Bazalel nata Ôhôliaba awna (Pu 35:30-36:1)
1 ABEIPA ta Mawsi hnohta,
2 “Pachâ teh, Zudah pho liatahpa Hura sawchapawpa Uri, cha chyhsa sawchapawpa Bazalel cha a tlyh haw na ta;
3 ano cha sona zy, novâhna zy, pahnona zy,
4 kyh to ta zôthaina zy, hmo tao awpa so ngaitapa ta pachâpady thaina zy,
5 lôsôhpa zy bô nawpa ta a thaina zy, tho a pangianazie thaina zy, kyh tota zôthaina zy hnei awpa ta, Khazohpa Thlahpa ta ei pabie haw na.
6 Chatawhcha a hnohta a hria hra awpa ta Dana pho liatahpa Ahisama sawchapawpa Ôhôliaba cha keima ta rao heih na ta; hmo tao awpa ta bie ei cha piepa zydua;
7 ahmaohpakhyna poh-o zy, bie Pahnosana Byh zy, cha chô liata zawngiahna dyuchhai zy, poh-o chhôh liata hmodâh zydua,
8 tlâhkhai nata a hmo baoh zy, ngô suapa ta taopa meiôh sona hmobao zydua chhaota, rohpahâhpa raona maisâh zy,
9 raopa hmohlâna maisâh a hmobao zydua chhaota, rahô nata a patyunazy,
10 chatawhcha chysia angia ngaitapa ta sapazy, theihthaipa rai ama chakao tita amâ ky awpa, theihthaipa Arawna chysia pathaihpa nata a sawchapawpazy chysia zy,
11 sathaw a thupa zy, su pathaihpa châta rohpahâhpa pahâh ngaitapa zy he ama tao thei nawpa ta, zôthaipa zydua sona ei pie. Tao awpa ta bie ei cha piepa zydua hawhna khata ama tao awpa a châ,” tahpa ta reih ta.
Pahâna pahnona
12 ABEIPA ta Mawsi hnohta,
13 “Izarel pathlazy hnohna chata, ‘Ei pahânohzy he namâ ô thlyu awpa a châ, nama pathlazy taihta keima nata nâmo likawh ta pahnosana châ tlôh ta, kei he ABEIPA nâmo cha pathaistuhpa ei châ tahpa nama pahno thei nawpa ta.
14 Chavâta pahânoh he namâ ô awpa a châ, cha cha nama châta noh pathaihpa châ tlôh ta; ahyrai a papuapa maih cha, thih thlyu awpa a châ; ahyrai cha noh liata raihria kheihhawhpa rai a hriapa cha, cha chyhsa cha a chiheihzy hry tawhta pahleipadia awpa a châ.
15 Noh charu chhôh raihria nawpa ta hmâh awpa châ ta, a noh sari noh deikua cha a pahâna pahânoh, ABEIPA châta noh pathaihpa a châ; ahyrai pahânoh liata rai a hriapa maih cha thi thlyu awpa a châ.
16 Chatanachata Izarel pathlazy heta pahônoh cha ama pathlazy taihta chhâzaw ta biehraina châta cha pahânoh cha amâ ô awpa a châ.
17 Keima nata Izarel pathlazy likawh liana heta chhâzaw ta biehrai pahnosana a châ, noh charu chhôhta ABEIPA ta alei nata avâ tao ta, a noh sari noh chata a pahâ ta, chatawhcha hu a pahno haw tlôh ta,’ tah hra mah y,” tahpa ta reih ta.
Ngôh viahchao taw (Rc. 9:6-29)
18 Chatanachata Sinai Tlâh liata ano bie a chho khai nahta bie pahnosana alô phiapa miano alô phiapa Khazohpa kudy ta a ropa cha Mawsi pie haw ta.
| 1 | 2 | 3 | 4 | 5 | 6 | 7 |
|---|---|---|---|---|---|---|
| 8 | 9 | 10 | 11 | 12 | 13 | 14 |
| 15 | 16 | 17 | 18 | 19 | 20 | 21 |
| 22 | 23 | 24 | 25 | 26 | 27 | 28 |
| 29 | 30 | 31 | 32 | 33 | 34 | 35 |
| 36 | 37 | 38 | 39 | 40 |