Hmotaopazy 1

Hmotaopazy 1

Thlahpa Pathaihpa bietaina

1 Hy Theôphila y: Hmia lâta cha liana khata Zisu hmotaopa nata pachuna, a pathaona zydua kha ei roh,

2 Thlahpa Pathaihpa baopa ta a apôstôlzy a tlypa hnohta bie a taih khai nahta avâ lâ chhihthapa taay hana noh kyh taihta.

3 A thi tawhta noh sypalih po tlai ama hnohta aluahpa ta, a hroh ha heih tahpa pasia nawpa ta kyh hluhpi ta a palâsa ta, Khazohpa Khihnarâh thâtih a reih tyh.

4 Hmaokha ta ama ypa a pahlao hra ta, “Zerusale siesai khah u, Paw bietaipa ei reipa nama theipa kha vaw hâ thlâh ha teh u,” khâchâ tah ta.

5 “Zawhana khata ti ta bâti tyh ta, châhrasala bohpi leipa ta Thlahpa Pathaihpa ta bâtipa nama châ aw,” tah ta.

Avâ lâ kiana

6 Chatanachata ama vaw pakhy nahta, âmo ta a hnohta, “Abeipa, atahmâ he ma Izarelzy hnohta Khihnarâh na padua pathi heih aw?” tahpa ta hiahri ei ta.

7 Ano chata ama hnohta, “Paw ta a daihti nata a noh, ano reisai ta y awpa ta a raopa cha nâmo pahno awpa châ vei.

8 Châhrasala Thlahpa Pathaihpa cha nama chôta a vaw tlô tita, hmotaotheina nama hnei aw; chatanachata Zerusale liata zy, Zudia râh nata Samari râh khi to liata zy, kaokih taih chhaota ei bie pahnotuhpazy nama châ aw,” tah ta.

9 Cha biezy cha a rei khai nahta, ama hmô thlâh hana chôta, avâ lâ chhihthapa ta y ta, ameih ta ama hmô khao leina taihta a chhi ha ta.

10 Avâ lâ a kiapa ama mo thlâh ha nota, chyhsa pano poh ngyuhpa a bupa ta ama kiapâh liata a vaw duah ei ta,

11 cha chyhsazy chata, “Kalili râh mo saih u, khazia avâ lâ mopa ta namâ duah thlâh haw? He Zisu, nâmo tawhtapa avâ lâ a chhipa ta a ypa he, avâ lâ a kiapa nama hmôpa hawhna hra heta ano tlai he a vy heih aw,” tah ei ta.

Zuda a thlatuhpa atlyna

12 Chatawhcha Ôli tlâh ama tahpa tawhta Zerusale lâ kua heih ei ta, cha tlâh cha Zerusale kiapâh châ ta, pahânoh siena rakha châ ta;

13 amâ ngia nahta, ama yna chhôhpadâhpa chô chaipa lâna chata kiah ei ta, Pity nata Zawhana zy, Zami nata Adru zy, Phili nata Thawma zy, Bathawlawmu nata Mathai zy, Alphu sawchapawpa Zami nata Saimaw Zelôte py liatahpa nata Zami sawchapawpa Zuda chhao ama châ.

14 Cha sahlao zydua cha chanô ahyzy tlyma nata Zisu nô Mari zy, Zisu unawhpazy chhaota, palôhrupa miakha ta phahnai khoh ngaitapa ta thlahchhâpa ta y thlâh ha ei ta.

15 Cha nohzy liana chata unawhzy hry liata Pity a duah ta ama zydua ta za kha nata syno rachhôh châ ei ta,

16 “Unawh saih u, Thlahpa Pathaihpa ta Davi pakah ta Zisu patu tuhpazy a chhithatuhpa Zuda kyh a rei chhieliepa kha, Khazohpa châ bie kha a vaw tlô awpa raina a châ.

17 Ano cha eima hry liata rei pâpa châ ta, he chakaonazy liana heta tovyuh chhao hnei tlôh hra ta.

18 (Cha chyhsa chata a moleina ty ta, su miakha chalei ta; â khu lâta pao ta, a lialiah liata a patlaw ta, a rih zydua pua khai ha ta.

19 Cha kyh cha Zerusale liata a ypa zydua ta vaw pahno ei ta, chatanachata cha su cha âmo reih ta ‘Akeldama’ tah ei ta, cha cha, ‘Thisaih Su’ tahna a châ.

20 Hlazy Châbu liata he biezy he ropa a châ, ‘A yna rory pahrasapa ta y mawh sy, a chhôh liata ahyhma y kha se,’ tahpa nata ‘Hyutuhpa a châna cha mo hropa ta to mawh sy,’ tahpa hih.

21 Chatanachata Abeipa Zisu eima hryta a ngia tyh, pua tyh tahpa ta a y chhôh zydua ta, 22 Zawhana bâti rakha tawhta keimo tawhtapa avâ lâ a chhipa ta a y noh taihna khata, he maniah a hlao tyhpazy hry liana heta, chyhsa pakha a thyuheina maniah a pahnokheituhpa châta a y awpa a châ,” tah ta.

23 Chatawhcha chyhsa pano rao ei ta, Zawsi Basaba ama tahpa cha, a moh hropa Zusta ama tahpa nata Mathia châ ei ta.

24 Thlahchhâ ei ta, “Nâ, Abeipa, chyhsa zydua palôhrupa a pahnotuhpa, Zuda chata ano yna liata sie awpa ta

25 he chakaona nata apôstôl rai a siesaina he a vyuhpa ta y awpa ta he chyhsa pano he a kheihawhpa he ma nâ tlyh maniah pahnosa mah y,” tah ei ta.

26 Cha khai tawhta pachao ei ta, ama pachaona liana chata Mathia chôta tlu ta; chatanachata ano cha apôstôlzy pahrawhleikhazy hry liana chata rei pâpa châ ta. 

Hmotaopazy Bo:- 1 - 2 - 3 - 4 - 5 - 6 - 7 - 8 - 9 - 10 - 11 - 12 - 13 - 14 - 15 - 16 - 17 - 18 - 19 - 20 - 21 - 22 - 23 - 24 - 25 - 26 - 27 - 28

Hmotaopazy 2

Hmotaopazy 2

Thlahpa Pathaipa a vyna

1 Petikaw noh a vaw tlô nahta, ama zydua ta su kha liata y pakhy khai ei ta.

2 Sôkha ta avâ tawhta pyu thlihpipa a pathlipa hawhta vaw tlô ta, cha chata amâ tyuna o cha pabie khai ha ta.

3 Paleihzy a pachhaih pathlapa ta mei hawhta ama hnohta a vaw luah ha ta, ama chô liata a choh chyu ta.

4 Ama zydua ta Thlahpa Pathaihpa ta bie khai ei ta, Thlahpa ta a pareisapa lymâ hawhta reih hropa ta reih haw ei ta.

5 Chatawhcha avâ ry liata pho to hry tawhtapa Khazohpa a pachâpa Zuzy Zerusale liatahpa châ ei ta.

6 Cha pyu cha ama theipa ta nahta zawpi a vaw pakhy ei ta, chyhsa to ta ama reih cha âmo reih chyu ta ama theipa vâta ama palôhrupa ta atymâ ei ta.

7 Ama zydua ta ama nôpo ta, ama noâh kaw ta, “Moh teh u, he a reipa zydua he, Kalili mo châ veih ei tlyma?

8 Kheihta e eima zvdua ta eima pikheipa reih hawhta eima thei chyu tly?

9 Thokha Pathia mozy, Elami mozy châ pi ta, Mesôpôtamia râh liata a ypazy, Zudia râh liata a ypazy, Kapadôkia râh liata a ypazy, Pawntu râh liata a ypazy, Asia râh liata a ypazy,

10 Phrukia râh liata a ypazy, Pamphulia râh liata a ypazy châ pi ta, thokha Rawma khih khichhai Zuzy nata ama phohlypazy châ pi ta,

11 thokha Kreta liahpahlô liatahpa nata Arabia râh liatahpa châ tlôh pi ta, châhrasala Khazohpa hmotaopa rônahpazy ama reipa eima reih chyuta eima thei tlôhpa he,” tah ei ta.

12 Ama zydua ta ama noâh kaw ta, a pachâna pahno leipa ei ta, âmosasyh ta, “Hezy he kheihtazie ta maw?” a tah ei ta.

13 Châhrasala thokha ta pahneisao ei ta, “Kresawti thiehpa ama pari he tlyma,” tah ei ta.

Petikaw nohta Pity bie reipa

14 Châhrasala Pity cha pahrawhleikhazy nata hmaokhata a duah ei ta, ano chata ao paro ngaitapa ta ama hnohta reih ta, “Nâmo Zudia mo saih u, nâmo Zerusale liata a ypa zydua saih u, hezy he pahno ula, ei bie nahthlie teh u,

15 he sahlao he nama pangiasapa hawhta pari veih ei, my dawh chaki deita a châ he;

16 hezy he hrohsopa Zôel ta a reipa kha tlao a châ:

17 ‘Khazohpa ta noh hnôh lâzy liana chata he tana he châ aw ta, chyhsa zydua chô liata ei Thlahpa hry aw na ta, chatanachata nama sawchapawzy, nama sawchanôzy ta ei bie chhochhielie aw ei ta, nama satliapazy ta aluahnazy hmô aw ei ta, nama pawpipazy ta mâ lâta sa aw ei ta;

18 cha nohzy liana chata ei seichapawzy, ei seichanôzy chô liata chhao ei Thlahpa hry aw na ta; ei bie ama chhochhielie aw.

19 Chôlâ avâ liata hmonoâhpazy, ry lâ alei liata pahnonazy pahmôsa aw na ta, thisaih zy, mei zy, meikhu hu zy chhaota; noh cha zohna lâta a lie aw ta, thlâpâ thisaih lâta a lie aw ta, Abeipa noh rônah ngaitapa nata pathâh ngaitapa cha a vaw tlô hlâta.

21 Chatawhcha ahyrai Abeipa moh a padopa maih cha pachhapa ta ama y aw,’ a tah na, tahpa kha.

22 “Nâmo Izarel mo saih u, he biezy he thei teh u, Nazari Zisu Khazohpa ta ano hmâpa ta nama hry liata hmo rônahpazy, hmonoâhpa zy, pakhona zy, a taopa khata a cha pahno pasiasapa ei kha, nâmo tlaita chazy cha pahno tlôh eichi ta;

23 kha chyhsa kha Khazohpa pachiapa nata pahno chhieliepa hawhta patusa eichi ta, nâmo ta moleipazy ku ta kraws liata khaipâ eichi ta, thie haw eichi ta.

24 Kha chyhsa kha Khazohpa ta thina chahrynazy cha pathlâpa ta, pathyu haw ta, ano cha thina patu pathlah thei rimâ awpa a châ leipa vâta.

25 Davi chata ano kyh rei ta; ‘Ei hmiakô liata chhâzaw ta Abeipa cha hmô tyh na ta, ei nôpo lei nawpa ta ei chachâh lâta a y;

26 chavâta ei pathipalôh a thapha ta, ei paleih chhao aly ta; chavâta ei sapa chhao hnabeisei ngaitapa ta a y hra aw.

27 Ei thlahpa Athihpa khih liata siesai leipa aw chi ta, na Mo Pathaihpa thupa hmô pasaih leipa aw chi ta.

28 Nâ ta hrona lâpizy na pahnosa chi ta; nâ ta na hmia ta alyna ta eina pabie aw chi,’ tahpa ta.

29 “Unawh saih u, chi pathlatuhpa Davi kyh he chi leipa ta nâma hnohta ei reih thei na, ano la thi ta, ama pabu ha mâ tâh, a thlâ chhao atahmâ taihta eima hnohta y thlâh ha ta.

30 Ano cha hrohsopa châ ta, Khazohpa ta a pathla liatahpa ahy tlyma a abeidyuchhai chô liata a patyusa aw tahpa chhiesapa ta a reih tahpa pahno ta,

31 chazy cha a pahno chhielie thlâh hapa vâta Mesia thyu heih awpa kyh a reih, Athihpa khih liata siesaipa ta y hra vei, a ri chhao thu hra vei,” tahpa ta.

32 Cha Zisu cha Khazohpa ta a pathyu heihpa rai a châ, cha cha eima zydua ta a pahnotuhpa eima châ.

33 Khazohpa ku chachâh lâta palyupalihpa ta y ta, Thlahpa Pathaihpa taipa cha Paw tawhta hmô ta, nama hmôpa nata nama theipa he a hrypa a châ hih.

34 Davi la avâ lâ kiah vei, ano tlaita, ‘Abeipa ta ei Beipa hnohta, ei chachâh lâta atyuh thlâh ha teh,

35 na khakhaipazy, na phei tlyna ta ei tao hlâ lei la,’ tlao a tah.

36 Chavâta Zisu nama khaipâpa tlai kha, Khazohpa ta Abeipa nata Mesia cha pahlypa ta a tao tahpa Izarel pho to ta pahno tlai se,” tah ta.

37 Cha biezy cha ama thei nahta ama pathipalôh a chhôpa hawhta vaw châ haw ei ta, Pity nata apôstôl hropazy hnohna chata, “Unawh saih u, kheihtama eima tah aw,” tah ei ta.

38 Pity chata ama hnohta, “Ro ula, nama molei ngiahthai nawpa ta Zisu Krista moh ta bâti châ chyu teh u; chatanachata hmosaipiepa Thlahpa Pathaihpa nama hmô aw.

39 A taihpa kha, na châta chhao, nama sawzy châta chhao, âhlapi ta a ypa zydua châta chhao, Abeipa eima Khazohpa ta a awpa maihzy châta a châ,” tah ta.

40 Chatawhcha bie hropa hluhpi ta chhopasia ta, “Atahmâhlâ thyutlia dyutlai leipazy tawhna heta a paboh teh u,” tahpa ta pasyu ta.

41 Chatanachata a bie a zyhpa maihta bâti châ haw ei ta, cha noh liana chata chyhsa sâh thôh rachhôh baichhapa ta y ei ta.

42 Apôstôlzy pachupa ta a kaopa ta, viahchhâ pachhaihpa ta, thlahchhâpa ta, phahnai khoh ngaitapa ta y thlâh ha ei ta.

Ngiapâtuhpazy hryta hrozie

43 Chyhsa to ta chi ei ta; apôstôlzy chata hmonoâhpa nata pahnona hluhpi tao ei ta.

44 A ngiapâpa maih chata hmaokha ta y ei ta, ato a hly ei ta.

45 Ama ryuzy, ama sôhzy zuah ei ta, ama byuhpa zydua a daihpa chyuta a rai tyh ei ta.

46 Nohchareih palôrupa miakha ta Khazohpa achhyna-o liana chata phahnai khoh ngaitapa ta y tyh ei ta, ama o lâta chhao viahchhâ pachhaihpa ta thaphapa nata palôhtlâh ngaitapa ta ama pati nie tyh ei ta,

47 Khazohpa reithai ei ta, chyhsa zydua alynazie ta ama y tyh. Chatawhcha a pachha haipa maih cha Abeipa ta nohchareih ama hnohta a baichha lymâ tyh. 

Hmotaopazy Bo:- 1 - 2 - 3 - 4 - 5 - 6 - 7 - 8 - 9 - 10 - 11 - 12 - 13 - 14 - 15 - 16 - 17 - 18 - 19 - 20 - 21 - 22 - 23 - 24 - 25 - 26 - 27 - 28

Hmotaopazy 3

Hmotaopazy 3

Pheisypa achhyna-o ochhi thaby liata patlâhna

1 Pity nata Zawhana cha noh kia râhsâ ta thlahchhâ daihti nota Khazohpa achhyna-o liata a ngia awpa ta khy ei ta.

2 Chyhsa ahy tlyma pi tua no tawhta pheisypa a vaw sy ei ta, cha chyhsa cha achhyna-o liata a ngiapazy lâta ku dao awpa ta achhyna-o ochhi Ngiapa ama tahpa kiapâh liana chata nohchareih pazia tyh ei ta.

3 Cha chyhsa chata Pity nata Zawhana Khazohpa achhyna-o liata a ngia awpa cha hmô ta, a ku dao ta.

4 Pity ta ano cha moh thlâh ha ta, Zawhana chhaota. Pity ta, “Maniah vaw moh teh,” tah ta.

5 Ano chata âmo liata khâpa tlyma hmô awpa ta a hnabeisei ta, moh ta.

6 Châhrasala Pity ta, “Tâkâ nata ngôh khâpahma hnei va na, châhrasala ei hnei chhôpa ei cha pie aw; Nazari Zisu Krista moh ta phei ta sie teh,” tah ta. A ku chachâh lâ patu ta, pathyu ta; sôkhata a pheizy nata phei lobyuhpa ruzy cha a tha vaw y ha ta.

8 Chatawhcha ano cha thyu ta, a duah ta, phei ta sie pathao ha ta, phei ta a siepa nata a zawzâna chôta nata Khazohpa reithaina chô lymâ ta achhyna-o liana chata a ngia ha hra ta.

9 Chatawhcha phei ta a siepa nata Khazohpa a reithaipa cha chyhsa zydua ta hmô ei ta,

10 achhyna-o Ochhi Ngiapa kiapâh liata kudaopa ta atyuh tyhpa kha a châ tahpa pahno ei ta; a chô liata hmo a tlôpa cha ama noâh ngaita kaw ta, atymâ kaw ei ta.

Sawlawmaw aikah liata Pity bie reipa

11 Ano chata Pity nata Zawhana cha a patu thlâh ha nota, chyhsa zydua ta ama noâh ngaita ta, Sawlawmaw aikah ama tahpa liana chata âmo lâta a vaw râ pakhy ei ta.

12 Pity ta cha cha a hmô nahta, chyhsazy cha bie a chho ta, “Nâmo Izarel mo saih u, hezy he khazia nama noâh, keimo hmotaotheina nata Khazohpa eima pachâpa vâta ano he eima pasiesapa hawhta khazia maniah nama mo thlâh haw?

13 Abaraha zy, Aisika zy, Zakaw zy Khazohpa eima pathlatuhpazy Khazohpa chata a chakaotuhpa Zisu a palyupalihpa a châ hih, ano cha patusa eichi ta, Pila ta pathlie â chhuahpa chhaota a hmiakô liata nama khoh leipa kha.

14 Mo Pathaihpa nata Sia ngaitapa kha khoh leipa eichi ta, lianycheituhpa kha a cha pasai awpa ei ta tlao a haw eichi ta,

15 hrona Taotuhpa cha thie eichi ta, châhrasala Khazohpa ta ano cha athihpa hry tawhtapa pathyu heih ta. Cha cha a pahnotuhpazy eima châ.

16 Ano moh ngiapâpa vâta, a moh ta he chyhsa nama hmôpa nata nama pahno tyhpa he a tha patlô haw ta; ano vâta ngiapâna a vaw ypa heta nama zydua mohmô liata a patlâ haw hih.

17 “Châhrasala unawh saih u, nama hyutuhpazy chhaota ama pahno leipa vâta ama taopa hawhna khata nama pahno leipa vâta hezy he nama tao tahpa ei pahno na.

18 Khazohpa ta hrohsopa zydua pakah liata a Mesia ta riethei a tao awpa kyh a pahnosa chhieliepa kha, kha hawhna khata a patlôsa haw.

19 Chavâta nama moleinazy pahleipa a châ thei nawpa ta ro ula, kua heih teh u. Chatanachata Abeipa tawhtapa a hrana daihtizy vaw tlô thei aw ta,

20 Krista Zisu, nama châta a raopa chhao kha a vaw tuah thei aw,

21 ato taopathi daihti a tlô hlâ lei la, ano cha avâ liata a y chy awpa a châ, cha taopathi awpa kyh cha Khazohpa ta aleilô pi tua no tawhtapa a hrohsopa pathaihpa a ypazy pakah ta a rei hawpa kha.

22 Mawsi tlaita, ‘Abeipa Khazohpa ta keima eina taopa hawhna heta nama unawhpazy hry liata hrohsopa pakha a cha taopa aw ei. Ano chata bie zydua nâmo lâ a reipa maih cha nama nahthlie aw.

23 Chyhsa ahyrai cha hrohsopa bie cha a nahthlie leipa maih chyhsa hry tawhta pahleipadiapa a châ aw,’ a tahpa kha.

24 Samuel y rakha tawhta hrohsopa zydua ama hnôh lâtahpazy chhao ama bie reipa maih khata, atahmâhlâ thâtih he ama chhochhielie tyh hra.

25 Nâmo he hrohsopazy nata biehrai sawzy nama châ mâ tâh, Khazohpa ta Abaraha hnohta, ‘Na pathlah vâta khizaw liata photo ama nohhlao aw,’ tahpa ta nama pathlatuhpazy hnohta a tahpa kha.

26 Khazohpa ta a chakaotuhpa cha rao ta, nama moleinazy paheihsaisa chyupa ta byhnâ cha pie awpa ta, nâmo lâta a vaw tuah tua chaipa a châ hih,” tah ta. 

Hmotaopazy Bo:- 1 - 2 - 3 - 4 - 5 - 6 - 7 - 8 - 9 - 10 - 11 - 12 - 13 - 14 - 15 - 16 - 17 - 18 - 19 - 20 - 21 - 22 - 23 - 24 - 25 - 26 - 27 - 28

Hmotaopazy 4

Hmotaopazy 4

Pity nata Zawhana ryureina hmiakô liata

1 Pity nata Zawhana ta chyhsazy hnohta bie ama rei nona chata theihthaipa sahlaozy, achhyna-o hyutuhpa nata Saduasi sahlaozy cha âmo lâta vaw tlô ei ta,

2 chyhsa ama pachupa nata Zisu vâta athihpa hry tawhtapa thyuheina kyh ama reipa vâta ama palôh châ lei ngaitapa ta y ei ta.

3 Patu ei ta, zâlâ a châpa vâta, a mylâ taihta lô-o liata khô haw ei ta.

4 Châhrasala bie a nahthlietuhpa sahlaozy hryta a hluhpi ta a ngiapâ ei ta; ama hluhna lâ cha chyhsa sâh pangawh rachhôh châ ei ta.

5 A mylâ nah chata ama hyutuhpazy, machâzy, Ryhpa pachutuhpazy.

6 Theithai Beichaipa Ana zy, Kaiapha zy, Zawhana zy, Alezanda zy, Theihthai Beichaipa chi zydua chhao Zerusale liata ypakhy ei ta.

7 Pity nata Zawhana cha a lialiah liata paduasa ei ta, “Khâpa taotheina ta ma, ahy moh ta ma, hezy he nama tao?” tahpa ta hiahri ei ta.

8 Chatanachata Pity cha Thlahpa Pathaihpa ta bie ta, ama hnohta, “Chyhsa zydua hyutuhpazy saih u, machâzy saih u,

9 chyhsa chieh leipa patlâhsana kyh liata, he chyhsa he khâpa vâta ma a vaw tlâh haw, tahpa ta atanoh liana heta maniah namâ padai khiahtala,’

10 nâmo zydua ta pahno teh u, Izarel mo zydua chhaota pahno ei se, Nazari Zisu Krista kraws liata nama khaipâpa, Khazohpa ta athihpa hry tawhtapa a pathyu heipa kha, ano moh tlaita he chyhsa he he liata nama hmiakô liata a tlâhpa ta â duah haw hih.

11 “Nâmo o satuhpazy saih u, nama alô kho leipa a ki liata alô phahnai chaipa a châpa kha, ano he a châ.

12 Mo hropa ahy hnohta hmah pachhana y vei, avâ ry liata chyhsa moh bipa hry liata maniah pachha awpa mo hropa rai y vei,” tah ta.

13 Pity nata Zawhana riahphazie cha ama hmô nahta, châ a thai leipa nata machhiepa dei ama châ tahpa ama pahno nahta ama noâh kaw ta; Zisu hnohta ama y haw tahpa pahno ha ei ta.

14 Chyhsa ama patlâhpa cha ama hnohta a duahpa hmô ei ta, khâpahma reipasipasua thei tlôh ei va.

15 Chatanachata ama ryureina tawhtapa â nano ta ama pasie tawhta a chhohia ei ta,

16 “He chyhsazy he kheihta eima tao aw? Hmonoâhpa pathâh ngaitapa ama tao tahpa Zerusale liata a ypa zydua ta a siapa ta ama pahno hawpa he, keimo chhao ei thei tlôh pi va.

17 Châhrasala chyhsa hnohta phuahpa ta a y thei khao lei nawpa ta atahmâ tawhta ahy hnohta hmah he moh ta bie ama reih lei nawpa ta pachhipary ei suh u,” tah ei ta.

18 Chatanachata âmo cha aw ei ta, Zisu moh ta bie reih khao chachei lei awpa nata pachu khao lei awpa ta liahsa tah ei ta.

19 Châhrasala Pity nata Zawhana ta ama hnohta, “Khazohpa mohmô ta Khazohpa bie zyhpa hlâta nâmo bie zyhpa â do via ma,

20 keimo lâ hmo eima hmôpa nata eima theipazy kha reih leipa ta y thei ma pi,” tah ei ta.

21 Chatawhcha âmo chata pachhipary via heih ei ta, pathlie haw ei ta, zawpi vâta hriena rypaohpa hmô veih ei; ama hmotaopa vâna khata chyhsa zydua ta Khazohpa palyupalih tlôh ei ta.

22 Hmonoâhpa ta ama patlâpa cha kô sypalih hlâta a machâ viapa châ tlôh ta.

Ngiapâtuhpazy riahpha nawpa ta thlahchhâna

23 Pity nata Zawhana cha ama pathlie nahta âmo sahlaozy lâta vawh ei ta, theihthaipa abeizy nata machâzy ta ama hnohta ama reipa maih cha chho khai ei ta.

24 Cha ama thei nahta, ama zydua ta â raohpa ta ao paro ngaitapa ta Khazohpa lâta, “Abeipa, nâ avâ zy, alei zy, tilaipi zy, a chhôh liata a ypa zydua taotuhpa na châ,

25 nâ ta Thlahpa Pathaihpa ta eima pathlatuhpa na chakaotuhpa Davi pakah ta, he biezy he na reih, ‘Zenitaizy khazia ama pathi a ia, pho to ta khazia hmo hrao leipa ama pachâ? Khizaw abeizy ta thyu ei ta, hyutuhpazy chhao a pahmaohpakhy ei ta, Abeipa nata a Mesia chô liana chata,’ tahpa ta.

27 He khih liana heta na chakaotuhpa pathaihpa, na sathaw thupa Zisu chô liana khata Herawda nata Pawtia Pila zy, Zenitaizy nata Izarel mozy chhaota ama pahmaohpakhy,

28 na ku nata na palôhrupa ta a vaw tlô awpa ta na rao chhieliepa maih kha tao awpa ta.

29 Chatawhcha atahmâ Abeipa y, chyhsa ama pachhiparynazie zy he pachâ teh, na chakaotuhpa he riahpha ngaitapa ta na bie pachhosa la,

30 chyhsazy patlâh awpa ta nâ ta na ku pazawh mah y, na chakaotuhpa pathaihpa Zisu moh vâta pahnona nata hmonoâh ngaitapazy pataosa hra mah y,” tah ei ta.

31 Chatawhcha thlah ama chhâ khai nahta ama y pahmaohna su cha a vaw chalyu ta; ama zydua ta Thlahpa Pathaihpa ta bie ei ta, riahpha ngaitapa ta Khazohpa bie chho ha ei ta.

Hmo zydua ahlyna

32 Chatawhcha ngiapâtuhpa zawpizy cha palôhrupa miakha nata pachâna su khata y ei ta, ama hryta pakha hmahta ama sôh hneipa ‘Kei eih,’ tah veih ei, hmo zydua tlao amâ hly tyh.

33 Apôstôlzy chata hmotaotheina thata chhaota Abeipa Zisu thyuheipa kyh pahnosa tyh ei ta, ama zydua chô liata ngiachhiena thata y ta.

34 Ama hry liata a phahlapa ahyhma y veih ei, alei su zy, o zy, a hneipa maihta zuah ei ta, ama hmo zuapazy cha a ty vaw cheih ei ta,

35 apôstôlzy phei thaby liata soh tyh ei ta; ama byuhpa rakha chyu ta rai tyh ei ta.

36 Zawsi, apôstôlzy ta Banaba ama tahpa cha, (cha moh yzie cha thlahpalôhpa Saw tahna châ ta), Livai chi, Kupra liahpahlô chyhsa châ ta,

37 a lyu hneipa cha zuah ta, a ty vaw cheih ta, apôstôlzy phei thaby liata soh ha ta. 

Hmotaopazy 5

Hmotaopazy 5

Anania nata Saphira

1 Châhrasala chyhsa pakha a moh Anania a lahpinô Saphira nata y ei ta, ano chata alei su zuah ta.

2 A lahpinô pahnopa ta a mâ phi bâ haw ta, chatawhcha a laibâhpa vaw cheih ta, apôstôlzy phei thaby liana chata soh ta.

3 Châhrasala Pity ta, “Anania y, Thlahpa Pathaihpa dô awpa nata lei su ty phih bâ awpa ta khazia Sâtâ ta na pathipalôh a pabie tly?

4 A y chhôh zydua liana khata nâ eih châ thlâh ha vei mâ? Na zua tawhna chhao khata na reisai ta y vei ma? Khazia e he kyh he na palôhrupa liata na pachâ? Chyhsapa liata a haihpa châ va chi, Khazohpa liata a haihpa tlao na châ,” tah ta.

5 Anania chata cha biezy cha a theipa ta nahta, pao ta, thi ha ta. A theipa maihta chi ngaita ei ta.

6 Satlia sahlaozy cha thyu ei ta, pahly ei ta, a sy ei ta, pabu haw ei ta.

7 Dawh thôh rachhôh tlyma rakha tawhta a lahpinô cha hmo yzie cha pahno leipa ta a ngia ta.

8 Pity ta a hnohta, “Na chho teh, alei su cha he zie deita heta ma nama zuah?” tah ta. Ano chata, “Y, he zie deita hena a châ,” tah ta.

9 Chatawhcha Pity ta a hnohta, “Khazia Abeipa Thlahpa pasia nawpa ta nama bie namâ paraoh? Moh teh, na vahpa a pabutuhpazy phei cha chhikao thaby liata a vaw y haw, nâ chhao ama châ sy aw,” tah ta.

10 Sôkhata a phei thaby liata pao ta, thi ha hra ta. Chatawhcha satlia sahlaozy cha a vaw ngia ei ta, ano cha a thipa ta vaw hmô ei ta, a sy ei ta, a vahpa kiapâh liana chata pabu haw ei ta.

11 Awnanopa sahlao zydua nata cha kyhzy a theipa maihzy chata chi ngaita ei ta.

Ngiana hluhpi nata hmonoâhpa taona

12 Chyhsa hry liata Khazohpa ta apôstôlzy ku ta ngiana nata hmonoâhpa hluhpi a tao tyh. Âmo sahlao cha ama zydua ta palôhrupa miakha ta Sawlawmaw aikah liana chata a pakhy tyh ei ta.

13 Mo hropa deikua cha ahyhma ama hry liata a hlao ngâh khao leipa ei ta, châhrasala chyhsa ta âmo sahlao cha reithai tyh tlôh ei ta.

14 Chatawhcha ngiapâ thiehpa sahlao chanô nata chapaw hluhpi ta Abeipa lâta a baichha rili ei ta,

15 chatanachata tlâh leipazy chhao othliah lâta zy a sy ei ta, rakhô liata zy, hmophaw liata zy paziasa ei ta, Pity a sie nota a nohpahlipa chhâ ta thokha a pahli thei nawpa ta.

16 Zerusale chheipâh khihzy tawhta zawpizy chhao cha, tlâh leipazy, lyurâhripa pualeipa taolapazy a vaw chhipa ta a vy ei ta, chazy chhao cha tlâ chyu ei ta.

Apôstôlzy taolana

17 Châhrasala Theihthai Beichaipa nata a viasa zydua vaw thyu ei ta, cha a viasazy cha Saduasi py châ ei ta, hnâchhao ngaita ei ta,

18 apôstôlzy cha patu ei ta, vâtlâh patâhna liata khô ei ta.

19 Châhrasala zâta Abeipa vâlyuhchâpa pakha ta ochhizy cha vaw pahy ta, papua ta,

20 “Khazohpa achhyna-o liata a kei duah ula, chyhsa hnohta he Hrona bie zydua he reih teh u,” tah ta.

21 Cha bie cha ama thei nahta, khihpavâ no rachhôh ta Khazohpa achhyna-o liana cha a ngia ei ta, pachu ei ta. Chatawhcha Theihthai Beichaipa nata a viasazy cha a vy ei ta, ryureituhpa sahlao nata Izarel pathlazy machâ sahlao zydua awpakhy ei ta, apôstôlzy cha vaw pachhithasa awpa ta patâhna o lâna chata chyhsa tuah ei ta.

22 Châhrasala hyutuhpazy cha vawh ei ta, patâhna o liana chata âmo cha hmô tlôh leipa ei ta, chatanachata kua haw ei ta,

23 “Atâhna o cha a bohpa ta a khawpa ta, a vaihtuhpazy chhao ochhi thaby liata a duahpa ta hmô tlôh pi ta, châhrasala pahy pi ta, a chhôh liata ahyhma hmô ma pi,” tahpa ta chho ei ta.

24 Khazohpa achhyna-o hyutuhpa nata theihthaipa abeizy ta cha biezy cha ama thei nahta, “Hezy he kha tluta ma ama phuah aw tly?” tahpa ta âmo kyh liana chata ama pachâ rôh ngaita ta.

25 Chyhsa pakha a vy ta ama hnohta, “Pachâ teh u, atâhna o liata chyhsa nama khôpazy khata Khazohpa achhyna-o liata aduahpa ta chyhsa ama pachu,” tahpa ta vaw chho ta.

26 Chatanachata hyutuhpa cha a chyhsazy chhaota vawh ei ta, vâtlâh ama chipa vâta, kheihta tah leipa ta a vaw chhi ei ta, chata leipa ta cha alô ta ama vawh awpa chi ei ta.

27 Chatawhcha amâ vaw chhi nahta, ryureituhpa sahlao hmiakô liata paduasa ei ta. Theihthai Beichaipa chata ama hnohta,

28 “He mo heta pachu lei awpa khâchâ cha tah haw pi ta, pahno teh u, nama bie pachupa ta Zerusale nama pabie khai ha hih, cha chyhsa thisaih eima chô liata paysa awpa ta namâ chhuah,” tahpa ta padai ta.

29 Châhrasala Pity nata apôstôlzy chata, “Chyhsa bie hlâta Khazohpa bie eima zyh via awpa a châ.

30 Nâmo ta Zisu tho liata khaipâpa ta nama thiepa kha, eima pathlatuhpazy Khazohpa ta a pathyu haw heih.

31 Ano tlai kha Khazohpa ta Hyutuhpa nata Pachhatuhpa ta y awpa ta a chachâh lâta palyupalih ha ta, Izarelzy molei parosa awpa nata a ngiahthai awpa ta.

32 Cha biezy cha a pahnotuhpazy eima châ hih, Thlahpa Pathaihpa ta a bie a zyhpa maih hnohta a piepa kha, a pahnotuhpa châ hra ta,” tahpa ta a chhy ei ta.

33 Âmo chata cha biezy ama thei nahta, ama pathi-ia kaw ta, thie khoh ei ta.

34 Châhrasala ryureituhpazy hry liana chata Pharisai chyhsa pakha a moh Kamaliel Ryhpa pachutuhpa, chyhsa zydua hryta moh pathâh ngaitapa cha a duah ta, cha chyhsazy cha papua chy awpa bie pie ta.

35 Ryureituhpazy hnohta, “Nâmo Izarel mozy saih u, he chyhsazy chôta nama hmotao a chhuahpa he a chado teh u.

36 Cha hlâna chhao khata Theuda molaipa ei châ, tahpa ta vaw y ta, cha chyhsa hnohna chata chyhsa hluhpi, za palih rachhôh a bai ei ta; ano cha thiepa ta y ta, a bie a zyhpa maih ama zydua ta pai khai ha ei ta, khâpahma châ khao veih ei.

37 Cha hnôh lâna chata maluh rei nona khata Kalili râh liatahpa Zuda kha vaw y heih ta, ano lâta chyhsa thokha sy hei ta; châhrasala ano chhao cha thi ha ta, a bie a zyhpa maih cha ama zydua ta ama pai khai ha heih.

38 Chavâta atahmâ ei cha tah ei chuh, he chyhsazy he hria khah u, y thlâh ha ei se; he ama hmotao a chhuahpa nata ama hmotaopa he chyhsapa papuapa a châ khiahtala a leidia aw;

39 châhrasala Khazohpa papuapa a châ khiahtala âmo pahleipadia thei aw veih eichi. Chata leipa tala Khazohpa adyuhpa nama châ pathlei aw na!” tah ta.

40 Chatawhcha a reipa cha â ryh tah ei ta, apôstôlzy cha aw ei ta, chhei ei ta, ama chhei khai nahta Zisu moh ta bie reih lei awpa liahsa taihpa ta pathlie ei ta.

41 Chatanachata ryureituhpazy hry tawhtapa pua ei ta, cha moh vâna chata maophyu tao tlâh ta raopa ama châpa vâta aly kaw ei ta.

42 Nohchareih Khazohpa achhyna-o liata nata ama ozy liata Zisu cha Mesia a châ tahpa ta pachupa nata chhopa bâh hlei veih ei. 

Hmotaopazy 6

Hmotaopazy 6

Machâ pasari raopazy

1 Cha nohzy ta pachupa sahlao ama pôh hai nona chata, nohchareih ama hmo raipa liana chata ama nôhmeizy ama pachâ tyh leipa vâta Krika Zuzy cha Hebraizy chôta paphôh ei ta.

2 Pahrawhleinozy chata pachupa zawpizy châ aw ei ta, “Khazohpa bie chho bâhsaipa ta tlâhkhaizy liata eima chakao khiahtala pha aw vei.

3 Chatanachata unawh saih u, nama hry liata Thlahpa nata sona ta a biepa, chyhsa moh phapa saita pasari a tlyh teh u, âmo cha he hmozy a pachâtuhpa châna heta eima tao aw.

4 Keimo deikua cha thlahchhâpa nata bie chhopa ta eima y lymâ aw,” tah ei ta.

5 Cha biezy chata zawpi zydua cha palysa ta, chatanachata Stiphana ngiapâna nata Thlahpa Pathaihpa ta a biepa nata Phili nata Prôkôra nata Nikanaw nata Timôna nata Parmena, Nikôla Zuzy phohlypa Antiôka khihpa chhaota a tlyh ei ta.

6 Cha chyhsazy cha apôstôlzy hmiakô liata paduasa ei ta, âmo chata thlahchhâ ei ta, ama chô liata ama ku pahnieh ei ta.

7 Khazohpa bie cha vaw pôh lymâ ta; Zerusale liata pachupazy sahlao pôh ngaita ei ta, theihthaipazy hry liata chhao chyhsa hluhpi ta zo ei ta, a ngiapâ haw ei ta. Stiphana patuna

8 Stiphana cha nôphana nata hmotaotheina ta bie ta, chyhsa hry liata hmonoâhpazy nata pahnosana rônah ngaitapazy tao tyh ta.

9 Chatanachata Kurini khih nata Alezandria khih tawhta Zu thokha, apakhyna-o liata chyhsazy, Sei Puapa sahlao ama tahpa zy nata Kilikia râh liata chyhsazy, Asia râh liata chyhsazy cha vaw thyu ei ta, Stiphana cha vawh ei ei ta.

10 Châhrasala a sona nata a reikheituhpa Thlahpa cha ei thei leipa ei ta.

11 Chyhsazy a ryru ei ta, cha chyhsazy chata, “Mawsi nata Khazohpa a reipachhiepa eima thei,” tah ei ta.

12 Chyhsazy, machâzy, Ryhpa pachutuhpazy pasyu ei ta, Stiphana tei ei ta, patu ei ta, ryureituhpazy lâta a chhi ei ta,

13 pahnotuhpa pakheipazy tao ei ta, chazy chata, “He chyhsa heta he o pathaihpa nata ryhpa he reipachhie tyh ta;

14 he Nazari Zisu heta he o he parao aw ta, Mawsi ta ryhpa maniah a piepazy kha a panano aw tahpa a reipa eima thei,” tah ei ta.

15 Chatawhcha ryureituhpa sahlao atyuhpa zydua chata Stiphana mo thlâh ha ei ta, a hmia cha vâlyuhchâpa hmia hawhta hmô ei ta. 

Hmotaopazy 7

Hmotaopazy 7

Stiphana thaina bie

1 Theihthai Beichaipa chata, “He biezy he a do ma?” tahpa ta hiahri ta.

2 Stiphana chata, “Unawh saih u, paw saih u, na nahthlie teh u. Eima pathlatuhpa Abaraha Harana khih liata a y hlâta, Mesôpôtamia râh liata a y nona khata, rônahna Khazohpa ano liata a vaw luah ta,

3 a hnohta, ‘Na râh nata na chizy hry tawhtapa pua la, râh ei cha pamosa awpa lâta sie teh,’ tah ta.

4 Chatawhcha ano cha Kaldia mo râh tawhtapa pua ta, Harana khih liata y ha ta. A paw a thi tawhta cha tawhna chata atahmâ ta nama yna khih liana heta Khazohpa ta pangiasa ta;

5 he liana heta a châ khâpahma su pahrâna awpa, a phei pahniehna rakha chhao pie leipa ta, châhrasala ano nata a hnôh lâta a pathlazy ryu châta pie awpa taih ta, saw a hnei hlâ chhaota.

6 Khazohpa ta he hawhta a reih, a pathlazy chyhsa râh liata kô za palih y aw ei ta, chyhsa ta sei ta tao aw ei ta, ama taola hra aw, tahpa ta.

7 Khazohpa ta, ‘Sei ta a tao awpazy pho pachia aw na ta, cha khai tawhna chata vaw pua aw ei ta, he su liana heta eina chakao aw ei,’ tah hra ta.

8 Khazohpa ta a hnohta, chopawtaina kyh kha bie hraih ta. Chatanachata Abaraha chata Aisika sa ta, a noh charie noh liata a chopaw tai ta; Aisika chata Zakaw sa ta, Zakaw chata chi pathlatuhpa pahrawhleino kha sa ta.

9 “Chatawhcha chi pathlatuhpazy khata Zawsi hnâchhao ei ta, Izi râh lâta zuah ei ta; châhrasala Khazohpa a hnohta y ta,

10 a riethei taona zydua liata pachha lymâ ta, Izi râh beipa Phirao chhao pangiachhiesa ta, chyhsa sopa a châpa pahnosa hra ta, chatanachata ano chata Izi râh nata a o liata a chyhsa zydua chôta ryureituhpa ta tao ha ta.

11 Izi nata Kana râh zydua liana chata chakâna vaw y ta, rietheina ru ngaitapa vaw tlô ha ta, eima pathlatuhpazy châta niepa rai hmô leipa ei ta.

12 Châhrasala Zakaw chata Izi râh liata sâh a ypa a theipa ta nahta, eima pathlatuhpazy cha tuah ta, cha cha ama sie tua chaina a châ.

13 Chatawhcha ama siena ei nona liana chata Zawsi cha a unawhpazy a pahnosa ta, Zawsi chhôhkha cha Phirao pahnosa haw ei ta.

14 Zawsi ta a paw Zakaw nata a unawh zydua pa-awsa ta, âmo cha sysari nata papangawh châ ei ta;

15 chatawhcha Zakaw cha Izi râh lâ zu ta. Ano nata eima pathlatuhpazy cha thi ha ei ta,

16 Sekhe khih lâta tlôkhei ei ta, Abaraha ta Sekhe khih liata Hamôra sawchapawpazy liata thlâ tâkâ ta a chaleipa liana khata pazia ha ei ta.

17 “Khazohpa ta Abaraha liata bie a taihpa kha a tlôna daihti cha a vaw tlô chyta, chyhsazy cha Izi râh liana chata pôh ei ta, hluh via lymâ ei ta,

18 Zawsi a pahno leipa abei hropa a vaw yna taihta.

19 Cha chyhsa chata eima chizy dô ta, eima pathlatuhpazy cha taola ta, hawsaihzy ama hroh lei awpa ta pathysa tyh ta.

20 Cha nona chata Mawsi pih ta, a hmi pha ngaita kaw ta. A paw o liata thla thôh pasa ei ta;

21 ama thy nata, Phirao sawchanônô ta la ta, ano saw awpa ta pasa ta.

22 Mawsi cha Izi râh liata chyhsazy sona zydua pachusa ei ta, a bie nata a hmotaona liata rônah ngâsâ ta.

23 “Ano cha kô sypalih a tlô daihmâ nahta, a unawh Izarel pathlazy cha hmô a chhuahpa ta pachâ ta.

24 Ama hryta chyhsa pakha Izi chyhsa ta a taochhie haipa hmô ta, pachha ta, taola taotuhpa phuh la ta, Izi chyhsa cha thie ha ta.

25 Mawsi chata ano ku ta Khazohpa ta âmo a pachha tahpa a unawhpazy ta ama pahno khiah ma tahpa ta pachâ ta, châhrasala pahno leipa ei ta.

26 A mylâ ta chyhsa pano amâ tu hai nota âmo lâ vaw tlô ta, ‘Ei chyhsazy saih u, unawh nama châ mâ tâh, khazia a do leipa ta nama tao?’ tahpa ta paryh a chhuah ta.

27 Châhrasala a viasa chôta chhoru viapa ta Mawsi chatitha ta, ‘Eima chô liata hyutuhpa nata ryureituhpa ta ahyma châ tao?

28 Zahia Izi chyhsa na thiepa hawhna khata thie einâ chhuah chi ma?’ tah ta.

29 Cha bie vâna chata Mawsi a râ ta, Midia râh liata y thlâh ha ta, cha liana chata sawchapaw pano sa ta.

30 “Kô sypalih tawhta Sinai Tlâh râhpathohpa liata thobuh liata mei kâpa hry liata vâlyuhchâpa pakha ano lâta a vaw luah ta.

31 Mawsi ta a hmô nahta, a hmo hmôpa cha a noâh ngaita ta; mo awpa ta a kei hnia nota Abeipa ao ta,

32 ‘Kei na pathlatuhpazy Khazohpa ei châ hih, Abaraha Khazohpa, Aisika Khazohpa, Zakaw Khazohpa cha,’ vaw tah ta. Mawsi cha a chalyu ta, mo ngâh khao leipa ta.

33 Abeipa chata a hnohta, ‘Na phei tawhta na pheiky kha pahluh teh, nâ duana su kha alei pathaihpa a châ.

34 Izi râh liata ei chyhsa a ypazy cha ama rietheinazie ei hmô thlâh ha mâ tâh, amâ rôhna chhao thei thlâh ha na ta, âmo pachha awpa ta ei zu. A vy tua, Izi râh lâ ei cha tuah aw,’ tah ta.

35 “Cha Mawsi, ‘Hyutuhpa nata ryureituhpa ta ahyma châ tao?’ tahpa ta ama dythapa cha, thobuh liata vâlyuhchâpa ano liata aluahpa khata bao ta, Khazohpa ta ano tlai cha hyutuhpa nata pachhatuhpa châ pabaopa ta a tuah.

36 Ano chata Izi râh liata zy, Tilaipi Saihpa liata zy, râhpathohpa liana zy chata kô sypalih chhôhta hmonoâhpa nata pahnonazy pahmôsa ta, âmo chhihtha haw ta.

37 Cha Mawsi cha Izarel pathlazy hnohta, ‘Khazohpa ta ‘kei eina taopa hawhna heta nama unawhpazy hry liata hrohsopa pakha a cha taopa aw ei,’ a tahtuhpa kha a châ.

38 Cha chyhsa cha râhpathohpa liata chyhsa a y pahmaohpa hryta Sinai Tlâh liata bie a chhotuhpa vâlyuhchâpa hnohta nata eima pathlatuhpazy hnohta a ypa kha a châ; cha chyhsa cha maniah pie pachhuah awpa ta bie hrohpazy cha a latuhpa kha a châ.

39 Eima pathlatuhpazy chata a bie zyh khoh leipa ei ta, dytha ei ta,

40 Arawna hnohta, ‘Maniah chhihtha awpa ta khazohzy maniah taopa teh; he Mawsi Izi râh tawhta maniah chhithatuhpa he a thâtih pahno khao tlôh lei khâh pi ta,’ tahpa ta ama palôhrupazy cha Izi râh lâta kua ha heih ta.

41 Cha nona chata viahchao taw nohthlahpa tao ei ta, a nohthlahpa lâna cha atheihna hlâ ei ta, âmo ku ta taopa chô liana chata thapha ngaitapa ta y ei ta.

42 Châhrasala Khazohpa ta a heisai ta, avâ liata awhsi sahlao amâ chhy thei nawpa ta âmo a heisai haw ta, hrohsopazy châbu liata: ‘Izarel chi saih u, râhpathohpa liana khata kô sypalih chhôhta sa thiepa nata sahroh thiepa ta kei einâ chhy eichi ma?

43 Môlôka poh-o nata khazoh Rephana awhsi chhao cha, a chhy awpa ta a nohthlahpa nama taopazy kha tlao a sy tyh eichi ta; chavâta Babylaw khih khô lâta ei cha chhihtha aw ei,’ tahpa ropa hawhna khata.

44 “A nohthlahpa a hmôpa hawhta tao awpa ta Mawsi a chhotuhpa ta a raopa hawhna khata, eima pathlahtuhpazy ta râhpathohpa liana khata pahnona poh-o cha hnei ei ta.

45 Cha thlyu cha eima pathlatuhpazy pathla pachhuahpa chhaota hnei lymâ ei ta, Khazohpa ta eima pathlatuhpazy hmiakô liata Zenitai a papuapa sahlaozy râh ama pahrâ nona khata Zawsua a ngia nota a ngiakhei ei ta. Davi vaw yna taihta cha liana chata y thlâh ha ta;

46 cha Davi cha Khazohpa mohmô ta khokhei tlâh châpa ta y ta, Zakaw Khazohpa chata yna tao awpa hiah ta.

47 Châhrasala Sawlawmaw ta o cha tlao sapa ta.

48 Châhrasala Chônôchaipa cha ku ta sapa ozy liata pahrâ beih vei; hrohsopa chata:

49 ‘Avâ ei beidyuchhai châ ta, alei ei phei tlyna a châ. O kheihawhta e, eina sapa aw chi, Abeipa ta a tah, ei pahâna su chhao khâpa a châ?

50 Keima ku ta he hmozy ato he tao vana mâ?” a tah na, tahpa ta a reipa hawhna khata.

51 “Chyhsa chhorupa pathipalôh nata pahno thai leipazy saih u, chhâzaw ta Thlahpa Pathaihpa namâ dyuh tyh. Nama pathlatuhpazy taopa lymâ hawhna khata nama tao tyh.

52 Nama pathlatuhpazy ta hrohsopazy hry liata ahyma ama pasipasaw leipa a y? Chyhsa Siapa a vy awpa kyh chhochhielietuhpazy kha thie ei ta, cha a patusatuhpa nata thietuhpazy nâmo he atahmâ nama châ mâ tâh,

53 ryhpa vâlyuhchâpazy pie pachhuahpa kha hmô ta, a zyh tlôh leipa saih u,” tah ta.

Stiphana alô ta ama vawna

54 Cha biezy cha ama thei nahta ama pathi-ia ngaita ta, Stiphana chô liana cha ama hâh charieh ei ta.

55 Châhrasala ano cha Thlahpa Pathaihpa ta a biepa châ ta, avâ lâ khâchâ moh ta, Khazohpa rônahzie nata Khazohpa chachâh lâta Zisu a duahpa hmô ta;

56 “Pachâ teh u, avâ pahypazy hmô na ta, Khazohpa chachâh lâta Chyhsa Sawchapawpa a duahpa chhao ei hmô” tah ta.

57 Chatanachata âmo cha ao paro ngaitapa ta awh ei ta, ama nahkhao a chahu ei ta, â raohpa ta tei ei ta.

58 Khih tawhtapa papua ei ta, alô ta vawh ei ta; a pahnotuhpazy chata satliapa pakha, a moh Sawla phei thaby liana chata ama pohzy soh chyu ei ta.

59 Chatanachata alô ta vawh ei ta, Stiphana ta, “Abeipa Zisu y, ei thlahpa la mah y,” tahpa ta Abeipa pado ta.

60 A pakhu paneih ta ao paro ngaitapa ta, “Abeipa y, he ama hmotaopa moleipa he ama chô liata maoh paphaosa khah y,” tah ta. Cha bie a rei khaipa ta nahta a mô ha ta. 

Hmotaopazy 8

Hmotaopazy 8

1 Chatawhcha Sawla chhao chata a thihpa cha a ryh tahkhei ta.

Sawla ta Awnanopa a taolana

Cha noh liana chata awnanopa Zerusale liata a ypa sahlaozy cha thata taola pathao ei ta, apôstôlzy deita leipata cha Zudia nata Samari râh khi to liata pai pathlah khai ei ta.

2 Khazohpa pachâpa thokha ta Stiphana cha pabu ei ta, thata chakhei ei ta.

3 Sawla deikua chata awnanopa sahlaozy taola ngaita ta, o to liata a ngia ta, a chanô a chapaw ta a daophi ta, patâhna o liata a khô tyh.

Samari liata Thâtihpha chhona

4 Cha a paihpazy cha khi to liata sie ei ta, bie cha chho lymâ ei ta.

5 Phili cha Samari khih lâ zu ta, ama hnohta Mesia bie tlâh-awhkhei ta.

6 Thlahpa pathaih leipazy cha chyhsa hluhpi ama patupazy chhôh tawhta ao paro ngaitapa ta awpa ta ama puapa vâta nata, asypa nata pheisypa a hluhpizy chhao ama tlâ hawpa vâta,

7 zawpizy ta a bie theipa ta, a hmonoâhpa taopazy hmôpa ta, Phili bie reipa cha palôhrupa miakha ta pachâ ei ta.

8 Chatawhcha khih liana chata thata aly ei ta.

9 A moh Saimaw chyhsa pakha y ta, ano chata molaipa ei châ, tahpa ta, eikhano ta cha khih liana chata dyu hmâpa ta Samari khih chyhsazy no pa-âh ngaitapa ta tao tyh ta.

10 “Chyhsa zydua chata machhie chaipa tawhta abei chaipa taihta, “He chyhsa he Khazohpa hmotaotheina rônahpa eima tahpa kha a châ hih,” tahpa ta a bie a papeisa kaw tyh ei ta.

11 A dyu hmâpa ta bohpi noâh ngaitapata a tao tyhpa vâta ama papeisa kaw tyh.

12 Châhrasala âmo chata Khazohpa Khihnarâh Thâtihpha nata Zisu Krista moh Phili chhopa cha ama zyh pata nahta, a chanô a chapaw ta bâti châ haw ei ta.

13 Saimaw chhaota a ngiapâ ha hra ta, chatawhcha bâti a châ khai nahta Phili hnohta y thlâh ha ta. Pahnona nata hmonoâhpa rônah ngaitapa taopazy hmô ta, noâh ngaitapata y ta.

14 Chatawhcha apôstôlzy Zerusale liata a ypazy khata Samari khih liata chyhsazy ta Khazohpa bie amâ ngiapâ tahpa ama thei nahta, âmo lâta Pity nata Zawhana cha tuah ei ta,

15 cha chyhsazy cha ama za tlô nahta Thlahpa Pathaihpa ama hmô thei nawpa ta thlahchhâpa ei ta,

16 cha hlâta cha ama hry liata ahy chô liata hmah tlô mâh vei, Abeipa Zisu moh ta bâti châpa deita a châ.

17 Apôstôlzy chata ama chô liata ama ku pahnieh ei ta, Thlahpa Pathaihpa hnei haw ei ta.

18 Chatawhcha apôstôlzy ku pahniehpa vâta Thlahpa Pathaihpa piepa a châ tahpa Saimaw ta a hmô nahta,

19 “He hawhpa biehneina he na pie hra teh u, ahy chô liata rai ku ei pahniehna maihta Thlahpa Pathaihpa ama hmô hra nawpa ta,” tahpa ta ama hnohta tâkâ pie a chhuah ta. Châhrasala Pity ta a hnohta, “Na tâkâ he na leidiana liata leidia hra mawh sy. Khazohpa hmopiepa tâkâ sô ta chalei nâ chhuahpa vâta!

21 He kyhzy liana heta a hlao hra va chi, tovyuh chhao hnei hra va chi, na palôhrupa Khazohpa pachâ ta sia vei.

22 Chavâta na moleina he ro la, Abeipa lâta thlahchhâ teh, chatanachata na palôhrupa liata na pachâpa he a châ ngiahthai thei nawpa ta.

23 Hmo khana hmôkhaw liata nata molei chahryna liata na y tahpa ei pahno,” tah ta.

24 Saimaw ta a chhy ta, “Nama hmo reipa he khâpahma ei chô liata a tlô lei nawpa ta nâmo ta Abeipa lâta thlah na chhâpa teh u,” tahpa ta.

25 Chatanachata âmo chata Abeipa bie cha pahnosa ei ta, ama rei khai nahta Zerusale lâta kua ha heih ta, Samari râh liata khih hluhpi lâtazy Thâtihpha cha chho lymâ ei ta.

Phili nata Ethiôpia hrilyupa chyhsa

26 Abeipa vâlyuhchâpa pakha ta Phili cha bie a chho ta, “Thyu la chho lâta Zerusale tawhta Kaza a za dypa lâpi liana khata sie teh, cha lapi cha râhpathohpa a siepahliepa a châ,” tah ta.

27 Chatanachata thyu ta, sie ha ta. Chatawhcha Ethiôpia râh liata chyhsa pakha, Ethiôpia beinô Kandaki ry liata hrilyupa abei ngaitapa, a ryu zydua a mohôhtuhpa, Zerusale liata Khazohpa a chhy awpa ta khy ta,

28 â liena lâta châ ta; a talaili liata a tyuna chôta hrohsopa Isai châbu rei lymâ ta.

29 Thlahpa chata Phili hnohta, “Hao talaili hao a kei hnia la, a kei pahlao teh,” tah ta.

30 Phili cha hrilyupa lâna chata a kei râ ta, hrohsopa Isai châbu a reipa thei ta, “Na reipa kha a yzie na pahno ma?” tah ta.

31 Ano chata, “Ahyhma eina chhopasia leipa ta kheihta a yzie ei pahno thei aw?” tah ta. Ano hnohta atyu awpa ta Phili cha hrua ha ta.

32 Khazohpa châ bie a rei haipa cha he he a châ. “Thie awpa ta mietahkupa hawhta ano cha a chhi ei ta, mietahkupa taw a hmi ngyutuhpa hmiakô liata a chalih thlâh hapa hawhta, ano chhaota a pakah â vei.

33 A nawh nota a chô liata bie pachia pasaih veih ei. A pathlazy thâtih ahy a chho aw? Khizaw tawhta a hrona lapa haw tlôh ei ta,” tahpa hih.

34 Hrilyupa chata Phili bie a chho ta a hnohta, “Hrohsopa ta he biezy he ahy kyh ma a reih, ano kyh ma, mo hropa kyh maw ei cha hiahri?” tah ta.

35 Phili ta reih ta, cha Khazohpa bie cha rei pathao ta, a thaby tawhta a hnohta Zisu Thâtihpha chho ta.

36 Lâpi liata ama sie nota ti kheihawhpa tlyma tlô ei ta, hrilyupa chata, “Mo tua, he liata ti a y! Bâti châ nawpa ta khâpa ma na pakhâ?” tah ta. 

37 Phili ta a hnohta, “Na palôhrupa zydua ta nâ ngiapâ khiahtala bâti na châ thei aw,” tah ta. Ano ta, “Ei bâti aw, Zisu Krista cha Khazohpa Sawchapawpa a châ tahpa ei ngiapâ,” tah ta.

38 Chatawhcha talaili cha paduasa ta; ama pano ta Phili nata hrilyupa cha ti lâna chata zu ei ta, Phili chata ano cha bâti pachâsa haw ta.

39 Ti tawhta ama kaw puapa ta nahta, Abeipa Thlahpa chata Phili la haw ta; hrilyupa chata ano cha hmô khao leipa ta, thapha ngaitapa ta sie lymâ haw ta.

40 Châhrasala Phili cha chyhsa ta Azôtu khih liata hmô ha heih ei ta, sie palâh ha ta, Kaisaria khih taihta Thâtihpha cha chho lymâ ta. 

Hmotaopazy 9

Hmotaopazy 9

Sawla pihpathina (Ht 22:6-16. 26:12-18)

1 Cha nona chata Sawla deikua chata Abeipa pachupa sahlao a pachhiparyna kyh nata thie â chhuahna kyh khâ reih thlâh ha ta, Theihthai Beichaipa lâta vawh ta,

2 Damaska liata apakhyna-o zydua liata chyhsa zydua lâta pie awpa ta chazy hia ta. Lâpi chyhsa cha ahyrai a hmô khiahtala, chanô rai, chapaw rai, Zerusale lâta chahryna chôta a vaw chhi thei nawpa ta.

3 Châhrasala a sie nota Damaska a tlô chyta sôkhata khaihpa avâ tawhtapa a chheipâh ta phu vaw khaih ta.

4 Alei liata pao ta, a hnohta, “Sawla, Sawla, nâ ta khazia eina taola chi?” tahpa ta ao thei ta.

5 Ano chata, “Abeipa, ahyma na châ?” tah ta. Abeipa chata, “Zisu na taolapa he ei châ;

6 châhrasala thyu la, khih liata a ngia teh, chatanachata na tao awpa ama cha vaw chho aw,” tah ta.

7 A hnohta a sie hrapazy cha a thlihpa ta a duah ei ta, ao cha thei taraw ei ta, châhrasala ahyhma hmô veih ei.

8 Sawla cha alei tawhtapa cha thyu ta; a mo vaw padeih ta, khâpahma hmô thei khao leipa ta; a ku ta cha-ao ei ta, Damaska lâna chata a chhi ei ta.

9 noh thôh hmô leipa ta y ta, khâpahma niepa ta doh leipa ta.

10 Damaska liata a moh Anania pachupa pakha a y. Abeipa ta mâ lâ hawhta a hnohta, “Anania,” tah ta. Ano chata, “Moh teh, Abeipa, he liata ei y,” tah ta.

11 Abeipa chata a hnohta, “Thyu la, Othlia Palâhpa ama tahpa lâna chata sie la, Zudah o liata Tarsa khihpa, a moh Sawla hiahri teh; thlah a chhâ hai,

12 a moh Anania chyhsa pakha a ngiapa ta a mo pavâh nawpa ta a chô liata ku pahniehpa ta a hmô haw,” tah ta.

13 Anania chata, “Abeipa y, cha chyhsa cha Zerusale liata na mo pathaihpazy chôta a paraona hluhzie kyh, chyhsa hluhpi pakah ta ei thei;

14 he liata chhao, na moh a padopa maih chahry nawpa ta theihthaipa abeizy tawhta biehneina a hmô mâ tâh,” tah ta a chhy ta.

15 Châhrasala Abeipa ta a hnohta, “Sie thlâh ha teh, Zenitaizy, abeizy, Izarel pathlazy lâta ei moh â ngiakhei nawpa ta ei chhaichhi raopa a châ mâ tâh,

16 ei moh vâta riethei kha tluta ma a tao aw, ano ei pahnosa aw,” tah ta.

17 Anania cha vawh ta, o liana chata a ngia ta. A chô liata a ku pahnieh ta, “Ei nawhta Sawla y, na mo pavâ nawpa nata Thlahpa Pathaihpa biepa ta na y thei nawpa ta Abeipa na vaw siena lâpi liata na hnohta aluahpa Zisu khata eina vaw tuah,” tah ta.

18 Chatawhcha sôkhata a mo tawhta phuhlupa hawhta tla ta, a mo vaw pavâh ha ta. Chatawhcha thyu ta, bâti châ ha ta,

19 chatawhcha pati nie ta, a tha vaw y ha ta.

Damaska liata Sawla bie chhona

Damaska liata pachupa sahlao a ypazy hnohna chata, noh khazie tlyma y ta.

20 Apakhyna-ozy liana chata Zisu cha Khazohpa saw a chânazie kyh tlâh-awhkhei ta.

21 A bie a theituhpa zydua chata ama noâh kaw ta, “He chyhsa he Zerusale liata, he mo a pasotuhpazy a taola tyhpa kha châ vei ma? Cha chyhsazy cha theihthaipa abeizy lâta chahryna chôta a chhi awpa a vy chhâpa a châ,” tah ei ta.

22 Sawla deikua cha a tha vaw tlô via ta, cha cha Mesia a châ hmeiseih tlai tahpa chhopasia ta, Damaska liata Zu a ypazy cha cha-ohsa thlâh ha tyh ta.

Sawla Zunawh tawhta a bohna

23 Noh hluhpi tawhna chata Sawla thie awpa ta Zuzy cha a chhohia ei ta,

24 châhrasala ano chata ama chhuahnohpa cha pahno ha ta, thie awpa ta kuh chhikao tô liana chata a chhô a zâ ta a byh tyh ei ta;

25 châhrasala a pachupazy chata ano cha a chhi ei ta, zâ ta kuh opy liata hrâbyh ta pathlia ha ei ta.

Sawla Zerusale liata

26 Sawla chata Zerusale a tlôpa ta nahta, pachupa sahlaozy cha a pahlao a chhuah ta; âmo deikua chata ama zydua ta ano cha chi ei ta, pachupa a châ hrapa a ngiapâ leipa ei ta.

27 Banaba deikua cha ano cha a chhi ta, apôstôlzy hnohna cha a vy khei ta, lâpi liata Abeipa hmô ta, a hnohta bie a reipa zy, Damaska liata Zisu moh ta riahpha ngaitapa ta bie a chhoziezy chhao cha ama hnohta reih ha ta.

28 Sawla cha Zerusale liana chata ama hnohta â ngia tyh, pua tyhpa ta y haw ta.

29 Abeipa moh ta riahpha ngaitapa ta bie chho tyh ta. Krika Zuzy hnohta bie reipa ta, ei ta; âmo deikua chata ano cha thie a chhuah ei ta.

30 Unawhzy chata cha cha ama pahno nahta Kaisaria lâta chhihtha ei ta, Tarsa lâta kua haw ei ta.

31 Chatanachata awnanopa sahlaozy cha Zudia râh chheipâh liata zy, Kalili râh chheipâh liata zy, Samari râh chheipâh liana zy chata a i via rili ei ta; thlahlôh ngaitapa ta y ei ta; Abeipa chipa ta Thlahpa Pathaihpa thlahpalôhpa ta pôh rili ei ta.

Ainia patlâhna

32 Pity ta khihzy a chahrypa ta Lyda khih liata mopathaihpa a ypazy lâta zu ta.

33 Cha liana chata chyhsa pakha a moh Ainia, asypa vâta kô charie rakhô liata a zia thlâh hapa hmô ta.

34 Pity chata a hnohta, “Ainia y, Zisu Krista chata a cha patlâh; thyu la na hmophaw chaty teh,” tah ta. Chatanachata thyupâ ha ta.

35 Lyda khih nata Sharaw by liata a ypa zydua chata Ainia cha hmô ei ta, Abeipa lâta a heih chyu ei ta.

Dawkasi pahrosa heihna

36 Zôpa liata a moh Tabi pachupa pakha y ta, (a Krika moh cha Dawkasi a châ; a yzie cha Sakhi tahna). Cha chanô chata hmotao phapa nata hmo piepa hnei chhei ha ta.

37 Cha nona chata tlâh leipa ta thi ha ta; a ngai pasi ei ta, chhôhpadâhpa chôchaipa liata pazia ei ta.

38 Lyda khih cha Zôpa khih kiapâh ta a châpa vâta pachupazy sahlao chata Pity cha liata a ypa pahno ei ta, “Hawh leipa ta keimo lâ a vy mah y,” tahpa ta a haw awpa ta ano lâ chyhsa pano tuah ei ta.

39 Pity cha thyu ta ama hnohta sie ha hra ta. Chatawhcha a tlôpa ta nahta, chhôhpadâhpa chô chaipa lâta a chhi ei ta. Nôhmei zydua cha a kiapâh liata a duahpa ta. Dawkasi ama hnohta a y nota a viahpakao taopazy, a chysia taopazy pamosana chôta cha ei ta.

40 Châhrasala Pity chata ama zydua ta papua khai ta, pakhu paneih ta thlahchhâ ta; athihpa ri lâ a heihpa ta, “Tabi, thyu teh,” tah ta. Chatanachata a mo vaw padeih ta, Pity cha a hmôpa ta nahta, a vaw tyu ha ta.

41 Pity chata a ku hlâ ta, pathyu ha ta. Mopathaihpazy nata nôhmeizy cha aw ta, a tlâhpa ta pahmô ta.

42 Cha cha Zôpa khih zydua chata pahno khai ha ei ta, chyhsa hluhpi ta Abeipa cha a ngiapâ ei ta.

43 Pity cha noh hluhpi Zôpa liata, Saimaw, savo taotuhpa o liata châh thlâh ha ta. 

Hmotaopazy 10

Hmotaopazy 10

Pity nata Kawnilia

1 Kaisaria liata, a moh Kawnilia, chyhsa pakha a y, Rawma pheisaih ryta Itali py ama tah, cha py liata pheisaih zakha hyutuhpa châ ta,

2 Khazohpa pachâpa chyhsa châ ta, a chhôhkha zydua chhaota hmo hluhpi pie tyh ta, Khazohpa lâta chhao thlahchhâ tyh ta.

3 Cha chyhsa chata zâlâ dawh thôhpa rachhôh ta aluahna liata a sia ngaitapa ta Khazohpa vâlyuhchâpa pakha ano lâta a ngia ta, “Kawnilia,” tahpa ta hmô ta.

4 Kawnilia chata ano cha vaw moh thlâh ha ta, chi ta, “Abeipa, khâpa maw?” tah ta. Ano chata a hnohta, “Na thlahchhânazy nata na hmopiepa kyhzy kha a thei thlâh ha na ta, Khazohpa lâta a tlô haw.

5 Atahmâ Zôpa khih lâta chyhsazy tuah la, chyhsa pakha Saimaw, Pity ama tahpa cha va padysa teh;

6 savo taotuhpa Saimaw liata a tlô, a o cha tilaipi kiah liata a y,” tah ta.

7 Vâlyuhchâpa bie a chhotuhpa cha a siepa ta nahta, Kawnilia chata a chakaotuhpazy hryta chyhsa pano nata a chakao tyhpazy hryta Khazohpa pachâpa pheisaih pakha aw ta,

8 bie zydua cha ama hnohta a chho khai nahta. Zôpa khih lâna chata tuah ha ta.

9 A mylâ ta, ama sie nota khih kiapâh ama tlô chyta, Pity cha thlahchhâ awpa ta nohchhô pati nie daihti nota o chôlâ kiah ta.

10 A nodi ta, pati nie khoh ha ta; châhrasala niepa ama tao nona chata a mo a lie ta,

11 avâ pahypa ta khâpaleipa byh, poh lai ngaitapa hawhta, a ki palih ta bupa ta, alei lâ za pathliahpa ta hmô ta.

12 Cha chhôh liana chata sa to nata lôvâpa alyh theipa maih, avâ liata a zawpa pavaw to zy y ta.

13 A hnohta ao ta, “Pity, thyu teh; thie la, nie teh,” tah ta.

14 Châhrasala Pity chata, “Abeipa, châ vei; ânapa nata a pathaih leipa khâpahma nie beih va na,” tah ta.

15 Chatawhcha ao chata a ei nona ta, “Khazohpa ta a pathai hawpa cha nâma ta âna tah khâ,” tah ta.

16 Cha hawhna saita ei thôh vaw y ta, byh cha avâ lâ chalopa ta ypâ ha ta.

17 Pity chata mâlâ hawhta a hmôpa cha a pachâna pahno leipa ta nôpopa ta a y nota, Kawnilia chyhsa tuapazy chata Saimaw o cha vaw hiahri ei ta, ochhi thaby liata a vaw duah ei ta,

18 aw ei ta, Saimaw Pity ama tahpa cha, cha liana chata a tlô nata tlô lei hiahri ei ta.

19 Pity chata a mâlâ hawhpa thâtih cha a pachâ nota, Thlahpa ta a hnohta, “Chyhsa pathôh ta ama cha tlua.

20 Thyu la, chôlâ khâpahma lôhleipa ta y leipa ta âmo zi teh; âmo cha ei tuapa ama châ,” tah ta.

21 Chatanachata Pity cha cha chyhsazy hnohna chata chô ta, ama hnohta, “Nama tluapa he ei châ; khâpa namâ vy chhâpa a châ?” tah ta.

22 Âmo chata, “Vâlyuhchâpa pathaihpa pakha ta Kawnilia pheisaih zakha hyutuhpa, chyhsa siapa, Khazohpa a chipa. Zu pho zydua hry liata chyhsa moh phapa hnohna chata, na bie reipa a thei nawpa ta na o lâta nâma aw awpa ta a chho,” tah ei ta.

23 Chatanachata chyhsazy cha aw ta, pariesa haw ta. A mylâna chata Pity cha thyu ta, ama hnohta sie ta, Zôpa khih liata unawh ahyzy tlyma chhao ano hnohta sie hra ei ta.

24 A mylâ heihpa ta Kaisaria khih liana chata a ngia ei ta. Kawnilia chata a sanawhzy nata a viasa kho chaipazy pakhypa ta âmo cha vaw hâ thlâh ha ta.

25 Pity cha a ngia chyta, Kawnilia chata vaw dy ta, a phei thaby liata pao ta, a chhy ta.

26 Châhrasala Pity chata ano cha pathyu ta, “A duah teh; kei chhao chyhsapa ei châ,” tah ta.

27 A hnohta bie reina chôta a ngia ta, chyhsa hluhpi a ypa cha kei hmô ta;

28 ama hnohta, “Zu chyhsa ta pho hropa a pahlaopa nata ama hnohta siepa ânapa a chânazie nâmo ta nama pahno; châhrasala ahyhma ânapa nata pathaih leipa eima tah awpa châ vei tahpa Khazohpa ta eina pahnosa.

29 Chavâta eina vaw aw pata nahta, ei leipa ta ei vy. Chatanachata ei cha hiahri ei chuh, khâpa eina vaw aw chhâpa ei chi?” tah ta.

30 Kawnilia chata, “Noh palih a châ haw, atahmâ daihti hawhpa taihna heta, ei o liata zâlâ dawh thôh rachhôh ta ei o liata thlahchhâ na ta; chyhsa pakha poh ngyuh ngaitapa a bupa ta ei hmiakô liata a vaw duah ta,

31 ‘Kawnilia y, na thlahchhâna kha theipa ta a y haw, chyhsa liata na hmopiepazy chhao kha Khazohpa ta a pahno thlâh ha na.

32 Chavâta Zôpa khih lâta chyhsa tuah la, Saimaw Pity ama tahpa cha nama lâta aw teh; ano cha tilaipi kiah liata savo taotuhpa Saimaw o liata a tlô,’ tah ta.

33 Chavâta nâ lâta chyhsa thlai ei vaw tuah, nâ vypa he a pha na. Chatanachata Abeipa ta bie a cha piepa maih pahno awpa ta, atahmâ Khazohpa mohmô ta eima zydua ta he liana heta eima y,” tah ta.

Kawnilia o liata Pity bie reipa

34 Pity chata reih ta, “Khazohpa ta chyhsa khokheipa hlei hnei vei tahpa, a dopa ta ei pahno,

35 châhrasala pho to hry liata ahyrai ano chipa ta a siapa ta a taopa maih aly viapa chyhsa ama châ tyh.

36 Ano chata thlahlôhna Thâtihpha Zisu Krista pakah ta chhopa ta Izarel pathlazy hnohta bie paphao ta (Zisu cha chyhsa zydua Beipa châ ta),

37 Zawhana ta tlâh a awhkhei tyhpa bâti a châ khai nahta bie, Kalili râh tawhta vaw pathâh pathaopa ta Zudia râh zydua a pathâhpa kha nâmo ta nama pahno hra mâ tâh:

38 Nazari Zisu thâtih kha, Khazohpa ta ano cha Thlahpa Pathaihpa nata hmotaotheina ta a vaozie kha, ano chata chyhsa chôta hmophapa taopa nata ahripa taolapa zydua patlâpa ta chahry tyh ta, Khazohpa ano hnohta a ypa vâta.

39 Zuzy râh liata nata Zerusale liata a hmotaopa zydua a pahnotuhpa eima châ. Ano cha tho liata chaluahpa ta thie haw ei ta;

40 Khazohpa ta ano cha noh thôh nohta pathyu heih ta, a sia ngaitapa ta pamosa ta;

41 châhrasala chyhsa zydua lâta châ vei, Khazohpa ta pahnosatuhpa a rao chhieliepazy lâta deita a châ, keimo athihpa hry tawhta a thyuhei tawhta ano hnohta a nie a bawhpazy hnohna heta.

42 Ano cha, cha athihpazy nata ahrohpazy chôta ryureituhpa ta Khazohpa raopa cha a châ tahpa, chyhsa lâta tlâh-awhkheipa nata pahnosa awpa ta Khazohpa ta bie maniah a pie.

43 Ahyrai ano cha a ngiapâpa maih a moh vâta moleinazy a ngiahthaipa ta ama y aw tahpa, he thâtihzy he hrohsopa zydua ta ama pahnosa tyhpa kha,” tah ta.

Zenitaizy ta Thlahpa Pathaihpa ama tona

44 Pity ta cha biezy cha a rei hai nota, bie a theituhpa zydua chô liana chata Thlahpa Pathaihpa vaw tlô ha ta.

45 Chopawtaipa sahlao hryta ngiapâtuhpazy Pity a vaw zipa maih chata, Thlahpa Pathaihpa piepa cha Zenitaizy chô liata chhao hrypa a châpa vâta ama noâh kaw ta.

46 Reih to rai ta reipa ta Khazohpa reithaipa ta thei tlôh ei ta, Pity ta bie chho ta,

47 “He chyhsazy keimo hawhta Thlahpa Pathaihpa a hmô hrapazy he, bâti ama châ lei nawpa ta chyhsa ta ti hmâ ama pakhâ thei ma?” tah ta.

48 Chatanachata Zisu Krista moh ta bâti châ awpa ta bie pie ta. Cha khai nahta noh khazie tlyma châh awpa ta a haw ei ta.