Puasaina Bo 16
Khazohpa ta Mâna a pie
1 Elima su tawhtapa cha pua ei ta, Izarel pathlazy pôhpakhypa zydua chata, Izi râh tawhta ama pua rakha tawhta thla nona noh hrawhleipangawh noh ta, Elima nata Sinai likawhta Sin râhpathohpa tlô ei ta.
2 Râhpathohpa liana chata Izarel pathlazy pôpakhypa sahlao zydua cha Mawsi chô liata nata Arawna chô liata paphô ei ta,
3 Izarel pathlazy ta ama hnohta, “Izi râh liata sâh bei thaby liata eimâ tyu no zy nata viahchhâ daina taih eima nie no zy khata ABEIPA ku liata tlao eima vaw thi thlâh ha mawh sa la; zawpi pôhpakhypa zydua he, râhpathohpa liana heta nodipa ta thi awpa ta maniah namâ chhi he zaw,” tah ei ta.
4 ABEIPA ta Mawsi hnohta, “Pachâ teh, avâ tawhta nama châta viahchhâ ei pasuasa aw na; zawpizy ta noh chareih noh kha châta ama tovyuh â daihpa cha a huah tyh mawh sy, ei ryhpa ama zyh ma, zyh vei ma ei pasia thei nawpa ta.
5 A noh charu noh châta amâ huapa cha a chhuahdy aw ei ta, noh chareih ta amâ huapa lie no lymâ a châ aw,” tah ta.
6 Chatawhcha Mawsi nata Arawna ta Izarel pathla zydua hnohna chata, “Zâlâ t ABEIPA cha Izi râh tawhtapa châ chhithatuhpa tlai a châ tahpa nama pahno aw na,
7 my ta chhao ABEIPA rôhnahna cha nama hmô aw na, ABEIPA chô liata nama paphôhna kha a vaw thei haw hih. Keimozy cha khâpa ma châ pi ta, eima chô liata nama paphôh tly?” tah ei ta.
8 Mawsi ta, “Chazy cha nama pahno aw, ABEIPA ta zâlâ ta sa nie awpa cha pie ei ta, my ta viahchhâ â daihna taih a cha pie tina chata, ABEIPA chata a chô liata nama paphôhna kha, thei thlâh ha tlôh ta, keimozy cha khâpa ma eima châ, eima chô liata a paphôhpa nah kaw ma châ ei chi va, ABEIPA chô liata a paphôhpa tlao nama châ mâh tâh,” tah ta.
9 Mawsi ta Arawna hnohta, “Izarel sahlaozy pôhpakhypa zydua hnohna heta, ‘ABEIPA kiapâh a hniapa lâta a vy teh u, nama paphôhnazy kha a vaw thei haw hih,’ tah mah y,” tah ta.
10 Izarel pathlazy pôhpakhypa zydua hnohta, Arawna ta bie a rei hai nona chata, râhpathohpa lâ cha sai ei ta, chatawhcha ABEIPA rôhnahna cha amei liata a vaw lâ ta.
11 ABEIPA ta Mawsi bie a chho ta
12 “ IZarel pathlazy paphôhnazy kha, vaw thei na ta; ama hnohta, ‘Zâlâ cha sa nie aw eichi ta, a my lâta viahchhâ rihbiena taih tlaita nama nie ha aw; chatanachata kei he ABEIPA nama Khazohpa cha ei châ tahpa nama pahno aw,’ a tah na’ tah mah y,” tahpa ta.
13 Zâlâ ta mamo thata a vaw zaw ei ta, amâ riena su cha bie thlâh ha ta; chatawhcha a mylâ chata amâ riena su chheipâh liana chata diati thata tla ta.
14 Diati tlapa cha a vaw hipata nahta, râhpathohpa alei chô liata hmo chyhpa ta a hlôpa, dâhaw tlaw tieta ta vaw y hôlô haw ta.
15 Cha cha Izarel pathlazy ta ama vaw hmô nah ta, “Khâpa ma a châ tly i?” a tah chyu ei ta, khâpa ma a châ tahpa pahno tlôh leipa ei ta. Mawsi ta ama hnohta, “ABEIPA ta viahchhâ nama nie awpa ta a cha pie ei hihh.
16 He he na ABEIPA ta, “Chyhsa tota ama rihbiena chyu ta a huah ula; chyhsa pakha châta Ômer* kha lymâ nama chhôhkha chyhsa a ypa zie lymâ hawhta, namâ huah awpa a châ,’ tahpa ta bie a piepa cha a châ,” tah ta.
17 Chatawhcha Izarel pathlazy chata cha hawhna chata tao ei ta; thokha ta a hluhpi a huah ei ta, thokha ta a chyhta a huah ei ta.
18 Châhrasala ômer ta ama panua no ta, a hluhpi a huapa chata a laipa ta hnei leipa ta, a chyhta a huahpa chata phahla hra vei; chyhsa tota ama rihbiena khi chyu cha a huah ei ta.
19 Mawsi ta ama hnohta, “Ahyhmah ta mylâ châta a khai khah u,” tah ta.
20 Châhrasala Mawsi bie cha nahthlie khoh leipa ei ta; thokha chata a mylâ châta a so ei ta, chatanachata alôpa y ha ta, a roh chhie kaw ta; chavâta Mawsi cha ama chô liata a hiehâh haw ta.
21 My chareih chyhsa tota ama rihbiena khi chyu lymâ ta a huah tyh ei ta; noh a kaw sa pata nahta zao khai ha tyh ta.
22 A noh charu nohna chata viahchhâ cha a lie no chyhsa pakha châta ômer miano lymâ a huah ei ta; chatawhcha cha pôhpakhypa sahlao ryureituhpa zydua chata, Mawsi chho ei ta,
23 ano chata ama hnohta, “Cha cha, ‘ABEIPA ta mylâ he a pahâna noh, ABEIPA châta pahânoh pathaihpa a châ na,’ a tahpa cha a châ, chavâta pakâpa nama khoh khiahtala chhoh teh u, cha laibâhpa cha mylâ châta nama soh aw,” tah ta.
24 Chatanachata Mawsi a chhopa hawhna khata a mylâ châta panano ei ta; cha cha a roh chhie leipa ta a lôpa y hra vei.
25 Mawsi ta, “Atanoh cha he he nie teh u, atanoh he ABEIPA châta pahânoh a châ hih; atanoh la alei liata a tlapa hmô aw veih ei chi.
26 Noh charu chhôh cha a huah tyh aw ei chi ta, a noh sari noh deikua cha pahânoh châ ta, a huah awpa y aw veih ei,” tah ta.
27 A noh sari nohna chata chyhsa thokha cha a huah awpa ta pua ei ta, a huah awpa rai hmô leipa ei ta.
28 Chatanachata ABEIPA ta Mawsi hnohta, “Ei biepiepazy nata ei ryhpazy he khachâ e apyh khoh lei namâ chhuah tly?
29 ABEIPA ta pahânoh a cha piepa he pahno teh y, chavâta noh charu noh ta, noh no a khi awpa ta viahchhâ ei cha pie ei hih; chyhsa to amo su chyu liata y molo teh u, noh sari nohna chata ahyhmah ta a yna su tawhtapa pua chacheita kha se,” tah ta.
30 Chatanachata chyhsazy cha noh sari nohna chata a pahâ ei ta.
31 Izarel chhôhkhazy chata cha cha mâna bi ei ta; kaoriandy chi hawhna tlaita ngyu ta, nie nata viahchhâ kheihti nata taopa hawhta a châ.
32 Mawsi ta, “He he ABEIPA ta, ‘He he nama pathlazy taihta ômer miakha paso teh u, Izi râh tawhta ei cha chhitha nota, râhpathohpa liata ei cha pasana viahchhâ cha, ama vaw hmô chyu thei nawpa ta,’ tahpa ta bie a piepa cha a châ,” tah ta.
33 Chatanachata Mawsi ta Arawna hnohta, “Beih la la ômer hmo kha mâna he khô teh, nama pathlazy taihta paso thlâh ha awpa ta ABEIPA hmiakô liata soh mah y,” tah ta.
34 ABEIPA ta Mawsi bie a piepa hawhna chata, Arawna chata paso thlâh ha awpa ta bie pahnosana hmiakô liata soh ta.
35 Izarel pathlazy chata chyhsapa pahrâna râh ama tlô hlâ lei cha, kô sypalih chhôh ta mâna nie tyh ei ta; Kana râhri daih lâ ama tlô hlâ lei cha mâna ama nie tyh.
36 (Ômer hmo kha he ephah* su hrawh pachhaih ta su kha tlu ta a châ)
| 1 | 2 | 3 | 4 | 5 | 6 | 7 |
|---|---|---|---|---|---|---|
| 8 | 9 | 10 | 11 | 12 | 13 | 14 |
| 15 | 16 | 17 | 18 | 19 | 20 | 21 |
| 22 | 23 | 24 | 25 | 26 | 27 | 28 |
| 29 | 30 | 31 | 32 | 33 | 34 | 35 |
| 36 | 37 | 38 | 39 | 40 |