Cha-u ta hriena
25 ABEIPA ta Nile a tu rakha tawhna chata noh sari tloh ta.
1 ABEIPA ta Mawsi hnohta, “phirao hnohta a kei ngia la a hnohta, ‘ABEIPA ta, “Ei chyhsazy heta eina chakao thei nawpa eita papua teh.
2 Anodeikuacha na papua pasai leipa khiahtala, na râh zydua he cha-u ta ei hrie aw;
3 Nile cha cha-u ta bie aw ta, chazy cha na o liana heta a kaw ngia aw ei ta, nâ ziana chhôhpadâhpa liata zy, na rakhô liata zy, n chakaotuhpa o chhôh liata zy, na chyhsazy hry liata zy, na lômathu liata zy, na viahchhâ nyna beikoh chhôh liata zy, thata ama y aw;
4 cha-uzy cha nâma nata na chyhsazy nata na chakaotuhpazy chô liana chata amâ khie ngâ aw, a tah na' tah ma y,” tah ta.
5 Chatawhcha ABEIPA ta Mawsi hnohta, “Arawna hnohta, ‘Na chôhchahrei kha na ku ta chavah chô liata zy, vatie chô liata zy nata lih lona chô liata zy pazaw la, Izi râh liana heta cha-u thata vaw patlôsa mah y,’ tah teh,” tah ta.
6 Chatanachata Arawna chata Izi râh chavah chô liana zy chata a ku pazawh ta; cha-uzy vaw pua ei ta, Izi râh bie khai haw ta.
7 Molie a thaipazy chhao chata ama dyu hmâna ta cha hawhna hra chata tao ei ta, Izi râh cha-uzy cha papua hra ei ta.
8 Chatanachata Phirao chata Mawsi nata Arawna cha paawsa ta, ama hnohta “Kei tawhta nata ei chyhsazy tawhta cha-u he pahlei awpa ta ABEIPA lâta hiah teh u; chatanachata ABEIPA lâta ama thei nawpa ta chyhsazy he ei papua aw na,” tah ta.
9 Mawsi ta Phirao hnohta, “Nâ ta, he palyupalihna he, tlao to châh chi, nâ tawhta nata na o tawhta zyta cha-uzy cha pahleipadiapa ta y ta, Nile liata deita a y awpa ta, nâma nata na chakaotuhpazy nata na chyhsazy châna chata khati châta e ei hiah aw?” tah ta.
10 Chatawhcha ano chata, “Mylâ châta sy,’ tah ta. Ano chata, “Na bie hawhna chata châ la vâ, chatanachata ABEIPA eima Khazohpa hawhpa rai he ahyhmah y veih ei, tahpa, na pahno aw.
11 Cha-uzy chata nâma nata na ozy nata na chakaotuhpazy nata na chyhsazy cha ama cha puasai khai aw; Nile liata deita ama y ha aw,” tah ta.
12 Chatawhcha Mawsi nata Arawn cha Phirao chô liata cha-u a vaw patlôsapa kyh liana chata ABEIPA lâta hiah ei ta.
13 ABEIPA chata Mawsi bie hawhna chata tao ta; chatawhcha o chhôh liatahpa zy, dôhpachhôh tlyhmia liatahpa zy nata lyu liata cha-uzy cha thi khai haw ei ta.
14 Chatawhcha pakhy ta, pathlu thlâh ha ei ta, chatanachata a lyurâh dua ta thu ta.
15 Châhrasala Phirao chata huhiehna a vaw y haw tahpa a pahno pata nahta a pathipalôh kuh pachhasa ta, ama bie cha nahthlie khoh leipa ta; ABEIPA ta a vaw rei hawpa hawhna khata.
Thlohhmia ta hriena
16 Chatawhcha ABEIPA ta Mawsi hnohta, “Arawna hnohta, ‘Na chôhchahrei kha hy la, alei liata dohlei he tu teh, Izi râh zydua liata dohlei he thlohmia lâta a vaw lie thei nawpa ta,’ tah mah y,” tah ta.
17 Cha hawhna chata tao ei ta; Arawna chata a chôhchahrei cha a ku ta hy ta, alei liata dohlei cha tu ta, chatawhcha chyhsapa chô liata nata sa chô liana chata thlohmia cha thata vaw y ta; Izi râh chhôh zydua liata alei liata dohlei zydua cha thlohmia lâta a lie khai haw ta.
18 Molie a thaipazy chhaota ama dyu hmâpa ta thlohmia papua hra awpa a chhuah ei ta, châhrasala tao thei veih ei. Thlohmia cha chyhsapa chô liata nata sa chô liana chata thata y ta.
19 Chatawhcha molie a thaipazy chata Phirao hnohta, “He he Khazohpa kudy a châ hih,” tah ei ta. Châhrasala Phirao pathipalôh cha ku pachhasapa ta y ta, ama bie cha nahthlie khoh leipa ta; ABEIPA ta a rei hawpa hawhna khata.
Mathyupa ta hriena
20 Chatawhcha ABEIPA ta Mawsi hnohta, “Myta thyu la, Phirao hmiakô liata a kei duah mah y, ti lâ â vy ti ta, a hnohta, ‘ABEIPA ta, “Ei chyhsazy heta eina chakao thei nawpa ei ta papua teh.
21 Ei chyhsazy na papua pasaih leipa khiahtala, na chô liata zy, na chakaotuhpazy chô liata zy, na chyhsazy chô liata zy, na o chhôh liana zy chata mathyupa a hluhpi vaw tuah aw na ta; chatanachata Izi chyhsazy ozy nata ama pahrâna alei zydua chhao cha, mathyupa sai ta a bie aw.
22 Châhrasala cha nona chata ei chyhsazy yna Kôse râh cha ei panano aw, cha liana chata mathyupa rai a y hra lei nawpa ta; chatanachata alei chô liana heta, kei he ABEIPA cha ei châ tahpa nama vaw pahno thei aw.
23 Ei chyhsazy nata na chyhsazy cha pnano aw na ta, mylâ he pahnona he a vaw y aw,” a tah na,’ tah mah y,” tah ta.
24 ABEIPA chata cha hawhna chata tao ta; chatanachata Phirao o liata nata a chakaotuhpazy oliata zy nata Izi râh zydua liana zy chata, mathyupa hluh ngaitapa cha a ngia ei ta, mathyupa hluh ngaitapa chata lyurâhpa cha thata parao ta.
25 Chatawhcha Phirao chata Mawsi nata Arawna pa-awsa ta, ama hnohta, “Sie ula, he râh liana heta nama Khazohpa lâna chata a theih teh u,” tah ta.
26 Châhrasala Mawsi chata, “Cha hawhta tao awpa cha sia vei; Izi mozy ta ânapa ama tahpazy chata ABEIPA eima Khazohpa lâta eimâ theih awpa a châpa cha, Izi mozy mohmô liana heta ânapa ama tahpazy chata eima theih khiahta cha alô ta maniah vawh aw veih ei mâ?
27 Râhpathohpa noh thôh siena lâ cha sie aw pita, ABEIPA eima Khazohpa ta tao awpa ta bie maniah a piepa hawhta a hnohta eimâ theih aw na,” tah ta.
28 Phirao chata, “Râhpathohpa liata ABEIPA nama Khazohpa lâta namâ theih thei nawpa ta ei cha pasiesa aw ei; anodeikuacha lâhlapi ta nama sie awpa châ vei, nâ haw pa mah y,” tah ta.
29 Mawsi chata, “Nâ tawhna chata pua aw na ta, mylâ Phirao nata a chakaotuhpazy nata a chyhsazy cha mathyupa hluh ngaitapa heta a puasai thei nawpa ta ABEIPA lâta ei hiah aw na; anodeikuacha cha chyhsazy ABEIPA lâta amâ theih awpa cha Phirao heta a pasaih leipa ta dôvei heih cheita kha se,” tah ta.
30 Chatawhcha Mawsi cha Phirao tawhta pua ta, ABEIPA lâta hiah ta,
31 ABEIPA ta Mawsi bie hawhna chata tao ta, chatanachata Phirao tawhta nata a chakaotuhpazy tawhta nata a chyhsazy tawhta mathyupa hluh ngaitapa cha papai haw ta; miakha hmah y khao leipa ta.
32 Châhrasala Phirao chata cha nona chhao chata a pathipalôh ku pachhasa heih ta, chatanachata chyhsazy cha papua pasaih leipa ta.
| 1 | 2 | 3 | 4 | 5 | 6 | 7 |
|---|---|---|---|---|---|---|
| 8 | 9 | 10 | 11 | 12 | 13 | 14 |
| 15 | 16 | 17 | 18 | 19 | 20 | 21 |
| 22 | 23 | 24 | 25 | 26 | 27 | 28 |
| 29 | 30 | 31 | 32 | 33 | 34 | 35 |
| 36 | 37 | 38 | 39 | 40 |