Athaona Bo 21
1 ABEIPA chata a rei hawpa hawhta Sara cha za tly ta, ABEIPA chata a bitai hawpa hawhta Sara chôta tao pa haw hra ta.
2 Chatanachata Sara cha saw phaoh ta. Khazohpa ta Abaraha hnohta a reipa daihti raopa liana tlai chata a pawpi tawhta sawchapawpa sa pâ ta.
3 Abaraha sawchapawpa Sara ta a sapa cha, a moh Aisika bi ta.
4 Chatawhcha Abaraha ta bie a piepa hawhna khata, a sawchapawpa Aisika cha noh charie a châ nahta a chopawtai pa ta.
5 Abaraha cha a sawchapawpa Aisika a sa nona chata kô za kha châ ta.
6 Chatawhcha Sara chata, “Khazohpa ta eina pahneisa haw; chyhsa to a theipa maih ta, eina pahneikhei aw ei,” tah ta.
7 Chatawhcha ano chata, “Sara ta hawsaih a pyh aw tahpa ahy e Abaraha hnohta reipa cha a pahno aw? A pawpi tawhna heta sawchapaw ei sapa haw hih,” tah ta.
Hakara nata Ishmael ama pasiesa haw
8 Chatawcha hawti cha vaw laiseih ta, sâhpi pabâsa haw ei ta; chatawhcha Aisika cha sâhpi ama pabâsa noh liana chata Abaraha ta kyhchhi rôhnah ngaitapa tao ta.
9 Izi chyhsa Hakara sawchapawpa Abaraha châta a sapa chata a pahneisao nota Sara ta hmô ta.
10 Cha vâna chata Abaraha hnohna chata, “He seichanô nata a sawchapawpa he papua teh; he seichanô sawchapawpa he ei sawchapawpa Aisika ryu a to lâhtuh awpa châ thei vei,” tah ta.
11 Cha bie cha a sawchapawpa vâta Abaraha pachâta cha hmo pha lei ngaitapa a châ.
12 Châhrasala Khazohpa ta Abaraha hnohna chata, “Hâti kyh nata na seichanô kyh he na pachânazie liata hmo pha lei ngaitapa châ kha se; Sara ta na hnohta bie a reipa zydua cha zyh teh, Aisika liana heta na pathlazy bipa châ tlôh aw ei ta.
13 Chatawhcha seichanô sawchapawpa chhao heta, na pathla a châpa vâta chi ta phopi tlaita ei tao aw,” tah ta.
14 Chatanachata Abaraha cha mydi ta thyu ta, viahchhâ nata titheih ti a biepa ta la ta, Hakara pie ta, a ngiatlâh liata khaipa ta, hawti chhao cha pasiesa haw ta. Chatanachata sie ta, Besheba râhpathohpa liana chata a khie ta.
15 Chatawhcha tithei liata ti cha y khao leipa ta, hawti cha chhobuh miakha ry liata soh thlâh ha ta.
16 “Hawti a thi awpa cha moh ngâh va na,” a tahpa vâta, lâ hlapi châtai ka pha theina rakha hawpa liata a dady liana chata a tyuh ta, hawti cha ao tlihli ta cha ta.
17 Chatawhcha Khazohpa ta hawti ao cha thei ta; Khazohpa vâlyuhchâpa ta vâ tawhta Hakara cha za aw ta, a hnohta, “Hakara y, khazia nâ tymâ? Chi khâ; hawti ao kha Khazohpa ta a thei mâh tâh.
18 Thyu la, hawti kha pathyu la, na ku ta patu teh; ano cha phopi rôhnah ngaitapa ta ei tao aw mâh tâh,” tah ta.
19 Chatawhcha Khazohpa ta a mo pavâhsa ta, tikhaohreipa hmô ta, vawh ta, titheih liata ti cha pabie ta, hawti cha padosa ta.
20 Khazohpa cha hawti hnona chata y tyh ta, vaw laiseih lymâ ta; râhpathohpa liata y tyh ta, châtai a ka thaipa vaw châ ta.
21 Paran râhpathohpa liata y ta; a nô chata Izi liatahpa lahpinô hiapa ta.
Abaraha nata Abimeleka biehraina
22 Cha nona chata Abimeleka nata a pheihsaih sahlao hyutuhpa Phikawl chata Abaraha hnohta, “Na hmo taopa maih liata Khazohpa na hnohta y lymâ ta;
23 atahmâ he liata Khazohpa moh reipa ta kei nata ei sawchapawpa nata ei sawchapawpa sawchapawpa chhao dôvei leipa ta, ei cha ngiachhie hawpa hawhna kha ta; kei nata na yna râh he ngiachhie pachhuah awpa ta ei hnohta chhie a sa teh, tahpa reih ta.
24 Chatawhcha Abaraha chata, “Chhie ei sa aw,” tah ta.
25 Abimeleka seizy ta tikhaohrei amâ chhupa vâna chata Abaraha ta Abimeleka cha chhorei ta.
26 Abimeleka chata, “Cha hmo a taotuhpa cha ahy maw? Pahno chacheita va na; nâ hra ta na chho tlôh lei khâh chi ta, atanoh dei leipa heta cha pahno va na,” tah ta.
27 Chatanachata Abaraha chata, mietahkupazy nata viahchao tôhpazy a chhi ta, Abimeleka pie ta, chatawhcha ama pano ta biehraina tao haw ei ta.
28 Abaraha ta a mietahkupa zaw hry liatahpa mietahkupa taw a chanôhpa pô sari a nano ta soh ta.
29 Abimeleka chata Abaraha hnohta, “Mietahkupa taw a chanôhpa pô sari a nano ta na sopa he kheihtazie ta a châ?” tah ta.
30 Ano chata, “He tikhaohrei he keima ta ei chao tahpa eina pahnokhei nawpa chi ta, he mietahkupa taw a chanôhpa pô sari he ei ku tawhta na la awpa a châ,” tah ta.
31 Chavâta cha su cha Besheba* bi ta; cha liana chata ama pano ta chhie amâ sa rairiehpa vâta.
32 Chatanachata Besheba liana chata bie hraih haw ei ta: chatawhcha Abimeleka cha thyu ta, a pheisaih sahlao hyutuhpa Phikawl chhaota Philistina râh lâna chata kua haw ei ta.
33 Abaraha chata Besheba liana chata meisa tho loh ta, cha liana chata ABEIPA, Chhâzaw Khazohpa moh cha pado ta.
34 Chatanachata Abaraha cha Philistina râh liana chata bohpi y ta.