Tipa-ua tlôna
1 Chatawhcha ABEIPA ta Naw hnohta, “Nâ nata na sanawh zydua cha, balyh liata a ngia teh u, nâ cha he chhâ liana heta ei mohmô ta chyhsa sia ngaitapa na châ tahpa ei cha pahno.
2 Sa pathaihpa hry tawhta a chapawhpa nata a chanôhpa bao ari la la, a pathaih leipa hry tawhta a chapawpa nata a chanôhpa bao kha la teh;
3 a ruapa liata a zawpa pavaw hry tawhta cha a chapawpa nata a chanôhpa bao sari la la, alei chô zydua liata chi a pathla awpa ta pahro awpa ta na hnohta nâ chhi awpa a châ.
4 Noh sari tawhta cha hnôh lâna chata alei chô liana heta noh sypalih nata zâ sypalih chhôh avâ pasuasa aw na ta; hmo hroh a hneipa ei taopa to aleicho tawhtapa ei pahleipadia aw,” tah ta.
5 Chatanachata Naw chata ABEIPA ta a hnohta bie a piepa zydua hawhna chata tao ta.
6 Alei chô liata tipa-ua a vaw tlô nona khata, Naw cha kô za charupa châ ta.
7 Chatawhcha tipa-ua a vaw tlô awpa vâna chata Naw cha balyh liata a ngia ta, a sawchapawpazy, a lahpinô nata a awchapawzy lahpinôzy chhao a hnohta a ngia hra ei ta.
8 Khazohpa ta Naw hnohta bie a piepa hawhna khata sa pathaihpa hry tawhtapa chhao, sa pathaih leipa hry tawhtapa chhao, pavaw hry tawhtapa chhao, alei liata alyh thaipa to hry tawhtapa chhao,
9 a chapawhpa nata a chanôhpa chyu, a bao lymâ ta Naw hnohta balyh liata a ngia haw ei ta.
10 Chatawhcha noh sari tawhna chata alei liana cha ta tipa-ua cha vaw tlô ta.
11 Naw cha kô za charu a châ kô, a thla nona, noh hrawhleisari noh liata, cha noh liana tlai chata ti a thu ngaitapa hnawh zydua cha rao khai haw ta, avâ opyzy chhao a pahy haw hra ta.
12 Chatawhcha noh sypalih nata zâ sypalih chhôh zydua cha alei liana heta avâ thata suah ta.
13 Cha noh liana tlai chata Naw nata a sawchapawpa Sema zy, Hama zy, Zaphetha zy nata Naw lahpinô nata a sawchapawzy lahpinô pathôh chhao ama hnohta a ngia hra ei ta.
14 âmo sahlao cha a ngia ei ta, sa to âmo chi yzie hawh chyu ta, sahroh zydua âmo chi yzie hawh chyu ta, alei liata alyh thaipa to, âmo chi yzie hawh chyu ta, pavaw to âmo chi yzie hawh chyu ta nata pavaw chi to cha a ngia hra ei ta.
15 Chatanachata sapa to hrona hu a hneipa maih cha a bao saita Naw hnohta balyh liana chata a ngia haw ei ta.
16 Chatawhcha a ngiapazy cha Khazohpa ta Naw hnohta bie a piepa hawhta, sapa zydua hry tawhta a chapawpa nata a chanôhpa lymâ ta angia ei ta, chatawhcha ABEIPA ta ano cha khawhlô haw ta.
17 Noh sypalih chhôh zydua alei liana heta tipa-ua tlô ta, ti cha lai via rili ngâ ta, balyh cha chalo ta, ti chô liata papho ha ta.
18 Ti cha lai lymâ ta alei chô liana heta a kaw sâh via lymâ ta; baly cha ti cho liana cha apho lyma ta.
19 Chatawhcha alei chô liana heta ti cha thata vaw lai haw ta, avâ ry liata tlâh sâhpa zydua cha vao khai haw ta;
20 dy hrawhleipangawh ta tlai a sâhpa ta ti ta tlâhzy cha vao haw ta.
21 Chyhsapa to chhaota thi khai haw ei ta;
22 ama hnapasu liata hrona husona a hneipa maih, râh liata a ypa maih cha thi khai haw hra ei ta.
23 Alei chô liata hmo hroh a hneipazy, avâ liata a zawpa pavawzy chhaota pahleipadiapa ta y ei ta, alei tawta pahleipadiapa ta ama y haw, Naw nata balyh liata a hnohta a ypazy deita cha pahlôpa ta ama châ.
24 Chatawhcha ti cha noh za kha nata noh sypangawh chhôh zydua alei liana heta lai via lymâ ta.