Hmotaopazy 23
1 Pawla chata ryureituhpazy cha moh thlâh ha ta, “Unawh saih u, atanoh taihta Khazohpa mohmô ta a phapa lâta ei pahnopa maih taopa ta ei y tyh,” tah ta.
2 Theihthai Beichaipa Anania chata Pawla kiapâh ta a duahpazy hnohta a pakah liata chabai awpa, tah ta.
3 Pawla chata a hnohta, “Nâ alô sahdô a ngyuhpa hniapa y, Khazohpa ta tlao a cha chabai aw. Na ryhpa hawhta na pachia awpa ta a tyuh chi ta, ryhpa leipa hawhta chabai awpa na tah bao hra mâ?” tah ta.
4 A kiapâh ta chyhsazy a duahpa ta, “Khazohpa Theihthai Beichaipa khazia na reipachhie?” tah ei ta.
5 Pawla ta, “Unawh saih u, Theihthai Beichaipa a châ tahpa na ei pahno vei; ‘Na chiheihzy hyutuhpa chô liata bie pha leipa rei khâ,’ tahpa chhao ropa châ tlôh ta,” tah ta.
6 Pawla ta thokha Saduasizy, thokha Pharisaizy ama châ tahpa a pahno nahta ryureituhpazy hry liana chata awh ta, “Unawh saih u, Pharisai ei châ, Pharisai sawchapawpa chhao ei châ; athihpa hnabeiseina nata thyuheina kyh liata padaipa ta ei y hih?” tah ta.
7 Cha cha a rei khai nahta Pharisaizy nata Saduasizy a ei ei ta, a hmaohpakhypazy cha a chhaih haw ei ta;
8 Saduasizy ta athihpa thyuheina rai y vei, vâlyuhchâpazy, thlahpazy y hra vei ama tah tyh; Pharisaizy deikua chata cha kyh no cha a ypa ta a ngiapâ tlôh ei ta.
9 Chatanachata thata a tyhrei haw ei ta; Pharisaizy lâta Ryhpa pachutuhpazy thokha a duah ei ta, ei ei ta, ‘’He chyhsa he khâpahma a moleina pahno ma pi. Thlahpa rai ta, vâlyuhchâpa rai ta ano he bie a chhopa rai châ sala khâpa a pei aw?” tah ei ta.
10 Chatawhcha thata amâ ei via ngâpa vâta, pheisaih hyutuhpa beichaipa chata Pawla ama chaphie awpa chi ta, pheisaihzy zupa ta ama hry tawhtapa kuh chhôh lâta a chhi thlyu awpa ta bie pie ta.
Pawla hrona pahlei awpa ta leih-na
11 A zâ heihpa liata Abeipa cha Pawla kiapâh ta a duah ta, “Thlahlôh ngaitapa ta y teh, Zerusale liata ei thâtih na pahnosapa hawhna hra heta, Rawma liata chhao na pahnosa awpa a châ,” tah ta.
12 Noh a chhi nahta Zuzy a paraoh ei ta, Pawla ama thie hlâ lei cha khâpahma nie nata do lei awpa ta chhie a sakhâh ei ta.
13 Cha bie aparaohpazy cha sypalih hlâta ama hluh via.
14 Chatawhcha âmo cha theihthaipa abeizy nata machâzy lâta vawh ei ta, “Pawla eima thie hlâ lei la khâpahma nie lei awpa ta chhie eimâ sakhâh haw.
15 Chavâta nâmo ta ryureituhpazy chhaota, a bie a sia viapa ta pachâ a chhuahpa hawhta nâmo lâ a zâ chhi awpa ta pheisaih hyutuhpa beichaipa lâ chahlôpa ta vaw reih teh u. Nama kiapâh a tlô hlâ chhaota keimo ano thie awpa ta eimâ mâ thlâh ha na,” tah ei ta.
16 Châhrasala Pawla sietanô sawchapawpa ta amâ byhpa cha vaw thei ta; kuh chhôh lâ a ngia ta, Pawla kei chho ta.
17 Pawla chata pheisaih zakha hyutuhpa aw ta, “He satlia he hyutuhpa beichaipa lâ a chhi teh, a hnohta bie kheihawhpa tlyma reih awpa a hnei ei aw,” tah ta.
18 Chatanachata pheisaih hyutuhpa beichaipa lâ a chhi ta, “Pawla atâhpa khata na aw ta, he satlia he nâ lâ a chhi awpa ta na tuah ta, na hnohta bie kheihawhpa tlyma reipa awpa a hnei ei aw,” tah ta.
19 Chatawhcha pheisaih hyutuhpa beichaipa chata a ku ta patu ta, â nano lâta siekhei ta a ru lâta, “Khâpa eina chho awpa chi na hnei?” tah ta hiahri ta.
20 Ano chata, “Pawla kyh cha a sia via heihpa ta na pachâ awpa hawhta mylâ ryureituhpazy lâta za chhihtha awpa ta Zuzy ta ama châ hia awpa paryhsa chyu ei ta.
21 Châhrasala ama bie vaw zo khah y; ama hryta chysa sypalih hlâta a hluh viapa ta a byh thlâh ha ei ta; cha chyhsazy chata ano ama thie hlâ lei cha khâpahma nie lei awpa ta chhie a sakhâh ei ta; atahmâ he na bie hâpa ta amâ chiehpa ta ama y thlâh haw,” tah ta.
22 Chatawhcha pheisaih hyutuhpa beichaipa chata pasiesa ta, “He biezy he eina pahnosa haw chi tahpa ahyhmah chho khah y,” liahsa tah haw ta.
Pawla ryureituhpa Felika lâ ama tuana
23 Chatawhcha pheisaih zakha hyutuhpa pano aw ta, “Zâ ta a moh roh ta Kaisaria khih taihta sie awpa ta pheisaih za no nata arâ a kiahpa sysari chhaota, asei a chabahpa za no chhao a chhuahnoh teh u,” tah ta.
24 Chatawhcha râh a vaotuhpa Felika lâna chata a bohpa ta ama patlôsa thei nawpa ta Pawla kia nawpa ta sazy a chhuahnoh awpa ta chho hra ta.
25 Chatawhcha he hawhna heta châ roh ta:
26 “Klaudia Lysia ta Felika hyutuhpa Phachaipa a naoh na.
27 He chyhsa he Zuzy ta patu ei ta, ama thie chyta âmo lâta pheisaihzy a chhipa ta sie na ta, Rawma chyhsa a châ tahpa pahno na ta, pachha haw na ta.
28 Chatawhcha ama leih-na chhâpa pahno khoh na ta, ama ryureituhpazy lâta a chhi na ta.
29 Ama ryhpa bie kheihawhpazy liata tlyma ama leih-na a châ tahpa pahno na ta, châhrasala ama leih-na kyh liata thina nata chahryna taihta khâpahmahta pahno lei khâh na ta.
30 Zuzy ta ano amâ byh tahpa chyhsazy ta eina pahnosa patanahta, na hnohta ano he thlai ei vaw tuah haw, a leihtuhpazy chhao a chô liata biepeipa ama hneipa maih na hmiakô liata reih awpa ta bie ei pie hra,” tah ta.
31 Chatanachata pheisaihzy chata a biepiepa hawhna khata Pawla cha a zovâ ta a chhi ei ta, Antipatri khih tlôkhei ei ta.
32 Chatawhcha a mylâ ta pheisaihzy cha kuh lâta vaw kua ei ta, arâ a kiahpazy deikua cha a hnohta sie lymâ ei ta.
33 Âmo cha Kaisaria khih tlô ei ta, râh a vaotuhpa liata cha cha pie ei ta, Pawla chhao a hmiakô liata paduasa ei ta.
34 Râh a vaotuhpa chata châ a rei khai nahta Pawla yna râh hiahri ta, Kilikia râh chyhsa a châ tahpa a pahno patanahta.
35 “Cha leihtuhpazy ama vaw tlô tita na biepeipa ei pachia aw,” tah ta. Chatawhcha Herawda o liata vaih awpa ta bie pie ta.