Lôpanô tawhta ti (Mar 20:1-13)
1 Izarel pathlazy pôhpakhypa sahlao cha Sin râhpathohpa tawhta pua heih ei ta, ABEIPA bie piepa hawhta ariena daihti hnei lymâpa ta Rephidi liata a rie ei ta; cha liana chata zawpizy do awpa ti y leipa ta.
2 Chavâta zawpizy chata Mawsi pachhie ei ta, “Ti do awpa maniah pie teh,” tah ei ta. Mawsi ta ama hnohta, “Khazia eina pachhie ei chi, khâpavâta e ABEIPA nama pasia,” tah ta.
3 Cha liana chata zawpizy cha dâhphipa ta y ei ta, Mawsi chôta paphôh ei ta, “Khâpa vâta e eima sawnawhzy nata eima sahrohzy chhao heta dâhphipa ta maniah thie awpa ta Izi tawhta maniah nama chhitha tly?” tah ei ta.
4 Mawsi ta, “He zawpi sahlao he kheihta e ei tao aw, alô ta eina vaw sao awpa ta ama khohpa he?” tahpa ta ABEIPA cha pado ta.
5 ABEIPA ta Mawsi hnohta, “Zawpi sahlao hmialâta sie la, Izarel pathlazy machâ sahlao thokha a chhi mah y, na chôhchahrei eikhanota Nile na tuna kha chaba la, sie teh.
6 Hôriba liata lôpanô chô liana hao ta, na hmiakô liata a vaw duah aw na ta; chatawhcha lôpanô cha vaw tu aw chi ta, chatanachata zawpizy do awpa ti cha a vaw loh aw,” tah ta. Chatawhcha Mawsi ta Izarel pathlazy machâ sahlao mohmô liana chata, cha hawhna chata tao ta.
7 Cha su moh châta Masah* nata Meribah* bi ta, Izarel pathlazy ta ama paphôhpa vâta nata, “Eima hry liana heta ABEIPA cha a y ma, y vei ma?” tahpa ta ama pasiapa vâta.
Amale mozy nata amâ dyuhna
8 Rephidi liana chata Amale mozy ta Izarel sahlao cha a vaw dyuh ei ta.
9 Mawsi ta Zawsua hnohta, “Eima hry liatahpa he a tlyh la, Amale mo he a dyuh teh u; mylâ tlâh laki liana khi ta Khazohpa chôhchahrei chabapa ta ei vaw duah aw na,” tah ta.
10 Chatanachata Mawsi ta a hnohta a reipa hawhna chata, Zawsua ta tao ta, Amale mo cha a dyuh ta; cha nota Mawsi nata Arawna nata Hura cha tlâh laki liata kiah ei ta.
11 Mawsi ta a ku a pazawh pata nahta, Izarel sahlao chata pahnie tyh ei ta; a ku a pathla pata nahta Amale mo chata pahnie tyh ei ta.
12 Châhrasala Mawsi bâhzy cha si kaw haw ta; chatanachata alô la ei ta, a kiahpâh liata soh ei ta, cha liana chata a tyuh ta, chatawhcha Arawna nata Hura chata a ku cha dei pa ei ta, pakha ta hiakha la dei ta, pakha ta hia kha lâ dei ta; chatanachata noh tlana taihta a kuzy cha a y ualuapa ta y ta.
13 Cha hawhna chata Zawsua chata Amale nata a sahlaozy cha zaozi tiahpa ta thie ta.
14 ABEIPA ta Mawsi hnohta, “He bie he a theih thlâh ha awpa ta châbu liata roh la, Zawsua theina liata reih tyh mah y, avâ ry liana heta Amale mo he, ama y tahpa chhao pahno leina taihta ei pahleipadia aw na,” tah ta.
15 Mawsi ta maisâh tao ta, a moh ta, Zehova-nisi* bi ta. 16 “ABEIPA lâta chhie ei sakhâh na ABEIPA ta chhâ y chhôh zydua cha Amale sahlao cha a dyuh aw,” tah ta.
| 1 | 2 | 3 | 4 | 5 | 6 | 7 |
|---|---|---|---|---|---|---|
| 8 | 9 | 10 | 11 | 12 | 13 | 14 |
| 15 | 16 | 17 | 18 | 19 | 20 | 21 |
| 22 | 23 | 24 | 25 | 26 | 27 | 28 |
| 29 | 30 | 31 | 32 | 33 | 34 | 35 |
| 36 | 37 | 38 | 39 | 40 |