Masidônia nata Krika râh lâta Pawla khitlyna
1 Palôhpasapa cha a pai nahta, Pawla ta pachupa sahlaozy pa-awsa ta, pasyu ta, reihphapa ta a chhaih ta, Masidônia râh lâ sie awpa ta pua haw ta.
2 Bie hluhpi ta pachupa sahlaozy pasyu lymâpa ta cha râh cha chahryh ta, Krika râh tlô haw ta.
3 Cha liana chata thla thôh a y tawhta Suria râh lâta balyh ta sie a chhuah ta, Zuzy ta ano ama teipa vâta Masidônia râh lâ kua awpa ta tlao a chhuah haw ta.
4 Pyrhu sawchapawpa Sôpata Berôia khihpa zy, Thysalawnika khihpa Kristaku nata Sekunda zy, Derbe khihpa Kaia zy, Timawthy zy, Asia râh chyhsa Tykiku nata Trôphima zy, a hnohta Asia râh taihta sie hra ei ta.
5 Cha sahlao chata hmialâ sie ei ta,
6 keimo deikua cha Viahchhâ Thinô pahlao leipa Kyhchhi noh zydua tawhna chata Philipi tawhtapa cha balyh ta pua pi ta, noh pangawh rakha tawhta Trôsa liata ama hnohta tlô pi ta, cha liana chata noh sari châh pi ta. Trôsa tlyna
7 Noh sarinoh noh hmiatua chaipa liana chata, viahchhâ pachhaih awpa ta eima y pakhy nota, Pawla ta a mylâ ta sie â chhuahpa vâta ama hnohta bie pakhâta ta chho ta; zâcho taihta bie reih lymâ ta.
8 Chhôhpadâhpa chô chaipa eima y pakhyna liana chata meiôh hluhpi y ta.
9 A moh Eutyka satlia pakha opy liana chata a tyuh ta. Tla-uah ngâ kaw ta, Pawla ta bohpi a reipa vâta ano chata mokuh tao khao leipa ta o chhâh thôhna tawhna chata tla ta, a thipa ta a huah ei ta.
10 Châhrasala Pawla chô ta, a chô liata a byu thlu ta, a pyh ta, “Nama thlah a pazo khah u, a hu chie vei,” tah ta.
11 Pawla kiah heih ta, viahchhâ cha pachhaih ta, pati nie ta, bohpi khihdeina taih daihmâ ta ama hnohta bie reih ta, cha tawhna chata sie haw ta.
12 Satliapa cha a tlâhpa ta a chhi ei ta, thlahlôh ngaitapa ta y haw ei ta.
Trôsa tawhta Mileta a tlyna
13 Keimo deikua cha balyh lâta sie ha pi ta, Asôsa khih pangai awpa ta balyh ta vawh tua pi ta, cha liana chata Pawla cha pakiasa a chhuah pi ta; ano chata phei ta vaw sie â chhuahpa vâta cha hawhta ano ta a raopa rai châ ta.
14 Asôsa khih liata maniah a vaw pahly nahta Mitylene khih tlô pi ta.
15 Cha tawhna chata balyh ta sie heih pi ta, a mylâ ta cha Kiôsa liahpahlô kiapâh ta tlô pi ta; a ylâh heihpa ta Samôsa liahpahlô tly pi ta; chatawhcha a mylâ heihpa ta Mileta khih tlô heih pi ta,
16 Pawla ta Asia râh liata bohpi y awpa a khoh leipa vâta Ephesi khih cha balyh ta siepakhô a chhuahpa rai a châ; a tah theipa khiahtala, Zerusale liata Pentikaw noh hmâ a chhuah ta, a sie parah khoh.
Ephesi machâzy hnohta Pawla bie reipa
17 Mileta tawhna chata Ephesi lâ chyhsa tuah ta, awnanopa machâzy ano lâta pa-awsa ta.
18 Ama vaw tlô nahta ano chata ama hnohta, “Asia râh ei tly tua no tawhna kha nama hnohta ei y chhôh zydua khata ei yzie kha nama pahno,
19 a reisi chaina chôta nata Zuzy ta eina teipa vâta mothlih tlapa nata rietheina ei chôta a tlôpazy, taona chôta Abeipa ei chakao tyhpa kha;
20 kha tana khata a phahnai awpa bie nama hnohta khâpahma chho awpa rei lei thei leipa na ta, vâtlâh hryta zy, o to liata zy, châ pachu tyh ei na ta,
21 Zuzy nata Krikazy hnohta chhao Khazohpa lâta palôhrupa kuana kyh nata eima Beipa Zisu Krista lâ a ngiapâ awpa kyh ei pahnosa tyhpa kha.
22 Pahno teh u, atahmâ he Thlahpa ta sie lei thei leipa ta ei pahnopa vâta, Zerusale lâ ei sie aw, cha liana chata ei chô liata hmo a vaw tlô awpa pahno va na.
23 Thlahpa Pathaihpa ta chahryna nata rietheina ta a cha dy tahpa ta khi to liata eina pahnosa tyh, chazy deita cha ei pahno.
24 Châhrasala ei râpasuana kyh ei hmâ tyhpa patlô awpa nata Khazohpa ngiachhienazie Thâtihpha pahnosa awpa ta, Abeipa Zisu liata khâ chakaona raihria ei hmôpa kha, hria khai tua aw sala, ei hrona chhao ngiabâh tlâh a châpa ta rao va na.
25 Pahno teh u, nâmo zydua Khazohpa Khihnarâh bie tlâh-awhkhei lymâpa ta ei khie ngâ tyhnazy heta ei hmia hmô khao aw veih eichi, tahpa ei pahno.
26 Chavâta atanoh he chyhsa zydua thisaih liata ei pathaih tahpa ei cha pahnosa ei,
27 Khazohpa pachiapa zydua azydua ta nama hnohta ei cha chho lei thei leipa ei kha.
28 Khazohpa awnanopa sahlao ano thisaih ta a chaleipazy cha pasa awpa ta nâmo nata nama sahlao zydua chô liana chata a chado teh u, Thlahpa Pathaihpa ta ama chô liata hyutuhpa ta a cha taopa ei he.
29 Ei sie tawhta changie a hrâhpazy nama hryta vaw ngia aw ei ta, sahlaozy cha pahlôh aw vei tahpa ei pahno;
30 nama hry liatahpa chhao he pachupa sahlaozy nâma lâta pabaisa awpa ta bie hropa a reihpa nama vaw y aw.
31 Chavâta a hrohrua teh u, kô thôh tlai mothlih tlana chôta a chhô a zâ ta chyhsa to chhoreipa ta ei bâh leipa kha a thei thlâh ha teh u.
32 Atahmâ he Khazohpa nata ngiachhiena bie liata ei cha pavaosa ei, cha chata cha palaisa thei ei ta, chyhsa palôhrupa pathaihpazy hryta ryuto a cha pahneisa thei ei.
33 Ahy liata hmahta tâkâzy, ngôhzy, chysiazy ei uava beih leipa kha.
34 He kuzy heta keima nata ei viasazy hmo byuhpa hria tyhpa kha, na mo tlaita nama pahno.
35 Ato ei taopa maih liata ei cha pahmô tyhpa ei kha, cha hawhta hriapasana chô nata Abeipa Zisu bie pahno thlâh hana chôta a chieh-leipazy nama bao awpa a châ, Abeipa Zisu tlaita, ‘Khâpaleipa lapa hlâta piepa ta byhnâ a to via,’ a tahpa kha,” tah ta.
36 Cha hawhpa bie cha a rei khai nahta a pakhu paneih ta, ama zydua ta thlahchhakhei ta.
37 Âmo zydua chata cha ei ta, Pawla a pyhpa ta sy ngâ ei ta,
38 a hmia ama hmô khao lei awpa kyh a reipa cha ama pachârôh chaina a châ. Balyh taihta ano pathlie haw ei ta.