Pawla Ephesi liata
1 Pawla chata maw lâ râh chahry khai ta, Apôlôsa Kawrini liata a y chhôhna khata Ephesi cha tlô ta. Pachupa sahlao ahyzy tlyma hmô ta.
2 Ano chata ama hnohta, “Namâ ngiapâ tua nona khata Thlahpa Pathaihpa nama to ma?” tah ta. Âmo chata a hnohta, “To ma pi, Thlahpa Pathaihpa a y tahpa rai pahno hra ma pi,” tah ei ta.
3 Ano chata, “Khâpa bâtina ma nama châ tly?” tah ta. Âmo chata, “Zawhana bâtina,” tah ei ta.
4 Pawla chata, “Zawhana khata chyhsa hnohta, ‘Na vaw pazituh awpa Zisu cha namâ ngiapâ awpa a châ,’ tahpa ta rona bâti a pachâsa tyh,” tah ta.
5 Cha bie cha ama thei patanahta Abeipa Zisu mohta bâti châ haw ei ta.
6 Pawla ta ama chôta a ku pahnieh ta, Thlahpa Pathaihpa cha ama chô liata vaw tlô ha ta; chatanachata reih tozy ta bie reih ei ta, Khazohpa bie chhao chhochhielie ei ta.
7 Ama zydua chata paw tlohpa pahrawhleino rachhôh ama châ.
8 Pawla cha pakhyna-o liata a ngia tyh ta, thla thôh riahpha ngaitapa ta bie reih ta, Khazohpa Khihnarâh kyh liana chata chyhsa châ ei ta, reipasao tyh ta;
9 thokha chhorupa ta y ei ta, zyh khoh leipa ei ta, zawpi hmiakô liata Lâpi cha ama reipachhie nahta cha ano chata âmo siesai ta, pachupa sahlaozy cha â nano ta a chhi ta, nohchareih Tyrana pachuna o liata chyhsa ei tyh ta.
10 Cha hawh saita kô no tao ta, chatanachata Asia râh liata a ypa zydua, Zuzy nata Krikazy chhaota, Abeipa bie cha thei haw ei ta.
Skeva sawchapawpazy
11 Khazohpa ta Pawla ku ta hmanoâh ngaitapazy pataosa ta,
12 chatanachata a pôhpa tawhtapa ahruna pohzy tlyma poh a saichavapa zy tlyma, a tlâh leipazy lâta vaw cheih ei ta, ama chhôh tawhta a hripazy chhao pua tyh ei ta.
13 Dyuthaina zuahpa ta a khiekhâpa Zu chyhsa ahyzy tlyma, “Pawla ta a bie tlâh-awhkhei tyhpa, Zisu moh ta eima cha pachhipary,” tahpa ta, ahripa a hneipazy chôta Abeipa Zisu moh reih tyh ei ta.
14 Zu chyhsa theihthaipa abei pakha Skeva chata cha hawhta a tah tyh hrapa sawchapawpa pasari hnei ta.
15 Châhrasala ahripa ta ama hnohta, “Zisu ei pahno, Pawla ei pahno hra; nâmo deikua cha ahyma nama châ tly?” tah ta a chhy ta.
16 Ahripa a hneipa chata a vaw zawhnao ta, pahnie ha ta, tiah ha ta, cha o tawhtapa cha thluahruapa nata hmah phaohpa ta a râ haw ei ta.
17 Ephesi liata a ypa zydua, Zuzy nata Krikazy hnohta chhao cha bie cha pathâh ha ta; ama zydua ta chi ei ta; Abeipa Zisu moh parônahsa haw ei ta.
18 A ngiapâpa sahlaozy chhao a hluhpi a vy ei ta, ama hmotaopazy reihpha chei ei ta, a phuah haw ei ta.
19 Dyuthaipa a hluhpi chhaota ama châbuzy vaw cheih ei ta, chyhsa zydua mohmô liata mei ta rao haw ei ta; a mâ cha a laichadai ei ta, tâkâ thy pangawh a châpa ta pahno ei ta.
20 Cha tlatluta a rônahpa ta Abeipa bie cha pôh ta, pahnie lymâ ta.
Ephesi liata tyhreina
21 Cha khai tawhna chata Pawla cha Thlahpa ta Masidônia râh nata Akai râh cha chahrypa ta, Zerusale lâ sie a chhuah ta, “Cha lâta ei sie khai nahta, Rawma ei tly hra awpa a châ,” tah ta.
22 Chatanachata a chakaotuhpa pano, Timawthy nata Erasta cha Masidônia râh lâ pasiesa tua ta, ano deikua cha Asia râh liata y chy ta.
23 Cha no rachhôh chata Lâpi vâna chata chyhsa thata a tyhrei ei ta.
24 Chysa pakha, a moh Demetria tâkâri daipa ta tâkâri ta Diana nohthlahpa a taotuhpa chata, a tao thaipazy lâta hlaona a hluhpi pie tyh ta.
25 Cha chyhsa chata âmo cha awpakhy ta, âmo raihria hawhpa a hriatuhpazy chhaota, ama hnohta, “Puhpa saih u, he raihria he eima hneirôna a châ tahpa nama pahno na.
26 He liata Ephesi deita liana heta châ leipa ta, Asia râh khizaw zydua daihmâ liata chhao, he Pawla heta ku ta taopa khazohzy he khazoh châ veih ei, tahpa ta chyhsa hluhpi reipasao thei ha ta, a pabaisa khai haw tahpa na mo tlai chhaota hmôpa ta thei hra eichi ta.
27 Chatanachata eima raihria a ly aw tahpa chi a chhihpa dei châ leipa ta, khazohnô rônah ngaitapa Diana achhyna-o chhao he, vaw panawhsa aw ei ta, Asia râh liata chyhsa zydua nata khizaw liata chyhsa ta amâ chhy tyhpa he a rônah thlâ bao nahta a nawh aw tahpa chi â chhih hra,” tah ta.
28 Cha biezy cha ama thei patanahta ama pathi-ia ngaita ta, “Ephesi liata Diana he rônah ngaitapa a châ,” tahpa ta awh ei ta.
29 Chatanachata a khih duata a tyhrei ei ta; Kaia nata Aristaku, Masidônia râh chyhsa Pawla a zituhpazy cha patu ei ta, â raohpa ta ahmaopakhyna-o lâta a râkhei ei ta.
30 Pawla ta zawpi hryta a ngia â chhuah nahta, pachupa sahlaozy ta pasaih leipa ei ta;
31 Asia râh hyutuh chaipazy hryta thokha ahyzy tlyma Pawla viasazy châ ei ta, ano lâta chyhsa tuah ei ta, ahmaohpakhyna-o liana chata a ngia raruah lei awpa ta reipasao chaimâh ei ta.
32 Chatawhcha pôhpakhypa sahlaozy cha a tyhrei ei ta, chyhsa hluh via ta amâ pakhy chhâpa chhao pahno leipa ei ta; chavâta thokha bie miakha ta aw ei ta, thokha bie hropa ta awh ei ta.
33 Zawpi hryta thokha ta Alezanda hnohta ama thaina bie reinazie awpa cha chho ei ta, Zuzy ta ano cha chyhsa hmiakô lâta chati laih ei ta. Chatawhcha Alezanda chata a ku ta zi ta, chyhsa zydua lâna chata ama thaina bie rei a chhuah ta.
34 Châhrasala ano cha Zu chyhsa a châ tahpa ama pahno patanahta dawh no likawh ao â raohpata ta, “Ephesi liata Diana he rônah ngaitapa a châ!” tahpa sai ta awh ngâ kaw ei ta.
35 Chatawhcha khih chârotuhpa ta zawpi cha a chalihsa khai nahta, “Ephesi mozy saih u, Diana rônah ngaitapa achhyna-o nata avâ tawhta nohthlahpa a tlapa kha Ephesi mozy he a vaihtuhpa nama châ tahpa, a pahno leipa ahyma a y?
36 He biezy he ei awhpa rih a châ vei khiahtala, nama thlie thlâh ha awpa a châ, a padia leipa ta khâpahma nama tao awpa châ vei.
37 He chyhsazy he liata nâ vaw chhipazy he, achhyna-o a hrao thaipazy châ hra veih ei, a khazohnô reipachhietuhpa châ hra veih ei.
38 Demetria nata a viasa zôthaipazy chhaota ahy liata rai biepeipa ama hnei khiahtala, biepeipa reina ozy cha pahy chiehpa a châ mâ tâh, abei vyuhpa ta a ytuhpazy chhao y ei ta; padai ei se.
39 Hmo hropa biepeipa a hneipa rai namâ châ khiahtala, apakhyna tyhpa liata ama paryh aw.
40 Atanoh palôhpasapa vâna heta padaipa chichhihpa ta eima y haw hih, a thabypa y tlôh leipa ta, cha hawhna chata châ tlôh ta, he a pakhy chhâpa he khâpahma reih thei aw ma pi,” tah ta.
41 Cha hawhpa bie a reih khai nahta, pôhpakhypa sahlaozy cha papaisa haw ta.