Mawsi awna
1 Mawsi chata a puhpa Zethrô, Midia râh theihthaipa mietahkupa zaw vaih ta; mietahkupa zaw cha râhpathohpa notla lâchhâ ta haoh ta, Khazohpa tlâh Hôriba cha kei tlô ta.
2 Chatawhcha thobuh liata ABEIPA vâlyuhchâpa mei paleih ta a hnohta a vaw luah ta, kei moh ta, thobuh cha mei ta kâ ta, a thobuhpa deikua cha kâ tlôh leipa t hmô ta.
3 Mawsi chata, “Ei kei tlei hnao tua rai aw, kheihtazie ta ma thobuh hao a kâ patlô vei, he hmonoâh ngaitapa he ei kei moh tua aw na,” tah ta.
4 ABEIPA chata mo awpa ta a kei tleipa cha a hmô nahta, Khazohpa ta thobuh hry tawhna chata vaw aw ta, “Mawsi, Mawsi y!” tah ta. Chatawhcha ano chata, “He liata ei y,” tah ta.
5 Ano chata, “A vaw hnia khâ; na pheipazah liata na pheikyzy kha pahluh teh, nâ duana su kha, alei pathaihpa châ tlôh ta,” tah ta.
6 Chatawhcha, “Kei he, na paw Khazohp, Abaraha Khazohpa, Aisika Khazohpa, Zakaw Khazohpa cha ei châ hih,” tah heih ta. Chatawhcha Mawsi chata a hmia a khu haw ta; Khazohpa moh ngâh tlôh leipa ta.
7 Chatawhcha ABEIPA chata, “Izi liata ei chyhsa a ypazy cha ama rietheizie ei hmô thlâh ha mâh tâh, âmo a vaihtuhpazy vâta ama awpa aozy cha thei na ta; ama pachârôhnazy cha pahno thlâh na ta,
8 Izi mo tawhtapa pachha awpa nata cha râh tawhtapa cha puakheipa ta Kana mozy, Hiti mozy, Amawri mozy, Periza mozy, Hivi mozy, Zebu mozy yna râh pha ngaitapa nata kawh ngaitapa ta, sâhpiti nata kheihti lona râh liata a ngiakhei awpa ta ei zu haw.
9 Chatawhcha pachâ teh, Izarel pathlazy awpa ao cha ei hnohta a vaw tlô, cha dei châ leipa ta, Izi mo ta âmo ama pasaipaina ziezy cha ei hmô thlâh ha na.
10 A vy teh, ei chyhsa Izarel pathlazy cha, Izi tawhta papua awpa ta Phirao lâta ei cha tuah aw,” tah ta.
11 Mawsi deikua chata Khazohpa hnohta, “Kei Phirao lâta vawhta, Izarel pathlazy Izi tawhta a za papua awpa cha, ahyma ei châ tly?” tah ta.
12 Ano chata, “Na hnohta ei y aw mâ tâh; keima tuapa tlai na châ tahpa, he he na châta pahnona a châ aw; Izi tawhtapa chyhsazy cha na vaw puakhei tina chata he tlâh liana tlai heta, Khazohpa na chakao aw,” tah ta.
13 Chatawhcha Mawsi ta Khazohpa hnohta, “Izarel pathlazy hnohna cha, zu aw sala, ama hnohta, ‘Nama pathlatuhpazy Khazohpa ta nama hnohta ei na vaw tuah,’ tah aw sala, âmo chata ei hnohta, ‘A moh ahy maw?” vaw tah ei sala, kheihta e ei reih aw?” tahta.
14 Khazohpa ta Mawsi hnohta, “KEI CHA A CHÂPA EI CHÂ,” tah ta. Chatawhcha a hnohta, “Nâma ta Izarel pathlazy hnohna chata, ‘EI CHÂ, chata eina tuah,’ na tah awpa a châ,” tah ta.
15 Khazohpa chata Mawsi hnohta, “Nâma ta Izarel pathlazy hnohta, ‘BEIPA nama pathlatuhpazy Khazohpa, Abaraha Khazohpa, Aisika Khazohpa nata Zakaw Khazohpa chata nama hnohta eina vaw tuah,’ tah ma y: he he chhâ zydua taihta eina thei thlâh hana cha a châ.
16 Sie la, Izarel machâ sahlao aw pakhy mah y, chatanachata ama hnohta, ‘ABEIPA nama pathlatuhpazy Khazohpa, Abaraha Khazohpa, Aisika Khazohpa nata Zakaw Khazohpa chata vaw tly tlai ei na ta, “Izi râh liata nama chô liata ama taonaziezy he ei hmô haw tlai na;
17 Izi liata riepatheina tawhtapa cha papua aw ei na ta, Kana mozy, Hiti mozy, Amawri mozy, Periza mozy, Hivi mozy, Zebu mozy râh, sâhpiti nata kheihti lona râh liana chata ei cha chhitha aw ei,” ei tah hawpa kha tahpa ta, ei hnohta a vaw luah,’ tah mah y.
18 Chatanachata na bie ama vaw nahthlie aw; nâ nata Izarel machâ sahlao cha. Izi beipa hmiakô liata vawh aw eichi ta, a hnohta, “ABEIPA Hebraizy Khazohpa ta maniah vaw tly haw tlaita; râhpathohpa noh thôh siena liata ABEIPA eima Khazohpa lâta atheihna eima hlâ thei nawpa ta ngiachhiepa ta maniah pasiesa mah y,” tah muh vy.
19 Izi beipa deikua ta ku thatlô ngaitapa leipa ta cha, cha papua aw veih ei tahpa ei pahno na.
20 Chatawhcha ei ku pazawh aw na ta, Izi mo cha ama hry liata hmonoâh ngaitapa ei tao awpa zydua chata ei hrie aw; cha hnôh lâta lah ei cha papua aw eih.
21 Chatawhcha he chyhsazy he Izi mo pangiachhiesa aw na ta; nama sie tita tahruapa ta sie leipa aw eichi ta,
22 chanô tota ama viasazy nata ama o liata a pahrâpazy cha tâkâ ri a tobinazy nata ngôh a tobinazy nata chysiazy, tlao hiah aw ei ta, chatanachata nama sawchapawpazy nata nama sawchanôzy cha namâ pakyh aw, cha hawhna chata Izi mozy cha nama pahryu aw,” tah ta.
| 1 | 2 | 3 | 4 | 5 | 6 | 7 |
|---|---|---|---|---|---|---|
| 8 | 9 | 10 | 11 | 12 | 13 | 14 |
| 15 | 16 | 17 | 18 | 19 | 20 | 21 |
| 22 | 23 | 24 | 25 | 26 | 27 | 28 |
| 29 | 30 | 31 | 32 | 33 | 34 | 35 |
| 36 | 37 | 38 | 39 | 40 |