1 Chatawhcha ABEIPA ta Mawsi hnohta, “Pachâ teh, Phirao châta Khazohpa ta ei cha tao haw mâh tâh; na unawhpa Arawna cha na hrosopa a châ aw.
2 Bie ei cha piepa maih cha reih lymâ aw chi t; chatawhcha na unawhpa Arawna ta Phirao a râh tawhtapa Izarel pathlazy papua awpa ta a chho aw.
3 Phirao pathipalôh cha ku pachhasa aw na ta; ei pahnona nata ei hmonoâhpazy cha Izi râh liana heta ei papôh aw.
4 Châhrasala Phirao ta nama bie a pyh khoh aw vei; chatawhcha Izi râh chô liana heta ei ku pahnie aw na ta, âmo cha thata pachiapa ta, ei chyhsa Izarel pathlazy ei sahlaozy he Izi tawhtapa cha ei chhitha aw.
5 Chatawhcha Izi chyhsazy chata Izi râh chô liata ei ku pazawhpa ta ama hry tawhtapa Izarel pathlazy ei chhitha tina chata, kei he ABEIPA cha ei châ, tahpa ama pahno aw,” tah ta.
6 Chatawhcha Mawsi nata Arawna ta cha hawhna chata tao ei ta; ABEIPA ta âmo bie a piepa hawhna tlai chata tao ei ta.
7 Phirao bie ama chho nona khata, Mawsi cha kô sychariepa châ ta, Arawna cha kô sysari nata kô thôhpa a châ.
Arawna chôhchahrei
8 Chatawhcha ABEIPA ta Mawsi nata Arawna hnohta,
9 “Phirao ta, ‘Hmonoâhpa tao teh u,’ a cha tah khiah ei ta la, nâma ta, Arawna hnohta, ‘Na chôhchahrei la la, Phirao hmiakô liata thy mah y, chatanachata parih lâta a vaw lie aw,’ tah mah y,” tahpa ta reih ta.
10 Chatawhcha Mawsi nata Arawna cha Phirao lâta a kei ngia ei ta, ABEIPA bie piepa hawhta tao ei ta; Arawna chata a chôhchahrei cha Phirao nata a chakaotuhpazy hmiakô liana cha thy ta, parih lâta a lie haw ta.
11 Chatanachata Phirao chhao chata chyhsa sopazy nata dyuthaipazy cha aw hra ta; âmo Izi râh liata molie a thaipazy chhao chata cha hawhna hra chata ama dyu chata tao hra ei ta.
12 Ama chôhchahrei cha thy chyu ei ta, parih lâta a lie chyu ta. Anodeikuacha Arawna chôhchahrei chata âmo chôhchahreizy cha palâ khai haw ta.
13 Phirao pathipalôh cha ku pachhasapa ta y ta, chatanachata ama bie nahthlie khoh leipa ta; ABEIPA ta a vaw rei hawpa hawhna khata.
Thisaih ta hriena
14 ABEIPA chata Mawsi hnohta, “Phirao pathipalôh he kuh pachhasapa ta y haw ta, chyhsazy cha papua awpa pasaih vei.
15 Phirao hnohna chata my ta vawh mah y, ti lâta si tyh ta; ano hmô a chhuahpa ta chavah kiah liata a duah mah y, na chôhchahrei parih lâta a liepa kha chaba mah y.
16 Chatawhcha a hnohta, ‘ABEIPA Hebraizy Khazohpa ta, “Ei chyhsazy heta a râhpathohpa liata eina chakao thei nawpa ta vaw pasiesa teh,” tahpa ta na hnohta eina tuah; atahmâ taihta nahthlie khoh leipa chi ta.
17 Chavâta ABEIPA ta, “He liana heta kei ABEIPA cha ei châ tahpa, na pahno aw: he ei chôhchahrei chabapa heta Nile liata tizy tu aw na ta, thisaih lâta â vaw lie aw,
18 chatawhcha chavah liata ngazy cha thi aw ei ta; chavah cha a thu aw, chatanachata Izi chyhsazy ta Nile liata ti cha a pahâhpa ta doh aw vei ei,” a tah na,’ tah mah y,” tah ta.
19 Chatawhcha ABEIPA ta Mawsi hnohta, “Arawna hnohta, ‘Na chôhchahrei chaba la, Izi râh ti chô liata zy, ama chavah chô liata zy, ama vatie chô liata zy, ama tipo chô liata zy, ama ti pa-ona zydua chô liana zy chata thisaih lâta a vaw lie khai nawpa ta na ku pazawh teh; chatanachata Izi râh zydua chô liat, tho hmobaoh liata zy nata alô hmobaoh liana zy chata thisaih a y khai aw,’ tah mah y,” tah ta.
20 Mawsi nata Arawna chata ABEIPA bie piepa hawhna chata tao ei ta; Mawsi ta chôhchahrei cha chalo ta, Phirao mohmô liata nata a chakaotuhpazy mohmô liana chata ti cha tu ta, chatanachata Nile liata ti zydua cha thisaih lâta a lie khai haw ta.
21 Chatawhcha chavah liata ngazy cha thi khai ei ta; chavah cha thu ta, chatanachata Izi chyhsazy chata chavah liata ti cha doh thei khao leipa ei ta; thisaih cha Izi râh chhôh zydua liana chata y khai haw ta.
22 Châhrasala Izi liata molie a thaipazy chhao chata ama dyu hmâpa ta cha hawhna hra chata tao hra ei ta; chatanachata Phirao pathiplôh cha ku pachhasapa ta y ta, ama bie nahthlie khoh leipa ta; ABEIPA ta a rei hawpa hawhna khata,
23 Phirao cha a o lâna chata a di ta, chazy chhao cha a pathipalôh liata pachâ hlei leipa ta.
24 Chatawhcha Izi chyhsa zydua chata ti do awpa ta chavah kiah chheipâhzy cha chao ei ta, Nile ti cha doh thei tlôh lei khâh ei ta.
| 1 | 2 | 3 | 4 | 5 | 6 | 7 |
|---|---|---|---|---|---|---|
| 8 | 9 | 10 | 11 | 12 | 13 | 14 |
| 15 | 16 | 17 | 18 | 19 | 20 | 21 |
| 22 | 23 | 24 | 25 | 26 | 27 | 28 |
| 29 | 30 | 31 | 32 | 33 | 34 | 35 |
| 36 | 37 | 38 | 39 | 40 |