Chopawtaina he biehraihna ngiana a châ
1 Abara cha kô sychaki nata kô chaki a châ nahta ABEIPA chata Abara hnohta a vaw luah ta, a hnohta, “Kei Khazohpa Atotaotheipa ei châ; ei hmiakô liata y la, pha pakipa ta y teh.
2 Chatanachata nâma nata keima likawh ta biehraihna tao aw na ta, thata ei cha papôh aw,” tah ta.
3 Chatawhcha Abara cha â khu lâta pao ta; Khazohpa ta ano hnohta bie reih ta.
4 “Pachâ teh, ei biehrai cha na hnohta ei hraih, chatanachata phopi hluhpi pathlatuhpa na châ ha aw.
5 Na moh chhao Abara châ khao leipa aw ta, na moh cha Abaraha tlao a châ ha aw; phopi pathlatuh awpa ta ei cha tao haw hih.
6 Chi thata cha pathlasa aw na ta, nâma liana cha phopizy tao aw nata; nama tawhna chata abeizy ama vaw pua hra aw.
7 Chatawhcha kei nata nâ nata na hnôh lâta na pathlazy ama pathla pachhuahzy taih chhaota ei biehrai he, na châta na hnôh lâta na pathlazy châta ama Khazohpa châ awpa ta chhâzaw biehrai châta ei pa-i aw.
8 Chatawhcha na hnohta nata na hnôh lâta na pathlazy hnohna chata, khichhai na châna râh Kana râh zydua he chhâzaw hneina châta ei cha pie aw ei; kei he ama Khazohpa ei châ aw,” tah ta.
9 Khazohpa ta Abaraha hnohna chata, “Chatawhla nâ la, ei biehrai he nâ pyh awpa a châ, nâ nata na hnôh lâta na pathlazy ama pathla pachhuahpazy taih chhaota amâ pyh awpa châ.
10 He he kei nata nâ nata na hnôh lâta na pathlazy likawhta, ei biehraina pyh awpa a châ; nama hryta chapaw maihta cha chopaw ama tai awpa a châ.
11 Nama sapa vo liana chata chopaw taipa ta nama y awpa a châ, cha cha nâma nata kei likawh ta biehrai pahnona a châ aw.
12 Nama hry liata noh chariepa a châ nata na pathlapachhuahzy taih chhaota na pathla a châ cheingei leipa chhao na o liata a pihpa tlyma, khichhaipa tawhta tâkâ sôh ta chaleipa tlyma; chapaw maih cha chopawtai awpa a châ,
13 na o liata a pihpa nata na tâkâ sôh ta na chaleipa chhao cha chopaw tai thlyu awpa a châ. Chatanachata ei biehrai cha chhâzaw biehrai châta nama sapa liata a y ha aw.
14 Chapaw chopawtai leipa a sapa liata chopaw taipa ta a y leipa cha, cha chyhsa cha a chieheih hry tawhta pahleipadiapa a châ aw; ano chata ei biehrai cha a parao,” tah ta.
15 Chatawhcha Khazohpa ta Abaraha hnohta, “Na lahpinô Sarai cha a moh Sarai tah khao leipa aw chi ta, Sara tlao a châ ha aw.
16 Ano chôta byhnâ aw aw na ta, cha leipa chhao cha ano liana chata sawchapaw ei cha pie aw; ano cha byhnâ pie aw na ta, phopizy pathlatuhpa a châ ha aw; chi hluhpi abeizy ano tawhna chata ama vaw pua aw,” tah ta.
17 Chatawhcha Abaraha cha â khu lâta pao ta pahneih ta, anosasyh ta, “Kô za khapa chyhsa heta ma saw a hnei aw? Sara kô sychakipa chyhsa chata saw a sa aw mâ?” tah ta.
18 Chatawhcha Abaraha chata Khazohpa hnohta, “Ishmael he na hmiakô liata y thei tlai sala aw! tah ta.
19 Khazohpa ta, “Châ bao vâ, na lahpinô Sara ta sawchapaw tlao a cha sapa aw, a moh cha Aisika na bi awpa a châ. Ei biehrai cha ano hnôh lâta a pathlazy châta chhâzaw biehrai châta ano hnohna chata ei pa-i aw.
20 Ishmael kyh chhao he ei cha nahthlie pa; pachâ teh, ano cha byhnâ pie na ta, chi hluhpi pathlasa aw nata thata ei papôh hra aw; ano chata abei pahrawhleino sa aw ta, ano cha phopi rôhnah ngaitapa ta ei tao aw.
21 Ei biehrai deikua Aisika, Sara ta hâkô he daihti liata a cha sapa awpa hnohna chata tlao ei pa-i aw,” tah ta.
22 Chatanachata a hnohta a bie reipa cha bâh ta, Khazohpa ta Abaraha cha khysai haw ta.
23 Abaraha chata a sawchapawpa Ishmael nata a o liata a pihpa zydua nata a tâkâ sôh ta a chaleipa zydua Abaraha chhôhkhazy hry liatahpa chapaw maih cha a chhi ta, Khazohpa ta a hnohta a rei hawpa hawhta cha noh liana chata ama sapa chopaw vo cha taipa khai haw ta.
24 Abaraha cha a sapa liata chopaw vo ama tai nona chata kô sychaki nata kô chakipa a châ.
25 Chatawhcha a sawchapawpa Ishmael cha a sapa liata chopaw ama tai nona chata kô hrawhleithôhpa châ ta.
26 Cha noh liana tlai chata Abaraha nata a sawchapawpa Ishmael cha chopawtaipa vaw châ haw ei ta;
27 a chhôhkha hry liata chapaw zydua, a o liata a pihpa nata khichhaipa tawhta tâkâ sôh ta a chaleipazy cha ano hnohna chata chopawtaipa vaw châ khai haw ei ta.