Zerusale liata pakhypi
1 Chyhsa ahyzy tlyma Zudia râh tawhta a zu ei ta, “Mawsi ryhpa hawhta chopaw nama tai leipa khiahtala pachhapa châ thei aw veih ei chi,” tahpa ta unawhzy pachu ei ta.
2 Pawla nata Banaba cha âmo nata thata ahryu pâpa ta a ei ei ta, Pawla nata Banaba cha ama hry liata ahyzy tlyma chhaota cha biepeipa kyh liana cha Zerusale liata apôstôlzy nata machâzy lâta khy awpa ta rao ei ta.
3 Awnanopazy chata kaw pathlie ei ta, âmo chata Zenitaizy ama pihpathina kyh cha chho lymâpa ta Phônisia râh nata Samari râh chahryh khai ei ta, chatanachata unawh zydua palysa ngaita ei ta.
4 Zerusale cha ama tlô nahta, awnanopa sahlaozy, apôstôlzy nata machâzy chata a vaw ly ei ta, Khazohpa ta âmo hmâpa ta hmo a taopa zydua cha chho ei ta.
5 Châhrasala Pharisaizy py liatahpa a ngiapâ hrapa ahyzy tlyma thyu ei ta, “Zenitaizy cha chopaw ama tai awpa a châ, Mawsi ryhpa zyh awpa chhao âmo liata bie taih cheingei awpa a châ,” tah ei ta.
6 Apôstôlzy nata machâzy cha, cha bie cha pachâ awpa ta a pakhy ei ta.
7 Thata amâ ei tawhta, Pity thyu ta ama hnohta, “Unawh saih u, Zenitaizy ta keima pakah ta Thâtihpha bie theipa ta a ngiapâ awpa ta Khazohpa ta eikhano ta nama hry tawhtapa eina raonazie kha nama pahno na.
8 Palôhrupa a pahnotuhpa Khazohpa ta keimo maniah piepa hawhna hra khata, Thlahpa Pathaihpa âmo liata pie hrapa ta ama chô liata aly tahpa pahnosa ta;
9 keimo nata âmo thlei hlei leipa ta, ngiapâna ta ama pathipalôh pathaih ta.
10 Chatanachata eima pathlatuhpazy nata keimo pahnie khao leipa raopakypa kha atahmâ pachupa sahlaozy chôta pahnie a chhuahpa ta khazia Khazohpa sona nama ei tly?
11 Âmo ngiapâpa hawhna hra heta keimo chhaota Abeipa Zisu ngiachhiena vâta pachha awpa châpa ta a pangiasa tlôh pi ta,” tah ta.
12 Chatanachata zawpi zydua cha a thlihthlâ ha ei ta; Banaba nata Pawla ta Khazohpa ta âmo hmâpa ta Zenitaizy hryta pahnona nata hmonoâhpa a taopa kyh ama chho chhôh zydua nahthlie ei ta.
13 Ama rei khai nahta, Zami ta reih hra ta, “Unawh saih u, ei bie nahthlie teh u.
14 Khazohpa ta ano moh a phaoh awpa ta ama hry tawhtapa chyhsazy la awpa ta Zenitaizy a hmô tuanazie kyh cha Simeôna heta reih ta.
15 Cha kyhzy nata hrohsopazy bie he miakhapa a châ:
16 Cha khai tawhna chata kua aw na ta, Davi byurei chopa kha taopathi aw na ta; a raona chhao sa pathi aw na ta,
17 mo hropa Zenitai zydua ei mo nâ hlypa sahlaozy chata Abeipa ama tlua nawpa ta ei padua heih aw,
18 khizaw tao tua no tawhta he biezy a pahnosa tyhtuhpa Abeipa chata a tah,’ tahpa ropa hih.
19 Chavâta he tana heta ei rao, Zenitaizy hryta Khazohpa lâ a heihpazy cha ama rie pathei leipa ei sihla,
20 nohthlahpa achhyna hmo pathaih leipa niepa zy, apheipa zy, pa-aosaopa nata thisaih niepa zy bâhsai awpa ta âmo lâta châ tlao paphao ei sihla ei tah.
21 Mawsi ta hlâno tawhta khi to liata a bie tlâh awhkheituhpa hnei tyh tlôh ta, apakhyna-o zy liata pahânoh maihta bie cha reipa a châ tyhpa kha,” tah ta.
Pakhypi bie pathlunazie
22 Apôstôlzy, machâzy, awnanopa zydua chhao chata ama hry liatahpa a tlypa ta Pawla nata Banaba hnohta Antiôka lâ pasiesa awpa a pha tah ei ta. Ama tlypazy moh cha Zuda, Basaba ama tahpa nata Sila châ ei ta, chazy cha unawhzy hryta hyutuh viapa châ ei ta,
23 he hawhta ropa he ama ku ta paphao ei ta: “Apôstôlzy nata unawhzy hryta machâzy ta Antiôka khih zy, Suria râh zy, Kilikia râh liata Zenitai unawh a ypazy, eima châ naoh na.
24 Eima sahlao hrytahpa ahyzy tlyma bie reipa ta cha patypamâ ei ta, nama nô a cha papo ei tahpa eima pahno, ama hnohta bie khâpahma pie tlôh lei khâh pi ta,
25 chavâta reikha tlapa ta a pakhy pi ta, eima kho ngaitapa Banaba nata Pawla,
26 eima Abeipa Zisu Krista moh vâta thi a papeisa leipazy hnohna heta chyhsa a tlypazy nâmo lâta vaw pasiesa awpa ta a pha tah pi ta.
27 Chatanachata Zuda nata Sila eima vaw tuah, âmo chhaota he bie he reikah ta ama cha chho hra aw.
28 Thlahpa Pathaihpa nata keimo ta he biepei ngaitapazy leipa heta cha phaohri pachaipa nama chô liata pahnieh leipa ei sihla a pha eima tah;
29 nohthlahpa a chhyna sa niepa zy, sa thisaih niepa zy, pa-aosaopa niepa zy, apheipa zy bâhsai ula, eima tah. Hezy he nama bâhsai khiahtala nama châta a pha aw. Atlâhpata ta y teh u,” tahpa ta.
30 Chatanachata âmo tuapa ta sie ei ta, Antiôka za tlô ei ta; zawpi cha awpakhy ei ta, cha cha pie ei ta.
31 Ama rei khai nahta, thlahlôhna bie vâna chata aly ngaita ei ta.
32 Zuda nata Sila cha hrohsopa châ hra ei ta, bie hluhpi ta unawhzy thlah palôh ei ta, tha patlô ei ta.
33 Cha liata bohpi ama y tawhta, âmo a tuahtuhpa lâta kua heih awpa ta unawhzy chata thlahlôh ngaitapa ta papuasa ei ta.
34 Châhrasala Sila cha cha liata ypa chata a chhuah ha ta.
35 Pawla nata Banaba deikua cha Antiôka liana chata bie pachupa nata chhopa ta y thlâh ha ei ta, mo hropa hluhpi chhaota.
Pawla nata Banaba achhaihna
36 Noh khazie tlyma tawhna chata Pawla ta Banaba hnohta, “Atahmâ, sie heih ei sila, khi to ta Abeipa bie eima chhona maih liata unawh a ypazy kha a hmô lymâ ei sihla, ama yzie moh ei si,” tah ta.
37 Banaba ta Zawhana, Maka ama tahpa cha ama hnohta a chhi a chhuah ta.
38 Pawla deikua chata ano cha ama hnohta a chhi awpa â ryh tah leipa ta, Pamphulia râh liata âmo kuasai ta, raihriana liata ama hnohta a sie hra leipa vâna khata.
39 Thata a ei ei ta, a chhaih ei ta; Banaba ta Maka cha a hnohta a chhi ta, Kupra liahpahlô lâta balyh ta sie haw ta,
40 Pawla deikua chata Sila a tlyh ta, unawhzy ta Abeipa ngiachhiena ama pavaosa tawhta pua haw ta.
41 Awnanopa hlaozy cha tha patlô lymâpa ta Suria nata Kilikia râh chahry khai ta.