1 Antiôka liata awnanopa sahlao a ypazy hry liana chata bie chhotuhpazy nata pachutuhpazy ama y, chazy cha Banaba zy, Simeôna, Nika ama tahpa zy, Kurinia khihpa Lukia zy, Abei Herawda unawh heihpa Manaina zy, Sawla zy ama châ.
2 Abeipa chakaona rai hriapa ta nie leipa ta ama y nota Thlahpa Pathaihpa ta, “Banaba nata Sawla he âmo ei aw chhâpa tao awpa ta na pananopa teh u,” tah ta.
3 Chatanachata nie leipa ta thlah ama chhâ khai nahta, ama chô liata ama ku pahnieh ei ta, pasiesa haw ei ta.
Kupra liata lyuhchâpazy bie chhona
4 Chatanachata Thlahpa Pathaihpa tuapa ta sie ei ta, Selukia khih lâ zu ei ta; cha tawhta Kupra liahpahlô lâta balyh ta sie ei ta.
5 Salami khih liata ama y nota Zuzy apakhyna-ozy liata Khazohpa bie chho tyh ei ta. Zawhana chhao âmo a chakao awpa ta a chhi hra ei ta.
6 Liahpahlô cha Pafawsa khih taihta chahry ei ta, dyuthaipa hrohso pakheipa Zu chyhsa pakha hmô ei ta, a moh cha Ba-Zisu châ ta.
7 Cha chyhsa cha abei vyuhpa ta a ypa Sazia Pawlasa chyhsa sopa hnohta a ypa châ ta, cha abei vyuhpa ta a ypa chata Banaba nata Sawla cha aw ta. Khazohpa bie pahno a chhuah ta.
8 Châhrasala Elymasa, (Ba-Zisu a moh hropa) dyuthaipa châ ta, cha chyhsa chata abei vyuhpa ta a ypa cha pangiapâsa lei a chhuahpa ta âmo cha pakhâpadie ta.
9 Chatanachata Sawla, Pawla ama tah hrapa cha Thlahpa Pathaihpa ta bie ta, ano cha moh thlâh ha ta,
10 “Nâ, chyhsa dopa nata nôchhiepa ta a biepa, nâ, ahripa sawchapawpa, nâ, siana to a haotuhpa, Abeipa lâpi sia ngaitapazy na paraopa he bâh aw va chi mâ?
11 Pahno teh, atahmâ Abeipa ku na chô liata a tla hih, na mo chao aw ta, noh khaihna hmô mâh aw va chi,” tah ta. Chatanachata meihdo nata zohna ta ano khupâ ha ta, a cha-aotuh awpa tluapa ta a khie ngâ kaw ta.
12 Chatawhcha abei vyuhpa ta a ypa chata cha hmotaopa cha hmô ta, Abeipa pachupa bie cha a noâh kaw ta, a ngiapâ haw ta.
Pawla nata Banaba Pisidia râh Antiôka liata
13 Pawla cha a sahlaozy chhaota Pafawsa tawhna chata balyh ta sie ei ta, Pamphuli râh liata Peka khih tlô ei ta. Zawhana khata âmo cha siesai ta, Zerusale lâta kua ha heih ta;
14 châhrasala âmo cha Peka tawhta sie lymâ ei ta, Pisidia râh liata Antiôka khih tlô ei ta. Pahânoh ta pakhyna-o liata a ngia ei ta, atyuh ei ta.
15 Ryhpa châbu nata hrohsopazy châbu reih khai nahta, a pakhyna-o hyutuhpazy ta âmo lâta chyhsa tuah ei ta, “Unawh saih u, chyhsazy pasyuna bie kheihawhpa tlyma nama hnei khiahtala, reih teh u,” tah ei ta.
16 Pawla a duah ta, a ku ta zi ta, reih ta: “Izarel mozy nata Khazohpa a chitupazy saih u, nahthlie teh u.
17 He Izarel chizy Khazohpa heta eima pathlatuhpazy a tlyh ta, Izi râh liata ama y nona khata vânoh patosa ta, bâh pazawhpa ta cha tawhna chata chhihtha haw ta.
18 Kô sypalih tlai râhpathohpa liana khata âmo mohôh ta.
19 Kana râh liata pho sari a panawh khai tawhna khata, ama râh cha pahra awpa ta pie lymâ ta, kô za palih nata kô sypangawh chhôh zydua khata,
20 cha tawhna chata ryureituhpazy pie tyh ta, Samuel taihna khata.
21 Cha tawhna chata abei hiah ei ta; Khazohpa ta. Sawla, Kisa sawchapawpa Benzami chi liatahpa kha ama hnohta pie ta, kô sypalih chhôh châta.
22 Ano tawhtapa a pasie ha tawhna khata ama abei châta Davi tao ta; Khazohpa ta cha kyh cha pahnosapa ta, ‘Davi, Zese sawchapawpa ei pathipalôh hawhpa a phaohpa ei hmô haw, ano chata ei khopa maih a tao aw,’ tah ta.
23 Cha pathlazy hry liana chata Khazohpa ta bietaipa lymâ hawhta Izarel sahlao hnohta pachhatuhpa, Zisu, vaw patlôsa ta.
24 A vy hlâta Zawhana ta rona bâtina kyh Izarel mo zydua hnohta vaw chho ta.
25 Zawhana ta a raihria a patlô chy nah khata, ‘Nama hâpa cha châ va na. Ano cha châ va na. Moh teh u, ei hnôh lâta a vy hai, a pheiky ri pathlâ tlâh châ va na,’ tah ta.
26 “Unawh saih u, Abaraha pathla sawzy saih u, nama hryta Khazohpa a chipa zydua saih u, keimo hnohna heta, he pachhana bie he maniah a vaw paphao hih.
27 Zerusale liata a ypazy nata ama ryureituhpazy chhaota, ano cha ama pahno leipa vâta nata hrohsopazy bie pahânoh maihta rei tyhpa kha ama pahno hra leipa vâta, ano cha thai lei pachâsapa ta, cha bie cha patlô haw ei ta.
28 A thina taihta a chô liata khâpahma ama hmô leipa chhaota, Pila liata thie awpa ta a haw ei ta.
29 A thâtih ro chhieliepa zydua kha a patlô khai nahta, tho tawhtapa cha la ei ta, thlâ liata pazia haw ei ta.
30 Châhrasala Khazohpa ta athihpa hry tawhta pathyu haw ta;
31 Kalili râh tawhta Zerusale liata ano hnohta a khy hrapazy hnohta noh hluhpi chhôhta aluah tyh ta, cha chyhsazy cha atahmâ he chyhsa lâta a bie a pahnotuhpazy ama châ.
32 Keimo chhaota pathlatuhpazy liata bietaipa kha a Thâtihpha eima cha vaw chho hih,
33 Khazohpa ta Zisu a pathyupa liana khata eima sawzy liana heta chazy cha a patlô; Hlazy mianona liata: ‘Ei Sawchapawpa na châ, atanoh he ei cha sa,’ tahpa ropa hawhna khata.
34 Thina su lâ sie heih lei awpa ta Khazohpa ta ano cha athihpa hry tawhtapa a pathyu awpazie kyh cha, he tana heta a reih, ‘Davi hnohta pathaihna nata byhnâ khâchâ ei taipazy kha nâma ei cha pie aw,’ tahpa ta.
35 Chavâta Hlazy hropa liata: ‘Na Mo Pathaihpa cha thupa pasaih aw va chi,’ tahpa y hra ta.
36 Davi cha Khazohpa ryureipa hawhta a hrolâhpazy a chakao khai tawhna khata, a mo ta, a pathlatuhpazy hnohta pazia ei ta, a thu ha mâ tâh;
37 Khazohpa pathyupa deikua kha thu vei.
38 Chatanachata unawh saih u, pahno teh u, cha chyhsa vâna chata molei ngiahthaina kyh nâmo lâta chhopa a châ hi,
39 ahyrai a ngiapâpa maih ato liata thai pachâsapa ta ama y, chazy liana chata Mawsi ryhpa ta thai pachâsapa ta y thei veih eichi.
40 Chavâta a hrohrua teh u, chata leipa ta cha hrohsopazy châbu liata ama reipa kha nama chôta a vaw tlô pathlei aw na:
41 “Mohnaotuhpazy saih u, moh teh u, noâh ula, leidia teh u; nama hro chhôh heta hmo kyh kha ei taopa he, cha hmo cha chyhsa ta cha chho hra ei sala, zo cheita aw veih eichi,’ a tahpa kha,” tah ta.
42 Ama pua nata, pahânoh heihpa liata cha biezy cha reih heih awpa ta a haw ei ta.
43 Apakhypa sahlaozy cha ama pai pata nahta, Zuzy nata ama phohlypa Khazohpa a pachâpa hryta chyhsa hluhpi ta Pawla nata Banaba cha zi lymâ ei ta, âmo chata bie a vaw chho ei ta, Khazohpa ngiachhiena liana chata y thlâh ha awpa ta pasyu ei ta.
44 Pahânoh heihpa liana chata a khih dua rô ta Khazohpa bie nahthlie awpa ta a vaw pakhy ei ta.
45 Châhrasala Zuzy ta zawpizy cha ama hmô patanahta, hnâchhao ngaita ei ta, Pawla bie reipa cha ei ei ta, reipachhie ei ta.
46 Pawla nata Banaba chata riahpha ngaitapa ta reih ei ta, “Khazohpa bie he nâmo liata rei tua awpa rai a châ. Châhrasala dytha eichi ta, chhâzaw ta hro tlâh châ leipa ta, nâmosasyh ta nama rao hnokua cha, pahno teh u, Zenitaizy lâ eimâ heih ha aw.
47 Cha hawhna chata Abeipa ta bie maniah a pie, ‘Zenitaizy pakhaihtuhpa ta ei cha rao, kaokih taihta pachhana cha a tlô thei nawpa ta,’ tahpa ropa hawhna khata,” tah ta.
48 Zenitaizy chata cha biezy cha ama thei nahta aly kaw ei ta, Khazohpa bie parônahsa ei ta; chhâzaw ta hroh awpa ta raopa maih chata a ngiapâ haw ei ta.
49 Chatawhcha Abeipa bie cha, cha râh chheipâh liana chata pathâh ha ta.
50 Châhrasala Zuzy chata chanô zachhihpa Khazohpa pachâpazy nata khih liata machâ sahlaozy cha pasyu ei ta, Pawla nata Banaba cha pataolasa ei ta, ama râh tawhtapa papua haw ei ta.
51 Âmo chata ama chô liata ama pheipazah liata buhchado chatho ei ta, Ikônia khih tlô ei ta.
52 Pachupa sahlaozy cha alyna nata Thlahpa Pathaihpa ta bie chyu ei ta.