Hmotaopazy 26
Akripa hmiakô liata Pawla a thai châna bie a reina
1 Akripa chata Pawla hnohta, “Na thaina bie na reih thei na,” tah ta. Pawla cha a ku pazawh ta, a thaina bie reih ta:
2 “Abeipa Akripa y, Zuzy ta eina leih-na zydua liata ei thaina bie atanoh na hmiakô liata ei reih awpa vâna heta ei ly kaw,
3 he he ei lyna chaipa a châ, Zuzy hry liata ryhpa nata biepeipa zydua kyh liata na so ngaitapa vâta; chavâta lôhchâta ta eina nahthlie awpa chi ta ei châ haw.
4 “Cha hlâta ei hawti no tawhta ei chizy hry liata nata Zerusale liata ei yzie kha, Zu zydua ta ama pahno.
5 Cha hlâ tawhta ei thâtih ama pahno, kha hawhta eima phôryhpa py â icha ngaitapa ryhpa zyhpa ta Pharisai liata a ypa kha ama khoh khiahtala eina reikhei thei ei.
6 Khazohpa ta eima pathlatuhpazy hnohta bie a taipa kha hnabeiseina kyh liata he liata atahmâ ryureipâpa ta ei duapa he,
7 cha bietai cha eima pho hrawhleino ta, a chhô a zâ ta phahnai khoh ngaitapa ta Khazohpa chakaopa ta hmô awpa ama hnabei a sei tyh. Hy beipa y, cha hnabeiseina kyh vâna chata Zuzy ta eina leih ei hih!
8 Khazohpa ta athihpazy a pathyu tahpa he khazia zo a chhih leipa ta nama rao tly?
9 “Kei chhaota Nazari Zisu moh ano leipa lâta hmo hluhpi tao aw sala a phapa ta pangiasa tyh na ta.
10 Cha hawhpa cha Zerusale liata tao tyh hra na ta; theihthaipa abeizy tawhta bie hmô na ta, mopathaihpa hryta chyhsa hluhpi patâhna ozy liata khô tyh hra na ta, chatawhcha ama thie nota thie awpa â ryh tah tyh hra na ta.
11 Chatawhcha apakhyna-o to liata hrie tyh na ta, Zisu kyh reipachhie a chhuah lyliah na ta; ama chô liata nôchhiepa ta y na ta, râh hropa khih taih chhaota taola tyh na ta.
Pawla ta a pihpathinazie a chhona
12 “Cha hawhta tao awpa ta theihthaipa abeizy bie hmôpa nata ama tuana cha a cheipa ta Damaska khih lâ sie na ta.
13 Beipa y, ei sie hai nota, nohchhô pati nie daihti châ ta, avâ tawhta a khaihpa khâpa tlyma, noh khaihpa hlâta a khaih viapa, keima nata ei sielâhpazy kiapâh liata a khaihpa ta hmô na ta.
14 Eima zydua ta alei liata pao pi ta, Hebrai reih ta, ‘Sawla, Sawla, nâma ta khazia eina taola chi? Saona chôhchahrei chapiapa na châta a pasa na,’ eina tahpa ta ao thei na ta.
15 Chatawhcha keima ta, ‘Abeipa ahyma na châ?’ tah na ta, Abeipa chata, ‘Zisu na taolapa he ei châ,
16 châhrasala thyu la, a duah teh; he na hmo hmôpazy nata na hnohta ei luahna awpa hmozy chhao, cha chakaona châta nata pahnotuhpa ta cha tao awpa ta na hnohta ei vaw luah hih,
17 chyhsa zydua nata Zenitaizy ku tawhta ei cha pachha aw, âmo mo pavâsa awpa ta âmo lâta ei cha tuah hih,
18 zohna cha khaihna lâta â heisai aw’ ei ta, Sâtâ biehneina cha Khazohpa lâta amâ heisai aw, molei ngiahthaina ama hmô awpa nata einâ ngiapâpa vâta pathaih hawpazy hryta ryuto ama hnei nawpa ta,’ tah ta.
Zunawh nata Zenitaizy hnohta Pawla pahnosana
19 “Chavâta Abei Akripa y, avâ liata aluahpa cha ei leipa na ta,
20 a hmiatua ta Damaska mozy hnohta, cha hnôh lâna chata Zerusale mozy hnohta zy, Zudia râh to liata chyhsazy hnohta zy, Zenitaizy hnohta zy chhao, ro moh phaoh tlâh châpa ta, hmo taopa ta, ropa ta, Khazohpa lâ amâ heih nawpa ta tlao ei chho tyh.
21 Chazy vâna chata Zuzy ta Khazohpa achhyna-o liata na patu ei ta, thie einâ chhuah ei.
22 Châhrasala Khazohpa tawhta châkheina ei hmôpa vâta, atanoh taihta chyhsa nawhpazy nata molaipazy hnohta bie pahnosapa ta y na ta, hrohsopazy nata Mawsi ta a vaw tlô awpa ama tahpa kyh deita leipa ta cha, bie hropa reih leipa ta:
23 Mesia ta riethei tao aw ta, athihpa hry tawhta a thyuheipa vâta chyhsa zydua lâta nata Zenitaizy lâta chhao, khaihna a pahmôsatuhpa hmiatua chaipa a châ aw, ama tahpa kyh kha,” tah ta.
Pawla ta angiapâ awpa ta Akripa a hruana
24 Cha hawhta a thaina bie a rei nota, Festa chata ao paro ngaitapa ta, “Pawla na hru ha na, nâ chu hluhna ta a cha pahrusa ha hih,” tah ta.
25 Châhrasala Pawla chata, “Festa Phachaipa y, hru va na, bie dopa nata bie sopa tlao ei reih hih.
26 He bie he beipa heta a pahno mâ tâh, ano liata chhao chi leipa ta ei reih he; he hmo he khâpahmata ano liata phihpa châ vei, tahpa a siapata ei pahno, he a chaki lâta taopa ta châ tlôh leipa ta.
27 Abei Akripa y, hrohsopazy na zo ma? Na zo tahpa ei pahno na,” tah ta.
28 Akripa chata Pawla hnohta, “Buakhata reipasaopa ta Krizyhpa ta tao awpa einâ chhuah chi he!” tah ta.
29 Pawla chata, “Buakhata hrasala, bohpi hrasala, nâ deita cha tah va na, atanoh ta ei bie a theituhpa zydua chhao he, keima hawhta y awpa ta Khazohpa lâta ei hiah, keihraizy deikua he daih hra leipa ta,” tah ta.
30 Chatawhcha abei zy, râh a vaotuhpa zy, Bernika nata ama hnohta atyuhpazy chhao chata thyu ei ta;
31 â nano lâta ama pua nahta a chhohia ei ta, “He chyhsa heta thina nata keihrai daina taihta hmo khâpahma tao vei,” tah ei ta.
32 Akripa ta Festa hnohta, “He chyhsa heta Kaisara kô tlô awpa ta vaw taih haw leipa sala pathliepa ta a y thlâh ha awpa tlai,” tah ta.