Mawsi hla
1 Chatanachata Mawsi nata Izarel pathlazy chata ABEIPA palyupalihpa ta he hla he sa ei ta,“ABEIPA palyupalihpa ta hla eima sa aw, rarôh y ngaitapa ta a pahnie haw hih; arâ nata a chô liata a kiahpa cha tilaipi liata a thy haw.
2 ABEIPA cha ei thatlôna nata ei hla a châ;ano cha ei pachhana a vaw châ haw hra;ei Khazohpa châ ta, ano cha ei reithai aw,eima Paw Khazohpa châ ta, ano cha ei palyupalih aw
3 ABEIPA cha a dyuhpa chyhsa a châ;a moh chhao ABEIPA a châ.
4 “Phirao talailizy nata a pheisaih sahlaozy cha tilaipi liata thy haw ta; a pheisaih hyutuhpa tlyhpazy chhao Tilaipi Saihpa liata ama tla sao khai haw.
5 Ti a thu ngaitapa ta a vao khai; alô hawhta ti a thuh ngaitapa liata amâ pamôh haw.
6 Na ku chachâh lâ cha, hy ABEIPA y,hmotaotheina ta, rôhnah ta, na ku chachâh lâ chata, hy ABEIPA y, khakhaipa cha pazao khai ta.
7 Na beina rôhnahnazie ta châ dyuhtuhpazy cha pahleipadia khai chi ta; na hiehâhna papua chi ta,sâhkô hawh tlaita ama tlo khai haw.
8 Na hnapasu hu ta, tizy cha paduapa ta y ta, tizy cha pahmaohpakhypa hawhta a duah ta; tilaipi chhôh liata ti a thuh ngaitapazy cha a vaw patloh khai ha ta.
9 Khakhaipa chata, ‘A chadai aw na ta ei pha tlai aw, hraona hmo cha ei rai aw, âmo liana chata lôhrâhtlôna ei hmô aw. Ei Zaozi phia aw na ta, ei ku ta âmo cha ei pahleipadia aw,’ tah ta.
10 Na thlih cha vaw pathlisa chi ta, tilaipi ta vao khai haw ta; ti a thuh ngaitapa liana zy chata ky hawhta ama tla haw.
11 “Hy ABEIPA y, khazohzy hry liana heta nâ hawhpa ahyma a y tly? Pathaihna lâta rôhnahpa nata reithai tlâh châna lâta zachhihpa nata hmonoâhpazy a tao tyhpa he, nâ hawhpa ahyma a y tly?
12 Nâ ta na ku chachâh lâ pazawh chi ta,alei ta âmo cha apalâ khai haw.
13 “Nâ ta na ngiachhiena ta zawpi na chatlaipazy kha a chhi chi ta, na pahrâna pathaihpa liana chata na thatlôna ta a chhi haw chi ta.
14 Chyhsa tota thei ei ta, amâ chalyu khai; Philistia râh liata a pahrâpazy cha thlahzona ta a patu haw.
15 Edôma râh liata hyutuhpazy chata nomaohpa ta y ei ta; Môaba chyhsa thatlôpazy cha a chalyuna ta vaw patu ta, Kana liata a ypazy cha ama zao khai haw.
16 China nata ngiarohna ta âmo chôta tla thlu ta; na bâh thatlôna ta alô hawh tlaita chalihsa ta, hy ABEIPA y, na chyhsazy ama khô khai hlâ lei ta cha.
17 Nâ ta âmo cha chhitha aw chi ta, na ryuto tlâh liana chata na lo aw,hy ABEIPA y, nâ ta na pahrâna awpa su nâ chhuahdypa liana chata, hy ABEIPA y, su pathaihpa, na ku tlaita a paduapa liana chata.
18 ABEIPA chata chhâzaw ta ryu a reih ha aw,” tahpa ta.
19 Phirao arâzy cha, a talailizy chhaota, a râ kiahpa chyhsazy chhaota, tilaipi liata a ngia ei ta, ABEIPA ta tilaipi tizy chata vaw khu haw ei ta, Izarel pathlazy deikua cha, tilaipi chhôh alei hipa liana chata sie khai ei ta.
20 Chatawhcha hrohsonô Miria, Arawna sietanô ta khoh chaba ta, chanô zydua ta khoh chabapa ta lâhpa ta zi chyu hra ei ta.
21 Chatawhcha Miria chata :“ABEIPA palyupalihpa ta hla sa teh u, rôhnah ngaitapa ta a pahnie ha hih; arâ nata a chô liata a kiahpa chhaota,tilaipi liata thy ha ta,” tahpa ta hla ta chhitha ta.
Marah ti khapa
22 Chatanachata Mawsi ta Izarel sahlaozy cha Tilaipi saihpa tawhta chhitha ta, Shura râhpathohpa lâ pangaipa ta pua haw ei t; râhpathohpa liana chata noh thôh tlai sie ei ta; ti hmô thei khao leipa ei ta.
23 Marah* su kei tlô ei ta, Marah su liata tizy cha a khapa vâta doh thei leipa ei ta; chavâta a moh ta Marah bipa ta a châ.
24 Zawpizy chata, “Khâpa ma eima doh aw tly?” tahpa ta, Mawsi chô liata paphôh haw ei ta.
25 Ano chata ABEIPA cha aw ta; ABEIPA chata tho miakha he vaw pamosa ta, cha cha ti liana chata za thy ta, chatanachata ti cha vaw pahâh ha ta.“Cha liana chata bieraopa nata biepiepa taopa ta, cha liana chata âmo pasiana tao ta.
26 “ABEIPA na Khazohpa ao he pakhâta ta nahthliepa ta, a mohmô liata a kho viapa lâ zy taopa ta, Izi mozy chô liata hri ei chareisa hawpa hawhpazy kha na chô liata rai chareisa aw va na; kei ABEIPA, cha patlâhtuhpa ei châ hih,” tah ta.
27 Elima su tlô ei ta, cha liana chata tihnawh sâhrawhleino nata thiahra kô sysari y ta; cha liata ti kiah lianazy chata a rie haw ei ta.
| 1 | 2 | 3 | 4 | 5 | 6 | 7 |
|---|---|---|---|---|---|---|
| 8 | 9 | 10 | 11 | 12 | 13 | 14 |
| 15 | 16 | 17 | 18 | 19 | 20 | 21 |
| 22 | 23 | 24 | 25 | 26 | 27 | 28 |
| 29 | 30 | 31 | 32 | 33 | 34 | 35 |
| 36 | 37 | 38 | 39 | 40 |