Athaona Bo 31
Zakaw ta Laba tawhta â râ
1 Chatawhcha Zakaw chata Laba sawchapawpazy ta, “Zakaw ta eima paw eih zydua cha lapa khai ha ta; eima paw liatahpa na, he rôhnahna zydua he a hmô,” ama tahpa bie cha vaw pahno haw ta,
2 Zakaw ta Laba hmia moh ta, hmia lâ tahpa hawhta a chô liata aly khao vei tahpa, pahno ta.
3 Chatawhcha ABEIPA chata Zakaw hnohta, “Na mahpawzy râh liata nata na chiheihzy hnohta kua heih ta, na hnohta ei y lymâ aw na,” tah ta.
4 Chatawhcha Zakaw chata, chyhsa tuah ta, lyurâhpa liata a sahroh zaw yna liana chata Rakheli nata Liah cha aw ta,
5 Ama hnohta, “Nama paw hmia ei hmôpa ta hmia lâtahpa hawhta ei chô liata aly khao vei tahpa pahno na ta. Châhrasala ei paw Khazohpa cha ei hnohta a y thlâh haw.
6 Nâmo chhaota nama paw ei chakaona zie he ei tao theipa hawhta ei chakao tyh tahpa pahno ei chi ta;
7 châhrasala nama paw ta na dô ta, ei hlao he, ei hrawh tlai na pananopa haw ta, châhrasala Khazohpa ta pasa eina pie awpa pasaih vei.
8 A râhpa ta a chapaipazy cha na hlao a châ aw,’ a tah nata, sahroh zydua chata a râhpa ta a chapaipazy ta sa tyh ei ta; chatawhcha ‘A râhpa ta a chei a rohpazy cha na hlao a châ aw,’ a tah nahta sahroh zydua chata a râhpa ta a chei a rohpa sa tyh ei ta.
9 Cha hawhna chata Khazohpa ta nama paw sahrohzy cha lapa ta, keima eina piepa a châ hih.
10 Sahrohzy cha ama vô nah chata, ei mâsana liana chata vaw hmô na ta, a chapawhpa sahroh a paw kiapazy cha, a râhpa ta a chei a rohpazy, a râhpa ta a chapaipazy nata a chapai charupazy ama châpa ta ei hmô.
11 Chatawhcha ei mâsana liana chata, Khazohpa vâlyuhchâpa ta, ‘Zakaw,’ na vaw tah ta, keima ta, ‘He liana heta ei y!” tah na ta.
12 Ano chata, ‘Sai la, moh teh, a chapawhpa, sahroh paw a kiapa zydua hao, a râhpa ta a chei a râhpazy, a râhpa ta a chapaipazy nata chapaicharupazy ama châ huh: Laba ta na chô liata hmo a taopa zydua he ei hmô mâh tâ.
13 Kei he lôbona sathaw na thupa, kei liata bie nâ tahnapa Bethel Khazohpa cha ei châ. Atahmâ thyu la, he râh tawhtapa he pua la, na pina râh liana chata kua heih bâ teh,’ a tah,” tah ta.
14 Chatawhcha Rakheli nata Liah chata a chhy ei ta a hnohta, “Eima paw o liana chata eima châta tovyuh nata ryutona rai a y aw tlyma?
15 Ano ta khichhaipa hawh deitata maniah pachâ thlâh ha vei mâ? Maniah zuah ta, eima mâ chhao nie khai ha tlôh ta.
16 Khazohpa ta eima paw tawhta sôh a lapa zydua cha, keimo nata eima sawzy eih a châ hih; chatanachata Khazohpa ta na hnohta a reipa maih cha, tao teh,” tah ei ta.
17 Chatanachata Zakaw cha thyu ta, a sawchapawpazy nata a lahpinôzy cha, râraoseihpa chô liata pakiasa ta;
18 Kana râh liata a paw Aisika hnohta sie awpa ta a ahroh zydua nata a sôh zydua a pahmaopa zydua cha Padanara liata a sahroh a hmôpa zydua cha siekhei khai ha ta.
19 Laba cha mietahkupa hmi ngyu awpa ta sie ha ta, Rakheli chata a paw khazoh nohthlahpa cha paru pa haw ta.
20 Zakaw cha Suria chyhsa Laba pahno leipa ta a ru lâta sie ha ta, a râ awpa cha chho leipa ta.
21 A hneipa zydua chhao chata a râ haw ta, chatawhcha thyu ta, Euphrate cha chaka haw ta, Kilia tlâh lâna cha a heihpa ta pangai lymâ ta.
Laba ta Zakaw â chadai
22 Chatawhcha a noh thôhnapa noh liana chata, Zakaw â râ haw tahpa Laba cha chho ei ta.
23 A uhnawhzy a chhi ta noh sari chhôh a chadai ta; Kilia tlâh liana chata pha haw ta.
24 Suria chyhsa Laba hnohna chata zâ ta, a mâsana liata Khazohpa a vaw luah ta, a hnohta, “Zakaw hnohta a pha tlyma, chhie tlyma khâpa rai reih lei awpa ta a chado teh,” tah ta.
25 Chatawhcha Laba chata Zakaw pha haw ta. Zakaw chata a poh-o cha tlâh liata vaw parai ha ta, chatawhcha Laba chhao ta, a uhnawhzy chhao ta, Kilia tlâh liata parai haw hra ei ta.
26 Chatawhcha Laba chata Zakaw hnohta, “Na hmo taopa he, kheihta zie ma a châ tly, ei pahno leipa ta, a ru lâta sie chi ta, zaozi ta seizy amâ chhipa hawh tlaita ei sawchanôzy nâ chhipa he?
27 Khâpa vâta e, a ru lâta a râpa ta na siesai chi ta, thaphanazy, hlazy, khohzy, totâzy chhaota ei cha pathlie awpa ta na chho leipa chi ta?
28 Tusawzy nata ei sawchanôzy, ei sy awpa ta na pasai vei? Hru ngaitapa ta hmo na tao haw hih.
29 Cha parao thei awpa ma-â ei châ tâh; châhrasala na paw Khazohpa chata zâhia zâna khata, ‘Zakaw hnohta a pha nata a chhie khâpa hmâh rei lei awpa ta, a chado teh,’ tahpa ta eina chho.
30 Chatawhcha na paw o na vâ ngâsâ kawpa vâta, sie khoh kaw hra la, khâpavâta e, khazoh nohthlahpazy eina parupa chi?” tah ta.
31 Zakaw chata a chhy ta, Laba hnohta, “Ei chipa vâta na a châ, na sawchanôzy he na chhu pathlei la chi, ei tahpa vâta a châ.
32 Ahyrai na khazoh nohthlahpazy na hmôna su cha hroh aw veih ei. Eima uhnawhpazy mohmô liana heta nâma eih keima liata a ypa cha a siapa ta moh la, la châ chi,” tah ta. Rakheli ta a vaw paru tahpa Zakaw ta pahno tlôh leipa ta.
33 Chatawhcha Laba cha Zakaw poh-o liata zy, Liah poh-o liata zy, a ngia lymâ ta, châhrasala hmô leipa ta. Liah poh-o tawhtapa cha pua ta, Rakheli poh-o liana chata a ngia heih ta.
34 Chatawhcha Rakheli chata khazoh nohthlahpazy cha vaw la ha ta, a râraoseihpa chhaichhi hry liata vaw soh ta, a vaw tyuhnie ha ta. Laba chata a poh-o chhôh zydua cha hrao khai ha ta, châhrasala hmô leipa ta.
35 Chatawhcha ano chata a paw hnohta, “Na hmiakô liata ei thyu thei leipa vâna heta, ei beipa na pathi-ia kha se, chanô yzie tyhpa hawhna cha ei chô liata a y nota châ tlôh ta,” tah ta. Chatanachata tlua laih lymâ ta, châhrasala a khazoh nohthlahpazy cha hmô thei leipa ta.
36 Chatawhcha Zakaw cha a pathi-ia ha ta. Laba cha ra ta, Zakaw chata Laba hnohta, “Khâpa ei parao? Khâpa e, ei moleina, thata eina vaw chadai chi?
37 Ei hmo zydua na hrao khai hapa chhaota, na ochhôh hmo rai khâpa e na hmô? Keimo pano he, maniah ama pachâ thei awpa ta keima sanawhzy nata na sanawhzy hmiakô liana heta soh teh.
38 He kô syno lai na hnohta y haw na ta; na mietahkupa panôzy nata na mie panôzy chata ama tawzy hrie beih leipa ei ta, na mietahkupa zaw hry liata a chapawhpazy chhao nie beih tlôh leipa na ta.
39 Sahrâhpa ta a taipazy chhao, na hnohta vaw cheih beih hra va na; kei ta tlao tlua tyh na ta; nohchhô ta a parupa tlyma, zâlâ ta a parupa tlyma ei cha thô awpa ta nâ hnaw tyh.
40 He hawhna heta ei y tyh; nohchhô nohsa nata zâ chasina rietheipa ta y tyh na ta, a mô chhao a mô tyh leipa na ta.
41 Cha kô syno chhôh zydua cha, na o liata y na ta; sawchanôzy panopa hlao awpa ta kô hrawhleipalih cha chakao na ta, na sahrohzy hlao awpa ta kô charu cha chakao heih na ta, ei hlao hra cha, ei hrawh tlai panano tlôh chi ta.
42 Ei pâ Khazohpa, Abaraha Khazohpa nata Aisika Chipa cha keima hnohta a y leipa chhochhi châ sala, atahmâ chhao he, a ruapa tlaita eina pakuasa thlyu chi he, Khazohpa ta ei rietheinazie nata ei ku hria pasanazie cha hmô ta, zâhnia zâna chata a cha chhorei chu,” tah ta.
Zakaw nata Laba likawhta pazaona
43 Laba chata a chhy ta, Zakaw hnohta, “Sawchanôzy he keima sawchanôzy châ ei ta, hawtipazy he keima hawtizy châ ei ta, sahrohzy he keima sahrohzy châ ei ta, na hmôpa zydua keima eih sai ama châ. Atanoh he, he ei sawchanôzy chô liata nata ama saw sapazy chô liana heta, khâpa e, ei tao thei aw tly?
44 A vy tua, keima nata nâma liana heta, bie hrai tua si; cha cha keima nata nâma likawh liana chata pahno nawpa ta châ se,” tah ta.
45 Chatanachata Zakaw chata alô la ta, lôbô châta bô ha ta.
46 Zakaw ta a sanawhzy hnohta, “Alô pakhy teh u,” tah ta. Chatawhcha alô la ei ta, pahmaoh ei ta; ama pahmaohna kiapâh liana chata pati nie ei ta.
47 Laba chata cha alô a pahmaohpa cha Zeka-sahadutha* bi ta; Zakaw deikua chata Kali* bi ta.
48 Laba chata, “He alô pahmaohpa he, atanoh keima nata nâma likawh pahnona a châ hih,” tah ta. Chavâta a moh ta Kali bipa a châ haw.
49 Mizpah# bipa châ hra ta, Laba ta, “A chhaihpa ta eima y tita ABEIPA chata maniah vaih veichâh mawh sy.
50 Ei awchanôzy he riepatheipa ta, ei sawchanô leipazy he lahpinô hropazy na hnei khiahta cha, ahyhmah ta eima hnohta ama y lei tarawpa ta, moh teh, Khazohpa cha kei nata nâma likawh liata a pahnotuhpa a châ,” tah tlôh ta.
51 Chatawhcha Laba chata Zakaw hnohta, “He alô pahmaohpa he moh la, keima nata nâma likawh ta, he alô ei bôpa chhao he, moh tua.
52 Paraona tao awpa ta, keima ta, he alô pahmaohpa he, khôpa ta nâma lâta a vy aw va na, tahpa nata nâma chhaota he alô pahmaohpa nata he alô bôpa he khôpa ta keima lâta a vy aw va chi tahpa he alô pahmaohpa he pahnona châ sala, he alô bôpa chhao he pahnona châ hra mawh sy.
53 Abaraha Khazohpa, Nahaw Khazohpa, ama paw Khazohpa chata eima likawh liata bie pachia mawh sy,” tah heih ta. Zakaw chata a paw Aisika Chipa cha reipa ta chhiesa haw ta,
54 Zakaw chata tlâh liana cha atheihna hlâ ta, a sanawhzy cha viahchhâ nie awpa ta aw ta; chatanachata viahchhâ nie ei ta, tlâh liana chata a rie haw ei ta.
55 Chatawhcha mydi ta, Laba cha thyu ta, a tupapazy nata a sawchanôzy cha sy ta, byhnâ aw ta; chatawhcha Laba cha sie ta, ano yna lâta a lie haw ta.