Pawla nata Banaba Ikônia liata
1 Ikônia khih liana chata Zuzy pakhyna-o liata a ngia ei ta, bie reih tyh ei ta, chatanachata Zu nata Krika hluhpi chhaota a ngiapâ haw ei ta.
2 Châhrasala a ngiapâ khoh leipa Zuzy ta Zenitaizy pathipalôh pasyu ei ta, unawhzy cha pahaosa ei ta.
3 Abeipa liata riahpha ngaitapa ta bie reipa ta cha liana chata bohpi y ei ta, ano chata pahnona nata hmonoâhpazy ama ku ta pataosapa ta a ngiachhiena bie pahnosa tyh ta.
4 Châhrasala khih liata zawpizy cha a pachhaih haw ei ta; thokha ta Zuzy cha a châh ei ta, thokha ta apôstôlzy cha a châh ei ta.
5 Zenitaizy, Zuzy, ama hyutuhpazy chhao chata apôstôlzy cha nozachhih ngaitapa ta taopa nata alô ta vaw a chhuahpa ta ama tei chyta,
6 âmo chata vaw pahno ei ta, Lykônia râh lâna chata Lystra nata Derbe khih lâta, nata a chheipâh râhzy lâta a râ ei ta;
7 chazy liana chata Thâtihpha chho lymâ ei ta.
Lystra liata Pawla alô ta ama vawh
8 Lystra khih liana chata pheisypa ahy tlyma a tyuh tyh ta, a pih tua no tawhta pheisypa châ ta, phei ta sie beih leipa ta.
9 Cha chyhsa chata Pawla bie reipa nahthlie ta; Pawla chata ano cha moh thlâh ha ta, tlâh nawpa ta ngiapâna a hneipa pahno ta,
10 ao paro ngaitapa ta, “Na phei ta a dopa ta a duah teh,” tah ta. Ano cha kaw thyu ta, phei ta sie ha ta.
11 Zawpizy ta cha ama hmô patanahta Lykônia reih ta, ao paro ngaitapa ta, “Khazohzy cha chyhsapa hawhta keimo lâ ama vaw chô haw hih!” tah ei ta.
12 Banaba cha Zupita tah ei ta, Pawla cha bie a rei viapa a châpa a châpa vâta, Merkuri tah ei ta.
13 Zupita achhyna-o opâh lâta a ypa cha a theihthaipa ta viahchao tôhpazy nata pawpi pachhihzy ochhi kiapâhzy lâta vaw cheih ta, zawpizy chhaota a chhy nawpa ta thie a chhuah haw ei ta.
14 Châhrasala apôstôl Banaba nata Pawla chata cha cha ama pahno patanahta, ama chysiazy hrie ei ta, zawpi hry lâna chata a ngia ei ta, awh ei ta,
15 “Puhpa saih u, he hmozy he khazia nama tao? Keimo chhao nâmo nôchâ hawhta a phaohpa chyhsapa eima châ hih, he hmo khâpahrao leipazy he a heisaipa ta avâ zy, alei zy, tilaipi zy, ama chhôh liata a ypa zydua chhaota a taotuhpa Khazohpa hropa lâna chata nama vaw bai awpa ta Thâtihpha eima cha vaw tlôkheipa hih.
16 Cha Khazohpa chata hlâno ta pho to âmo lâpi chyu a chhipa ta pasaih ta;
17 châhrasala ano a pahnosana y leipa ta a tao beih vei, cha hawhta hmophapa tao tyh ta, avâ tawhta vâsuazy nata kô pha kôzy cha pie ei ta, nama palôhrupa cha niepa nata alyna ta a cha pabie tyh ei,” tah ei ta.
18 Cha biezy chata zawpizy ta âmo a chhy nawpa ta sahroh thie awpa cha pakhâ lylia ta.
19 Châhrasala Antiôka nata Ikônia liatahpa Zu ahyzy tlyma cha liana chata a vy ei ta; zawpizy cha reipasao thei haw ei ta, chatanachata Pawla cha alô ta vawh ei ta, a thipa ta ama pangiasa vâta khih tawhta a daophi haw ei ta.
20 Châhrasala pachupa sahlaozy cha a kiapâh liata amâ dua nota vaw thyu ta, khih liata a ngia haw heih ta; a mylâ chata Banaba nata Derbe khih liata a ngia haw ei ta.
21 Cha khih mozy hnohna chata Thâtihpha chho ei ta, pachupa hluhpi ama tao tawhta Lystra lâta zy, Ikônia lâta zy, Antiôka lâta zy kua lymâ ei ta,
22 riethei hluhpi taopa ta Khazohpa Khihnarâh eimâ ngia awpa a châ, tahpa ta pachupa sahlaozy palôhrupa pa-i ei ta, ngiapâna liana chata y thlâh ha awpa ta pasyu lymâ ei ta.
23 Awnanopa hlao to liana chata machâzy raopa ei ta, nie leina chôta thlah ama chhâ khai nahta, amâ ngiapâpa Abeipa lâna chata pavaosa lymâ ei ta.
Suria râh Antiôka lâta ama kua
24 Pisidia râh cha chahryh khai ei ta, Pamphulia râh cha tlô ei ta.
25 Peka liata bie ama chho khai nahta Atalia khih lâta zu ei ta;
26 cha tawhna chata balyh ta pua ei ta, Antiôka cha vaw tlô ei ta, cha cha ama hmotao khai hawpa cha tao awpa ta unawhzy ta Khazohpa ngiachhiena pavaosapa ta ama puana kha a châ.
27 Chatawhcha ama tlô tawhta awnanopa sahlaozy cha aw pakhy ei ta, Khazohpa ta âmo hmâpa ta hmo a taopa zydua nata Zenitaizy châta ngiapâna ochhi a pahyziezy cha chho ei ta.
28 Pachupa sahlaozy hnohna chata bohpi y ei ta.