Achhyna byureih (Pu 36:8-38)
1 “Achhyna byureih pohraipa miahrawh a hneipa ta na tao hra awpa a châ, pala ri di ngaitapa pabaohpa a nohpa zy, a saihdôhpa zy, a sailawpa zy hmâpa ta; cherubi nohthlapa zy zôthai ngaitapa ta taopa pakiasapa ta na tao awpa a châ.
2 Pohraipa cha a seihna lâ dy syno nata dy charie chyu châ aw ta, a phiana lâ dy palih chyu a châ aw; pohraipa zydua cha a kho sai awpa a châ.
3 Pohraipa miapangawh cha â pazao awpa châ ta, chatawhcha pohraipa miapangawh a hrohpa chhao cha a pazao hra awpa a châ.
4 Pohraipa pazaopa miakha a pawhmao chaipa tlâh liana chata a nahli a nohpa ta na tao awpa châ ta, cha hawhna hra chata pohraipa pazaopa hiakhalâ a pawhmao chaipa tlâh liana chata na tao hra awpa a châ.
5 Pohraipa miakha liana chata a nahli sypangawh na tao awpa châ ta, chatawhcha pazaopa miakha pohraipa tlâh liana chhao chata nahli sypangawh na tao hra awpa châ ta, cha nahli zy cha â dady chyu awpa a châ.
6 Ngôh hraina na tao awpa châ ta, a hrainazy chata pohraipazy cha na hraih awpa châ ta, chatanachata achhyna byureih cha chhôhpadâhpa miaakha a châ awpa a châ.
7 “Achhyna byureih chô khu nawpa ta mie hmi pohraipazy na tao awpa a châ, pohraipa miahrawhleikha na tao awpa a châ.
8 Pohraipa cha a seihna lâ dy sythôh chyu a châ awpa châ ta; a phiana lâ dy palih chyu a châ awpa a châ; pohraipa miahrawhleikhazy cha a kho khai awpa a châ.
9 Chatawhcha pohraipa miapangawhzy cha na pazao khai awpa châ ta, pohraipa miacharu chhao cha na pazao hra awpa châ ta, poh-o hmia lâta pohraipa a miacharuna châta a khu awpa a châ.
10 Pohraipa pazaopa miakha tlâh liana chata nahli sypangawh tao hra awpa a châ.
11 “Dawh ta hraina sypangawh na tao awpa châ ta, cha hraina cha poh tlâh liata a nahli liana chata a patao awpa châ ta, poh-o cha pazao khai awpa a châ, poh miakha ta a châ thei nawpa ta.
12 Poh-o pohraipa a pathliahpa a laipa, a khophie a laipa cha achhyna byureih chhôchâ lâ a pathlia awpa a châ.
13 Poh-o pohraipa a doh lâ pawhmao rairieh dykha rairieh a laipa cha, achhyna byureih pâchhôh hiakha lâ nata hiakha lâ khu nawpa ta pathlia awpa a châ.
14 Mietahkupa tôhpa vo pasaipa ta poh-o chô khunazy, pihvao vo ta a chô liata khu pachhuahnazy na tao awpa a châ.
15 “Achhyna byureih thophia paryh awpazy cha a dopata ta a duahpa ta akeisha a tho ta na tao awpa a châ.
16 A thophia paryhpa seihna lâ cha dy hrawh châ sala, a hâ lâ cha dy kha nata a khophie châ chyu mawh sy.
17 Thophiapa paryhpa to liana chata a phei miano a pazao nawpa ta a y awpa a châ; cha hawhna chata achhyna byureih thophia paryhpa zydua cha, na tao awpa a châ.
18 Achhyna byureih châta thophia paryhpa chho lâ heih ta chho lâchhâh châta thophia paryhpa syno na tao awpa a châ.
19 Cha thophia paryhpa syno chata tâkâ ri patyuna sypalih na tao awpa a châ, a phei miano châta thophia châta thophia paryhpa miakha a patyuna miano nata thophia paryhpa hropa miakha a phei miano chata a patyuna miano na tao awpa a châ;
20 achhyna byureih kâ hiakha lâ maw lâ chhâna chata thophia paryhpa syno na tao awpa a châ,
21 cha châna chata a patyuna tâkâ ri sypalih chhaota, thophia paryhpa miakha châta a patyuna miano nata thophia paryhpa miakha châta patyuna miano na tao hra awpa a châ;
22 achhyna byureih chhôchâ notla heih lâ châta thophia paryhpa miacharu na tao awpa a châ.
23 Chatawhcha achhyna byureih chhôchâ ki rairieh châta thophia paryhpa miano na tao awpa a châ;
24 a hnei lâna chata pakyu awpa a châ, cha hawhna chata â sâhna lâ a nahli hmiatua chaipa taihta tao khai awpa a châ; cha hawhna chata a miano ta tao rairieh awpa a châ; cha cha a ki miano châta a châ aw.
25 Chatawhcha thophia paryhpa miacharie a patyuna awpa tâkâ ri patyuna miahrawhleicharu chhaota a y awpa a châ; thophia paryhpa miakha châta patyuna miano, thophia paryhpa hropa châta chhao patyuna miano lymâ.
26 “Akeisha tho cha a tlâhzy na tao aw, achhyna byureih pâchhôh hiakhalâ thophia paryhpa châta miapangawh,
27 achhyna byureih pâchhôh hiakhalâ thophia paryhpa châta a tlâh miapangawh, chatawhcha a chhyna byureih chhôchâ notla heih lâ thophia paryhpa châta chhao a tlâh miapangawh na tao awpa a châ.
28 A tlâh liahliah pa thophia paryhpa a liah liatahpa chata thophia paryhpa chhâna chaipa tawhta hiakhalâ a hrei pakhâh awpa a châ.
29 Thophia paryhpazy cha ngôh ta na pahu awpa châ ta, chatawhcha a tlâhzy hrei pakhâh nawpa ta ngôh nahlizy na tao awpa a châ; cha a tlâhzy cha ngôh ta na pahu awpa a châ.
30 Chatanachata tlâh liata ei cha pamosapa hawhna tlai khata achhyna byureih cha na sa awpa a châ.
31 “Pohraipa châta pala ri di ngaitapa pabaohpazy, a nohpa zy, a nohsaihpapa zy, a saihlawpa zy hmâpa ta cherubi nohthlahpazy zôthai ngaitapa taopa pachosapa ta na tao awpa a châ;
32 cha cha akeisha tho a tôh miapalih ngôh pahupa liana chata na parai awpa a châ, a baina cha ngôh ta tao awpa a châ, tâkâ ri patyuna miapalih liata a patyu awpa a châ.
33 Cha pohraipa cha, pohraipa hrainazy ry lâna chata Biehraina Byh cha na soh awpa a châ; chatanachata cha pohraipa châta su pathaihpa nata su pathaih chaipa cha a pachhaihna a châ aw.
34 Zawngiahna dyuchhai cha su pathaih chaipa liata Biehraina Byh chô liana chata na soh awpa a châ.
35 Pohraipa khôtho lâna chata tlâhkhai na patyuh awpa a châ. Achhyna byureih chho lâ hei tlâhkhai dady liana chata meiôh sona na patyuh awpa a châ; chatanachata tlâhkhai cha maw lâchhâh ta na soh awpa a châ.
36 “Poh-o chhikao liata rai awpa pala rih di ngaitapa pabaohpazy, a nohpazy, a nohsaihpa zy, a saihlawpazy hmâpa ta kiky a thai ngaitapa pakypa chhaota na tao awpa a châ.
37 Chatawhcha pohraipa raina awpa chôta akeisha tho tôh pangawh na pahu awpa a châ; a bainazy cha ngôh ta tao awpa a châ, chazy patyuna châta dawh patyuna miapangawh na leih awpa a châ.
| 1 | 2 | 3 | 4 | 5 | 6 | 7 |
|---|---|---|---|---|---|---|
| 8 | 9 | 10 | 11 | 12 | 13 | 14 |
| 15 | 16 | 17 | 18 | 19 | 20 | 21 |
| 22 | 23 | 24 | 25 | 26 | 27 | 28 |
| 29 | 30 | 31 | 32 | 33 | 34 | 35 |
| 36 | 37 | 38 | 39 | 40 |