1 Mawsi chata, “Pachâ teh, na zo aw veih ei, ei ao na nahthlie hra aw veih ei, ‘ABEIPA cha na hnohta a luah ngyu vei, tah thlâh ha tlôh aw ei ta,” tahpa ta a chhy ta.
2 ABEIPA chata a hnohta, “Na ku liatahpa kha, khâpa e a châ?” tah ta. Ano chata, “Chôhchahrei,” tah ta.
3 Chatawhcha ano chata, “Alei liana khata thy tua,” tah ta. Alei liana chata thy ta, parih lâta a vaw lie haw ta; chatawhcha Mawsi chata a râsai ta.
4 ABEIPA chata Mawsi hnohta, “Na ku khata paza la, a lahmei lâta la tua,” (chatawhcha a ku chata paza ta, la ta, a ku liana chata chôhcharei lâta a vaw lie haw ta)
5 “ABEIPA ama pathlatuhpazy Khazohpa, Abaraha Khazohpa, Aisika Khazohpa, Zakaw Khazohpa cha, na hnohta a vaw luah tlai tahpa ama zo thei nawpa ta,” tah ta.
6 ABEIPA chata a hnohta, “Na ku khata, na chachôhna a hria tua,” tah heih ta. Chatawhcha a chachôhna cha a hria ta; vaw la nahta a ku cha dâhaw hawhta a râhpa ta vaw phawh haw ta.
7 Chatawhcha ano chata, “Na ku khata na chachôhna zâ hria heih tu,” tah ta. A chachôhna zâ hria heih ta, a chachôhna tawhta a la nahta, a sapa hropa hawh hra ta vaw y haw heih ta.
8 Chatawhcha, “Cha zo leipa ei sala, pahnona hmiatuapa cha amâ pyh khoh vei khiahtala, pahnona hnôh lâtahpa chhâ cha ama zo aw.
9 Cha pahnona miano tlai chhao cha, zo leipa ta na bie reipa chhao ama nahthlie vei khiahtala, Nile ti za thai aw chi ta, alei chawhkaraipa liata patlai aw chi ta; chavah tawhta ti na za thaipa cha alei chawhkaraipa liana chata thisaih lâta â vaw lie aw,” tah ta.
10 Châhrasala Mawsi chata ABEIPA hnohta, “Hy ABEIPA y, kei la, cha hlatazy nata na chakaotuhpa hnohta bie na vaw rei tawhna chhao heta, chyhsa reikah a hmâh thaipa châ beih va na; kachôhleiâhpa nata reikah sôhpa châ tlôh na ta,” tah ta.
11 ABEIPA chata a hnohta, “Chyhsa pakah he ahy taopa ma châ ta? Reih pathlie thei leipazy, nahpâpazy, mochaopazy chhao he, ahy taopa e a châ? Kei, ABEIPA heta châ vei mâ?
12 Chavâta sie thlâh ha teh, na pakah cha keima ta cha ypâ lymâ aw na ta, na rei awpa cha ei cha chho lymâ aw,” tah ta.
13 Ano chata, “Hy ABEIPA y, chyhsa hropa tuah thlâh ha mah y,” tah ta.
14 Chatanachata ABEIPA cha Mawsi chô liata a pathi-ia ta, a hnohta, “Na unawhpa Arawna, Livai chi cha y vei mâ? Ano ta a reikah hmâzie a thai tahpa ei pahno; nâma châdy awpa ta â vy mâh tâh, a cha hmô tita la a pathipalôh cha aly ngaita aw.
15 Chatanachata na pakah nata a pakah cha keima ta ypâ lymâ aw na ta, nama tao awpa cha ei cha chho lymâ aw ei.
16 Ano cha zawpi hnohta, na bie a rei pachhuahtuhpa a châ aw; na châta pakah châ aw ta, nâ cha ano châta Khazohpa hawhta na châ aw.
17 Chatawhcha he chôhcharei he chaba aw chi ta, cha chata hmonoâhpazy cha na tao aw,” tah ta.
Mawsi cha Izi râh lâ a kua
18 Mawsi cha a puhpa Zetharô lâta kua haw heih ta, a hnohta, “Izi liata ei unawhpa a ypazy cha, ama hroh tlyma, âmo lâta ngiachhiepa ta ei vawh chy tua aw,” tah ta. Chatawhcha Zetharô chata Mawsi hnohta, “Thlahlôhpa ta sie mah y,” tah ta.
19 Chatawhcha ABEIPA chata Midia râh liata Mawsi hnohna chata, “Sie la, Izi lâna chata vaw kua heih mah y, nâma thie châ chhuahtuhpazy kha, ama thi khai ha na,” tah ta.
20 Chatawhcha Mawsi chata a lahpinô nata a sawchapawpazy cha a chhi ta, alâ chô liata pakiasa ta, Izi lâna chata kua haw heih ta; Mawsi chata Khazohpa chôhcharei cha chabah ta.
21 Chatawhcha ABEIPA chata Mawsi hnohta, “Izi na tlô tina chata, na ku liata hmonoâhpa zydua ei cha chabasapa he Phirao hmiakô liana chata tao tlai mah y; châhrasala a pathipalôh kuh pachhasa na ta, chatanachata chyhsazy cha pasiesa aw vei.
22 Chatawhcha nâ ta Phirao hnohna chata, ABEIPA ta, Izarel he ei sawchapawpa, saw tuapa a châ na,
23 na hnohta, “Ei sawchapawpa chata eina chakao thei nawpa ta papuasa teh,” tah na ta; pasiesa awpa ta na pasai vei khiahtala, na sawchapawpa na saw tuapa cha, ei thie aw,’ a tah na, tah mah y,” tah ta.
24 Lâpi liata a riena su liana chata, ABEIPA ta Mawsi a tyh ta, thie a chhuah haw ta.
25 Chatawhcha Zipôrah chata chilô la ta, a sawchapawpa chopaw cha tai ta, Mawsi phei thaby liata thy ta, “Kei châta thisaih a palopa chyhsa myu a hneituhpa na châ tlai he!” tah ta.
26 Chatanachata pathlie haw ta; Zipôrah chata chopawtaipa vâta, “thisaih a palopa chyhsa myu a hneituhpa na vaw châ hih!” tah ta
27 ABEIPA ta Arawna hnohta, “Mawsi dy awpa ta râhpathohpa lâta va sie teh,” tah ta. Chatanachata sie haw ta, Khazohpa tlâh liata a kei tyh ta, sy ta.
28 Chatawhcha Mawsi chata ABEIPA ta a tuapa bie zydua nata hmonoâhpa a pataosa awpa zydua cha, Arawna chho khai ta. 29 Mawsi nata Arawna chata, Izarel pathlazy machâ sahlao zydua cha, aw pakhy khai ei ta.
30 Chatawhcha ABEIPA ta Mawsi hnohta a reipa zydua kha Arawna chata rei pachhuah khai heih ta, chatawhcha zawpizy hmôna liana chata hmonoâhpazy cha tao ta.
31 Chatawhcha chyhsazy chata zo haw ei ta; ABEIPA ta Izarel pathlazy cha za tly ta, ama rietheina ziezy a za hmô haw tahpa ama pahno nahta ama luh a bôh ei ta a chhy haw ei ta.
| 1 | 2 | 3 | 4 | 5 | 6 | 7 |
|---|---|---|---|---|---|---|
| 8 | 9 | 10 | 11 | 12 | 13 | 14 |
| 15 | 16 | 17 | 18 | 19 | 20 | 21 |
| 22 | 23 | 24 | 25 | 26 | 27 | 28 |
| 29 | 30 | 31 | 32 | 33 | 34 | 35 |
| 36 | 37 | 38 | 39 | 40 |