Zawsi nata Pawtipha lahpinô
1 Chatawhcha Zawsi cha Izi râh lâta a chhi ei ta, Phirao ry liata hyutuhpa pakha, vaihtuhpa py hyutuhpa Izi chyhsa Pawtipha chata, cha râh liata a zâ chhituhpa Ishmael sahlao ku tawhtapa cha chalei ta.
2 ABEIPA cha Zawsi hnohta y ta, chatanachata ano cha chyhsa vâhnei ngaitapa ta; a zibeipa Izi chyhsa o liana chata y ta.
3 Chatawhcha a zibeipa chata, ABEIPA ta a ku liata hlao patlohsa tahpa vaw pahno haw ta.
4 Zawsi chata a zibeipa mohmô ta ngiachhiena hmô ta, chakao tyh ta, chatawhcha ano chata a chhôhkhazy chô liana chata hyutuhpa ta tao ta, a hneipa zydua a ku liata soh khai ha ta.
5 A o liana chata hyutuhpa ta tao ta, a hneipa zydua chô liata hyutuhpa ta a tao rakha tawhna chata, Zawsi vâta ABEIPA chata Izi chyhsa chhôhkhazy cha byhnâ pie ta, O lâ nata râh lâta a hneipa zydua cha, ABEIPA ta byhnâ pie tyh ta.
6 Chatanachata a hneipa zydua cha, Zawsi ku liata khâchâ soh ta; a hnohta hmo a ypa rai cha pahnokhei leipa ta ano niepa deita leipa ta cha pahno vei. Chatawhcha Zawsi cha chyhsa chhithai kawpa châ ta, a hmi chhao pha kaw ta.
7 Chatawhcha a zibeipa lahpinô chata Zawsi cha aohraohpa ta moh ta. “Nâ ziakhei teh,” tah ta.
8 Ano deikua chata khoh leipa ta, a zibeipa lahpinô hnohna chata, “Ei zibeipa chata he o liana heta ei hnohta khâpa ma a y tahpa pahno tlôh leipa ta, a hneipa zydua ei ku liana heta soh khai ta;
9 he o liana heta kei hlâta a lai viapa ahyhmah y leipa ei ta; a lahpinô na châpa vâta nâma deita leipa ta cha, kei liata khâpahmah a pasaih leipa hnei hra vei; kheihta e, he moleina lai ngaitapa he taopa ta Khazohpa chô liata hmo ei parao thei aw?” tah ta.
10 Chatawhcha noh chareih ta Zawsi cha bie chho tyh hrasala ano a ziakheina kyh tlyma, ano hnohta yna kyh tlyma, a pyh khoh leipa ta.
11 Châhrasala noh kha cha a rai cha hria awpa ta ochhôh lâ a kei ngia ta, cha liana chata ama o a hâpa rai ahyhmah y leipa ei ta,
12 ano chata, “Nâ ziakhei teh,” tahpa ta a chysia patu ta, ano chata a chysia cha a ku liata siesaipa ta, a râsai ta, pua syulyu haw ta.
13 Chatawhcha a chysia cha a ku liata siesaipa ta, â râ haw tahpa a pahnopa ta nahta,
14 a o hâpazy cha aw ta, ama hnohta, “Moh teh u, maoh na paphyu awpa ta Hebrai chyhsa pakha ei vahpa ta a hnei haw hi, nâ ziakhei a chhuahpa ta ei hnohta a vaw ngia ta, chatanachata ao paro ngaitapa ta ei awh haw;
15 ao paro ngaitapa ta ei awh tahpa a theipa ta nahta, ei kiahpâh liata a chysia he a râsaipa ta a pua syulyu haw,” tah ta.
16 Chatawhcha Zawsi zibeipa a vaw di hlâ lei cha, a chysia cha a kiahpâh liata soh thlâh ha ta.
17 Chatawhcha a hnohta, he hawhpa bie he vaw reih ta, “Hebrai sei eima hnohta nâ vaw chhipa kha, na pamaohphyu a chhuahpa ta, ei hnohta a vaw ngia ta, ao paropa ta ei awh pata nahta ei kiahpâh liata a chysia he siesaipa ta â râ haw, tah ta.
19 Chatawhcha Zawsi zibeipa chata, a lahpinô ta a hnohta, “Na sei heta, he tana heta eina tah,” tahpa ta a bie reipa cha a thei nahta, a pathi-ia ngaita ta.
20 Chatanachata Zawsi zibeipa chata, ano cha a chhi ta, atâhna o abeipa chyhsa âtâhpa chahrypa ta ama yna liana chata, khô haw ta, cha atâhna o liana chata y haw ta.
21 Châhrasala ABEIPA cha Zawsi hnohta y lymâ ta, a chô liata a ngiachhiena pahmôsa ta, atâhna o vaihtuhpa chhao pangiachhiesa ta.
22 Chatanachata atâhna o vaihtuhpa chata, atâhna o liata atâhpa sahlao a ypa zydua cha, Zawsi ku liata pavaosa khai ta; ama taopa maih cha Zawsi cha a taotuhpa châ lymâ ta.
23 ABEIPA cha Zawsi hnohta y ta, a hmo taopa maih cha ABEIPA chata a pahlaotlohsa tyhpa vâta, atâhna o vaihtuhpa chata, a ku liata hmo a ypa maih cha, moh khao leipa ta.