Internet Mara Holy Bible â vaw thaotôna thâtih chyupa
Marasawzy ta Mara Holy Bible he Mara reih tlai ta Internet website liata so awpa khona thata hnei tyh pi ta, anodeikua Copyright ahnei thei awpa a châ vâta rairuna a ypa ta pahnopa châ ta; anodeikua Khazohpa bie liata Ano azi tuhpazy cha thâtihpha chho awpa maohphaohna piepa eima châ vâta thâtihpha chho awpa chata Khizaw kaoki liata sie thei awpa vaw châ vei.
Anodeikua, internet siepahliepa ta Mara reih Bible he thâtihpha chhona châta hmâ awpa palôh liata alai kaw vâta Maraland.net moh ta kô 2009 liata Mara Holy Bible amopâpa ta Bangalore liata type pathaopa vaw châ ta, he liata a type tuhpazy cha Finalee Beitâ nata Roselyne Beitâ zy ama châ. College akiah haipazy ama châ vâta daihti ruapa lia maih ta type ei ta, Khazoh ngiachhiena vâta thla 9 chhôh liata type patlô theipa avaw châ.
Kô vaw sie lymâ ta, aso nawpa dâh patuapaluapa châ ta, Bible Software zy hmâpa ta atluanazy arainao via awpa a châ no ta thlai ta hmôpa a châ lei vâta thlai ta hmah la pazi theipa vaw châ leipa ta, kô 2012 liata Hard Disk araopa vâta he eima type chiehpa zydua he lei khai ha ta, hnôh lâ ta recover heihpa a châ.
Kô 2018 liata www.marabible.com he registration taopa vaw châ taraw ta, website liata khô awpa he hmo rainaopa vaw châ heih leipa ta, daihti vâro tlai avaw sie ha heih.
Kô 2020 Thlazoh thlâpâ noh 6 tawhta Blogspot Free blog hmâpa ta post lymâpa vaw châ ta, Khazoh ngiachhiena vâta târi 27 August, 2020 liata post patlô khai theipa a vaw châ; Abeipa moh cha reithaipa ta y mawh sy.
He website lia he ta Sermon nata Bible Study zy chhao, Mara reih ta so baichhi lymâpa a châ aw.
He Mara Holy Bible website avaw tlypa zydua, Khazohpa ta byhnâ chapie ei sala, a khihnarâh apakawh tuhpa châ chyu awpa ta eimâ hrua hra.