Raopa hlâna maisâh (Pu 38:1-7)
1 “Akeisha tho maisâh, a doh lâ dy pangawh, a hâ lâ dy pngawh ta na tao awpa a châ; cha maisâh cha ki palihpa a châ awpa a châ. Chatawhcha â sâhna lâ cha dy thôh a châ awpa a châ.
2 A ki palih pawhmao liana zy chata a kizy na tao awpa a châ. Maisâh nata cha a kizy cha â pazao khai awpa a châ. Dawh ta na pahu khai awpa a châ.
3 Buchâh hruna beihzy, buchâh linazy, rahôzy, sa thaona thua â kohpazy, mei lanazy na tao awpa a châ; cha chhaichhi zydua cha dawh ta na tao awpa a châ.
4 Maisâh châta dawh sao na tao awpa a châ; cha sao chô a ki palihzy liana chata dwh tiaki miapalih na tao awpa a châ.
5 Cha cha maisâh kiah ry lâ na soh awpa a châ, cha sao chata maisâh khophie a tlô thei nawpa ta,
6 Chatawhcha maisâh chata a lâ akeisha tho lâzy na tao awpa châ ta, chazy cha dawh ta na pahu awpa a châ;
7 cha lâzy cha nahlizy liana chata pangia awpa châ ta, chatanachata lâzy cha a sy nawpa ta maisâh kâ lâ miano liana chata a ryh rairieh awpa a châ.
8 Maisâh cha thophia ta dôhpa ta a pakaohpa ta na tao awpa a châ; tlâh liata ei cha pamosa hawhna tlai khata ama tao awpa a châ.
Achhyna byureih dôhpachhôh
9 “Achhyna byureih dôhpachhôh tlyhmia na tao awpa a châ. Chho lâ heih, chho lâchhâh ta a kâ lâ hiakhalâ chata a dôhpachhôh tlyhmi liata pohraipa bangie awpazy pala ri di ngaitapa pabaohpa ta taopa dy za kha a seihpa a y awpa a châ;
10 cha châna chata a tôh syno nata dawh patyuna syno a y awpa a châ, a tôh liata a bainazy nata a patusanazy cha tâkâ ri a châ awpa a châ.
11 Cha hawhna chata maw hei lâchhâh a doh lâ pohraipa bangie awpazy cha, dy za kha a sei awpa châ ta, cha châna chata a tôh syno nata dawh patyuna syno a y awpa a châ, a tôh liata a bainazy nata a patyunazy cha tâkâ ri a châ awpa a châ.
12 Chatawhcha a notla lâchhâ dôhpachhôh hâ lâ pohraipa bangie awpazy cha, dy sypangawh a seihpa a y awpa a châ, a tôh miahrawh nata a patyuna miahraw chhaota.
13 Nochhi lâchhâ a dôhpachhôh tlyhmia hâ lâ cha, dy sypangawh a seih awpa a châ.
14 Chhikao kâ hiakhalâ pohraipa bangie awpazy cha dy hrawhleipangawh a seihpa a châ awpa a châ; a tôh miathôh nata a patyuna miathôh a y awpa a châ.
15 Chhikao kâ hiakhalâ pohraipa bangie awpazy cha, dy hrawhleipangawh a seihpa a châ awpa a châ, a tôh miathôh nata a patyuna miathôh a y awpa a châ.
16 A dôhpachhôh tlyhmia chhikao liata rai awpa dy syno a seihpa pala ri di ngaitapa pabaohpazy, a nohpa zy, a nohsaihpa zy, a saihlawpa zy hmâpa ta, kiky a thai ngaita a pakypa chhaota, a y awpa a châ; a tôh miapalih nata a patyuna miapalih a y awpa a châ.
17 A dôhpachhôh tlyhmia tôh zydua cha tâkâ ri ta patusana a y khai awpa châ ta; a bainazy cha tâkâ ri a châ awpa châ ta, a patunsazy cha dawh a châ awpa a châ.
18 A dôhpachhôh tlyhmia doh lâ cha dy za kha châ sala, a hâ lâ cha dy sypangawh châ sala, chatawhcha a sâhna lâ cha dy pangawh châ sala, pala ri di ngaitapa pabaohpa ta dôhpa châ sala, chatawhcha a patyunazy cha dawh châ mawh sy.
19 Achhyna byureih sana zydua liata a chhaichhi hmo zydua nata a khaipâna zydua nata a dôhpa chhôh tlyhmia khaipâna zydua cha dawh sai a châ awpa a châ.
Meiôh vaizie (Th. 24:1-4)
20 Chatawhcha meiôh cha khati no rai ta so tyhpa a châ thei nawpa ta ôli thaw pasoh ngaitapa saohpa pakhaih awpa ta nâ lâta ama vaw cheih tyh awpa ta Izarel pathlazy cha bie na pie awpa a châ.
21 Ahmaohpakhyna poh-o chhôh liata bie pahnosana sona kiahpâh ta pohraipa khôtho lâna chata Arawna nata a sawchapawpazy ta ABEIPA hmiakô liana chata zâlâ tawhta a mylâ taihta amâ chhuahdy tyh awpa a châ. He he Izarel pathlazy châta chhâzaw ta ama pathlazy taih chhaota bieraopa â i ngaitapa a châ awpa a châ.
| 1 | 2 | 3 | 4 | 5 | 6 | 7 |
|---|---|---|---|---|---|---|
| 8 | 9 | 10 | 11 | 12 | 13 | 14 |
| 15 | 16 | 17 | 18 | 19 | 20 | 21 |
| 22 | 23 | 24 | 25 | 26 | 27 | 28 |
| 29 | 30 | 31 | 32 | 33 | 34 | 35 |
| 36 | 37 | 38 | 39 | 40 |