Hmotaopazy 27
Rawma lâ balyh ta siepa ta Pawla a thaona
1 Itali râh lâ balyh ta eima sie awpa bie ama pathlâ patanahta, Pawla nata atâhpa hropa ahyzy tlyma, Awkustu py liatahpa pheisaih zakha hyutuhpa, a moh Zulia pavaosa ei ta.
2 Adramytia khih balyh, Asia râh tilaipi ngiakâ liata khih a ypazy chapia awpa chata kiah pi ta, tilaipi liata sie haw pi ta, Masidônia râh chyhsa Aristaku, Thysalawnika khihpa eima hnohta y ta.
3 Mylâ ta Sidaw khih tly pi ta; Zulia chata Pawla ngiachhie kaw ta, a patlâpazia awpa ta a viasa hnohta chareisa ta.
4 Cha tawhta tilaipi liata sie heih pi ta, thlih ta ano leipa lâta maniah a nâpa vâta Kupra liahpahlô thlih a ôna lâta chahri pi ta.
5 Kilikia râh nata Pamphulia râh a daih lâ tilaipi eima khô tawhta, Lysia râh liata Myra khih tlô pi ta,
6 cha liana chata pheisaih zakha hyutuhpa chata Alezandria khih balyh Itali râh a tly awpa cha hmô ta, cha liana chata maniah pakiasa ta.
7 Chatawhcha noh hluhpi dusawta ta sie pi ta, Knidu khih dady a ru ngaitapa ta tlô pi ta, thlih ta maniah a supa vâta Salmône dady ta chahri pi ta.
8 Chatawhcha a ru ngaitapa ta ngiakâ chhei pi ta, balyh pahâna Ngiapâ ama tahpa su cha tlô pi ta, cha kiapâh liana chata Lasia khih a y.
9 Chatawhcha noh hluhpi a lei hawpa vâta nata balyh liata siepa chi â chhih kawpa vâta nie leipa noh cha khô haw tlôh ta, Pawla chata âmo cha chhorei ta,
10 ama hnohta, “Puhpa saih u, atahmâ ta balyh liata siepa he raona nata leidiana ru ngaitapa a tlô aw tahpa ei pahno na, hmozy nata balyh chôta dei ei tahpa châ leipa ta keimo chô liata chhao ei tah,” tah ta.
11 Châhrasala pheisaih zakha hyutuhpa chata Pawla bie reipa hlâta cha balyh puhpa nata balyh a hneituhpa bie zo via ta.
12 Chatawhcha chasipaw nota balyh pahâna liata ypa cha â ryh leipa vâta, a hluh via ta cha tawhta tilaipi lâta siepa ta, Phôni khih tlôpa ta, cha liata chasipaw nota y awpa cha pahrua ei ta, Phôni cha Krita liahpahlô balyh pahâna miakha a châ, maw nochhi nata chho nochhi dady a châ.
Tilaipi liata thlihpipa
13 Chatawhcha chho thlih cha dusawta ta a vaw pathli nahta, ama khonazie hmô khiah ma, tah ei ta, thuacha-ia cha chalo ei ta, Krita liahpahlô ngiakâ cha chhei ngâ kaw ei ta.
14 Châhrasala buakhata tawhta raphyu lâ tawhna chata thlih ru ngaitapa ta vaw pathli ta, cha thlih cha maw nochhi thlih ama tah tyh;
15 chatawhcha balyh cha vaw su ta, thlih lâ a heih thei lei patanahta pathli haw pi ta, maniah phaoh ngâ thlâh ha ta.
16 Chatawhcha a moh Kawda liahpahlô chyhpa ta thlih a ôna lâta chhei pi ta, a ru ngaitapa ta balyh chyhpa pabosa thei lyliah pi ta;
17 amâ daophi khai tawhta pachhana khawhrizy hmâh ei ta, balyh â dopa ta chahry ei ta; chatawhcha poh-raina maih paphao khai ei ta, chata leipa ta cha leisadi a sy theipa lâta a phaoh awpa chi ei ta, chatanachata maniah phaoh lymâ ta.
18 Mylâ ta ti chatlaopa ta thata maniah a supa vâta, balyh liata hmozy cha ti liata thy pathao haw ei ta;
19 a mylâ heihpa ta âmo ku tlaita balyh hmobaoh thy heih ei ta.
20 Noh hluhpi chhôh awhsi chhao a lâ leipa ta, thlihpipa ru ngaitapa ta maniah daih ta, hro rai eimâ hnabeisei khao vei.
21 Chatawhcha pati nie leipa ta bohpi ama y tawhta, Pawla ama hryta a duah ta, “Puhpa saih u, Krita liahpahlô liana khata pathlâ leipa ta, ei bie kha zyhpa ta, he raona nata leidiana he namâ tyh lei awpa tlai.
22 Châhrasala atahmâ chhao thlahlôh ngaitapa ta y awpa ta ei cha pasyu ei; nama hryta ahyma nama hro pahlei aw veih eichi, balyh deikua he a lei aw.
23 Ano eih châ na ta, ei chakao tyhpa Khazohpa kha, cha vâlyuhchâpa pakha atazâ he ei kiapâh liata a vaw duah ta, ei hnohta,
24 ‘Pawla chi khâ; Kaisara hmiakô liata nâ duah awpah a châ; balyh liata na hnohta a siepa zydua chhao he, Khazohpa ta a cha pie,’ eina tah.
25 Chavâta puhpa saih u, thlahlôhpa ta y teh u, Khazohpa ei ngiapâ na, eina chhopa lymâ hawhta a y aw.
26 Anodeikua liahpahlô kheihawhpa liata tlyma maniah a papua awpa a châ,” tah ta.
27 Adria tilaipi liata thlih ta hiakha lâ, hiakha lâ, maniah phaoh ngâ kaw ta, zâ hrawhleipalih a tlô zâ ta, zâcho ta tlyma balyh chyhsazy chata kheihawhpa raphyu tlyma tlô awpa ta a pangiasa ei ta.
28 Chatanachata ti a thuna lâ thlie ei ta, lâh sy no ta pahno ei ta; chatawhcha bohpi leipa ta thlie hei ei ta, lâh hrawhleipangawh ta pahno ei ta.
29 Chatawhcha balyh chao lâta thuacha-ia miapalih pathla ei ta, chata leipa ta cha alô chhiepa su lâta maniah a phaoh pathlei aw na, tahpa chi ei ta, khih pavâ awpa a ngiatiah leipa ei ta.
30 “Chatawhcha balyh chyhsazy chata balyh luh lâta thuacha-iazy pathla awpa hawhta taopakheipa ta balyh chyhpa cha tilaipi liata pathla ei ta, siesai a chhuah ei ta.
31 Cha nota Pawla chata pheisaih zakha hyutuhpa nata pheisaihzy hnohta, “He sahlao he balyh liata ama y thlâh ha vei khiahtala, a boh aw veih eichi,” tah ta.
32 Chatanachata pheisaihzy ta balyh chyhpa rizy cha a ei ta, pathlie haw ei ta.
33 Chatawhcha khih pavâ chy ta, Pawla ta chyhsa zydua cha pati nie awpa ta chho ta, “Atanoh he noh hrawhleipalih hâ haw eichi ta, khâpahma nie leipa ta y eichi ta, nodipa ta nama y thlâh haw.
34 Chavâta nie awpa ta ei cha chho ei; nama thatlô nawpa a châ hih, nama hry liata ahyhma sâbu sâkha hmah leidia aw vei,” tah ta.
35 Cha bie cha a rei khai nahta, viahchhâ la ta, chyhsa zydua hmiakô liana chata Khazohpa lâta alyna bie reih ta, pachhaih ta, nie pathao haw ta.
36 Chatawhcha âmo chhao thlahlôh ngaitapa ta y ei ta, pati nie haw hra ei ta.
37 Balyh liata chyhsa cha eima zydua ta zâ no nata sysari nata pacharu châ pi ta.
38 Chatawhcha ama nie khai nahta sâh cha tilaipi liata thy ei ta, balyh pahuasa via ei ta.
Balyh raona
39 Chatawhcha noh a chhi nahta ngiakâ cha khataih liata ma a châ tahpa pahno leipa ei ta, châhrasala kheihawhpa balyh pahâna tlyma raphyu a hneipa hmô ei ta, cha chô liana chata ama tâh theipa khiahtala balyh chasô a chhuah ei ta.
40 Thuacha-ia hrainazy cha â ei ta, tilaipi liata siesai ei ta, cha hnohta a pahina chahrynazy cha pathlâ ei ta; hmialâ poh-raipa cha thlih hmô nawpazie ta pasâh ei ta, raphyu cha pangai haw ei ta.
41 Châhrasala ti ly rupa a tyhna su liata a ngia pi ta, balyh cha alei pasusa haw ei ta, chatanachata balyh luh lâ cha a taw ha ta, papie thei leipa ta y thlâh ha ta, a chao lâ deikua cha ti chatlaopa rupa vâta parao pathao haw ta.
42 Chatawhcha pheisaihzy ta atâhpazy cha thie a chhuah ei ta, chata leipa ta cha ti a zaw ta a puapazy y aw ei ta, amâ râ aw tahpa chi ei ta;
43 châhrasala pheisaih zakha hyutuhpa chata Pawla pachha khoh ta, ama hmo a chhuahpa cha pakhâ ta. Ti zaw a thaipa maih tilaipi liata a zawpa ta raphyu pua tua awpa nahta.
44 mo hropa cha thokha thophiapa chô liata zy, thokha balyh hmobao hropa chô liata zy, kiah awpa ta bie pie ta, Cha hawhna chata ama zydua ta raphyu liata â bohpata ta pua khai haw ei ta.