MAWSI CHÂBU SÂNONA AMA TAHPA CHA
Izi râh liata Izarel mozy riepatheina
1 Hezy he Izarel sawchapawpa Izi liata a ngiapazy moh cha a châ, chyhsa to ama chhôhkhazy chyuta Zakaw hnohta a siepazy cha;
2 Rubena zy, Simeôna zy, Livai zy, Zudah zy,
3 Iskara zy, Zebulawna nata Benzami zy,
4 Dana nata Nathalai zy, Kada nata Asera zy,
5 Zakaw pathla zydua cha chyhsa sysari ama châ; Zawsi cha Izi râh liata a vaw y chiehpa châ ta.
6 Chatawhcha Zawsi nata a unawhpa zydua nata cha chhâ sahlao zydua cha thi khai haw ei ta.
7 Izarel pathlazy chata chi hluhpi pathla ei ta, thata pôh ei ta; hluh ngaita ei ta, ama tha tlô via rili ngâ ta; cha râh liana chata bie thlâh ha ei ta.
8 Izi râh liata Zawsi a pahno leipa, abei thiehpa vaw y haw ta.
9 A chyhsazy hnohta, “Pachâ teh u, Izarel pathlazy he keimo hlâta hluh viapa ta ama tlô via ha he zaw.
10 A vy ula, âmo he so ngaitapa ta tao ei suh u, chata leipa ta la vaw pôh lymâ aw ei ta, noh hrota adyuhnazy a vaw y nata eima khakhaipazy lâta a bai pathlei aw ei ta, maniah adyuh aw ei ta, he râh tawhtapa he maniah ama khysai aw na,” tah ta.
11 Chavâta ama phaohripa ta rie pathei awpa ta ama chô liata raihria a vaihtuhpazy rao haw ei ta; Phirao châta hmodâh sopakhy nawpa ta Pithôma nata Ramese khihzy tao ei ta.
12 Châhrasala âmo cha thata rie ama pathei nahta pôh via rili ei ta, a vaw hie patla rili ei ta. Chatawhcha Izarel pathlazy vâna chata pachârôhpa ta y haw ei ta.
13 Chatawhcha Izi mozy chata Izarel pathlazy cha riethei ngaitapa ta pahriasa ei ta,
14 raihria ru ngaitapa, alô baina nata alei raopazy pataosapa nata lyu liata rai tozy riethei ngaitapa ta pahriasapa ta thata hmâh ei ta; ama hriana zydua liana chata, riethei ngaitapa ta hmâh lymâ ei ta.
15 Chatawhcha Izi abeipa chata Hebrai nawhpaytuhpazy cha bie a chho ta, cha chyhsazy pakha moh cha Sipra nata a hropa moh cha Puah châ ta,
16 ama hnohna chata, “Hebrai chanôzy nawh yna su lâta nawh nama pay tita, chapaw saw a châ khiahtala thih lyma mu vy; chanô a cha khiata deikua cha pahlôh awpa a châ,” tah ta.
17 Châhrasala nawhpaytuhpazy chata Khazohpa chi ei ta, Izi beipa bie a piepa hawhna chata tao khoh leipa ei ta, chapaw sawzy cha pahro lymâ hra ei ta.
18 Izi beipa chata nawhpaytuhpazy cha aw ta, ama hnohna chata, “Khazia he hawhta hmo tao eichi ta, chapaw sawzy cha nama pahro lymâ tly?” tah ta.
19 Nawhpaytuhpazy chata Phirao hnohta, “Hebrai chanôzy he, Izi chanôzy hawhta ama châ hra leipa vâta a châ; âmo sahlao he la ama nawh y nao pachaih ta, nawhpaytuhpazy ama vaw tlô hlâna heta, nawh amâ vaw chhaih ha tyh,” tah ei ta.
20 Chatawhcha Khazohpa ta nawhpaytuhpazy chôta phana kyh tao ta; chyhsazy cha vaw hluh kaw haw ei ta, ama tha tlô rili ta.
21 Nawhpaytuhpazy ta Khazohpa ama chipa vâta chhôhkha hneipa ta tao haw ta.
22 Chatawhcha Phirao ta, “Hebrai chapaw a pihpa maih cha Nile chavah liata thy aw eichi ta, chanô a pihpa deikua cha, nama pahro lymâ awpa a châ,” tahpa ta a chyhsa zydua cha bie pie ta.
| 1 | 2 | 3 | 4 | 5 | 6 | 7 |
|---|---|---|---|---|---|---|
| 8 | 9 | 10 | 11 | 12 | 13 | 14 |
| 15 | 16 | 17 | 18 | 19 | 20 | 21 |
| 22 | 23 | 24 | 25 | 26 | 27 | 28 |
| 29 | 30 | 31 | 32 | 33 | 34 | 35 |
| 36 | 37 | 38 | 39 | 40 |