Zerusale Awnanopa hnohta Pity pahnosana
1 Zudia râh liata apôstôlzy nata unawh a ypazy chata Zenitaizy chhaota Khazohpa bie ama zyh tahpa pahno haw ei ta.
2 Chatanachata Pity cha Zerusale a tlôpa ta nahta, chopawtaipa sahlaozy ta a hnohta,
3 “Chopawtai leipazy o liata a ngia chi ta, ama hnohta nie bawh hra chi ta,” tahpa ta ei ei ta.
4 Châhrasala Pity chata a thaby tawhta a pazipa ta ama hnohta chhopasia ta:
5 “Zôpa khih liata thlahchhâpa ta y na ta; aluahna hmô na ta, khâpa leipa byh poh lai ngaitapa hawhpa, a ki palih ta bupa ta, avâ tawhta a zâ pathliahpa ta hmô na ta; ei kiapâh lia tlai na vaw hnia ta.
6 Cha cha moh thlâh ha na ta, pachâ na ta, alei liata sa phei palih a hneipazy, lyurâhpa sazy, lôvâpa alyh theipazy nata avâ liata a zawpa pavawzy hmô na ta.
7 Chatawhcha ao ta, ‘Pity thyu teh, thie la, nie te,’ eina tahpa ta thei hra na ta.
8 Châhrasala kei ta, ‘Abeipa, châ vei, ânapa nata a pathaih leipa khâpahma ei pakah liata a ngia beih vei,’ tah na ta.
9 Châhrasala avâ tawhta ao chata a ei nona liata, ‘Khazohpa ta a pathai hawpa cha nâma ta âna tah khâ,’ tahpa ta nâ chhy ta.
10 Cha hawhna saita ei thôh vaw y ta, ato cha a vâ lâ chalopa ta y ha ta.
11 Chyhsa pathôh Kaisaria khih tawhta kei lâ vaw tuah ei ta, eima yna tlyhmia liana chata vaw duah thlâh ha ei ta.
12 Thlahpa ta ahyhma pathlua hlei leipa ta âmo zi awpa ta na tuah ta. He unawhzy pacharu chhao heta na zi hra ei ta, Kawnilia o liana chata a ngia pi ta;
13 ano chata eima hnohta, a o liata vâlyuhchâpa a duahpa a hmônazie nata a hnohta, ‘Zôpa khih lâta chyhsa tuah la, Saimaw Pity ama tahpa cha vaw pachhihthasa teh;
14 ano chata bie cha chho aw ta, cha bie ta nâma nata na chhôhkhazy cha pachhapa ta nama y aw,’ a tahnazie chhao maniah chho ta.
15 Chatawhcha bie ei rei tua nota, Thlahpa Pathaihpa eima chôta a vaw tlô tua no hawhna khata ama chô liata vaw tlô haw ta.
16 Abeipa bie, ‘Zawhana ta ti ta chyhsa bâti a pachâsa tyhpa kha, châhrasala nâmo la Thlahpa Pathaihpa ta bâti nama châ aw,’ a tahnazie kha a vaw thei na ta.
17 Chatanachata Abeipa Zisu Krista amâ ngiapâ pata nahta, Khazohpa ta hmosaipiepa maniah a piepa hawhpa kha ama hnohta a pie hra tawhta kei heta Khazohpa a ei awpa ei châ ma?” tah ta.
18 Cha biezy cha ama thei nahta a thlihthlâh ha ei ta, “Chata a châ khiahta cha Khazohpa ta Zenitaizy chhao hroh awpa ta ro a pasai haw cha zaw,” tahpa ta Khazohpa reithai ei ta.
Antiôka Awnanopa
19 Stiphana vâta taolapa ta a pai pathlahpazy kha Phônisia râh zy, Kupra liahpahlô zy, Antiôka khih zy taihta sie ei ta, Zuzy hnohta deita leipa ta cha ahy hnohta hmah bie cha chho leipa ta y lymâ ei ta.
20 Châhrasala ama hryta thokha cha Kupra liahpahlô nata Kurini chyhsazy châ ei ta, cha chyhsazy chata Antiôka cha ama tlô nata Krikazy hnohta chhao bie reih ei ta, Abeipa Zisu Thâtihpha cha chho ha hra ei ta.
21 Abeipa ku ta âmo a châkhei ta, chyhsa hluhpi ta a ngiapâ ei ta. Abeipa lâna cha a heih chyu ei ta.
22 Ama thâtih cha Zerusale liata awnanopa a ypazy nahkhao liana chata a ngia ha ta, chatanachata Antiôka taihta Banaba cha tuah haw ei ta.
23 Ano cha kei tlô ta Khazohpa ngiachhiezie cha hmô ta, aly kaw ta; phahnai a ngiah ngaitapa ta Abeipa patu thlâh ha awpa ta ama zydua pasyu ta;
24 Banaba cha chyhsa pha kawpa châ ta, Thlahpa Pathaihpa nata ngiapâna ta a biepa châ ta. Chyhsa hluhpi ta Abeipa lâta a baichha haw ei ta.
25 Banaba cha Sawla tlua awpa ta Tarsa lâta sie ta;
26 a hmô nahta, Antiôka lâta a vaw chhi ta. Chatawhcha kô kha tlai awnanopazy apakhyna liana chata a hlao tyh hra ei ta, chyhsa hluhpi pachu tyh hra ei ta; Antiôka liana chata pachupa sahlaozy cha Krizyhpa ama tah tua chai.
27 Cha nona chata hrohsopa ahyzy tlyma Zerusale tawhta Antiôka lâna cha zu ei ta.
28 Ama hryta chyhsa pakha a moh Akaba a duah ta, khizaw zydua liata chakâhna ru ngaitapa a tlô aw tahpa Thlahpa chhopa ta pahnosa ta; cha chakâhna cha Klaudia a bei nota vaw tlô haw ta.
29 Pachupa sahlaozy chata ama tao theipa rakha chyuta, Zudia râh liata unawh a ypazy lâna chata, bao nawpa ta paphao a chhuah ei ta;
30 cha cha tao ha tlai ei ta, Banaba nata Sawla ku liana chata machâzy lâta paphao ei ta.