Hmotaopazy 28
Pawla Melita liahpahlô liata
1 Eima pua khai tawhta, liahpahlô moh cha Melita a châ tahpa pahno pi ta.
2 Chatawhcha râh hropa chyhsazy chata thata maniah ngiachhie ei ta, avâ a suapa vâta nata a chasipa vâta mei patih ei ta, eima zydua ta maniah a vaw ly ei ta.
3 Pawla chata tho ty kha pakhy ta, mei liata ti ta, a sahpa vâta vâzi vaw pua ta, a ku liata pachu ta, a bangie thlâh ha ta.
4 Cha râh chyhsazy chata parih a ku liata a bangie thlâh hapa cha ama hmô nahta, “He chyhsa he lianycheipa a châ tlai aw. Tilaipi tawhta pua hrasala, phuh latuhpa chata pahro khoh khao aw vei,” tah ei ta.
5 Châhrasala ano chata parih cha mei liata chatho pathla ta, kheihtahma y leipa ta.
6 Âmo deikua chata a thloh tlyma, sôkhata thipa ta a pao pâ aw tlyma tahpa bohpi hâ thlâh ha ei ta, kheihtahma a y leipa ama pahno nahta, ama palôh panano ei ta, khazohpa a châ hih, tlao tah haw ei ta.
7 Cha su kiapâh liana chata, cha liahpahlô liata abei chaipa Publia râh a y, cha chyhsa chata maniah a vaw ly ta, noh thôh aly ngaitapa ta maniah patlôsa ta.
8 Publia paw chasipa nata a thi ta lyupâh a puapa a vaw zia thlâh ha ta; Pawla ano lâ a ngia ta, thlahchhâ ta, a chô liata a kuzy pahnieh ta, patlâ haw ta.
9 Cha cha a tao khai nahta, cha liahpahlô liata chyhsa hropa pasapa a hneipa maih cha a vy ei ta, tlâh chyu ei ta,
10 Cha chyhsazy chata thata maniah palyupalih ei ta; chatawhcha eima sie chyta eimâ ngiahpa maih balyh liata soh chyu ei ta.
Pawla Rawma a tlôna
11 Thla thôh tawhta a moh ‘Vara Maphi’ Alezandria khih baly chasipaw nota liahpahlô liata a ypa, cha balyh chata sie pi ta.
12 Chatawhcha Syraku khih tly pi ta, cha liana chata noh thôh châh pi ta.
13 Cha tawhna cha chahlô pi ta Rhezia khih tlô pi ta; noh kha tawhta chho thlih vaw pathli ta, a mylâ heihpa ta Puteôli khih tlô thei pi ta.
14 Cha liana chata unawhzy hmô pi ta, ama hnohta noh sari châh awpa ta maniah reipasao ei ta. Cha hawhna chata Rawma lâ sie lymâ ha pi ta.
15 Unawhzy ta eima thâtih ama thei patanahta cha tawhna chata Apia Daopi nata Khichhai bu Miathôh taihta maniah dy awpa ta a vy ei ta, Pawla ta cha chyhsazy cha a hmô nahta Khazohpa lâ alyna bie reih ta, thlahlôhpa ta y haw ta.
16 Rawma liata amâ ngia nahta, Pawla cha a vaihtuhpa pheisaih hnohta ano deita ta y awpa ta pasai ei ta.
Rawma liata Pawla bie chhona
17 Chatawhcha noh thôh tawhta Pawla chata Zuzy hyutuh viapa maih aw pakhy ta; ama vaw pakhy nahta ama hnohta, “Unawh saih u, chyhsa zydua nata eima pathlatuhpazy ryhpa chôta khâpahma ei tao leipa chhaota Zerusale tawhta Rawma mozy hnohta eina patâh ei.
18 Chatawhcha âmo chata einâ padai khai nah ta, thina tlâh taihta ei chô liata khâpahma a y leipa vâta pathlie nâ chhuah ei ta.
19 Châhrasala Zuzy ta cha cha ama eipa vâta Kaisara kô a tlô lei thei awpa châ khao leipa na ta, châhrasala ei chiheihzy leih-na hneipa ta a tâhpa châ va na.
20 Chazy kyh liana chata nâmo hmô awpa nata chho awpa ta ei cha aw ei, Izarelzy hnabeiseina ei hlykheipa vâta, he bâlia he a kypa châ tlôh na ta.
21 Chatawhcha âmo chata a hnohta, “He thâtih Zudia râh tawhta châzy ta hmô hra ma pi, unawhzy ahyhma ta he lâ a vypa ta na chô liata biepeipa khâpahma phuah hra veih ei, a reih chhao reih hra veih ei.
22 Anodeikuacha he sahlao he râh to liata reipachhiepa châ tlôh ei ta, nâma ta kheihta ma na pachâ, pahno eima khoh,” tah ei ta.
23 Chatawhcha a noh taih ei ta, cha noh liana chata a tlôna o liata ano lâta chyhsa hluhpi a vy ei ta. My tawhta zâ taihta ama hnohta cha bie cha chho pasia ta, Khazohpa Khihnarâh bie pahnosa ta, Mawsi ryhpa châbu nata hrohsopazy châbu bie ta Zisu lâta âmo reipasao ngâ ta.
24 Thokha ta a bie reipa cha a ngiapâ ei ta, thokha ta a ngiapâ leipa ei ta.
25 Chatawhcha a ryh khao leipa ei ta, Pawla ta bie kawh kha a rei khai nahta sie haw ei ta, a bie reipa cha he he a châ: “Thlahpa Pathaihpa ta hrohsopa Isai pakah ta nama pathlatuhpazy hnohta a reipa kha â do kaw na,
26 He chizy hnohna heta reih teh, nah ta thei aw ei ta, nama no deikua â vâh aw vei, hmô aw eichi ta, pahno aw veih eichi.
27 He chizy pathipalôh he a kuh chha haw ta, ama nahzy pâ ta, ama mo paso hra ei ta, chata leipa ta la ama mo ta hmô aw ta, ama nah ta thei aw ei ta, ama pathipalôh ta pahno hra aw ei ta, kua heih aw ei ta, âmo ei patlâh pathlei aw na,’ a tahpa kha.
28 Chatanachata Khazohpa pachhana bie he Zenitaizy lâta paphaopa a châ tahpa pahno teh u; âmo ta cha a nahthlie chhao ama nahthlie aw,” tah ta.
[ 29 Pawla a rei khai tawhna cha Zuzy chata siesai ei ta, âmosasy ta thata a ei ei ta.]
30 Chatawhcha Pawla cha kô no bohlo ano o a hlapa liata y ta, a hnohta a ngiapa maih aly tyh ta.
31 Khazohpa Khihnarâh bie chho ta, Abeipa Zisu Krista bie chhao riahpha ngaitapa ta pachu tyh ta, ahyhmah ta pakhâ leipa ei ta.