Hmotaopazy 17
Thysalawnika liata atyhreina
1 Amphipôli khih nata Apôlônia khih sie pakhô ei ta, Thysalawnika khih tlô ei ta, cha liana chata Zuzy pakhyna-o y ta.
2 Pawla a yzie tyhpa hawhta ama hnohta a ngia ta, pahânoh ei thôh Khazohpa châ bie tawhta pakhâta ta a laichadaikheipa ta,
3 Mesia cha riethei a tao awpa a châna zy, athihpa hry tawhtapa chhao a thyu hei awpa a chânazie zy cha chhopasia ta, palâsa tyh ta, “He Zisu, a bie ei cha chhopa ei he, ano cha Mesia cha a châ,” tah tyh hra ta.
4 Chatanachata ama hryta thokha cha reipasao theipa ta y ei ta; Pawla nata Sila cha a pahlao haw ei ta; Khazohpa pachâpa Krika zawpi hluhpi nata chanô nôhrâhpa hluhpizy chhaota.
5 Châhrasala Zuzy ta hnâchhao ei ta, sôhdao su liata moleipa thathipa ahyzy tlyma âmo lâ a chhi ei ta, zawpi awpakhy ei ta, khih zydua patypamâ ei ta, Zasawna o vaw siehnao ei ta, vâtlâh lâta chhihtha a chhuahpa ta.
6 Chatawhcha âmo cha hmô leipa ei ta, Zasawna nata unawh hropa ahyzy tlyma khih hyutuhpazy lâta a daophi ei ta, aw ei ta, “Khizaw patypamâtuhpazy kha helâ chhao a vy ei ta,
7 Zasawna heta patlôsa bao hra ta; he sahlao zydua he a moh Zisu abei hropa a y, tahpa ta, Kaisara bie chakhiapa ta ama y tyh,” tah ei ta.
8 Zawpi nata khih hyutuhpazy chata cha biezy cha ama thei nahta atymâ ngaita ei ta.
9 Chatawhcha Zasawna nata mo hropazy tawhna cha ama vyuhpa ta a cheikana ama la nahta pathlie haw ei ta.
Apôstôlzy Berôia liata
10 Unawhzy chata a zo ta Pawla nata Sila cha Berôia khih lâta pasiesa pâ ha ei ta; cha liata ama kei tlô nahta Zuzy pakhyna-o liata a ngia ei ta.
11 Cha liata chyhsazy cha Thysalawnika chyhsa hlâta cha pha via ei ta, chatanachata palôhrupa aly ngaitapa ta bie cha a pyh ei ta, ama bie reipa cha â do nata do lei pahno nawpa ta nohchareih Khazohpa cha liata tlua tyh ei ta.
12 Cha sahlao chyhsa hluhpi ta a ngiapâ haw ei ta, Krika chanô zachhihpazy nata chapawzy chhao.
13 Châhrasala Thysalawnika liata Zu sahlaozy chata Pawla ta Berôia liata Khazohpa bie a chho tahpa ama thei pata nahta, cha lâna chhao cha vawh ei ta, zawpizy hnapaona reipa ta patypahrei ei ta.
14 Chatanachata unawhzy ta tilaipi taihta sie awpa ta Pawla cha pasiesa pâ ha ei ta, Sila nata Timawthy deikua cha cha liana chata y thlâh ha ei ta.
15 Pawla a chhihthatuhpazy chata Atheni taihta chhihtha ei ta; Sila nata Timawthy cha a chatliepa ta ano lâ sie nawpa bietahpa a chakaihpa ta pua haw ei ta. Pawla Atheni liata
16 Pawla ta Atheni liata âmo a vaw hâ nona chata, khih cha khazoh nohthlahpa ta a biepa ta hmô ta, a palôh pasa kaw ta.
17 Chatanachata apakhyna-o liata Zuzy nata Khazohpa a pachâpazy ei tyh ta, sôhdaona su liata chhao, cha liata a vaw ypa maih cha nohcharei a ei tyh hra.
18 Epikuria chyhsa nata Stôika chyhsa hryta chyhsa sopa ahyzy tlyma chhaota ano cha vaw ei ei ta. Thokha ta, “He reih hluhpa heta khâpa rei â chhuah?” tah ei ta. Thokha ta Zisu kyh nata thyuheina kyh a reipa vâta, “Râh hropa khazohzy bie chhotuhpa a châ ei aw,” tah ei ta.
19 Chatawhcha ano cha patu ei ta, Areôpaku lâna chata a vaw chhi ei ta, a hnohta, “He pachuna thiehpa na reih tyhpa he maniah na pahnosa thei aw ma?
20 Hmonoâhpa kheihawhpa tlyma eima nahkhaozy liata na vaw tlôkhei; chatanachata he hmozy yzie he eima pahno khoh,” tah ei ta.
21 Atheni chyhsa zydua cha ama khih liata khichhai a ypazy chhao ama mana maihta bie thiehpa maih cha reipa ta tlyma, nahthliehpa chhâ ta tlyma y tyh ei ta.
22 Pawla cha Areôpaku liah liana chata a duah ta, reih ta, “Nâmo Atheni mozy saih u, ato liata phôhryhpa a pachâ ngaitapa nama châ tahpa ei pahno.
23 Ei chareipa ta nama chhypazy ei mo nota, maisâh miakha a chô liata, ‘Pahno leipa Khazohpa châta,’ tahpa ropa ei hmô. Chatanachata pahno leipa ta namâ chhy tyhpa kha, cha bie cha ei cha chho ei hih.
24 Khazohpa khizaw nata a chhôh liata hmo a ypa zydua a taotuhpa cha, alei nata avâ Beipa a châpa vâta ku ta sapa ozy liata pahrâ vei,
25 hmo phahlapa hawhta chyhsapa ku ta chakaopa ta y hra vei, ano tlai cha ato hnohta hronazy, husonazy nata hmo zydua a pietuhpa tlao a châ.
26 Alei chô zydua liata y awpa ta thyuna miakhasai ta pho to chyhsa tao ta, ama châta daihtizy rao ta, ama yna râhrizy chhao pakhâh ta,
27 Khazohpa tluapa ta patha ngâpa ta ama hmô lyliah nawpa ta. Châhrasala ano chata maniah ahla chyu tlôh lei khâh ta.
28 Ano vâta eima hro, eima pielyu, eima ypa châ tlôh ta; nâmo hla phi thaipa ahyzy tlyma chhaota, ‘Keimo chhao a pathlazy châ tlôh pi,’ tahpa ta ama reipa hawhna khata.
29 Khazohpa pathla eima châ hmâchhâ khiahtala Khazohpa sapa cha ngôh zy, tâkâ zy, alô zy, chyhsapa zôthaipa nata a ryraopa ta daipazy hawhpa he khiah ma, tahpa eima pangiasa awpa châ vei.
30 Khazohpa ta eima pahno vei nota zy, pahno lei a pachâ tyh ta, châhrasala atahmâ he râh to liata chyhsa zydua ro awpa bie a pie haw,
31 noh a taipa vâta cha noh liana chata a chyhsa raopazy Khazohpa ta ano cha a thihpa hry tawhtapa pathyupa ta chyhsa zydua lâta a pahnosa haw,” tahpa ta.
32 Athihpa hry tawhtapa thyuheina kyh cha ama thei pata nahta, thokha ta pahneisao ei ta; thokha ta, “He kyh he na hnohta eima nahthlie heih aw,” tah ei ta.
33 Chatanachata Pawla cha ama hry tawhtapa pua haw ta.
34 Châhrasala chyhsa ahyzy tlyma a hnohta a hlao haw ei ta, a ngiapâ haw ei ta, chazy hry liata thokha cha Areôpaku chyhsa Diônesia nata chanô pakha, a moh Damari nata ama hnohta mo hropazy chhao ama châ.