Pawla Kawrini liata
1 Cha hmozy hnôh lâna chata Pawla O cha Atheni tawhta pua ta, Kawrini lâ sie ta.
2 A moh Akuila, Zu pakha hmô ta, cha chyhsa cha Pawntu râh liata a pihpa châ ta, Klaudia ta Zu zydua Rawma khih tawhta pua awpa ta bie a piepa vâta, a lahpinô Priskila nata Itali râh tawhta amâ vy thao no châ ta;
3 Pawla cha cha chyhsazy liana chata tlô ta, ama raihria hawpa a hriapa a châpa vâta ama hnohta y ta, ama hnohta hria tyh hra ta, ama raihria cha poh-o taopa châ ta.
4 Pahânoh maihta apakhyna-o liata bie ei tyh ta, Zuzy nata Krikazy cha reipasao a chhuah tyh ta.
5 Sila nata Timawthy cha Masidônia râh tawhtapa amâ vy nahta, Pawla cha bie chhopa ta y ha ta, Zisu kha Mesia a châ tahpa Zuzy lâta chhopasia tyh ta.
6 Châhrasala ano adyuhpa ta reipachhiepa ta Pawla ta a poh chatho ta ama hnohta, “Nama thisaih maoh cha nâmo luh chô liata y se! Kei la, ei pathaih na, atahmâ tawhla Zenitaizy lâta ei sie aw,” tah ta.
7 Cha tawhtapa cha sie ta, a moh Titu Zusta chyhsa pakha o liata a ngia ta, cha chyhsa chata Khazohpa a chhy tyh ta; a o chhao cha apakhyna-o nata a pazaopa châ ta.
8 Krispa apakhyna-o hyutuhpa châ ta, a chhôhkha zydua chhaota, Abeipa a ngiapâ ei ta; Kawrini chyhsa hluhpi chhaota thei ei ta, a ngiapâ hra ei ta, bâti châ haw ei ta.
9 Zâ ta Abeipa ta Pawla hnohta mâlâ hawhta, “Chi khâ, a thlih thlâh ha leipa ta bie reih lymâ teh;
10 kei, na hnohta ei y mâ tâh, cha pasasa awpa ta ahyhma ta na chôta a ma ku pathla aw veih ei; he khih liana heta chyhsa hluhpi hnei tlôh na ta,” tah ta.
11 Pawla cha cha liana chata ama hryta Khazohpa bie pachupa ta, kô kha nata thla charu y ta.
12 Kaliô, Akai râh liata abei vyuhpa ta a y nota, Zuzy ta a raohpata ta Pawla tei ei ta, ryureina dyuchhai hmiakô liata a chhi ei ta,
13 “He chyhsa heta ryhpa leipa hawhta Khazohpa a chhy awpa ta chyhsa a reipasao tyh,” tah ei ta.
14 Pawla ta a chhy chyta, Kaliô ta Zuzy hnohna chata, “Zuzy saih u, hezy he hmo do leipa kyh tlyma, hmo paraopa tlyma chhâ châ sala, cha pachâ tlai aw ei na ta;
15 châhrasala biezy, mozy, nama ryhpa kyh zy dei a châ khiahtala, nâmo ta tlao pachia teh u; kei lâ cha hawhpa kyh cha pachâ khoh va na,” tah ta.
16 Ryureina dyuchhai tawhna chata âmo cha papua haw ta.
17 Krika chyhsa zydua ta apakhyna-o hyutuhpa Sôsthene patu ei ta, ryureina dyuchhai hmiakô liana chata chhei ei ta. Kaliô deikua chata ama hmotaopa cha khâpa ta hmah pachâ leipa ta.
Antiôka lâta Pawla a kuana
18 Cha hnôh lâna chata Pawla cha bohpi châh thlâh ha ta, cha khai tawhna chata unawhzy cha reih phapa ta a chhaih ta, cha tawhna cha Suria râh lâta balyh ta sie ta, a hnohta Priskila nata Akuila cha sie hra ei ta. Pawla ta bietaipa a hneipa vâta Kenkria khih liata a sâ a ngyu ta.
19 Ephesi châ tlôh ei ta, cha liana chata âmo cha siesai ta; anodeikuacha apakhyna-o liata a ngia ta, Zuzy hnohta bie ei tyh ta.
20 Bohpi châ awpa ta a haw ei ta, châhrasala a ryh tah leipa ta;
21 “Khazohpa ta a pasai khiahtala nâmo lâ ei vy heih aw,” tahpa ta reih phapa ta a chhaih ta, Ephesi tawhtapa cha balyh ta sie haw ta.
22 Balyh tawhtapa Kaisaria liata a pua nota, Zerusale lâ vawh ta, awnanopa sahlaozy cha a naoh ta, cha khai tawhta Antiôka lâ zu ha ta.
23 Cha liana chata bohpi a y tawhta sie heih ta, pachupa sahlao zydua tha patlôpa ta Kalatia râh nata Phruzia râh cha chahryh khai ta.
Ephesi liata Apôlôsa bie chhona
24 Zu pakha, a moh Apôlôsa, Alezandria khih liata a pihpa, chyhsa so ngaitapa Ephesi lâna chata zu ta. Ano chata Khazohpa châ biezy pahno ngaita ta.
25 Cha chyhsa cha Abeipa Lâpi kyh a chu hawpa châ ta; palôhrupa ta phahnai khoh ngaitapa a châpa vâta Zisu thâtih cha pakhâta ta chho ta, pachu tyh ta, Zawhana bâtina kyh deita pahno tlôh ta.
26 Apakhyna-o liata riahpha ngaitapa ta bie reih pathao ta; chatanachata Priskila nata Akuila chata a bie reipa ama thei nahta, ama o lâ a chhi ei ta, a hnohta Khazohpa kyh bie a sia via heipa ta chhopasia haw ei ta.
27 Ano chata Akai râh lâta sie a chhuah pata nahta unawhzy ta pasyu ei ta, ano ama vaw ly nawpa ta pachupa sahlaozy hnohta châ ro pa ei ta. A tlô nahta Khazohpa ngiachhiena vâta ngiapâtuhpazy cha thata bao ta,
28 vâtlâh pahnopa ta Zuzy cha thata ei pathlah ta, Khazohpa châ bie hmâpa ta Zisu kha Mesia cha a châ tahpa pahnosa tyh ta.