Athaona Bo 33
Zakaw nata Esaw amâ paryh
1 Chatawhcha Zakaw cha sai ta, Esaw cha a hnohta za palih chhaota a vypa hmô ta. Chatanachata a sawzy cha Liah hnohta zy, Rakheli hnohta zy, seichanô pano hnohta zy rai ta.
2 Chatawhcha seichanôzy nata ama sawzy cha a hmiatua chaipa ta soh ta, Liah nata a sawzy cha a pazipa ta soh ta, Rakheli nata Zawsi cha a hnôh chaipa ta soh ta.
3 Ano cha ama hmialâna chata sie ta, a uhta kô a tlô hlâna chata ei sari a bôhpa ta a naoh ta.
4 Esaw cha ano aly awpa ta a râ ta, a pyh ta, anâcha-i ta, sy ta: chatawhcha cha haw ei ta.
5 Chatawhcha Esaw cha vaw sai ta, chanôzy hawtizy cha hmô ta, “Nâ chhipazy hao ahyzy e ama châ?” tah ta. Zakaw chata, “Khazohpa ta ngiachhie ta na sei a pihpa hawtizy ama châ hao,” tah ta.
6 Chatanachata seichanô nata ama sawzy chhaota a vaw hnia ei ta, a bôh ei ta, a naoh ei ta;
7 Liah chhao a sawzy nah chata a vaw hnia ei ta, a bôh ei ta, a naoh hra ei ta; cha hnôlana chata Zawsi nata Rakheli cha avaw hnia ei ta, abô eita, anao hra ei ta.
8 Esaw chata, “Sahroh zaw ei tyhpa zydua kha kheihtazie ta e a châ?” tah ta. Zakaw chata, “Ei beipa ngiachhiena nâ tawhta ei hmô thei nawpa ta ei taopa a châ,” tah ta.
9 Esaw chata, “Kei chhaota, a daihpa ta ei hnei na, ei nawhta y, na hneipa zydua cha nâ eih châ mawh sy,” tah ta.
10 Zakaw chata, “Châ vei, na ngiachhiena ei hmô khiahtala, ngiachhiepa ta ei lyna, ei cha piepa kha na lapa mah y; Khazohpa hmia a hmôpa hawhta na hmia hmô na ta, ei chô liata aly tlôh chi ta.
11 Khazohpa ta ei hneipa vâna heta, ngiachhiepa ta ei hmo ei cha vaw piepa kha, a la mah y,” tah ta. Cha hawhna chata reipasao ta a la haw ta.
12 Chatawhcha Esaw chata, “A vy teh, sie ei si, hmia châ sahpa aw sa,” tah ta.
13 Châhrasala Zakaw chata a hnohta, “Hawtizy ama chyh nata mietahkupa zaw nata viahchao zaw ei hnohta a ypazy he, ama taw sâhpi a pazy haipa ama châ, ei beipa na pahno na; noh kha chhao ei pasiesa tu khiahtala sahroh zydua ama thi aw.
14 Ei beipa y, ngiachhiepa ta na sei hmialâna heta sie la, kei chata Seira tlâh taihta, ei beipa y, na hnohta ei tlô hlâ lei cha ei hmiakô liata sahroh a siepa he ama sie theipa rakha lymâ hawhta nata hawtizy sie theipa rakha lymâ hawhta, ei vaw deichhy lymâ aw na,” tah ta.
15 Chatawhcha Esaw chata, “Ei hnohta a ypa chyhsa thokhazy he cha siesai pa awh sa y,” tah ta. Ano chata, “Khazia maw? Ei beipa ngiachhiena na pahmôsa mah y,” tah ta.
16 Chatanachata Esaw cha, cha noh lilaw na chata Seira lâ pangaipa ta kua haw heih ta.
17 Zakaw cha Sukô lâta sie ta, ano châta o sa ta, a sahrohzy châta byureihzy sa hra ta; chavâta cha su cha Sukô ama bi haw.
18 Chatawhcha Zakaw cha Padanara tawhta a vypa cha thlahlôhpa ta Sekhe khih Kana râh liata a ypa châ tlôh ta; khihpi opâh liana chata a poh-o cha parai haw ta.
19 Chatawhcha a poh-o paraina su cha Sekhe paw Hamôra sawzy liata tâkâ za kha* ta chalei ta.
20 Cha liana chata maisâh tao ta, a moh ta El-Elôhe-Izarel* bi ta.