEIPA cha ama hmiakô liata sie ta, zâna chata âmo pakhai awpa ta meitô ta a chhi t, chhô nata zâ cha ama sie thei lymâ nawpa ta,
22 nohchhô ta ameihtô a duahpa nata zâta meitô chata zawpi cha siesai beih leipa ta.
| 1 | 2 | 3 | 4 | 5 | 6 | 7 |
|---|---|---|---|---|---|---|
| 8 | 9 | 10 | 11 | 12 | 13 | 14 |
| 15 | 16 | 17 | 18 | 19 | 20 | 21 |
| 22 | 23 | 24 | 25 | 26 | 27 | 28 |
| 29 | 30 | 31 | 32 | 33 | 34 | 35 |
| 36 | 37 | 38 | 39 | 40 |