Adâh pathlazy (Tr. 1:1-4)
1 He he Adâh pathlazy rona châbu cha a châ. Khazohpa ta chyhsapa a tao nona khata, Khazohpa a lyupa ta ano cha tao ta.
2 Chapaw nata chanô ta âmo cha a tao, taopa ta ama y nona khata byhnâ aw pa ta ama mohta Chyhsa bi ta.
3 Adâh cha kô za kha nata sythôh a châ nahta, ano lyupa ta ano kakuapa tlaita sawchapawpa sa ta, a moh ta Setha bi ta.
4 Setha a sa tawhna chata Adâh cha kô za charie hroh ta; sawchapawzy nata sawchanôzy sa heih ta.
5 Adâh hro chhôh zydua cha kô za chaki nata sythôh châ ta; chatawhcha thi haw ta.
6 Setha cha kô za kha nata kô pangawh a châ nahta Enawsa sa ta.
7 Enawsa a sa tawhna chata Setha cha kô za charie nata kô sari hroh ta; sawchapawzy nata sawchanôzy sa heih ta.
8 Chatanachata Setha hro chhôh zydua cha kô za chaki nata hleino châ ta; chatawhcha thi haw ta.
9 Enawsa cha kô sychaki a châ nata Kenana sa ta.
10 Kenana a sa tawhna chata Enawsa cha kô za charie nata hleipangawh hroh ta; sawchapawzy nata sawchanôzy sa heih ta.
11 Chatanachata Enawsa hro chhôh zydua cha kô za chaki nata kô pangawh châ ta; chatawhcha thi haw ta.
12 Kenana cha kô sysari a châ nata, Mahalalel sa ta.
13 Mahalalel a sa tawhna chata, Kenana cha kô za charie nata sypalih hroh ta; sawchapawzy nata sawchanôzy sa heih ta.
14 Chatanachata Kenana hro chhôh zydua cha kô za chaki nata kô hrawh châ ta; chatawhcha thi haw ta.
15 Mahalalel cha kô sycharu nata kô pangawh a châ nata, Zare sa ta.
16 Zare a sa tawhna chata, Mahalalel cha kô za charie nata sythôh hroh ta; sawchapawzy nata sawchanôzy sa heih ta.
17 Chatanachata Mahalalel hro chhôh zydua cha kô za charie nata sychaki nata kô pangawh châ ta; chatawhcha thi haw ta.
18 Zare cha kô za kha nata sycharu nata kô no a châ nata, Enawka sa ta.
19 Enawka a sa tawhna chata, Zare cha kô za charie hroh ta; sawchapawzy nata sawchanôzy sa heih ta.
20 Chatanachata ano hro chhôh zydua cha kô za chaki nata sycharu nata kô no châ ta; chatawhcha thi haw ta.
21 Enawka cha kô sycharu nata kô pangawh a châ nata Methusela sa ta.
22 Methusela a sa tawhna chata, Enawka cha kô za thôh chhôh zydua Khazohpa nata charei khoh tyh ei ta; awchapawzy nata sawchanôzy sa heih ta.
23 Chatanachata Enawka hro chhôh zydua cha kô za thôh nata sycharu nata kô pangawh châ ta.
24 Enawka cha Khazohpa nata charei khoh tyh ei ta; hmôpa y khao leipa ta, Khazohpa ta a la hapa vâta.
25 Methusela cha kô za kha nata sycharie nata kô sari a châ nata, Lameka sa ta.
26 Lameka a sa tawhna chata, Methusela cha kô za sari nata sycharu nata kô no hroh ta; sawchapawzy nata sawchanôzy sa heih ta.
27 Chatanachata Methusela hro chhôh zydua cha kô za chaki nata sycharu nata kô chaki châ ta; chatawhcha thi haw ta.
28 Lameka cha kô za kha nata sycharie nata kô no a châ nata, sawchapawpa sa ta.
29 Chatawhcha, “ABEIPA chhiesapa alei vâta eima raihriana nata ku ta eima hriapasana liata he tlai heta thlah maniah a palôh ha aw,” tahpa ta a moh Naw bi ta.
30 Naw a sa tawhna chata Lameka cha kô za pangawh nata sychaki nata kô pangawh hroh ta; sawchapawzy nata sawchanôzy sa heih ta.
31 Chatanachata Lameka hro chhôh zydua cha kô za sari nata sysari nata kô sari châ ta; chatawhcha thi haw ta.
32 Naw cha kô za pangawhpa a châ nata, Sema nata Hama nata Zaphetha sa ta.