Khizaw nata chysa taona
1 Athaona liata Khazohpa ta alei nata avâ tao ta.
2 Alei he yzie hnei leipa ta a ruapa ta y thlâh ha ta, ti a thu ngaitapa chô cha zohkaluh thlâh ha ta; Khazohpa chata ti chôzy liana cha a pasi ngâthlâh ta.
3 Khazohpa ta, “Khaihna vaw y se,” tah ta; khaihna vaw y ta.
4 Chatawhcha Khazohpa ta khaihna cha moh ta, a pha kawpa ta pahno ta; Khazohpa ta khaihna nata zohna cha pachhaih ta.
5 Khazohpa ta khaihna cha Chhô bi ta, noh khana cha.
6 Chatawhcha Khazohpa ta, “Ti nata ti likawh liana chata a ruapa kawh ngaitapa y sala, cha chata ti nata tizy cha pachhaih mawh sy,” tah ta.
7 Chatanachata Khazohpa ta a ruapa kawh ngaitapa cha tao ta, a ruapa kawh ngaitapa ry liata ti a ypazy nata a ruapa kawh ngaitapa chôta ti a ypazy cha pachhaih haw ta. Cha hawhna chata vaw châ haw ta.
8 Chatawhcha Khazohpa ta a ruapa kawh ngaitapa cha Avâ bi ta. Chatanachata zâlâ y ta, my y hra ta, a noh nona cha.
9 Chatawhcha Khazohpa ta, “Avâ ry liata tizy cha su kha ta a pahmaoh sala, lyurâhpa cha a lâ mawh sy,” tah ta. Cha hawhna chata vaw châ haw ta.
10 Khazohpa ta lyurâhpa cha Alei bi ta, ti a pahmaohpazy cha Tilaipi bi ta. Chatawhcha Khazohpa ta cha cha moh ta, a pha kawpa ta pahno ta.
11 Khazohpa ta, “Alei ta sipopazy, chicheipa a chi a hneipazy, theilâpa kô alei liata âmo chi yzie awpa hawhta a patheipa, a theilâpa chhôh liata a chi a ypzy cha papua mawh sy,” tah ta. Cha hawhna chata vaw châ haw ta.
12 Alei chata sipopazy, chicheipa âmo chi yzie awpa hawhta chi a hneipazy, tho âmo chi yzie awpa hawhta a patheipa a theilâpa chhôh liata a chi a ypazy cha papua ta. Chatawhcha Khazohpa ta moh ta, a pha kawpa ta pahno ta.
13 Chatanachata zâlâ y ta, my y hra ta, a noh thôhna cha.
14 Chatawhcha Khazohpa ta, “Chhô nata zâ pachhaihna awpa ta avâ a ruapa kawh ngaitapa liata a khaihtuhpa y sala; chazy cha ngiana zy, daihti zy, noh zy, kô zy, pahnona awpa châ mawh sy,
15 alei chô a khaih awpa ta avâ aruapa kawh ngaitapa liana chata a khaihtuhpazy y hra mawh sy,” tah ta.
16 Chatanachata Khazohpa ta a khaihpa rôhnah ngaitapa mianozy khi tao haw ta, khaihna rôhnah viapa cha chhô ryurei awpa ta, khaihna chyh viapa cha zâ ryu a reih awpa ta tao ta; awhsizy chhao tao hra ta.
17 Chatawhcha Khazohpa ta chazy cha alei chô liata a khaih awpa nata,
18 chhô chôta nata zâ chôta ryu a reih awpa nata, khaihna nata zohna pachhaih awpa ta avâ ruapa kawh ngaitapa liana khita paysa ta.
19 Khazohpa ta cha cha moh ta, a pha kawpa ta pahno ta. Chatanachata zâlâ y ta, my y hra ta, a noh palihna cha.
20 Chatawhcha Khazohpa ta, “Tizy chata hmo hroh hneipa â pie theipa hrona a hneipazy a hluhpi papua sala, pavawzy chhao avâ a ruapa kawh ngaitapa liata a zawpa ta alei chô liata a zaw mawh sy,” tah ta.
21 Chatanachata Khazohpa ta tilaipi hmo rôhnahpa lai ngaitapazy cha tao ta, hmo hroh hneipa â pie theipa to, ti ta a papuapazy cha âmo chi yzie awpa hawh chyu ta tao hra ta. Pavaw mathlaw a hneipa to chhao, amo chi yzie awpa hawh chyu ta tao hrata. Khazohpa ta cha cha moh ta, a pha kawpa ta pahno ta.
22 Chatawhcha Khazohpa ta, “Chi hluhpi pathlapa ta pôh ula, tilaipi tizy bie teh u, pavawzy chhao alei liata pôh mawh sy,” tahpa ta byhnâ aw ta.
23 Chatanachata zâlâ y ta, my y hra ta, a noh pangawhna cha.
24 Khazohpa ta, “Alei chata hmo hroh hneipa âmo chi yzie awpa hawh chyu ta, sahrohzy, alyh theipazy, lyurâhpa sazy, âmo chi yzie awpa hawh chyu ta papua mawh sy,” tah ta. Cha hawhna cha vaw châ haw ta.
25 Chatanachata Khazohpa ta lyurâhpa sa âmo chi yzie awpa hawh chyu ta, sahrohzy âmo chi yzie awpa hawh chyu ta alei liata alyhpa maih, âmo chi yzie awpa hawh chyu ta tao ta. Khazohpa ta cha cha moh ta, a pha kawpa ta pahno ta.
26 Chatanachata Khazohpa ta, “Keimo kakuapa ta, keimo hawh tlaita chyhsapa tao ei sihla; âmo cha tilaipi liata nga chô liata zy, a zawpa pavaw chô liata zy, sahroh chô liata zy, alei chô liata zy, alei liata alyh thaipa zydua chô liata zy bie pahneisa ei suh u,” tah ta.
27 Chatanachata Khazohpa ta ano alyupa ta chyhsapa tao ta, Khazohpa kakuapa ta chyhsapa tao ta, Khazohpa kakuapa tlaita taopa a châ; chapaw nata chanô ta a tao.
28 Chatawhcha Khazohpa ta âmo byhnâ pie ta, Khazohpa chata ama hnohta, “Chi hluhpi pathlapa ta pôhpa ta, aleilô he bie ula, nama reisai ta paysa teh u; tilaipi liata a pie thaipa zydua chô liata zy biehnei hra teh u,” tah ta.
29 Chatawhcha Khazohpa ta, “Pachâ teh u, alei chô zydua liata chicheipa chi a hneipa to nata tho to, tho chi a hneipa theilâpa ynazy cha ei pie ei; nama niepa châta a châ aw.
30 Chatawhcha alei liata sa to hnohta zy, a zawpa pavaw to hnohta zy, hmo to alei liata alyh thaipa, hrona a hneipa to hnohta zy, ama niepa châta sipopa hrohpa to ei pie,” tah ta. Cha hawhna chata vaw châ haw ta.
31 Chatawhcha Khazohpa ta a hmo taopa to cha moh ta, a pha kawpa ta pahno ta. Chatanachata zâlâ y ta, my y hra ta, a noh charuna cha.