Athaona Bo 22
Abaraha cha Aisika hlâ awpa ta biepiepa a châ
1 Cha hmozy hnôh lâna chata Khazohpa ta Abaraha pasia ta, a hnohta, “Abaraha!” tah ta. Ano chata, “He liata ei y,” tah ta.
2 Ano chata, “Na sawchapawpa, na sawchapaw matlupa, a kyh na pachâ ngaitapa, Aisika tlai kha a chhi la, Môria râh lâna chata sie la, cha liana chata ei cha chho awpa tlâh miakha liana chata raopa hlâna ta hlâ teh,” tah ta.
3 Chatawhcha Abaraha cha mydi ta thyu ta, ano alâ a chhuahnoh ta, a hnohta a sei satliapa pano a chhi ta, a sawchapawpa Aisika chhaota, chatawhcha raopa hlâna châta tho patlaw ta, thyu ta, Khazohpa ta a chhona lâta sie haw ta.
4 Noh thôh noh liana chata Abaraha cha mohmia pasaih ta, a su cha lâ hlapi ta hmô ta.
5 Chatanachata Abaraha ta a sei satliapazy hnohna chata, “He liata alâ chhaota vaw y teh u; kei nata hawtipa he hao liana haota vawh aw pi ta, Khazohpa a kei chhy aw pi ta, nâmo lâ eima vaw kua heih aw,” tah ta.
6 Chatawhcha Abaraha chata raopa hlâna tho cha la ta, a sawchapawpa Aisika cha papiasa ta; ano chata mei nata chaizôh chaba ta. Chatanachata ama pano ta hmaohkha ta sie lymâ haw ei ta.
7 Aisika chata a paw Abaraha cha bie a chho ta, “Ei pâ” tah ta. Ano chata, “Ei sawchapawpa, he liata ei y,” tah ta. Ano chata, “Moh tua, mei nata tho y ta; châhrasala raopa hlâna châta mietahkupa taw cha khataih liata a y?” tah ta.
8 Abaraha chata, “Ei sawchapawpa y, Khazohpa ta ano châta raopa hlâna awpa mietahkupa taw cha pachâ chhy lah vâ,” tah ta. Chatanachata ama pano ta hmaohkha ta sie lymâ haw ei ta.
9 Chatawhcha Khazohpa ta a chhopa su cha kei tlô haw ei ta, Abaraha chata cha liana chata maisâh tao ta, thochâh pacho ta, a sawchapawpa Aisika cha chahry ta, maisâh tho chô liana chata paziasa ta.
10 Chatawhcha Abaraha ta a ku ta paza ta, a sawchapawpa thie nawpa ta chaizôh cha la ta.
11 Châhrasala ABEIPA vâlyuhchâpa chata avâ tawhta ano cha za aw ta, “Abaraha, Abaraha y!” za tah ta. Ano chata, “He liata ei y,” tah ta.
12 Ano chata, “Hawti chô liata na ku pathla khâ, ano kha kheihtahmah tao khâ; na sawchapawpa, na sawchapawpa hnei chhôhpa tlai chhao eina pie awpa chita na thlyu leipa vâta, Khazohpa na chi tahpa atahmâ ei pahno haw,” tah ta.
13 Chatawhcha Abaraha cha mohmia pasaih ta, moh ta, a hnôh lâna chata mietahkupa tôhpa a ki tho liata khâchâ a taw hawpa y ta; chatanachata Abaraha chata mietahkupa tôhpa cha patu ta, cha chata a sawchapawpa vyuhpa ta raopa hlâna ta tlao hlâ ta.
14 Chatanachata Abaraha ta cha su moh cha ABEIPA ta a pachâ aw, tahpa ta bi ta; atanoh taihta, “ABEIPA tlâh liata pachâpa châ la vâ,” ama tah tyhpa hawhna heta.
15 Chatawhcha ABEIPA vâlyuhchâpa ta a ei nona ta avâ tawhta Abaraha cha za aw heih ta.
16 “He hmo he na tao hawpa vâta nata, na sawchapawpa, na sawchapaw na hnei chhôhpa tlai chhao na thlyu leipa vâta,
17 byhnâ cha aw pa tlai aw na ta, avâ liata awhsi zie nata tilaipi kiah liata leisadi zie ta na pathlazy cha ei papôh tlai aw. Na pathlazy chata amâ dyuhpazy kuh ochhi cha ama lapa aw tahpa nata,
18 ei bie nâ ngiah hawpa vâta na pathla liana chata khizaw liata pho to ama hu â hie aw tahpa, keimasasyh a reipa ta chhie ei sa haw, ABEIPA ta a tah,” za tah ta.
19 Chatanachata Abaraha cha a satliazy lâna chata kua heih ta; thyu ei ta, Besheba lâna chata sie haw ei ta; chatawhcha Abaraha cha Besheba liata pahrâ thlâh ha ta.
Nahaw pathlazy
20 Cha hmozy hnôh lâna chata chyhsa ta Abaraha hnohta, “Milka chhao khata na nawhta Nahaw cha sawzy a sa pa haw,” tahpa ta chho ei ta;
21 a saw tuapa cha Uza châ ta, a nawhta cha Buza châ ta, Kemuel, Arama paw chhao.
22 Kese zy, Hazô zy, Pilda zy, Zidla zy, Bethuel zy chhao châ ei ta.
23 Bethuel chata sawchanô Rebeka sa ta, cha pachariezy cha Milka chata Abaraha nawhta Nahaw cha sa pa ta.
24 A nôtho a moh Reuma chhaota Teba zy, Kahama zy, Tahasa zy, Maakah zy sa hra ta.