1 Cha hawhna chata avâzy nata alei, a chhôh liata a ypa zydu chhaota paloh khaipa châ haw ta.
2 Chatawhcha noh sari noh liana cha Khazohpa ta hmotaopa cha pangoh ta; noh sarina noh liana chata a hmotaopa zydua tawhtapa a pahâsai haw ta.
3 Cha noh liana cha Khazohpa ta, a paysapa nata a taopa hmo hriana zydua tawhtapa a pahâsaipa vâta Khazohpa ta noh sari noh cha a chôta byhnâ aw ta, a pathaisa hra.
4 He he avâzy nata lei taopa ta ama y nota thâtih cha a châ. ABEIPA Khazohpa ta alei nata avâzy a tao nona khata,
5 si biepa rai alei liata a y leipa ta chicheipa rai chhao pyu hra vei, ABEIPA Khazohpa ta alei chô liata avâ a pasuasa leipa vâta nata, lei a palietuh awpa chyhsa rai chhao ama y leipa vâta;
6 anodeikuacha alei tawhta ameih vaw pua ta alei chô zydua cha a pahnasa tyh,
7 chatawhcha ABEIPA Khazohpa ta alei liata doh lei cha chapaw* tao ta, a ahnapasu liata hrona hu so thlu ta; chapaw cha chyhsa hropa vaw châ haw ta.
Idâh sahdô
8 ABEIPA Khazohpa ta nochhi lâta, Idâh liana chata sahdô tao ta; a chyhsa taopa cha cha liana chata paysa haw ta.
9 Chatawhcha ABEIPA Khazohpa ta alei tawhta palôh a la theipa nata niepa ta, phapa tho tozy cha papyusa haw ta, hrona tho chhao sahdô liahlia liata papyusa ta, chhie nata pha pahnona tho chhao.
10 Chatawhcha Idâh tawhta sahdô pahnasa nawpa ta chavah loh ta, cha tawhna chata pachiah ta, chavah mia palih vaw châ haw ta,
11 a miakhana cha Pisaw a châ; cha cha Havilah râh zydua a chadôtuhpa cha a châ, cha liana chata ngôh y ta;
12 cha râh liata ngôh cha a pha ngaitapa a châ; cha liana chata bedelium nata bery lô a y.
13 Chavah mianona moh cha, Kihaw a châ; cha tlai cha Kusa râh zydua a chadôtuhpa cha a châ.
14 Chavah miathôhna moh cha Hidekel châ ta, cha cha Asuria râh nochhi lâta a lohpa cha a châ. Chavah miapalihna cha Euphrate a châ.
15 ABEIPA Khazohpa chata chapaw cha a chhi ta, Idâh sahdô liana chata a hria awpa nata a vai awpa ta soh haw ta.
16 ABEIPA Khazohpa ta chapaw hnohna chata, “Sahdô liata tho to rai theizy he na khopa hawhta na nie thei na;
17 chhie nata pha pahnona tho thei deikua he na nie awpa rai châ vei, na nie khiahtala na nie noh tlaita na thi thlyu awpa a châ,” tahpa ta bie pie ta.
18 ABEIPA Khazohpa chata, “Chapaw ano deita ta a ypa he pha vei; ano a baotuh awpa a kaolâhpa, â khypa ei taopa aw,” tah ta.
19 ABEIPA Khazohpa chata alei tawhtapa sa tozy nata a ruapa liata pavaw to tao ta, ama moh bi awpa ta chapaw lâta a chhi ta; chatawhcha hmo hroh hneipa tozy cha chapaw ta ama moh a vaw bipa maih cha ama moh a vaw châ haw.
20 Chapaw chata sahroh zyduazy, a ruapa liata pavawzy, râhsa to rai zy cha a moh bi chyu ta; châhrasala chapaw châna chata a baotuh awpa a kaolâhpa, â khypa y leipa ta.
21 Chatanachata ABEIPA Khazohpa chata chapaw cha mokuh pahâh ngaitapa ta pamôsa ta, â mô chhôhna chata a kâru miakha la ta, cha vyuhpa cha a sapa ta pamai haw ta;
22 ABEIPA Khazohpa ta chapaw tawhta a lapa kâru cha chanô ta tao ta, chapaw lâta a chhi haw ta.
23 Chatawhcha chapaw chata,“A! he tlai he ei rupazy tawhta rupa nata Ei sapa tawhta sapa cha a châ;Chapaw tawhta lapa a châpa vâta Chanô tah awpa a châ”.tah ta.
24 Chavâta chapaw ta a nô nata a paw sieai aw ta, a lahpinô a patu aw; chatanachata pôhpa miakha ama vaw châ ha aw. 25 Chatawhcha chapaw nata a lahpinô cha, thluahruapa ta y ei ta, ama noza vei.