Hmotaopazy 24
Pawla ama leih-na bie
1 Noh pangawh tawhta Theihthai Beichaipa Anania za tlô ta, machâ ahyzy tlyma chhaota, a moh Tertula bie rei a thaipa pakha chhao. Pawla chôta biepeipa cha râh a vaotuhpa liata reih ei ta;
2 Pawla cha ama aw tawhta Tertula chata ano leih pathao ta: “Felika Phachaipa y, nâma zawhzi ta thlahlôh ngaitapa ta eima ypa vâta nata na mohôhpa vâta he pho châna heta moleinazy pakhâpa ta a y tyhpa vâta,
3 chhâzaw ta, khataih liata rai, palôhtlâhpata ta eimâ ly tyh.
4 Anodeikuacha na châta no-aichhihpa cha khoh leipa na ta, na nôphana ta bie kawh kha deikua cha eina nahthliepa awpa chi ta ei châ haw.
5 He chyhsa he chyhsa a tahsa ngaitapa khizaw liata Zu sahlao zydua a patypahreituhpa nata Nazari mozy py liata ama hyutuhchaipa pakha a châpa cha pahno pi ta.
6 Khazohpa achhyna-o tlai chhao papuapalei a chhuah hra ta, chavâta patu pi ta. [Eima ryhpa hawhta pachia awpa ano cha eima khoh,
7 châhrasala hyutuhchaipa Lysia a vy ta ano cha tararuahna ta la haw ta,
8 a leihtuhpa zy cha na hmiakô lâta avy awpa ta bie pie ta.] Nâma tlaita padaipa ta eima leih-na hmo zydua he ano liata na pahno thei aw,” tah ta.
9 Zuzy chhao chata cha biezy cha, cha hawhna cha a châ tahpa ta a châkhei hra ei ta.
Felika hmiakô liata Pawla thaina bie reina
10 Chatawhcha râh a vaotuhpa chata bie reih awpa ta Pawla cha a ku ta a thlie thlâ patanahta, Pawla chata: “Nâ, kô hluhpi he phozy ryu a rei patuhpa he na châ tahpa ei pahnopa vâta aly ngaitapa ta ei thaina bie ei reih aw.
11 Zerusale liata Khazohpa achhy awpa ta ei khy tawhta noh hrawhleino hlei châ aw vei, tahpa na pahno thei aw;
12 Khazohpa achhyna-o liata rai, apakhyna-o liata rai, khih lia ta rai, ahyhma eipa nata zawpi ei pasyupa âmo ta na hmô hra veih ei.
13 Atahmâ chhao eina leih-na bie he na theina liata a thabypa reih thei hra aw veih ei.
14 Châhrasala he bie he na hnohta ei phuah aw, py hropa ama tahpa Lapi yzie hawhta eima pathlatuhpazy Khazohpa ei chhy tyh, ryhpa nata hrohsopazy châbu liata ropa zydua a ngiapâ na ta,
15 chyhsa siapazy nata sia leipazy thyuheina a y aw tahpa Khazohpa lâta ei hnabeisei ta, he sahlaozy chhao heta chazy cha a ngiapâ tlôh hra ei ta.
16 Chatanachata Khazohpa lâ nata chyhsapa lâ chhao palôhrupa molei leipa he patu ei chhuah tyh.
17 Chatawhcha kô hluhpi tawhna heta ei chiheihzy hnohta hmo pie awpa nata sa thie awpa vaw cheihpa ta a vy na ta.
18 Cha hmozy ei pie nona chata zawpi a hlao leipa ta, palôhpasa leipa ta, Khazohpa achhyna-o liata pathaihpa ta na hmô ei ta. Châhrasala cha liana cha Asia râh liata Zu ahyzy tlyma ama ypa kha,
19 chazy chata ei chô liata bie ama hnei khiahtala, he liana heta na hmiakô liata ypa ta eina leih awpa ei a châ:
20 A châ vei khiahta he chyhsazy tlai heta ryureituhpazy hmiakô liata ei dua nona khata ei paraopa khâpa ma ama hmô reih ei se,
21 he bie kawh kha vâna heta a châ leipa khiahtala ama hryta a duahpa ta, ‘Athihpa thyuheina kyh liata atanoh he nama hmiakô liata padaipa ta ei y hih,’ ei tahpa kha,” tah ta, a chhy ta.
Pawla patupa ta a y
22 Felika chata Lapi kyh cha a pahnopasia viapa vâta, “Pheisaih hyutuhpa beichaipa Lysia cha a zu tita nama bie ei paryh aw,” tahpa ta soh ha chy ta.
23 Pawla cha dao viapa ta a viasazy ta ama deichhy awpa pakhâ leipa ta, pavaisa awpa ta pheisaih zakha hyutuhpa hnohna chata bie pie ta.
24 Noh khazie tlyma tawhta Felika cha a vy heih ta, a lahpinô Drusila, Zu chanô chhaota; Pawla cha pa-awsa ta, Krista Zisu ngiapâna kyh cha nahthlie ta.
25 Pawla chata siana kyh zy, a sohsina kyh zy, ryureina a vaw y awpa kyh zy â icha ngaitapa ta a chho nota Felika chata chi ngaita ta, “Vawh ha chy la; daihti rypaohpa ei hnei tita ei cha aw heih aw,” tah ta.
26 Pawla ta tâkâ a pie awpa a hnabeisei hra ta. Chavâta aw parahpa ta bie â chho tyh.
27 Châhrasala kô no tawhta, Porsia Festa ta Felika cha â thla haw ta; Felika chata Zuzy hry liata moh pha khoh ta, Pawla cha chahry chiehpa ta siesai ta.