1 “Unawh saih u, paw saih u, atahmâ nama hnohta ei thaina bie ei cha chho awpa ei he nahthli teh u,” tah ta.
2 Hebrai reih ta ama hnohta bie a reipa kha ama pahno nahta a chalih pachai ei ta. Ano chata:
3 “Zu chyhsa ei châ, Kilikia râh liata Tarsa khih liata a pihpa ei châ, châhrasala he khih liana heta Kamaliel phei thaby liana chata achupa ta a laiseihpa ei châ, eima pathlatuhpazy ryhpa yzie a i ngaitapa cha a chu tyhpa ta a ypa ei châ, atanoh nâmo zydua hawhna tlai heta Khazohpa châta a phahnai tyhpa ei châ.
4 He Lâpi chyhsazy he thiena taihta taola tyh na ta, a chanô a chapaw ta chahry na ta, patâhna o liata pakhôsa tyh na ta,
5 Theihthai Beichaipa nata machâ zydua chhaota cha biezy cha eina pahnokhei thei ei. Âmo tawhtapa chhao unawhzy pie awpa ta cha ei hmôpa kha, chatawhcha Damaska liata a ypa maih âmo hrie awpa ta chahryna chôta Zerusale lâ a chhi awpa ta ei siepa kha.
Pawla ta a pihpathinazie a chhona(Ht 9:1-19; 26:12-19)
6 “Chatawhcha sie na ta, Damaska kiapâh ei tlô nahta, nohchhô pati nie daihti nota avâ tawhta a khaih ngaitapata ei kiapâh liata sôkha ta vaw khaih ta.
7 Alei liata pao na ta, ei hnohta, ‘Sawla, Sawla nâ ta khazia eina pasipasawh chi?’ tahpa ta ao thei na ta,
8 kei ta, ‘Abeipa ahyma na châ?’ tahpa ta a chhy na ta. Ano chata ei hnohta, ‘Nâzari Zisu na pasipasawhpa he ei châ,’ tah ta.
9 Ei viasazy chata a khaihpa cha ama hmô tarawpa ta, bie na chhotuhpa ao deikua cha thei veih ei.
10 Kei ta, ‘Abeipa khâpa ei tao aw?’ tah na ta. Abeipa chata ei hnohta, ‘Thyu la, Damaska khih liata a ngia teh, hmo zydua na tao awpa ta raopa maih chhopa ta na y aw,’ tah ta.
11 Cha a khaihpa rônahpa vâna chata pavâpa hmô thei khao leipa na ta, ei hnohta a ypazy ta ku ta na cha-ao ei ta, Damaska liata a ngia na ta.
12 “Chatawhcha chyhsa pakha Anania, ryhpa kyh liata Khazohpa a pachâpa nata cha liata Zu a ypa zydua lâta moh phapa cha.
13 ei hnohta a vy ta, ei kiapâh ta a duah ta, ei hnohta, Ei nawhta Sawla y, mo pavâpa ta y teh,’ na tah ta.
14 Ano chata, ‘Eima pathlatuhpazy Khazohpa ta a khopa pahno awpa nata Mo Siapa cha hmôpa ta a reikah thei awpa chhaota cha rao haw ta;
15 na hmôpa nata na theipa kyh liana khata chyhsa zydua lâta ano bie a pahnotuhpa na châ aw.
16 Chatawhcha, khazia na y thlâh ha tly? Thyu la, ano moh padona chôta bâti châ la, na moleizy pasi ma y,’ na tah ta.
Zenitaizy châta Pawla awpa ta a yna
17 “Zerusale lâna heta ei vy heih tawhta Khazohpa achhyna-o liata thlah ei chhâ nota mo a liepa ta y na ta,
18 ‘A parah la, Zerusale tawhta pua teh, ei thâtih na chho awpa cha a pyh aw veih ei hih,” eina tahpa hmô na ta.
19 Kei ta, ‘Abeipa y, apakhyna-o to liata châ ngiapâtuhpa maih patâhna o liata khô na ta, ei chhei tyhpa kha pahno tlôh ei ta.
20 Chatawhcha na bie a pahnotuhpa Stiphana thisaih ama palo nona khata, kei chhao a kiapâh liata a duah na ta, a ryh tah hra na ta, thietuhpazy chysiazy ei vaih hra,’ tah na ta.
21 Ano chata, ‘Sie teh; he tawhta lâhlapi ta Zenitaizy lâta tlao ei cha tuah aw,’ na tah haw ta,” tah ta.
Pawla pheisaih hyutuhpa beichaipa ku liata a yna
22 Cha bie taina chata nahthlie ei ta; ao paro ngaitapa ta, “He hawhpa chyhsa he aleilô tawhta pahleipadia teh u! A hroh awpa tlâh châ vei,” tah ei ta.
23 Awh ei ta, ama pohzy hlaipa ta thy ei ta, buhchado pathluah ei ta,
24 pheisaih hyutuhpa beichaipa chata Pawla cha kuh chhôh lâ a chhi awpa ta bie pie ta, a chôta cha tlatluta ama awna chhâpa cha pahno nawpa ta chheina chôta padai awpa tah ta.
25 Chatawhcha savo ri ta ama chahry pâ khai nahta, Pawla ta a kiapâh ta a duahpa pheisaih zakha hyutuhpa hnohna chata, “Rawma chyhsa rai nama chhei thei ma? Thai lei pachâsa tawhta chhao châ tlôh leipa ta,” tah ta.
26 Pheisaih zakha hyutuhpa chata cha cha a thei patanahta, pheisaih hyutuhpa beichaipa lâ vawh ta, Na hmo tao awpa he kheihta ma nâ chhuah? He chyhsa he Rawma chyhsa a châ,” tah ta chho ta.
27 Chatawhcha pheisaih hyutuhpa beichaipa cha a vy ta a hnohta, “Rawma chyhsa na châ ma, na chho teh?” tah ta. Ano chata, “Ei châ na,” tah ta.
28 Pheisaih hyutuhpa beichaipa chata, “Cha khih chyhsa cha awpa ta keima cha tâkâ a hluhpi ei hryu mâ tâh,” tah ta a chhy ta. Pawla chata, “Kei la, Rawma chyhsa ta a pihpa raina ei châ,” tah ta.
29 Chatanachata rie patheina chôta padai a chhuahpazy chata ano cha thlai siesai pâ ha ei ta; pheisaih hyutuhpa beichaipa chhaota, Rawma chyhsa a châ tahpa a pahno nahta a chahrypa vâta chi ta.
Ryureina hmiakô liata Pawla a duana
30 Châhrasala a mylâ chata Zuzy ta khâpavâta ma Pawla ama leih tahpa pahnopasia a chhuahpa ta, pheisaih hyutuhpa beichaipa chata ano cha pathlâ ta, theihthaipa abeizy nata ryureituhpa zydua a pakhy awpa bie pie ta, Pawla a zâ chhi ta, ama hmiakô liata paduasa ta.