Timawthy ta Pawla nata Sila a zina
1 Pawla cha Derbe lâ nata Lystra lâna chata sie hra ta. Cha liana chata a moh Timawthy pachupa pakha a y, ano cha ngiapâ hropa Zu chanô sawchapawpa châ ta; a paw deikua cha Krika chyhsa a châ.
2 Lystra nata Ikônia liata unawh a ypazy chata ano cha reithai kaw ei ta.
3 Pawla ta ano cha ama hnohta sie hra awpa ta khoh ta; cha lâta Zu a ypazy vâna chata a chopaw tai pa ta, a paw cha Krika chyhsa a châ tahpa pahno khai tlôh ei ta.
4 Khi to liata ama sie laih nota, Zerusale liata apôstôlzy nata machâ a ypazy bie pachiapa kha zyh awpa ta unawhzy lâta pie lymâ ei ta.
5 Chatanachata awnanopa sahlaozy cha ngiapâna liata tha patlôpa ta y haw ei ta, nohcharei pôh lymâ ei ta.
Masidônia chyhsa pakha Pawla ta aluahna ta a hmôpa
6 Thlahpa Pathaihpa chata Asia râh lâ bie chhopa a pakhâpa vâta, Phruzia nata Kalatia râh cha chahry khai ei ta.
7 Chatawhcha Mysia râh kiapâh ama tlô nahta, Bithunia râh liata a ngia a chhuah ei ta, châhrasala Zisu Thlahpa ta pasai leipa ta;
8 Mysia râh cha khô ei ta, Trôsa khih lâta zu ei ta.
9 Chatawhcha zâ ta Pawla ta mâlâ hawhta Masidônia chyhsa pakha a duahpa ta, “Masidônia râh lâ vaw kiah la, maniah bao teh,” tahpa ta â hawpa hmô ta.
10 Cha mâ cha a sa khai pata nahta, Masidônia râh lâna chata sie a chhuah pâ ha pi ta, ama hnohta Thâtihpha chho awpa ta Khazohpa ta mania a aw tahpa pahno pi ta.
Lydia pihpathina
11 Trôsa tawhta balyh ta pua pi ta, a palâpa ta Samôtre khih lâta sie pi ta, a mylâ ta Nipôli khih lâta sie heih pi ta.
12 Cha tawhna chata Philipi lâ sie pi ta, cha khih cha Masidônia râh liata khih miakha châ ta, cha bia liana chata khih tytua chaipa châ ta, Rawma mo khih cha a châ. Cha khih liana chata noh khazie tlyma châh pi ta;
13 Pahânoh ta kuh ochhi khôtho lâ chavah kiah liata thlahchhâna su a châpa ta eima pangiasapa lâna chata sie pi ta, a tyuh pi ta, chanô a vypa sahlaozy hnohna chata bie reih pi ta.
14 A moh Lydia poh nohsaihpâpa a zuahtuhpa Thyatira khihpa Khazohpa achhytuhpa chanô pakha ta eima bie thei ta. Pawla bie a reipa zyh awpa ta Abeipa chata a pathipalôh pavâsa ta.
15 Ano nata a chhôhkhapazy ta bâti ama châ khai nahta, “Abeipa a ngiapâ hmeiseihpa ta eina rao khiah chi ta la, ei o liata vaw tlô teh u,” tahpa ta maniah a haw ta. Maniah patu haw ta.
Philipi liata Pawla atâhna
16 Thlahchhâna su lâna chata eima sie nota, sei laihsa ahy tlyma mothaipa thlahpa a hneipa ta maniah a tyh ta, ano chata a mothaipa vâta a zibeipazy cha sôh hluhpi pahmôsa tyh ta.
17 Cha chyhsa chata Pawla nata keimo maniah zi ta, “He chyhsazy pachhana lâpi cha chhotuhpazy he, Chônôchaipa Khazohpa sei ama châ hih,” tahpa ta awh ta.
18 Cha hawhna chata noh hluhpi tah tyh ta. Pawla cha a palôh châ khao leipa ta a heih ta, thlahpa hnohna chata, ’”Zisu Krista moh ta a chhôh tawhtapa pua awpa bie ei cha pie,” tah ta. Cha nona tlai chata pua pâ ha ta.
19 A zibeipazy chata ama sôh hmôna a lei tahpa ama pahno nata, Pawla nata Sila cha patu ei ta, hyutuhpazy hmiakô lâta sôhdao su liata a daophi ei ta;
20 bie pachiatuhpazy lâ a chhi ei ta, He chyhsazy he Zuzy châ ei ta, eima khih patypamâ ngaita ei ta.
21 Ryhpa kheihawhpa tlyma eimâ ly awpa nata eima zyh awpa ânapazy he chho tyh ei ta, Rawma chyhsa châ tlôh pi ta,” tah ei ta.
22 Zawpizy chhao cha âmo tei awpa ta vaw pua hra ei ta; bie pachiapatuhpazy chata ama pohzy hriepa ta, chôhchahrei ta tu awpa bie pie ei ta.
23 Ei hluhpi ama chhei khai tawhta, patâhna o liata khô ei ta, a vaihtuhpa hnohta â bohpa ta vai awpa liahsa tah haw ei ta.
24 Cha tlatluta bie ama piepa vâta ano chata patâhna chhôh chaipa liata khô ta, ama pheizy liana chata tho keihrai khâchâ daih ta.
25 Châhrasala zâcho ta Pawla nata Sila chata Khazohpa lâta thlahchhâ ei ta, hla sa ei ta, chyhsa atâhpazy ta nahthlie ei ta,
26 sôkhata alo thata a vaw sih ta, patâhna o lôbôpazy taihta a chalyu ta; ochhi zydua thlai a pahy ta, chyhsa to keihrai daipazy cha a vaw thlâ khai ha ta.
27 A vaihtuhpa cha a môpa a vaw hra ta, patâhna o ochhizy cha a pahypa hmô ta, atâhpazy cha amâ râ khiah ma tah ta, a zaozi phia ta a thie a chhuah ta.
28 Châhrasala Pawla cha ao paro ngaitapa ta aw ta, “Kheihtahma a tah khâ, eima zydua ta he liata eima y khai thlâh ha mâ tâh!” tah ta.
29 A vaihtuhpa chata meiôhzy pado ta, a ngia ta, chipa ta a chalyuna chôta Pawla nata Sila hmiakô liata â khu lâta pao ta,
30 âmo cha puakhei ta, “Puhpa saih u, pachhapa ta ei y nawpa ta khâpa ei tao aw?” tah ta.
31 Âmo chata, “Abeipa Zisu a ngiapâ la, chatanachata pachhapa ta na y aw, nâ nata na sanawhzy chhaota,” tah ei ta.
32 Chatawhcha a hnohta nata a o liata a ypa zydua hnohna chata Abeipa bie reih ei ta.
33 Cha zâ liata cha nona tlai chata a chhi ta, ama chheina a hrei chheipazy cha pasi ta, ano nata a sanawh zydua chata bâti châ pâ ha ei ta.
34 Chatawhcha a o lâ a chhi ta, niepa pie ta; Khazohpa amâ ngiapâpa vâta ano cha a sanawh zydua nata thapha ngaitapa ta y ei ta.
35 Noh a chhi nata bie pachiatuhpazy chata, “Kha chyhsazy kha papua teh,” tahpa ta chyhsa patutuhpazy tuah ei ta.
36 Patâhna o vaihtuhpa chata Pawla hnohta ama bie chho ta, “Hyutuhpazy chata cha papua awpa ta eina vaw tuah ei; chavâta atahmâ vaw pua ula, thlahlôh ngaitapa ta sie teh u,” tah ta.
37 Châhrasala Pawla chata ama hnohta, “Rawma chyhsa châ tlôh pi ta eima thai nata thai lei pahno leipa ta, vâtlâh mohmô ta maniah chhei ta, patâhna o liata maniah khô ta; atahmâ he a ru lâta papua awpa zua maniah amâ chhuah mâ? Châ tiarâh aw vei! Âmo tlai a vy ei sala, maniah vaw papua ei se,” tah ta.
38 Chatanachata chyhsa patutuhpazy chata cha bizy cha bie pachiatuhpazy lâna chata chho ei ta, Rawma chyhsa ama châ tahpa ama pahno nahta chi ei ta;
39 chatawhcha vawh ei ta, reipasao chaimâh ei ta. Papua ei ta, khih tawhtapa cha ama sie syulyu awpa ta a haw ei ta.
40 Patâhna o tawhtapa cha pua ei ta, Lydia o liata a ngia ei ta; unawhzy cha hmô ei ta, ama thlah palôh ei ta, pua haw ei ta.