Phirao mâsapa Zawsi ta a chhopasia
1 Kô no tawhna chata Phirao chata mâ sa ta, Nile kiah liana heta â vaw duah.
2 Viahchao panô pô sari a mi ngaitapa, a thawh ngaitapa he ti tawhna chata kaw pu ta, liaryh hry liana heta alao bâ ta.
3 Chatawhcha viahchao panô hropa pô sari, a mih leipa, a zaohkariepa he, ti tawhna chata ama hnôh lâta vaw pua heih ei ta, viahchao panô a hropazy kiahpâh liata chavah kiah liana chata a vaw duah chyu ei ta.
4 Chatawhcha viahchao panô a mih leipa, a zaohkariepa chata viahchao panô a mih ngaitapa a thawh ngaitapa cha nie khai ha ei ta. Chatanachata Phirao cha a vaw hra ta.
5 Chatawhcha a mô heih ta, mâ sa heih ta; sâh kô kha liana heta a suh miasari a lai ngaitapa a pha ngaitapa he vaw pua ei ta.
6 Cha hnôh lâna chata suh miasari a chawhpa nochhi thlih ta a chhei chahriepazy he vaw pua heih ta.
7 Chatawhcha a su chawhpazy chata su sari a lai ngaitapa nata a pata ngaitapazy cha palâ khai haw ei ta. Chatawhcha Phirao cha a vaw hra ta, mâ sapa vaw châ ta.
8 Chatawhcha a mylâ myta a palôhrupa cha a nôpo kaw ta; chatanachata chyhsa tuah ta, Izi râh liata molie a thaipa zydua nata chyhsa sopa zydua cha aw ta; chatawhcha Phirao chata a mâ cha âmo chho chyu ta, châhrasala Phirao a chhopasia theipa ahyhmah y tlôh leipa ei ta.
9 Cha nona chata kresawti a pietuhpa hyutuh chaipa chata Phirao hnohta, “Atanoh liana heta ei moleina ziezy ei vaw pahno haw.
10 Phirao a seizy chô liata a pathi-ia ta, chatanachata vaihtuhpa py hyutuhpa o liana chata kei nata viahchhâ a taotuhpa hyutuh chaipa cha maniah patâh ta.
11 Kei nata ano chata zâ zâ kha ta mâ sa pi ta, mâ yzie nanopa rairieh eima sa.
12 Cha liana chata vaihtuhpa py hyutuhpa sei Behrai satlia pakha y ta; ano cha chho pi ta, ano chata eima mâ sapazy cha maniah chho pasia ta, eima mâ yzie lymâ hawhta maniah a chhopasia rairieh.
13 Maniah a chhopasia pa hawh tlaita a vaw châ haw, kei cha ei raihria he na pahriasa heih ta, ano cha a bangie haw,” tah ta.
14 Chatanachata Phirao chata Zawsi cha thlai pa-awsa ta, a chatliepa ta patâhna tawhna chata a vaw chhi ei ta; ano cha a kâhmi a siapa ta a ngyu ta, a chysia a patly ta, Phirao lâta a vaw ngia ta.
15 Phirao chata Zawsi hnohta, “Mâ sa na ta, a chhopasia theipa ahyhmah y leipa ei ta; nâ ta mâsapa he a bie na pahno khiahtala na chhopasia thei tahpa, na thâtih he chyhsa reipa vaw pahno na ta,” tah ta.
16 Zawsi chata phirao cha a chhy ta, “Cha cha keima liata a ypa châ vei; Khazohpa ta Phirao cha thlahlôhchhi ngaitapa ta tlao a chhy aw,” tah ta.
17 Phirao chata Zawsi hnohta, “Ei mâ lâna chata, chavah kiah liana heta a duah na ta;
18 viahchao panô pô sari a thawh ngaitapa, a mih ngaitapa he, ti tawhna chata kaw pua ei ta, liahryh hry liana heta bâ ei ta.
19 Chatawhcha viahchao panô hropa pô sari a pua lei ngaitapa, a dao hrihrupa, a zaohkariepa, cha hawhpa rai ta a chhiepa Izi râh liata chhao ei hmô beih leipa he, ama hnôh lâta kaw pua heih ei ta.
20 Viahchao panô pô sari a thawh ngaitapa a vaw pua tuapazy cha nie khai haw ei ta.
21 A nie khai tawhna chhao chata, ama nie tahpa a hno hlei vei, a hmialâ hawhna hra khata a dao kachao ha ei ta. Chatanachata a vaw hra haw na ta.
22 Ei mâ lâna chata sâh kô kha liata su sari a lai ngaitapa, a pata ngaitapa he vaw pua ta;
23 cha hnôh lâna chata su sari a chawhpa a su chhie kawpa, nochhi thlih chheichahriepazy he vaw pua heih ei ta,
24 a su chhiepazy chata su sari a pha ngaitapazy cha ama palâ khai hawpa ta hmô na ta. Chatawhcha molie a thaipa sahlaozy cha chho na ta, châhrasala na chhopasia theipa ahyhmah y tlôh leipa ei ta,” tahpa ta reih ta.
25 Zawsi chata Phirao hnohta, “Phirao mâ sapa he su kha a châ; Khazohpa ta a hmo tao daihmâpa cha, Phirao a pahnosapa a châ chu.
26 Viahchao pô sari a pha ngaitapazy cha, kô sari châ ei ta, su sari a pha ngaitapazy cha kô sari châ hra ei ta, mâsapa cha su kha a châ.
27 Ama hnôh lâta viahchao pô sari zaohkariepa, a daohriehrupa a kaw puapazy cha, kô sari châ ei ta, su sari a chawhpa sai, nochhi thlih chhei chahriepazy chhao chata, chazy cha chakâh kô, kô sari awpa a châ.
28 Cha cha na a châ, Phirao hnohta ei reipa kha, Khazohpa ta a hmo tao daihmâpa cha Phirao a pahnosapa a châ hih.
29 Izi râh zydua chhôh zydua liana heta, kô veih ngaitana kô, kô sari a vaw tlô aw.
30 Cha hnôh lâna chata chakâh kô, kô sari a vaw y heih aw, chatanachata kô veina zydua kha Izi râh liana heta, my khaipa ta a châ aw; chakâhna chata lyurâh he a nie khai aw.
31 Hneirôhna kha a zi tuhpa hluhpa vâna chata, he râh liana heta pahno khao aw veih ei, thata châ tlôh aw ta.
32 Chatawhcha mâsapa Phirao ei no a pasasa chaneina cha, he vâna heta a châ, hmo tao awpa cha Khazohpa ta pa-i ta, Khazohpa ta a patlôsa patoh awpa vâta.
33 Chavâta atahmâ he Phirao chata chyhsa pakha a so ngaitapa tlua sala, Izi râh chô liana heta hyutuhpa ta paysa mawh sy.
34 Phirao ta cha cha tao sala, chatawhcha râh chô liana heta hyutuhpazy rao sala, kô veih kô, kô sari chhôh chata, Izi râh sâh he su pangawh pachhaih ta su kha lymâ khei mawh sy.
35 Chatanachata âmo chata cha kô pha kô a vaw tlô awpa sâh zydua cha pakhypa ta Phirao ry liata a y awpa ta khihzy liata nie awpa ta sâh pahmaohpakhy sala, liahsa a vao mawh sy.
36 Chakâhna vâta râh he a leidia lei nawpa ta sâh cha chakâh kô, kô sari Izi râh liata a vaw tlô awpa châta he râh châna heta a pachyh awpa a châ aw,” tah ta.
Izi chô liata Zawsi ryu a reituhpa ta taona
37 Cha bie cha Phirao nata a sei zydua chata, pha ama tah zie châ ngaita ta.
38 Phirao chata a seizy hnohta, “He hawhta Khazohpa thlahpa yna chyhsa he, eima hmô thei aw mâ?” tah ta.
39 Phirao chata Zawsi hnohta, “Khazohpa ta cha zydua cha pahnosapa vâta, nâ hawhta a sopa rai he y veih ei.
40 Nâ he ei chhôhkhazy chô liata hyutuhpa ta y aw chi ta, ei khihnarâh zydua he na bie lymâ hawhta ama y aw; abeidyuchhai liata atyuna kyh liana deita heta nâ hlâta ei bei via aw,” tah ta.
41 Chatawhcha Phirao chata Zawsi hnohta, Izi râh zydua chô liana heta hyutuhpa ta ei cha tao,” tah ta.
42 Phirao ta a ku tawhtapa a moh chahnaona kusadi cha pahluh ta, Zawsi ku liata pakysa ta, a rao liata ngôh bâlia pa-aosa ta.
43 A talaili hneipa mianona liana chata pakiasa ta; a hmiakô liana chata, “Pakhu paneih teh u!” tahpa ta awh lymâ ei ta. Chatawhcha Izi râh zydua chô liana chata hyutuhpa ta tao haw ta.
44 Phirao chata Zawsi hnohta, “Kei ei châ, nama bie leipa ta cha, Izi râh chhôh zydua liana heta ahyhmah ta ama ku tlyma, ama phei tlyma, papie aw veih ei,” tah ta.
45 Phirao ta Zawsi moh ta, Zaphenapania bi ta; Ôna khih theihthaipa Pawtipha sawchanônô Asena lahpinô ta pahneisa ta. Chatawhcha Zawsi cha pua ta, Izi râh chahryh haw ta.
46 Zawsi cha Izi râh beipa hmiakô liata a duah nona chata kô sythôhpa châ ta. Zawsi cha Phirao tawhtapa pua ta, Izi râh zydua cha chahry khai ta.
47 Chatawhcha kô pha kô, kô sari chhôh chata, alei chata a hlao ngaitapa ta sa papua tyh ta.
48 Izi râh liata kô pha kô, kô sari a vaw tlôpa sâh zydua cha pakhy ta, sâh cha khihzy liana chata pahmaohpakhy ta; khi to liata a chheipâh lyu liata sâh pahmaopakhy lymâ ta.
49 Chatanachata Zawsi chata sâh cha a hluh ngaitapa ta tilaipi liata dohlei zie ta pahmaohpakhy ta, reihtiah leina taihta, reitiahpa châ khao tlôh lei khâh ta.
50 Chakâhna a vaw tlô hlâna chata Zawsi ta sawchapaw pano sa ta, chazy cha Ôna theihthaipa Pawtipha sawchanônô Asena chata sapa ta.
51 Zawsi ta a saw hmiatuapa moh cha Manase bi ta, “Khazohpa ta ei hriapasana zydua nata ei paw chhôhkhapa zydua cha na pamysa haw tlôh ta,” tah ta.
52 A saw panona moh châta Ephrai bi ta, “Khazohpa ta ei riethei taona râh liana heta chi na pathlasa haw tlôh ta,” tah ta.
53 Kô pha kô, kô sari Izi liata a vaw tlô awpa cha vaw tlô khai haw ta.
54 Chakâh kô, kô sari awpa cha Zawsi reipa hawh tlaita, vaw tlô pathao haw ta. Râh to liata chakâhna vaw y ta; Izi râh chhôh zydua liana deikua chata niepa y ta.
55 Izi râh liatahpa zydua cha ama chakâh pata nahta Phirao hnohta niepa hiapa ta awh ei ta, chatawhcha Phirao chata Izi chyhsa zydua hnohna chata, “Zawsi lâta vawh ula; a cha chhopa maih tao teh u,” tah ta.
56 Chatawhcha chakâhna cha alei chô zydua liana chata vaw y ta, chatanachata Zawsi chata pachô pakhyna o zydua cha pahy ta, Izi chyhsazy hnohna chata zuah ta, Izi râh liana chata chakâhna thata y ta.
57 Chatawhcha alei chô zydua, chakâhna thata a ypa vâta râh to chyhsazy cha sâh chalei awpa ta Izi râh liata Zawsi lâna chata a vy ei ta.