Pacheisana ryhpa bie
1 “Chyhsa ta viahchao tôhpa tlyma, mietahkupa tlyma, paru sala, thiepa ta tlyma, vaw zuah haw sala, viahchao tôhpa pô kha vyuhpa ta viahchao tôhpa pô pangawh cheih aw ta, mietahkupa pô kha vyuhpa ta mietahkupa pô palih a cheih aw. A kipa ta a pakua awpa a châ; a pie awpa a hnei vei khiahta deikua cha, a parupa vâta ano cha ama zuah awpa a châ.
2 Parutuhpa a hmo parupa viahchao tôhpa tlyma, alâ tlyma, mietahkupa tlyma, a hropa ta hnei thlâh ha sala a lie no ta a cheih awpa a châ.
3 “Parutuhpa ta chyhsa o liata a ngiapa cha patupa ta tu sao haw sala, a thisaih palo hra awpa châ vei;
4 no ta a vaw chhi pachhaih hmâ khiahta deikua cha, a thisaih palo hra awpa a châ aw.
5 “Chyhsa ta lyu tlyma, kresadôh tlyma, paniesa khai ha sala, a sahroh cha pathlie sala, chyhsa lyu cha pabâsa sala, ano lyu pha chaipa nata ano kresadô pha chaipa chata a thô heih awpa a châ.
6 “Mei pazopa ta a hlohzy tlyma kâpa ta sapiahzy tlyma, sa a duahpa tlyma, lyu tlyma, kâ khai ha sala, mei a pazotuhpa tlai chata a thô tlai awpa a châ.
7 “Chyhsa ta a tâkâ tlyma, a hmodâh tlyma, a vaih pavaosa sala, cha o tawhtapa cha chyhsa ta paru ha sala, parutuhpa cha ama patu khiahtala a lie no ta a cheih awpa a châ.
8 Parutuhpa cha ama patu tlôh leipa khiahtala, cha o hneituhpa cha Khazohpa kiapâh lâta vawh sala a vaih hmodâh cha ano ta a lapa nata la leipa pasia mawh sy.
9 “Paraona maihta cha viahchao tôhpa kyh tlyma, alâ kyh tlyma, mietahkupa kyh tlyma, chysia kyh tlyma, hmo khâparai a leipa kyh tlyma rai, chyhsa ta, ‘He he cha kei eih a châ,’ vaw tah sala, ama pano bie peipa cha, Khazohpa lâta tlô khei awpa a châ; Khazohpa ta thai lei a pachâsapa maih cha a vaih lâna chata a lie nota a cheih aw.
10 “Chyhsa ta alâ tlyma, viahchao tôhpa tlyma, mietahkupa tlyma, sahroh khâparai a vaih pamokhâhsa sala, thipa ta tlyma, hmah paphaopa ta tlyma, hraopa ta tlyma vaw y sala, ahyhmah ta hmô tlôh leipa ei sala,
11 ano chata a vaih sahroh cha a hria nata hria lei kyh liata ama pano likawh liana chata ABEIPA moh reipa ta chhie a sa awpa a châ; chatanachata a hneituhpa chata cha cha a vaw pyh aw ta, ano chata thô aw vei.
12 Anodeikuacha paru pâpa tlai a châ khiahtala a hneituhpa cha a thô awpa a châ.
13 Sa ta tai sala a tlawhpoh cha pahno nawpa ta vaw cheih mawh sy; cha sa taipa vyuhpa cha a thô awpa châ vei.
14 “Chyhsa ta a vaih sahro a hlâh sala, hmah phaohpa ta tlyma, vaw thi sala tlyma, hneituhpa a hlao leipa sala, a thô tlai awpa a châ.
15 A hneituhpa a hlao khiahtala deikua cha, a thô awpa châ vei; a ty hneipa ta a hlâhpa a châ khiahta deikua cha amâ hlâna yzie ta a châ aw.
Yzie dopa nata do leipa kyh nata phôryhpa ryhpa biezy
16 “Chyhsa ta laihsapa lahpinô ta a pahawh leipa cha, raipasaopa ta a ziakhei sala a mâ piepa ta a lahpinô ta a hnei tlai awpa a châ.
17 A paw ta pahneisa khoh vei hrasala, laihsa mâ zie sôh cha a pie tlai awpa a châ.
18 “Dyuthaipa chanô rai na pahlô awpa châ vei.
19 “Ahyrai sahro a ziakheipa maih cha thie tlai awpa a châ.
20 “Ahyrai ABEIPA lâta deita tah leipa ta cha, khazoh hropa rai lâta a thaihpa cha, pahleipadia awpa a châ.
21 “Pho hropa rie na pathei awpa châ leipa ta, na pasaipa-i awpa châ hra vei, nâmo chhao Izi râh liana khata pho hropa nama châpa kha.
22 Nôhmei tlyma, hârapa tlyma, rie nama pathei awpa châ vei.
23 Amo rie patheipa ta eina pado khiah ei tala, ama awna ao cha thei tlai aw na ta;
24 chatanachata ei hiehâhna cha sôkha ta thyu aw ta, zaozi ta cha thie aw ei na ta, nama lahpinô zy cha, nôhmei châ aw ei ta, nama sawzy chhao hârapa ta ama y aw.
25 “Ei chyhsa sahlao hry liatahpa nama hnohta ypa sipasapazy tâkâ dyu na chei khiahtala, cha bâhtuhpa hawhta na pachâ awpa châ leipa ta ano liata a pôhna na haw awpa châ hra vei.
26 Na vaih chysia cha sôka ta a lapa châ la, noh tla hlâta na pie heih awpa a châ;
27 a bu awpa ta a hnei chhôhpa châ ta, a pôhpa palalôh nawpa ta a poh châ tlôh ta; khâpa a bupa ta e a mô aw? Eina aw khiahtala thei tlai aw na ta, kei cha thapasana a hnei ngaitapa châ tlôh na ta.
28 “Khazohpa cha na pachhi awpa châ leipa ta, na chyhsazy hry liata ryureituhpazy cha chhie na sapa awpa châ hra vei.
29 “Na chicheipa a daih tuapa nata na kresawti a tla tua chaipa cha thlai na hlâ awpa a châ. “Na sawchapaw pih tuapa cha eina pie awpa chi a châ.
30 Cha hawhna hra chata na viahchao tôhpazy nata na mietahkupazy chhao cha, na tao awpa a châ; noh sari cha a panô hnohta y aw ta; a noh charie noh ta eina pie awpa chi a châ.
31 “Kei châta chyhsa pathaihpa nama châ awpa a châ; chavâta lyurâhpa liata sâh ta a taipa rai cha nama nie awpa châ leipa ta; i lâta nama thy awpa a châ.
| 1 | 2 | 3 | 4 | 5 | 6 | 7 |
|---|---|---|---|---|---|---|
| 8 | 9 | 10 | 11 | 12 | 13 | 14 |
| 15 | 16 | 17 | 18 | 19 | 20 | 21 |
| 22 | 23 | 24 | 25 | 26 | 27 | 28 |
| 29 | 30 | 31 | 32 | 33 | 34 | 35 |
| 36 | 37 | 38 | 39 | 40 |