Athaona Bo 10
Naw sawchapawpa pathlazy
1 Hezy he Naw sawchapawpenaw Sema nata Hama nata Zaphetha chhâzy cha a châ; tipa-ua hnôh lâna chata sawchapawpazy sa chyu ei ta.
2 Zaphetha sawchapawpazy cha : Kôma zy, Medai zy, Zavana zy, Tubal zy, Meseka zy, Tira zy ama châ.
3 Kôma sawchapawpazy cha : Askenaza zy, Ripha zy, Tôkama zy ama châ.
4 Zavana sawchapawpazy cha : Elishah zy, Tasi zy, Kiti zy, Dôdani zy ama châ.
5 He sahlaozy tawhna heta phophizy liahpahlô lâna cha amâ râ chyu ta ama pai haw, ama reizie lymâ hawhta nata ama pho yzie hawhta amo chizy hry liana chata.
6 Hama sawchapawpazy cha : Kusa zy, Mizrai zy, Pu zy, Kana zy ama châ.
7 Kusa sawchapawpazy cha : Keba zy, Havila zy, Sabatah zy, Raam zy, Sateka zy ama châ. Raama sawchapawpazy cha : Sheba nata Dedana ama châ.
8 Kusa chata Nimraw sa ta, ano cha alei liata chyhsa thatlô ngaitapa vaw châ tua haw ta.
9 “ABEIPA hmiakô liana chata râhkhiepa thatlô ngaitapa Nimraw hawhta a châ,” ama tah tyh.
10 Ano khihnarâh a thaona cha Shinara râh liata Babel khih zy, Ereka khih zy, Akada khih zy ama châ.
11 Cha râh tawhna chata pua ta Asuria râh liata a ngia ta, Niniva khih zy, Rehôbô khih zy, Kalah khih zy,
12 Niniva nata Kalah khih likawhta Rese khih y ta, cha khih cha khih rôhnah ngaitapa a châ.
13 Mizrai chata Ludi mozy, Anama mozy, Lehabi mozy, Naphatu mozy,
14 Parusi mozy, Kaluhi mo (Philistina puana) zy, Kafataw mozy pathla ta.
15 Kana chata a saw tuapa ta Sidawna sa ta, Hetha chhao sa hra ta,
16 Zebu mozy, Amawri mozy, Kikasi mozy nata,
17 Hivi mozy, pathla ta. Cha tawhna chata Kana mozy cha vaw pai patla haw ei ta.
19 Chatawhcha Kana mozy râhri cha Sidawna khih tawhta Kera lâchhâ ta Kaza khih taihta Sawdawma nata Kawmawra nata Adamah nata Zebô khih lachhah ta Lasa khi taita a châ.
20 Hezy he Hama sawchapawzy ama châ, ama chhôhkha lymâ hawhta, ama reihzy nata ama râhzy chyu liata nata ama phozy liana chhao chata.
21 Sema, Ebera saw zydua a pathlatuhpa, Zaphetha uhtapa chhao chata, sawzy vaw sa ta.
22 Sema sawchapawpazy cha : Elama zy, Ashura zy, Arapasa zy, Luda zy, Arama zy châ ei ta.
23 Arama sawchapawpazy cha : Uza zy, Hula zy, Kethy zy, Masa zy châ ei ta.
24 Arapasa chata Shela sa ta, Shela chata Ebera sa ta.
25 Ebera chata sawchapaw pano sa ta : pakhapa moh cha Peleka châ ta, a hro chhôhta alei he pachhaihpa ta châ tlôh ta, chatawhcha a uhnawhpa moh cha Zawkata bi ta.
26 Zawkata chata sawchapawpa, Almôda zy, Selepha zy, Hazamave zy, Zerah zy,
27 Hadawra zy, Uzala zy, Diklah zy,
28 Ôbala zy, Abimael zy, Sheba zy,
29 Ôphira zy, Havilah zy, Zôbaba zy sa ta; he zydua he Zawkata sawchapawpazy ama châ.
30 Ama pahrâna cha Mesa tawhta nochhi lâ tlâh Sephara lâ heihpa ta a châ.
31 Hezy he Sema sawchapawpazy ama châ, ama chhôhkha lymâ hawhta, ama reihzy nata ama râhzy chyu liata nata ama phozy liana chhao chata.