Chyhsapa paona
1 ABEIPA Khazohpa ta, râhsa a taopa zydua liana chata parih so chai ta. Ano chata chanô hnohna chata, “Khazohpa ta,”Sahdô liata tho theipa rai rai nama nie awpa châ vei a cha tah ei mâ?” tah ta.
2 Chatawhcha chanô chata parih hnohna chata, “Tah bao va, sahdô liata tho theipazy he eima nie thei mâ tâh;
3 châhrasala Khazohpa ta, ‘Sahdô liahlia liata tho a ypa thei deikua cha nama nie awpa châ vei, hria chhao nama hria awpa châ vei, chata leipa ta la nama thi aw,’ a tah,” tah ta.
4 Châhrasala parih chata chanô hnohna chata, “Thi tiarâh aw vei eichi.
5 Nama nie noh cheingei ta nama mo vaw pavâh aw ta, chhie nata pha pahnopa ta Khazohpa hawhta nama vaw châ aw tahpa a pahno ha cha zaw,” tah ta.
6 Chatanachata chanô chata tho theipa cha niepa châta a pha nata palôh la ngaitapa a châ tahpa nata sona hnei theina awpa tho thei hiatlia a chhih ngaitapa a châ tahpa a pahno nona chata, a theilâpa cha lyu ta nie ta; a vahpa pie hra ta; ano chhao cha nie haw hra ta.
7 Chatanachata ama pano ta ama mozy vaw pavâh haw ta, thluahruapa ama châpa a pahno haw ei ta; chatanachata theiku hnazy bieh ei ta, chysia a tao ei ta.
8 Chatawhcha ABEIPA Khazohpa cha sahdô liata zâlâ nohnai râhsâ ta a chareipa pyu cha thei ei ta, chatanachata chapaw nata a lahpinô chata sahdô liata tho hry liana chata ABEIPA Khazohpa cha a vaw nyu sai haw ei ta.
9 Châhrasala ABEIPA Khazohpa chata chapaw cha aw ta, a hnohta, “Khaitaihta e na y?” tah ta.
10 Chatawhcha ano chata, “Sahdô liata na pyu thei na ta, thluahruapa ta ypa ei châpa vâta chi na ta; ei nyu haw,” tah ta.
11 Ano chata, “Thluahruapa na châpa ahy e châ chho, tho thei nie lei awpa ei cha tahpa kha nie ha khiah chi?” tah ta.
12 Chapaw chata, “Na y lâh awpa ta chanô eina piepa chi tlai khata tho theipa cha na pie ta, ei nie haw,” tah ta.
13 Chatawhcha ABEIPA Khazohpa chata Chanô hnohta, “Na hmotaopa he kheihtazie ta e?” tah ta. Chanô chata, “Parih ta na dôvei ta ei nie haw,” tah ta.
14 ABEIPA Khazohpa chata parih hnohta,“He hawhta na tahpa vâta sahroh zydua nata râhsa to hry liana chata chhiesapa ta y pachaih aw chi ta; na py ta alyh aw chi ta, na hro chhôh zydua ta dohlei na nie hra aw.
15 Chatawhcha nâ nata chanô he cha padyusa aw ei na ta, na pathlazy nata a pathlazy chhao ei padyusa hra aw: cha chata na luh cha padôsa aw ta, nâ ta a phei ngavâh hmaothy thi na padôsa aw,”tah ta.
16 Chanô hnohna chata,“Na rietheina nata sawphaohna cha thata papôh aw na ta; riethei ngaitapa ta aw sa tyh aw chi ta, na khonazie cha na vahpa lâ châ aw ta, ano chata na chô liata bie a hnei tyh aw,”tah ta.
17 Chatawhcha chapaw hnohna chata,“Na lahpinô bie zyh chi ta, tho miakha a theilâpa ‘Na nie awpa châ vei’ tahpa ta bie ei cha piepa kha, a theilâpa na niepa vâta alei he nâma vâta chhiesapa ta a châ haw; na hro chhôhta hriapasa ngaitapa ta hriapa ta a theipa cha na nie aw;
18 a hlohzy nata diahsaizy chhao a chapapuapa aw; chatawhcha alei liata âhnalasi cha na nie aw.
19 Alei lâta na kua heih hlâ lei cha na hmia liata mathlai a loh ngâpa ta pati na hmô aw; alei tawhta lapa châ tlôh chi ta, dohlei châ chi ta, dohlei lâta na kua heih awpa a châ,”tah ta.
20 Chapaw chata a lahpinô cha chyhsa zydua nô a châpa vâta, a moh ta Ivy* bi ta.
21 ABEIPA Khazohpa chata chapaw châta nata a lahpinô châna chata savo viahpakao pasihpa taopa ta pakysa ta.
22 Chatawhcha ABEIPA Khazohpa chata, “Pachâ teh u, chapaw cha chhie nata pha pahnopa ta keimo hawhta a vaw châ haw; a ku ta hrona tho cha lyupa ta nie aw ta, chhâzaw ta a hroh pathlei aw na,” tah ta.
23 Chavâta ABEIPA Khazohpa ta ano a lanapa alei cha palie awpa ta Idâh sahdô tawhtapa cha papua haw ta.
24 Chapaw cha papua haw ta; chatawhcha hrona tho lâpi cha vaih awpa ta Idâh sahdô nochhi lâ chhâhta Cherubizy nata mei paleih zaozi â pahieh ngâpa cha paysa haw hra ta.