Arawna nata a sawchapawpazy pananona (Th. 8:1-36)
1 “Theihthaipa raihria liata ei chakaona rai ama hria thei nawpa ta âmo pathaisa nawpa ta ama chô liata he hawhna heta na tao awpa a châ. Viahchao tôh dawpa pô kha nata mietahkupa tôhpa seina hnei leipa pô no nata
2 viahchhâ thino pahlao leipa chhao, viahchhâ thinô pahlao leipa sathaw pahlaopa chhao, viahchhâ a pahpa thinô pahlao leipa sathaw thupa chhao na vaw cheih awpa a châ. Uit viahdie di ngaitapa ta na tao awpa a châ.
3 Cha cha kachu miakha liata sopa ta, a kachu chhaota viahchao tôhpa nata mietahkupa tôhpa pô no chhao chata na vaw cheih awpa a châ.
4 Arawna nata a sawchapawpazy cha a hmaohpakhyna poh-o chhikao kiahpâh liana chata a vaw chhipa ta, ti ta na pasi awpa a châ.
5 Chatawhcha chysiazy cha vaw lapa ta Arawna cha viahpakao chhaota, theihthaipa viahpakao pasihpa nata theihthaipa viahpakao nata chachôhna baipa pakysapa ta, theihthaipa viahpakao chaisaihna zôthai ngaitapa ta sapa ta nâ saih awpa a châ.
6 theihthaipa lakhu cha pakhusapa ta, theihthaipa lakhu chô liata lakho pathaihpa cha na pakhosa awpa a châ.
7 Chatanachata sathaw thupa lapa ta a luh liata hrypa ta na thu awpa a châ.
8 A sawchapawpazy cha a vaw chhipa ta viahpakao na pakysa awpa a châ.
9 Arawna nata a sawchapawpazy cha chaisai ta saipa ta, luhkhuna na pakhusa awpa a châ; chatawhcha theihthaipa châna cha chhâzaw châta liahsa raopa ta ama to ha aw. He hawhna heta Arawna nata a sawchapawpazy cha na pathaisa awpa a châ.
10 “Chatawhcha ahmaohpakhyna poh-o kiahpâh liata viahchao tôhpa na vaw cheih awpa a châ. Arawna nata a sawchapawpazy chata viahchao tôhpa luh chô liata ama ku ama pahnieh aw,
11 chatanachata ahmaohpakhyna poh-o chhikao thaby liata ABEIPA hmiakô liata viahchao tôhpa cha na thie awpa a châ,
12 cha viahchao tôhpa thisaih cha lapa ta maisâh kizy cha na ku pazô ta na hnia awpa a châ, maisâh thaby liata thisaih cha na leitha khai awpa a châ.
13 Chatawhcha a chhôrih thaw zydua nata a rihhri chhaota, a lôpô miano nata a pahlypa thawzy chhaota lapa ta maisâh liata na rao awpa a châ.
14 Viahchao tôhpa sa nata a vo nata a ie deikua cha riena su khôtho lâ na rao awpa a châ; cha cha molei châta hlâpa a châ.
15 “Mietahkupa tôhpa miakha na vaw cheih hra awpa a châ, chatawhcha Arawna nata a sawchapawpazy ta cha mietahkupa tôhpa luh chô liata ama ku ama pahnieh aw,
16 mietahkupa tôhpa cha thiepa ta a thisaih lapa ta maisâh chô cha a chheipâta na hie awpa a châ.
17 Chatawhcha mietahkupa tôhpa cha na pachhaih awpa a châ, a chhôrih nata a pheizy cha pasipa ta a sa tlozy chhao a luh chhaota na so awpa a châ.
18 Cha mietahkupa tôhpa cha a pôhpa ta maisâh liata na rao awpa a châ; cha cha ABEIPA châta raopa hlâna a châ; ABEIPA châta mei ta hlâpa rohpahâhpa cha a châ na.
19 “Mietahkupa tôhpa hropa na vaw chhi heih awpa a châ; Arawna nata a sawchapawpazy ta cha mietahkupa tôhpa luh chô liana chata ama ku ama pahnieh aw,
20 chatanachata mietahkupa tôhpa cha thiepa ta a thisaih cha lapa ta, Arawna nahkhao chachâh lâ tlâh liata zy, a sawchapawpazy nahkao chachâh lâ tlâh liata zy, ama ku chachâh lâ kupi liata zy, ama phei chachâh lâ pheipi liata zy, ama phei chachâh lâ pheipi liata zy na hnia awpa châ ta, maisâh chô chheipâh liana chata thisaih na hie awpa a châ.
21 Chatawhcha maisâh chô liata thisaih nata sathaw a thupa cha vaw cheihpa ta Arawna nata a chysiazy liata nata a sawchapawpazy nata a hnohta a hlao hrapa sawchapawpazy sawchapawpazy chysia liana chata na hie awpa a châ, chatanachata ano nata chysiazy nata a sawchapawpazy nata a hnohta a hlao hrapa sawchapawpazy chysiazy cha pathaisapa ama vaw châ ha aw.
22 “Mietahkupa tôhpa thaw zy, a lahmei thawh ngaitapa zy, a chhôrih thaw zy, a rihhri zy, a lôpo miano nata a pahlypa thaw zy chhaota, a chachâh lâ phei chhaota na la hra awpa a châ, (cha cha pananona mietahkupa tôhpa cha châ tlôh ta),
23 ABEIPA hmiakô liatahpa kachu liata viahchhâ thinô pahlao leipa, viahchhâ miakha, viahchhâ sathaw pahlaopa mia kha, viahchhâ a pahpa miakha chhaota na pahlao awpa a châ;
24 chazy cha Arawna ku nata a sawchapawpazy ku liana chata na soh khai awpa châ ta, ABEIPA hmiakô liata hiepa hlâna châta na hie awpa a châ.
25 Chatawhcha ama ku tawhtapa cha lapa ta ABEIPA châta rohpahâhpa cha maisâh liata raopa hlâna chô liana chata na rao awpa a châ; cha cha ABEIPA châta mei ta hlâna a châ.
26 “Arawna pananona mietahkupa tôhpa palôh cha lapa ta ABEIPA hmiakô liata hiepa hlâna châta na hie awpa a châ, cha cha na tovyuh awpa a châ aw.
27 Arawna nata a sawchapawpazy chata pananona mietahkupa tôhpa palôh hiepa hlâna nata chaluahpa hlâna a phei hi chiehpa nata chaluah chiehpa cha na pathaisa awpa a châ.
28 Cha cha Izarel pathlazy liata chhâzaw ta Arawna nata a sawchapawpazy tovyu awpa ta raopa a châ aw, cha cha chaluahpa hlâna châ tlôh ta, adyna hlâna ama atheinazy hry liata Izarel pathlazy ta ama chaluahpa hlâna awpa cha a châ aw; ABEIPA lâta ama chaluahpa hlâna tlai cha.
29 “Arawna chysia pathaisapazy cha, a sawchapawpazy ta ama to lymâ aw, chazy chata tobipa ta sathaw thupa nata pathaisapa ama châ thei nawpa ta.
30 A sawchapawpa ano vyuhpa ta theihthaipa rai hria awpa ta raopa châta su pathaihpa liata chakao awpa ta a hmaohpakhyna poh-o liata a ngia tita noh sari chhôh cha atobipa ta a y awpa a châ.
31 “Pananona mietahkupa tôhpa cha vaw cheipa ta a sapa cha su pathaihpa liata na pasyuh awpa a châ;
32 chatanachata Arawna nata a sawchapawpazy chata, mietahkupa tôhpa sa nata kachu liata viahchhâzy cha ahmaohpakhyna poh-o chhikao thaby liata ama nie aw.
33 Cha a ryhna hmo ama panano nawpa ta nata pathaisa nawpa ta hlâpazy cha ama nie awpa a châ, anodeikua cha hmo pathaihpa a châpa vâta mo hropa ta ama nie awpa châ vei.
34 Cha pananona sa tlyma, viahchhâ tlyma cha, a mylâ taihta a laibâhpa a y khiahtala, a laibâhpa cha mei ta na rao awpa a châ; cha cha hmo pathaihpa a châpa vâta, nie awpa châ vei.
35 “Chatanachata bie ei cha piepa zydua hawhna heta Arawna nata a sawchapawpazy chô liata na tao awpa a châ; noh sari âmo na panano awpa a châ;
36 noh chareih molei hlâna atheihna viahchao tôhpa aryhna awpa ta na hlâ awpa a châ. Aryhna na tao tita maisâh cha na pathai aw, chatawhcha a pathai awpa ta sathaw na thu awpa a châ.
37 Noh sari maisâh châta aryhna taopa ta na pathaisa awpa châ ta, chatanachata maisâh cha hmo pathaih ngaitapa a vaw châ aw; maisâh a hriapa maih cha a vaw pathaih lymâ aw.
Noh chareih hlâna (Mar 28:1-8)
38 “Chatanachata maisâh chô liata na hmohlâ awpa cha he he a châ: noh chareih kô khata mietahkupa taw pô no lymâ.
39 Mietahkupa taw pô kha cha my ta na hlâ awpa châ ta, chatawhcha mietahkupa taw a hropa cha zâ lâta na hlâ awpa a châ;
40 mietahkupa taw pô kha hlâna liana chata viadie di ngaitapa ephah su hrawh pachhaih ta su kha, thaw saopa hin* su palih pachhaih ta su kha chhaota na pahlao awpa châ ta, dopa hlâna châta kresawti hin su palih pachhaih ta su kha chhaota.
41 Chatawhcha mietahkupa taw a hropa cha zâ lâta na hlâ awpa châ ta, cha cha my ta niepa hlâna yzie hawhta nata dopa hlâna yziehawhta, rohpahâhpa ABEIPA châta mei liata hlâpa châta na hlâ awpa a châ.
42 Cha cha nama pathlazy taihta ahmaohpakhyna poh-o chhikao thaby liata ABEIPA hmiakô liata raopa ta khâ hlâ tyh awpa a châ aw, cha liana chata bie cha chho awpa ta ei vy tyh aw.
43 Izarel pathlazy chhao cha liana chata bie ei vaw chho tyh aw, chatanachata poh-o cha ei rôhnahna ta pathaisapa a châ aw;
44 ahmaohpakhyna poh-o nata maisâh cha ei pathaisa aw; Arawna chhao a sawchapawpazy nata kei châta theihthaipa rai hriapa ta eina chakao thei nawpa ta ei pathaisa hra aw.
45 Izarel pathlazy hry liata pahrâ aw na ta, ama Khazohpa ei châ aw.
46 Chatanachata âmo sahlao hry liata ei pahrâ thei nawpa ta Izi râh tawhta a chhithatuhpa ABEIPA ama Khazohpa cha ei châ tahpa ama pahno aw; kei ABEIPA ama Khazohpa ei châ hih.
| 1 | 2 | 3 | 4 | 5 | 6 | 7 |
|---|---|---|---|---|---|---|
| 8 | 9 | 10 | 11 | 12 | 13 | 14 |
| 15 | 16 | 17 | 18 | 19 | 20 | 21 |
| 22 | 23 | 24 | 25 | 26 | 27 | 28 |
| 29 | 30 | 31 | 32 | 33 | 34 | 35 |
| 36 | 37 | 38 | 39 | 40 |