Seizy pachâna kyh (Rc. 15:12-18)
1 Hezy he ama hnohta pachiana yzie awhpa na pahnosa awhpazy cha acha.
2 Hebrai chyhsa sei châta a chaleipa châ la, kô charu chakao aw ta, chatawhcha kô sari kô ta a chatlai leipa chhaota a pua thei aw.
3 Ano deitata a vaw ngiapa a châ khiahtala ano deitata a pua heih aw, lahpinô a hneipa a châ khiahtala a lahpinô chhao cha a pua hra aw.
4 A zibeipa ta lahpinô hiapa sala, chatawhcha sawchapaw tlyma, sawchanô tlyma vaw sapa sala, a lahpinô nata a sawzy cha a zibeipa eih châ aw ei ta, ano deikua cha ano deitata a pua awpa a châ.
5 Anodeikuacha sei chata, ‘Zibeipa zy, ei lahpinô zy, ei sawzy he ama kyh pachâ kaw na ta pua khoh va na,’ a tah khiahta la,
6 a zibeipa ta Khazohpa lâta a chhi sala, chhikao liata tlyma, chhikao tôh liata tlyma a chhi sala, chatawhcha a zibeipa ta a nahkao cha thua pazaohpa ta vieh sala; chatanachata chhâzaw ta a chakao aw.
7 “Chyhsa ta a sawchanônô cha sei ta zuah sala, seichapawzy hawhna chata pua aw vei.
8 A zibeipa chata a lahpinô châta a vaw pahawh sala, ano chata a zibeipa palysa thei tlôh leipa sala a chatlaisa heih awpa a châ; a dôpa vâna chata pho hropazy hnohta zuah heih theina hnei aw vei.
9 Chatawhcha a sawchapawpa chata lahpinô ta a pahawhpa khopa a châ khiahtala sawchanôzy mopa hawhta moh awpa a châ.
10 Lahpinô hropa hnei heih hra sala, a nie awpa sâhzy, a chysiazy a lahpinô a chânazy kha a pachyhsa awpa châ vei.
11 Cha kyh thôh cha a tao leipa khiahtala, tâkâ pie leipa ta a pua thei aw.
Nôchhiena taona ryhpa biezy
12 “Ahyrai ta chyhsa tu sala, cha chyhsa cha thi haw sala, thie thlyu hra awpa a châ.
13 Chyhsa ta â chhuahpa vâta châ leipa ta, Khazohpa patysapa a châ khiahta deikua cha a râ na awpa su ei cha rao pa aw.
14 Anodeikuacha chyhsa ta a chhuahpa ta a vaih cha piepiepa ta thie a chhuah sala, thie awpa ta ei maisâh tawhtapa cha a chhi mah y.
15 “Ahyrai a nô tlyma, a paw tlyma, a tupa maih cha, thi tlai awpa a châ.
16 “Ahyrai chyhsa parupa ta a zuahpa tlyma, a hnei thlâh ha nota tlyma, ama hmô khiahtala, cha chyhsa cha thi tlai awpa a châ.
17 “Ahyrai a nô tlyma, a paw tlyma, chhie a sa papa maih cha thi tlai awpa a châ.
18 “Chyhsa a ei ei sala, pakha chata alô ta a chô sala tlyma, a kutô ta a chô sala tlyma, thi cha thi leipa sala, anodeikuacha a rakhô liata a ziakheina taihta châ sala,
19 vaw thyu heih theipa ta, chôchahrei a chhypa ta sie thei sala, a chô liata ku a pathla thlutuhpa cha, pathaihpa a châ aw; a daihti pahryuna tlu khata deikua cha thô aw ta, a patlâ pasiasa awpa a châ.
20 “Chyhsa ta a chakaotuhpa tlyma, a seichanô tlyma, chôhchahrei ta tu sala, a ku ta thi haw sala, ano cha hrie thlyu awpa a châ.
21 Anodeikuacha noh kha tlyma, noh no tlyma hroh sala, hrie awpa châ aw vei; a chakaotuhpa cha ano sôh châ tlôh ta.
22 “Chyhsa a tu ei sala, chanô nawh a hneipa tu pathlei ha ei sala, a nawh hneipa cha rao sala, a raona hropa deikua cha y leipa sala, cha chanô vahpa chata a hawpa hawhta pacheisa thlyu awpa a châ, pachiatuhpazy raopa hawhta a pie awpa a châ.
23 Anodeikuacha raona hropa a y khiahtala hrona vyuhpa ta hrona,
24 mo vyuhpa ta mo, hâh vyuhpa ta hâh, ku vyuhpa ta ku, phei vyuhpa ta phei,
25 mei ta rao vyuhpa ta mei ta raopa, hma vyuhpa ta hma, tupa vyuhpa ta tupa, na pataosa awpa a châ.
26 “Chyhsa ta a chakaotuhpa mo tlyma, a seichanônô mo tlyma, tupa ta rao ha sala a mo vâna chata a papuasa awpa a châ.
27 A seichapawpa hâh tlyma, a seichanônô hâh tlyma palaosa ha sala, a hâh vâna chata a papuasa awpa a châ.
A hneituhpazy maohphaohna ryhpa biezy
28 “Viahchao tôhpa ta chapaw tlyma, chanô tlyma daih sao ha sala, cha viahchao tôhpa cha alô ta vawh sao tlai awpa châ ta, chatawhcha a sapa cha nie awpa châ leipa ta viahchao tôhpa a hneituhpa deikua cha a pathaih aw.
29 Anodeikuacha viahchao tôhpa ta, cha hlâ tawh raita chyhsa a daih tyhpa châ sala, chatawhcha a hneituhpa chhao cha, a pahnosa ha chiehpa châ sala, hrai khôh hlei tlôh leipa sala chapaw tlyma, chanô tlyma daih sao sala, cha viahchao tôhpa cha alô ta vaw sao awpa a châ, a hneituhpa chhao cha thie hra awpa a châ.
30 A chatlai ta ama chatlaisa khiahtala a hrona vyuhpa ta ama chatlaisapa zie maih cha chatlai nawpa ta pie awpa a châ.
31 Chyhsa sawchapaw tlyma, sawchanô tlyma rai daih saopa châ sala, he yzie hawhna heta pachia awpa a châ.
32 Viahchao tôhpa ta seichapaw tlyma, seichanô tlyma daih sao sala, ama zibeipa cha tâkâ sekel* sythôh pie aw ta, chatawhcha viahchao tôhpa cha alô ta vaw sao awpa a châ aw.
33 Chyhsa ta khaotlô phiehru pahy sala tlyma, chyhsa ta khaotlô chao sala tlyma, phiehru leipa sala, viahchao tôhpa tlyma, alâ tlyma tla sala,
34 cha khaotlô a hneituhpa chata a thô awpa a châ; ano chata cha sahroh a hneituhpa cha tâkâ pie aw ta, chatanachata ano ta sahroh a thiepa cha a to aw.
35 Chyhsa pakha viahchao tôhpa ta chyhsa viahchao tôhpa daih sao sala viahchao tôhpa a hropa cha zuah aw ei ta, a ty cha amâ rai aw; chatawhcha a thipa chhao cha amâ rai aw.
36 Viahchao tôhpa chata cha hlâ rai ta chyhsa daih thai kaw tyh sala, a hneituhpa chata hraih khoh leipa sala, viahchao tôhpa vyuhpa ta viahchao tôhpa lilaw cha a pie awpa châ ta, chatawhcha sahroh a thipa cha a to aw.
| 1 | 2 | 3 | 4 | 5 | 6 | 7 |
|---|---|---|---|---|---|---|
| 8 | 9 | 10 | 11 | 12 | 13 | 14 |
| 15 | 16 | 17 | 18 | 19 | 20 | 21 |
| 22 | 23 | 24 | 25 | 26 | 27 | 28 |
| 29 | 30 | 31 | 32 | 33 | 34 | 35 |
| 36 | 37 | 38 | 39 | 40 |