Hmotaopazy 12
Zami thina nata Pity patâhna
1 Cha no rachho chata Abei Herawda ta awnanopazy hryta ahyzy tlyma taola a chhuahpa ta a ku hy ta.
2 Zami, Zawhana unawhpa cha zaozi ta a luh tai ta;
3 cha chata Zuzy a palysa tahpa a pahno nahta Pity chhao cha patu a chhuah heih ta. Cha noh cha viahchhâ Thinô pahlao leipa kyhchhi noh a châ.
4 A patu tawhna chata patâhna o liata khô ta, pheisaih hlao palih, papalih lymâ ta pavaisa ta. Zawpakhô khai tawhta chyhsa zydua lâta puakhei a chhuah ta.
5 Chavâta Pity cha patâhna o liata paysa chy ta; châhrasala awnanopa sahlao ta ano châta phahnai khoh ngaitapa ta Khazohpa lâta thlahchhâ tyh ei ta.
Lô-o tawhta Pity a puana
6 Herawda chata a papua chyta cha zâ liana tlai chata, Pity cha pheisaih pano likawh ta, bâlia miano pakypa ta a mô ta, a vaihtuhpazy chhao ochhi thaby liata y ei ta, patâhna o cha vaih ei ta.
7 Sôkha ta Abeipa vâlyuhchâpa pakha a kiapâh liata a vaw duah ta, lô-o khaoh liana chata a khaihpa khâpa tlyma vaw khaih ta; Pity kâ liata chabai ta, “Thyu parah teh,” tah ta. Chatawhcha a bâliazy cha a ku tawhta tla haw ta.
8 Vâlyuhchâpa chata a hnohta, “Poh a sai la, na pheiky a ky teh,” tah ta. Ano chata cha hawhna chata tao ta. Vâlyuhchâpa chata a hnohta, “Na poh pakhâta ta a bu la, na zi teh,” tah ta.
9 Pity cha pua ta, zi ha ta; vâlyuhchâpa yzie cha a hmeiseihpa a châ tahpa pahno leipa ta, mâ lâta a hmôpa khiah ma, tlao tah ha ta.
10 Chatawhcha vaihtuhpa ty tuapa nata a pazipa ama khô tawhna chata khihpi lâ puana awpa thua ochhi cha kei tlô ei ta. Cha cha âmo chata a vaw pahy ha ta, pua ei ta, othliah miakha khô ei ta; vâlyuhchâpa chata thlai siesai pâ ha ta.
11 Chatawhcha Pity chata a vaw thei pata nahta, “Abeipa ta a vâlyuhchâpa tuah ta, Herawda ku tawhtapa nata Zu chyhsazy hnabeiseina zydua tawhtapa eina pachha tahpa atahmâ â dopata ta ei pahno haw,” tah ta.
12 Anosasyh ta a pachâ khai nahta, Zawhana, Maka ama tahpa, cha chyhsa nô Mari o lâna chata vawh ta, cha liana chata thlahchhâpa ta chyhsa hluhpi vaw y pakhy ei ta.
13 Chatawhcha aikah ochhi a chakhy patanahta, a moh Rôda, laihsa pakha a chhy awpa ta vawh ta.
14 Pity ao a thei patanahta, alypa vâta ochhi cha pahy leipa ta tlao a ngia sai ha ta, Pity ochhi thaby liata a duah tahpa kei chho ta.
15 Âmo chata a hnohta, “Na hru ha he,” vaw tah ei ta. Anodeikua chata, ‘’Hmeiseihpa a châ,” khâchâ tah ta. Âmo chata, “Vâlyuhchâpa a châ chuh,” tah ei ta.
16 Châhrasala Pity chata chakhy ngâthlâh ta; ama pahy nahta ano cha hmô ei ta, ama noâh ngaita ta.
17 Châhrasala ano chata amâ chalih nawpa ta a ku ta zie ta, Khazohpa ta patâhna o tawhtapa ano a papuanazie zy cha chho ta. “He biezy he Zami nata unawhzy kei chho teh u,” tah ta. Chatawhcha pua ta, a hro lâ sie ha ta.
18 Noh a chhi patanahta, pheisaih sahlaozy cha Pity, khataih liata a y haw, tahpa ta thata a tyhrei ei ta.
19 Herawda chata tlua ta, hmô tlôh leipa ta, a vaihtuhpazy cha pasia ta, thie awpa ta bie pie ta. Herawda cha Zudia râh tawhta Kaisaria lâ zu ta, cha liana chata y thlâh ha ta.
Herawda thina
20 Tyre nata Sidaw chyhsazy chô liana chata a palôh châ lei ngaitapa ta y ta; âmo chata Blasta abei rakhô vaihtuhpa cha ama viasa châta tao ei ta, reihkha ka kha tlapa ta ano lâ a vy ei ta, ama khih lâta abei khih lâta kâhsâ a zyh tyhpa ama châpa vâta adypa ta y awpa ta a haw ei ta.
21 Chatawhcha a noh taipa noh ta Herawda ta abei poh a bu ta, abeidyuchhai liata a tyuh ta, ama hnohta bie reih ta.
22 Chyhsa zydua chata, “Khazohpa ao a châ, chyhsapa ao châ vei!” tah ei ta, aw tyh ei ta.
23 Ano chata Khazohpa lâta palyupalihna châ a pie leipa vâta Abeipa vâlyuhchâpa ta sôkhata tu ta; alôpa ta nie ta, thi ha ta.
Banaba nata Sawla
24 Khazohpa bie deikua cha a hie patla ta, pôh lymâ ta.
25 Banaba nata Sawla chata chakaona rai ama hria khai nahta Zerusale tawhtapa cha kua haw ei ta, Zawhana, Maka ama tahpa cha ama hnohta a chhi ei ta.