Zerusale lâta Pawla khitlyna
1 Âmo nata a chhaih pi ta, balyh ta pua pi ta, cha hnôh lâna chata a palâhpa ta Kôsa liahpahlô tlô pi ta, a mylâ ta Rhôde liahpahlô tlô heih pi ta, cha tawhna chata sie lymâ pi ta, Patara khih tlô pi ta.
2 Chatawhcha Phônisia lâ sie awpa balyh miakha hmô pi ta, kiah pi ta, sie lymâ ha pi ta.
3 Kupra liahpahlô hmô pi ta, chavei lâta khô pi ta, Suria râh lâ sie lymâ pi ta, Tyre khih liana chata ngiakâ lâta pua ha chy pi ta, cha liana cha balyh liata hmo paly awpa châ ta.
4 Pachupa sahlaozy hmô pi ta, cha liana chata noh sari châh pi ta. Chatawhcha âmo chata Thlahpa chhopa ta Pawla liata Zerusale khi tlyh lei awpa tah ei ta.
5 Châhrasala cha nohzy khai tawhna chata pua pi ta, sie haw pi ta, unawhzy chata ama zydua ta ama lâpi sawzy chhaota khi khôtho lâ maniah pathlie ei ta; chatawhcha tilaipi ngiakâ liana chata eima pakhu paneihpa ta thlahchhâ pi ta.
6 Chatawhcha atlâhpata ta a tah pi ta, balyh liana chata kiah pi ta, âmo deikua cha ama o lâ kua haw ei ta.
7 Tyre tawhta balyh ta eima sie khai nahta Ptôlemai khih tlô pi ta; unawhzy a naoh pi ta, âmo liata noh kha châh pi ta.
8 A mylâ ta pua pi ta, Kaisaria tlô pi ta; Thâtihpha chhotuhpa Phili o liata a ngia pi ta; ano cha pasarizy hryta pakha kha châ ta, ano liata châh pi ta.
9 Cha chyhsa chata sawchanô papalih hnei ta, laihsakôpa châ ei ta, Khazohpa bie chhochhielie tyh ei ta.
10 Cha liana chata noh hluhpi châh pi ta, cha nona chata Zudia râh tawhta a moh Akaba, hrohsopa pakha a zu ta,
11 keimo lâ a vy ta, Pawla chaisaihna la ta, a ku zy, a phei zy anosasy ta a chahry ta, Zerusale liata Zuzy chata he hawhna heta he chaisaihna a hneituhpa he chahry aw ei ta, Zenitaizy ku liata ama pie hra aw,’ “Thlahpa Pathaihpa ta a tah,” tah ta.
12 Cha biezy cha eima thei patanahta, keimo nata cha khih liata chyhsazy chata Pawla cha Zerusale lâ a sie lei awpa ta a haw chaimâh pi ta.
13 Pawla chata a chhy ta, “Khazia ma cha eichi ta, ei ngia eina pachhie eichi? Abeipa Zisu moh vâta Zerusale liata chahrypa ei ngâhpa dei châ leipa ta, thi chhao ei ngâh mâ tâh,” tah ta.
14 Chatawhcha reipasao theipa rih a châ vei tawhta, “Abeipa reisai châ mawh sy,” tah pi ta, bâh ha pi ta.
15 Cha nohzy hnôh lâna chata eima hmodâh tao pi ta, Zerusale lâ khy pi ta.
16 Kaisaria khihpa pachupa sahlao ahyzy tlyma keimo lâ a vy hra ei ta, âmo chata a moh Mnasô hmialâ tawhta angiapâpa Kupra liahpahlô chyhsa pakha, eima tlô na awpa cha a chhi hra ei ta.
Pawla ta Zami a tlyna
17 Zerusale eima tlô nahta, unawhzy ta thapha ngaitapa ta maniah a vaw ly ei ta.
18 A mylâ chata Pawla chhaota Zami o liata a ngia pi ta; cha liana chata awnanopa machâ zydua chhao y ei ta.
19 Pawla ta âmo a naoh khai nahta a chakaona hmâpa ta Khazohpa ta Zenitaizy hryta hmo a pataosapa maih cha miakha miakha ta reih ta.
20 Unawhzy chata cha bie cha ama thei nahta Khazohpa palyupalih ei ta. Pawla hnohna chata, “Unawh y, Zuzy hry liata ngiapâtuhpazy hluhzie hmô chi ta; ama zydua ta ryhpa chô liata phahnai a ngiah hra ei ta,
21 nâma ta Zenitaizy hry liata Zu a ypa zydua lâna chata ama sawzy chopawtai lei awpa nata ryhpa hawhta y lei awpa tahpa Mawsi ryhpa pathlua nawpa na pachu tyh tahpa chyhsa pakah liata na bie he pahno ei ta.
22 Kheihta ma a châ aw tly? Na vaw tlô tahpa pahno thlyu tlôh aw ei ta.
23 Chavâta na hnohta eima reipa hawhta tao mah y. Bietai a hneipa chapaw papalih eima hnohta ama y;
24 cha chyhsazy cha a chhi la, ama hnohta a pathai hra la, ama sâ ama ngyu thei nawpa ta ama châta sôh pasai teh. Chatanachata chyhsa zydua ta chyhsa pakah ta na bie ama theipa zydua kha hmeiseihpa châ vei tahpa pahno aw ei ta, nâma tlai chhao ryhpa a chhihpa ta a siapata ta na y hra tahpa ama cha pahno aw.
25 Zenitaizy hry liata ngiapâtuhpazy kyh cha, nohthlahpa achhyna hmo niepa kyh liata zy, sa thisaih niepa kyh liata zy, sa pa-aosaopa niepa kyh liata zy, apheina kyh liata zy ama bâhsai awpa a châ tahpa ta pachia pi ta, eima ro haw kha,” tah ei ta.
26 A mylâ chata Pawla ta chapawzy cha a chhi ta, ama hnohta a pathai hra ta, Khazohpa achhyna-o liana chata a ngia ta, ama châta sa thie chyu awpa a pie hlâ lei cha a pathaina noh ama hnei tua aw tahpa theihthaipa hnohta chho chhielie ta.
Achhyna-o liata Pawla patuna
27 Noh sari cha a tloh chyta Asia râh liata Zuzy chata Pawla cha Khazohpa achhyna-o liata hmô ei ta, zawpi zydua pasyu ei ta, ano cha patu ei ta,
28 aw ei ta, ‘Izarel mozy saih u, maniah bao teh u! He chyhsa he râh to liata chyhsa zydua lâta Zu chyhsa zy, ryhpa zy he a reipachhietuhpa kha a châ hih; cha leipa chhao Khazohpa achhyna-o liana heta Krika mozy chhao a ngiakhei ta, he o pathaihpa he a papuapalei haw,” tah ei ta.
29 Cha hlâta khih liana chata Ephesi khihpa Trôphima cha a hnohta hmô ei ta, Pawla ta cha chyhsa cha Khazohpa achhyna-o liata a ngiakheipa ama pangiasa.
30 A khih duata paphôh ngâ ei ta, chyhsazy cha a râ pakhy ei ta; Pawla patu ei ta, Khazohpa achhyna-o tawhtapa cha a daophi ei ta, ochhizy cha thlai khawpa ei ta.
31 A no cha thie amâ chhuah nota Zerusale liata chyhsa zydua amâ tyhreipa kyh cha pheisaih sahlao hyutuhpa beichaipa lâta thâtih tlôkhei ei ta.
32 Ano chata pheisaihzy nata pheisaih zakha hyutuhpazy a chhipâ ha ta, âmo lâta a za râ ta; âmo chata hyutuhpa beichaipa nata pheisaihzy cha ama hmô patanahta, Pawla ama chheipa cha bâh haw ei ta.
33 Chatawhcha hyutuhpa beichaipa chata a vaw hnia ta, Pawla cha patu ta, bâlia miano paky awpa bie pie ta. Ahyma a châ, khâpa ma a tao, tahpa hiahri ta.
34 Zawpi hry liana chata thokha ta bie miakha ta aw ei ta, thokha ta bie hropa ta aw ei ta; palôhpasapa vâta a yzie pahno thei khao leipa ta kuh chhôh lâta a chhi awpa ta bie pie ta.
35 Pawla ta a kiana a tlô nota zawpi ta thata ama teipa vâta pheisaihzy ta ano cha chalo lymâ ei ta;
36 chyhsa zydua ta, “Pahleipadia teh u!” tahpa ta awpa ta, zi tlôh ei ta.
Pawla thaina bie reina
37 Pawla cha kuh chhôh lâ amâ chhi chyta, ano chata pheisaih hyutuhpa beichaipa hnohna chata, “Na hnohta bie kawh kha ei reih thei aw ma?” tah ta. Ano chata, “Krika reih na pahno ma?
38 Eikha nota chyhsazy pasyupalipa ta chyhsa thie hmâhpa sahlao sâh palih râhpathohpa lâta a chhihthatuhpa, Izi râh liata chyhsa kha châ va chi mâ?” tah ta.
39 Pawla deikua chata, “Zu chyhsa, Kilikia râh liata Tarsa khihpa ei châ, khih chyhpa liata a ypa châ va na; na ngiachhie la, chyhsa zydua lâta bie na pachhosa teh,” tah ta.
40 Chatawhcha â ryh a tah patanahta, Pawla cha a kiana liana chata a duah ta, chyhsa zydua a chalih nawpa ta a ku ta zie ta; amâ chalih patanahta Hebrai reih ta ama hnohta: